Elqaná ni israelita abokän muko nämene nibu, Ana aune Peniná. Akwa Ana nämene tare bäri kwe. Peniná monsoitre nämene kwati krubäte aune Ana abokän monsoi ñaka nämene jire iti. Ye medenbätä, Peniná nämene nemen Ana kötaire. Kä kwatire kwatire te, Elqaná nämene niken mräkätre ngwena kä Siló yekänti Jehová mikakäre täte tabernáculo yete. Bati, niaratre nämene yete angwane, muko bäri tare kwe Ana ye nämene ulire krubäte ye gani kwe. Aisete niebare kwe ie: ‘Ana, ñan ja muai. Tita mäbe nete aune mä tare krubäte tikwe’.

Ye bitikäre, Ana nikani kaibe orare. Niara namani ja muaire krubäte aune Jehovakwe niara dimikadre ribebare kwe ie. Kukwe ne käbämikani kwe ie: ‘Jehová, mäkwe monso biain iti tie angwane tikwe biain mäi ne kwe rabadre sribere kärekäre mä kräke’.

Sacerdote bäri kri Elí yei Ana jutuabare muen aune kada nämene ngrenkä akwa ñaka nämene blite aune Elí nütübare niara nämene dröbare. Ana niebare ie: ‘Ti däkien, ti ñaka tä dröbare. Kukwe kri tä ti kisete yebätä tita blite Jehovabe’. Elí ie naninte ye nükani gare ie aune niebare kwe Ana ie: ‘Mäkwe dre ribeni Jehovai ye erere biandre kwe mäi’. Ja namaninta ruin kwin Ana ie aune nikani mento. Kä jämi niken kwati ta ye känenkri, monso namani kwe aune kädekani kwe Samuel. ¿Kä namani juto Anabätä ye mä raba bämike ja töite?

Ana dre käbämikani Jehovai ye ñaka käi  kwitaninkä kwe jabiti. Samuel dianinkä kwe kianbätä angwane, nikani ngwena tabernáculo yekänti ne kwe rabadre sribire Ngöbö kräke. Ana niebare Elí ie: ‘Tikwe orabare Jehovai ne kwe monso ne biandre kwe tie. Aune matare tibike bien ie ne kwe rabadre sribire kräke kärekäre’. Elqaná aune Ana nämene niken basare Samuel ie kä kwatire kwatire aune niaratre nämene niken dän kise otore ngwena niara kräke. Ja känenkäre, monso brare nimä aune merire nibu namani Ana yekwe, Jehová köböire.