Jehovakwe Abrahán aune Isaac kriemikani ye erere, Jacob kriemikai kwe ye käbämikani kwe ie. Jacob namani nüne kä kädeka nämene Harán yekänti. Kä yekänti ja mäkäninte kwe, ngäbriänkätre namani kwati krubäte aune namani jondron bökäne krubäte.

Kä nikani kwati krubäte ta, ye bitikäre Jehovakwe niebare Jacob ie: ‘Nänta mä rün aune mä meye käi yekänti’. Aisete, Jacob aune mräkätre kwe nikani kä mente ye kokwäre. Nämene ji ngrabare ye ngwane, nitre sribikä kwe ye ruäre ngätäni ben käkwe niebare ie: ‘Mä eteba Esaú tä näin nitre 400 ben ni ngäbiti’. Nane Esaú kukwe tare nuaindre Jacob aune mräkätre kwe yebätä ye jürä namanibätä. Ye medenbätä, orabare kwe Jehovai: ‘Mä raba ti mike kwäre ti eteba yebätä’. Jetebe se kwrere, Jacob jondron juani Esaú kräke: oveja, cabra, nibi, camello aune burro juani kabre kwe ie.

Köbö yete deu Jacob namani kaibe ye ngwane ángel tuani kwe. Ángel ye namani ja di nuin ben. Ja di nuani kwetre nememe dekä. Jacob nuainbare tare akwa ñaka ja ngwani di nekä kwe. Ángel niebare ie: ‘Ti tuenmetre nikenta’. Akwa Jacob niebare ie: ‘Ñakare, mäkwe kukwe kwin mikai nemen bare ti kräke ye ngwane batibe’.

Mrä mada, ángel kukwe kwin mikani nemen bare Jacob kräke. Jehovakwe ñaka Esaú tuainmetre kukwe tare nuainne Jacob yebätä ye namani gare ie.

 Köbö yete dekä Esaú aune nitre 400 ye jutuabare menteni Jacob ie. Jacob nikani mräkätre kwe ye känenkri ja tuakäre Esaú ben aune namani yete ngwane namani ngukodokwäbiti bä kükü ngwärekri. Esaú nikani betekä Jacob kokwäre aune kise kitani ngärä kwe. Niaratre nibu ye namani ja muaire aune ja mäkäninta kwetre jabe. Jacob kukwe nuainbare ye namani tuin ño Jehovai, ¿raba ruin mäi?

Kukwe namani bare ye bitikäre, Esaú nikaninta ja gwirete aune Jacob nikani jankunu ja käne. Jacob ngäbriänkätre nämene 12: Rubén, Simeón, Leví, Judá, Dan, Neftalí, Gad, Aser, Isacar, Zabulón, José aune Benjamín. Kä nikani ta angwane, Jehovakwe juta kwe mikani kwäre José ye köböire, niara ye Jacob ngobo arato. ¿Nuainbare ño kwe ye mä törba mikai gare jai? Ani mike ñärärä.