Nitre kristiano kena käkwe kukwe kwin Gobran Ngöbökwe yebätä driebare kä bäri mente känti. Medente niaratre rabadre kukwe driere yekäre Jesukwe niaratre jie ngwani. Arato jondron ñan tuabare yebiti niaratre tötikani kwe ne kwe kukwe metre ye driedre kwetre nitre nämene blite ño ye kukweibiti. Jehovakwe ja di biani ietre aune kä jürä ñaka namani bätätre ja tuakäre niaratre rüe rakadrekä yebe.

Jehová käikitadrekä ye Jesús mikani tuare apóstol Juan ie. Aune Gobran Ngöbökwe kä kwinbiti käkwe Satana ganaindi ño ye bämikani kwe aune Satana ñaka rabaira jire ye mikani tuare kwe Juan ie arato. Jesús rabadi Reire aune nitre 144,000 käkwe gobrandi ben ye tuani Juankwe. Kä tibien  jökrä rabai kwitani bä nuäre aune nitre jökrä rabai Jehová mike täte töi jämebiti aune keteitibe ye tuani kwe arato.