KUKWE JA TÖTIKARA 01
¿Biblia raba mä dimike ño nüne bäri kwin?
Ñobätä nita ja tare nike aune krüte, ñokäre ni sribebare aune ni rabai nüne ño ja känenkäre ye nitre kwati tä ngwentari jai. Arato, kukweta ni kisete yebätä nita ja di ribere. Ñodre, ngwian rabadre nikwe ni mräkätre ngübakäre o kä rabadre juto bätätre yekäre nita ja di ribere. Kukwe ngwantarita ye Biblia tä mike gare ye niena gare nitre kwati ie. Ne madakäre, Biblia tä kukwe kwin mike gare nünankäre köbö kwatire kwatire te. ¿Biblia raba nitre dimike raba ruin mäi?
1. ¿Kukwe meden ngwantarita abokän raba nemen gare Bibliabätä nie?
Kukwe ngwantarita ne Biblia tä mike gare: ¿Nirekwe ja nire biani nie aune ñokäre nita nire? ¿Ñobätä nita ja tare nike? ¿Nita krüte ye bitikäre dreta nemen bare? Ni jökrä tö nünain jäme jabe, ¿akwa ñobätä rü nakainkä krubäte? ¿Dre rabai bare kä tibien nebätä? Biblia raba mä dimike kukwe ye mike gare jai aune kukwe ye namanina gare nitre kwati ie, yebätä käta juto bätätre.
2. ¿Biblia raba ni dimike ño nüne kä jutobiti köbö kwatire kwatire te?
Biblia tä kukwe kwin mike gare ye raba ni dimike nüne kä jutobiti ni mräkäbe, ñaka töbike krubäte aune sribire kä jutobiti. Ni täi ja tötike gwairebe tärä nebätä ngwane, kukwe ne aune kukwe mada rabai gare mäi. Ne madakäre, “kukwe jökrä” tä Bibliabätä ye “kwin krubäte” ni kräke rabai gare mäi (2 Timoteo 3:16, TNM).
Tärä ne ñaka Biblia erere, akwa raba ni dimike Biblia mike gare bäri kwin jai. Aisete texto jökrä tä tärä nebätä, yebätä mäkwe ñäkä. Texto tä dre niere aune kukwe medenbätä mätä ja tötike yebätä mäkwe töbika.
JA TÖTIKE BÄRI NGUSETA
Biblia käkwe nitre dimikanina ño, dre raba ni töi mike ñäke bäri Bibliabätä aune ñobätä ni mada käkwe ni dimikadre Biblia mike nüke gare jai ye ani mike gare jai.
3. Biblia raba ni jie ngwen
Biblia ye ñotra trä ngwenbrere ye kwrere. Raba ni dimike kukwe kwin den nuaindre jai aune dre rabai bare ja känenkäre ye raba mike gare nie.
Ñäkädre Salmo 119:105 yebätä aune kukwe ne kädriedre jabe:
-
¿Ni salmo tikaka nämäne töbike ño Biblia yebätä?
-
¿Mätä töbike ño Biblia yebätä?
4. Nita kukwe ngwentari ye raba nemen gare nie Bibliabätä
Kä kwati krubäte te meri iti nämäne kukwe ngwentari jai ye jökrä namani gare ie Bibliabätä. VIDEO mikadre ñärärä, biti kukwe ne kädriedre jabe:
-
¿Meri ye nämäne kukwe meden ngwentari jai aune ñobätä ngwanintari kwe jai?
-
¿Ja tötikani Bibliabätä kwe ye köböire dre namani gare ie?
Biblia tä ni töi mike kukwe ngwentari jai. Ñäkädre Mateo 7:7 yebätä aune kukwe ne kädriedre jabe:
-
¿Mätä kukwe ngwentari jai ye raba nemen gare Bibliabätä raba ruin mäi? Ye erere ngwane, ¿kukwe meden Biblia raba mike gare mäi?
5. Ñäkädre Bibliabätä ye raba nemen tuin kwin mäi
Kä jutobiti nitre kwati tä ñäke Bibliabätä aune kukwe kwin tä nemen gare ietre. VIDEO mikadre ñärärä, biti kukwe ne kädriedre jabe:
-
¿Ñäkädre täräbätä ye tuin ño monsotre bati ie?
-
Niaratre ñaka tö ñäkäi täräbätä, ¿akwa ñobätä tö ñäkäi Bibliabätä?
Kukweta Bibliabätä ye raba ni töi mike jäme aune tö ngwen kukwe kwin ie. Ñäkädre Romanos 15:4 yebätä aune kukwe ne kädriedre jabe:
-
Biblia raba ni töi mike jäme aune tö ngwen kukwe kwin ie, ¿ye mä tö mikai gare jai?
6. Ni mada raba ni dimike Biblia mike nüke gare jai
Nitre ruäre tä ñäke kaibe Bibliabätä, akwa ni mada tä niaratre dimike ja tötikebätä ye tä nemen bäri kwin kräketre. Ñäkädre Hechos 8:26-31 yebätä aune kukwe ne kädriedre jabe:
-
Bersikulo 30 aune 31 tä niere erere, ¿nita dre ribere jai ne kwe Biblia rükadre gare bäri kwin nie?
Ni nünanka Etiopía ye dimikadre tärä mike nüke gare jai ye ribebare kwe. Kä nengwane, ni dimikadre ja tötike Bibliabätä ye tuin kwin nitre kwati ie.
NITRE RUÄRE TÄ KUKWE NE NIERE: “Ja tötikata Bibliabätä ye kä juanta ngwarbe ta”.
-
¿Mä abokän raba dre niere? ¿Aune ñobätä mätä kukwe ye niere?
¿DRE NIBI GARE MÄI?
Nikwe nünandre ño köbö kwatire kwatire te aune nita kukwe ngwentari ye Biblia tä mike gare nie. Raba ni töi mike jäme aune ni dimike tö ngwen kukwe kwin ie.
Ngwankäreta törö
-
¿Biblia tä kukwe meden kwin mike gare nie nünankäre kä jutobiti?
-
¿Kukwe meden ngwantarita abokän Biblia raba mike gare nie?
-
¿Kukwe drieta Bibliakwe ye meden mä tö mikai gare jai?
KUKWE MIKE GARE BÄRI JAI
Biblia tä kukwe ütiäte mike gare ye raba ni dimike ño kä nengwane ye mäkwe mika gare jai.
“Kukwe ütiäte drieta Bibliakwe ye tä kärekäre” (Ni Mikaka Mokre, núm. 1 2018)
Ni iti nämäne monsore ngwane, ja tuani kukwe keta kabre ben ye Biblia käkwe dimikani ño ye mike ñärärä.
Kukwe kwin mikata gare Bibliakwe abokän raba nitre ja mräkäre mike nüne kä jutobiti ye mike gare jai.
“Kukwe 12 nuaindre nünankäre kä jutobiti ni mräkäbe” (Ni Mikaka Ngwäte, núm. 2 2018)
Nireta kä tibien ne gobraine ye ñaka gare metre nitre ie, akwa Biblia tä mike gare metre ye mä raba mike gare jai.
Ne rabai tuen kwin mäi arato
KUKWE NGWANTARITA BÄRI
¿Ja tötika Bibliabätä drieta ni testiko Jehovakwe ye abokän ño?
Ni testiko Jehovakwe tä ni tötike ye ütiä kärä ñaka aune mä raba ja tötike Biblia jeñe mäkwe yebiti. Ne madakäre mä raba mä mräkä jökrä o ja ketamuko ye nübaire jabe ja tötike.
