Gobran asirio käkwe gobran juta 10 nitre Israelkwe ye diani jai. Ye bitikäre, rei Asiria Senaquerib, tö namani juta ketebu Judá yekwe diain jai arato. Aisete bätärekä bätärekä jatani juta Judá ye den ketare ketare jai. Akwa metrere tö namani juta Jerusalén ye diain jai. Jehová nämene juta ye kriemike ye ñaka nämene gare Senaquerib ie.

Ezequías rei Judá, ye käkwe ngwian biani ere krubäte Senaquerib ie ne kwe ñaka Jerusalén diandre kwe jai. Senaquerib ngwian ye kani ngäbiti, akwa yebiti ta nitre rükä dite kwe ye juani kwe rüre juta yebe. Nitre nünanka juta yete yebätä kä jürä namani krubäte, ñobätä ñan aune nitre rükä asirio ye nämene nökrö bäri niaratre ken. Angwane Ezequías niebare ietre: ‘Mun ñan kä jürä ngwan jabätä. Nitre asirio ye dite krubäte, akwa Jehovakwe ni mikai bäri dite niaratre ngwä’.

Senaquerib käkwe Rabsaqué juani ja kukwei niere, ne kwe rabadre nitre nünanka Jerusalén kötaire. Rabsaqué namani nünaninkä juta ye bäre aune niebare kwe: ‘Jehová ñaka raba mun dimike. Munkwe ñaka ja ngökamana Ezequías ie. Ngöbö ñaka iti jire abokän raba mun kriemike nun kisete’.

Ezequías raba dre nuainne ye ngwantaribare kwe Jehovai aune Jehová niebare ie: ‘Rabsaqué tä dre niere ye mäkwe ñaka jürä ngwan jabätä. Senaquerib ñaka juta Jerusalén ye diain jai’. Ye bitikäre, Senaquerib tärä juani Ezequías ie yebätä kukwe ne nie nämene: ‘Mun raba ja ngwen di nekä. Jehová ñaka raba mun mike kwäre’. Angwane Ezequías orabare: ‘Jehová, nun mike kwäre ne kwe mä aibe Ngöbö metre ye rabadre gare juta jökrä ie’. Aune Jehová niebare ie: ‘Rei Asiria ye ñaka näin jire Jerusalén. Tikwe juta tikwe kriemikai’.

Senaquerib namani nütüre juta Jerusalén ye diain kwe jai. Akwa bati deu, nitre asirio nämene nünentubu juta bäre, yekänti Jehovakwe ángel juani. ¡Ángel ye  käkwe nitre rükä 185,000 murie ketani! Nitre rükä bäri dite ye murie ketani rei Senaquerib yekän aune ñaka namani dre nuaindre kräke yebätä nikaninta ja gwirete. Ye erere Jehovakwe Ezequías aune juta Jerusalén kriemikani, käbämikani kwe ye erere. Mä tädre Jerusalén angwane, ¿mäkwe tö ngwandre Jehovai?