Jesús nikaninta kä kwinbiti ye köböi nikani köbö jätä ta. Angwane nitre ja tötikaka Jesube yekwe üai deme namani. Fiesta Pentecostés kä 33 ye näire aune nitre kä jene jene känti nükani ye nämene Jerusalén fiesta ye käi ngwankäre juto jabätä. Nitre 120 ja tötikaka Jesube ye käkwe ja ükaninkrö cuartote kwin, batibe jondron ñan tuabare namani bare. Nitre ja tötikaka ye itire itire dokwäbiti ñukwä jutra ye kwrere namani aune niaratre jökrä namani blite kukwe jene jenebiti. Ne madakäre, kä ngö juruabare kri krubäte ju yekänti.

Nitre juta mada mada te käkwe nänbare Jerusalén yei kä ngö kri krubäte ye juruabare aune nikanintre betekä ju ye kokwäre dre namani bare ye mikakäre gare jai. Nitre ja tötikaka nämene blite kukwe jene jenebiti ye kukwe nuani kwetre angwane, niaratre töi namani ñan krütare. Namanintre niere: ‘Nitre ne abokän nünanka Galilea bä amarebiti, ¿niaratre tä blite ni kukweibiti ye?’.

Angwane, Pedro aune nitre apóstol mada ye nükani krö nitre ye jökrä ngwärekri. Pedro mikani gare ietre: ‘Munkwe Jesús murie ketani, akwa  Jehovakwe ganinkröta. Aune matare Jesús tä kä kwinbiti Ngöbö kise ruinkri. Aune üai deme käbämikani kwe nunye ye erere bini kwe nunye. Ye medenbätä, jondron ñan tuabare ne kukwe nuri munkwe aune jutuani munye’.

Nitre töi namani ñan krütare. Pedro kukwe niebare ye matani niaratre brukwäte yebätä ngwantaribare kwetre: ‘¿Nunkwe dre nuaindre?’. Niara käkwe niebare ietre: ‘Munkwe ja mikani ngite yebätä ja töi kwite aune munkwe ja ngöka ñöte Jesús käbiti. Ye bitikäre üai deme ye rabai munkwe arato’. Köbö ye ngwane nitre 3,000 ja ngökani ñöte. Yete ja känenkäre, nitre ja tötikaka namani bäri kwati krubäte Jerusalén. Üai deme ye köböire nitre apóstol käkwe konkrekasion mada mada ükaninte käbiti tibien. Ye köböire Jesús kukwe jökrä nuain manabare ietre ye namani driere nitre ja tötikaka yei.