José nämene ngite angwane, faraón ni gobranka kä Egipto yekänti käkwe köböbare, akwa ni ñaka namani jire iti kukwe ye mikakäre gare ie. Angwane ni iti sribikä faraón kräke käkwe niebare ie José raba kukwe ye mike gare. Ye medenbätä, jötrö ngwarbe José jänjatadre faraón känti ribebare kwe.

Faraón ngwantaribare ie: ‘¿Tikwe köböbare ye tä dre mike gare ye mä raba mike gare tie?’. José niebare ie: ‘Kä Egipto nete mrö rabai krubäte kä kwä kükü te aune ye bitikäre kä kwä kükü te mrö nikai krubäte. Mäkwe ni töbätä känä ne kwe rabadre mrö ükökrö aune nitre ñaka krütadre mrö miare’. Faraón niebare ie: ‘¡Tibike mä ara mike! Mä rabai ni nibukäre bäri ütiäte kä Egipto nekänti’. Akwa, faraón köböbare ye dre gärä nämene, ¿ye ñokänti namani gare José ie? Jehovakwe niara dimikani yebätä.

Kä kwä kükü te Josekwe mrö ükaninkrö. Ye bitikäre, mrö nika namani kä jökräbiti tibien, niebare kwe ye erere aune nitre kä jökräbiti tibien namani nüke mrö kökö jai. Jacob niara rün yei namani gare kä Egipto yekänti mrö nämene, ye medenbätä ngäbriänkätre ni jätä juani kwe kä yekänti mrö kökö arato.

Jacob ngäbriänkätre nikani José känti aune niaratre nükani gare bengwairebe ie. Akwa etebatre yei niara ñaka nükaninta gare. José nämene bati ye ngwane köböbare kwe ye erere namani bare, etebatre ye namani ngukodokwäbiti niara ngwärekri. José tö namani gai niaratre brukwä nämene kräke o ñakare yebätä niebare kwe ietre: ‘Mun ye kä tuabitikä aune juta nunkwe ne tä dite o ñakare ye mun tö mikai gare jai yekäre munta nete’. Niaratre niebare: ‘¡Nun ñaka kä tuabitikä! Nun nünanka kä Canaán yekänti. Nun nämene 12 jai, akwa nun eteba iti krütani aune bäri köre tä gwi nun  rünbe’. José niebare ietre: ‘Mun jata mun eteba köre ye ngwena nete aune ti mun kukwei mikai era jai’. Niaratre nikaninta rün känti.

Bobukäre Jacob mräkätre yekwe mrö ñaka namani yebätä niarakwe ngäbriänkätre ye juaninta kä Egipto yekänti. Ye ngwane eteba köre Benjamín ye jänikani kwetre jabe. Etebatre kwe ye töi gakäre, copa sribebare ngwiane nämene Josekwe ye ükani kwe sako te Benjamín nämene mrö ngwen yete aune biti jondron ye goibare kwetre niebare kwe bätätre. Nitre sribikä Josebe yei copa ye kwani sako Benjaminkwe yete angwane, etebatre ye töi namani ñan krütare. Niaratre mikadre ja ngie nuin akwa ñaka Benjamín mikadre ja ngie nuin ribebare kwetre José ie.

Ye köböire namani gare José ie etebatre yekwe ja töi kwitabarera. Kä ñaka nükani José ie, namani muen aune niebare kwe: ‘Ti abokän José, mun eteba. ¿Ti rün tä nire ya?’. Niara etebatre ye töi namani niä. José niebare ietre: ‘Munkwe dre nuainbare tibätä, yebätä ja ñaka raba ruin ngite munye. Ngöbö jatani ti ngwena nete ne kwe mun rabadrete nire. Akwa, ¡jötrö ngwarbe! Mun jata ti rün ngwena nete’.

José etebatre nikaninta rün känti kukwe kwin ye mikakäre gare ie aune jatanintre ngwena kä Egipto yete. Kä nikani kwati krubäte ta ye bitikäre, José aune rün namaninta keteitibe.