Ja känenkäre, nitre Israel käkwe Jehová tuanimetre aune namanintre ngöbö keta kabre ngwarbe mike täte. Kä kwä kükü te, nitre Madián nämene jondron nire goire nitre Israel kän aune nämenentre nüra ngwä juen ngwarbe niaratre kän arato. Ja kriemikakäre, nitre Israel nämene ja üke kämäkäte aune kä tokwäte. Mrä mada, niaratre ja di ribebare Jehovai ne kwe niaratre mikadre kwäre kwe. Aisete Jehovakwe ángel juani monso bati kädeka nämene Gedeón yekänti niere ie: ‘Jehová mä dianinkä ne kwe mä rabadre ni rükä dite krubäte’. Gedeón ngwantaribare ie: ‘¿Ti ñaka ni ütiäte se ño ti raba Israel mike kwäre?’.

Jehovakwe Gedeón dianinkä o ñakare ye tö namani mikai gare metre jai. ¿Dre nuainbare kwe? Lana ötö brai mikani tibien kwe aune niebare kwe Jehovai: ‘Dekä ñü burei käkwe lana mikai niere, akwa dobro täi nötare angwane, rükai gare tie mäkwe ti dianinkä Israel mikakäre kwäre’. Jetebe se kwrere, lana nämene niere krubäte, akwa dobro nämene nötare. Angwane, Gedeón ribebare Jehovai jetebe se kwrere lana ye tädre nötare, akwa dobro tädre niere. Gedeón dre ribebare ye erere namani bare bobukäre. Mrä mada namani gare metre Gedeón ie Jehovakwe niara dianinkä. Aisete nitre rükä ükaninkrö kwe rükäre nitre Madián ben.

 Jehová niebare Gedeón ie: ‘Tibike nitre Israel dimike ne kwe rabadre ganane. Akwa nitre rükä kwati nämene kwetre, yebätä rü ye ganaindre kwetre angwane niaratre ja di jeñebiti rü ye ganainbare rabadre nütüre. Yebätä bäri kwin nitre medenbätä kä jürä ye rikadreta ja gwirete mä nie ietre’. Aisete nitre 22,000 nikaninta ja gwirete aune 10,000 namani. Ye bitikäre Jehovakwe niebare: ‘Nitre täbe kwati krubäte. Ñö nen yekänti mä rika ngwena aune ñö ñadre kwetre mäkwe nie ietre. Niaratre meden käkwe ñö ñadre aune tädre mokre jabiti nane rüe jatadre ye gadre kwetre ye aibe mäkwe tuanmetre nemen’. Nitre 300 aibe käkwe ja ngwani mokre ñö ñabare kwetre ye ngwane. Nitre braibe yebiti niaratre käkwe nitre rükä Madián 135,000 ye ganaindi Jehovakwe käbämikani.

Köbö yete deu Jehová niebare Gedeón ie: ‘Kä nüra rükäre nitre Madián ben’. Gedeón nibi krotu aune jarra teri antorcha nämene krati ye biani nitre rükä itire itire kwe yei, aune niebare kwe ietre: ‘Ti mike ñärärä aune tibike dre nuainne ye erere munkwe nuain’. Gedeón nibi krotu jükani, jarra kwe ye trekaninte kwe, antorcha ye miniabare nekwäre sekwäre kwe aune ngratebare ja dibiti kwe: ‘¡Ngitra Jehovakwe aune Gedeonkwe!’. Nitre 300 käkwe nuainbare ye erere arato. Nitre Madián yebätä kä jürä namani krubäte aune namanintre nen ngwarbe kwäräkwärä kä namani jäme niaratre dokwäbiti ye kwrere. Aune, niaratre namani nen ngwarbe kwäräkwärä yebätä, namanintre ja kämike kwärikwäri. Mada bati, Jehovakwe nitre Israel dimikani rüe ganainne.