Elí sacerdote bäri kri ye ngobo nämene nibu, Hofní aune Finehás. Niaratre nämene sacerdotere aune sribire tabernáculo yete. Akwa Jehovakwe kukwe biani nuaindre ye niaratre ñaka nämene mike täte aune ñaka nämenentre nitre kain ngäbiti kwin. Nitre Israel nämene niken jondron nire ngwena kukwadre Jehovai ye ngwane, Hofní aune Finehás nämene ngri bäri kwin ye den jai. Elí ie nämene gare kwin monsotre kwe ye nämene ja ngwen blo, akwa ñaka nämene niaratre töi ükete jire. ¿Jehová kukwe ye tuanimetre nemen bare jankunu raba ruin mäi?

Samuel nämene bäri bati Hofní aune Finehás ye kräke, akwa ñaka kukwe blo nuainbare kwe niaratre erere. Ye medenbätä, niara käi nämene juto Jehovabätä. Bati deu, Samuel nämene kübiani ye ngwane niara käräbare namani ruin ie. Nükani krö, nikani betekä Elí känti aune niebare kwe ie: ‘Tita nete’. Akwa, Elí niebare ie: ‘Ti ñaka mä kärere. Nänta kübien’. Samuel nikaninta ja täte. Kukwe ye erere namaninta bare bobukäre. Bämäkäre ni kukwei juruabare ie, ye ngwane namani gare Elí ie Jehová nämene Samuel kärere. Elí mikani gare ie ni kukwei juruata mäi angwane mäkwe kukwe ne nie ie: ‘Blite Jehová. Ti ni sribikä mä kräke tä mä kukwe nuin’.

Samuel nikaninta ja täte aune ni kukwei juruabareta ie: ‘Samuel, Samuel’. Niarakwe niebare: ‘Blite Jehová. Ti ni sribikä mä kräke tä mä  kukwe nuin’. Jehová niebare ie: ‘Mäkwe nie Elí ie tikwe niara aune monsotre kwe mikai ja ngie nuin. Monsotre kwe tä kukwe blo nuainne tabernáculo yete ye gare ie, akwa niara ñaka tä töi ükete’. Dekä, Samuel nämene käre jukwe tike tabernáculo yete ye erere nuainbare kwe. Jehovakwe kukwe mikani gare ie ye niedre kwe ni sacerdote bäri kri yei ye jürä namanibätä. Akwa, Elí niara käräbare aune ngwantaribare kwe ie: ‘Monso tikwe, ¿Jehová dre nini mäi?’. Angwane, Samuel kukwe ye mikani gare jökrä ie.

Samuel ririabare aune Jehová nämene ja kete jankunu ben. Juta te nitre Israel nämene nüne ye jökrä ie namani gare Jehovakwe Samuel dianinkä niara kukwei niekäre aune kukwe ükatekäre.