KUKWE JA TÖTIKARA 06
¿Ñokänti ni aune jondron jökrä namani?
Ngöbö, “makwe jändrän jökrä dätebare” (Apocalipsis 4:11). ¿Kukwe ye era mä kräke? Nitre ruäre tä nütüre ni aune jondron jökrä ye sribekä ñaka. Ye erere akräke, ngwarbekäre nita nire. Akwa Jehovakwe ni aune jondron jökrä sribebare akräke, ñan ngwarbekäre nuainbare kwe, ¿ñan ererea? a Ni aune jondron jökrä sribebare ño mikata gare Bibliabätä ye mike gare jai. Aune ñobätä kukwe ye raba tuin metre nie ye mike gare jai arato.
1. ¿Ñokänti kä kwinta aune kä tibien namani?
Biblia tä niere: “Kena dekä Ngöbökwe kä käinta btä kä tementa dätebare” (Génesis 1:1, Jändrän Jökrä Namani Bare Ño Kena, [JK]). Kä kwinta aune kä tibien namani kena ye nitre científico kwati tä mike era jai. ¿Ngöbökwe kä kwinta bätä kä tibien sribebare ño? Üai demebiti galaxia, muke aune planeta jökrä sribebare kwe (Génesis 1:2).
2. ¿Ñokäre Ngöbökwe kä tibien sribebare?
Jehovakwe ñaka kä tibien “sribebare ngwarbekäre, ñakare aune sribebare kwe nünankäre” (Isaías 45:18). Kä tibien sribebare kwin kwe aune bä nuäre nünankäre kärekäre nie (mäkwe ñäkä Isaías 40:28; 42:5 yebätä). Nitre científico tä niere, kä ne kwin krubäte ñobätä ñan aune planeta ne erere ñan raba kwen kä mada känti nünankäre nie.
3. ¿Ñobätä ni ñan sribebare ja erebe jondron nire yebe?
Jehovakwe kä tibien sribebare ye bitikäre kri aune jondron nire känsenta ye sribebare kwe. Biti, “Ngöbökwe ni nire sribebare ja bä kwrere” (mäkwe ñäkä Génesis 1:27 yebätä). ¿Ñobätä ni ñaka ja erebe jondron nire yebe? Ñobätä ñan aune Ngöbökwe ni sribebare ja bä kwrere, aisete niarata ja ngwen ño ye erere ni raba ja ngwen. Ñodre, ni raba ni mada tarere aune kukwe metre nuainne. Arato ni raba ja kite blite kukwe madabiti, jondron bä nuäre aune musika ye käi ngwen juto jabätä. Jondron nire ñaka raba Ni ni Sribekä ye mike täte ni erere.
JA TÖTIKE BÄRI NGUSETA
Dreta mike gare Ngöbökwe ni aune jondron nire sribebare, jondron sribebare ño nieta Bibliakwe ye ñobätä raba tuin metre nie aune nita kukwe kwin nuainne ye tä dre mike gare Ngöböbätä nie ye ani mike gare jai.
4.Jondron nire ye sribekä tärä
Nitre tä ja kite jondron nirebätä jondron mada sribekäre ngwane käikitakata. ¿Akwa nire käikitadrekä jondron nire sribebare yebätä? VIDEO mikadre ñärärä, biti kukwe ne kädriedre jabe:
-
¿Jondron nire meden medenbätä nitrekwe ja kitanina jondron sribekäre?
Ju jökrä sribekä tärä, ¿akwa nirekwe jondron jökrä sribebare? Ñäkädre Hebreos 3:4 yebätä aune kukwe ne kädriere jabe:
-
¿Jondron nire sribebare ye meden tuin kwin mäi?
-
¿Jondron kä kwinbätä aune kä tibienbätä ye jökrä sribebare ye ni raba mike era jai? ¿Ñobätä?
¿Ne gare mäi?
Video aune kukwe mada kwain mäi serie kädekata “¿Sribekä tärä?” aune “Jondron sribebare ño yebätä dre nieta” tä jw.org yete.
“Ju jökrä sribekä tärä, akwa jondron jökrä ye Ngöbökwe sribebare”
5. Jondron sribebare ño nieta Bibliabätä ye mika raba era jai
Kä tibien aune jondron nire sribebare ño kena ye Biblia tä mike gare Génesis kapitulo 1 yete. ¿Ye erere namani bare o kukwe ngwarbe nieta? VIDEO mikadre ñärärä, biti kukwe ne kädriedre jabe:
-
¿Kä tibien aune jondron nire sribebare köbö ti aibe te drieta Bibliakwe?
-
¿Jondron sribebare ño mikata gare Bibliabätä ye erere namani bare aune mika raba era jai raba ruin mäi? ¿Ñobätä mätä töbike kore?
Ñäkädre Génesis 1:1 yebätä aune kukwe ne kädriedre jabe:
-
Nitre científico bäsi jökrä tä niere kä kwinta bätä kä tibien namani kena. ¿Kukwe ye erere Bibliakwe mikanina gare nibi tuin mäi?
Ngöbökwe célula chi sribebare biti tuanimetre nikwite jondron nire bätäkä ngwarbe ererea ye nitre ruäre tä ngwentari jai. Ñäkädre Génesis 1:21, 25, 27 yebätä aune kukwe ne kädriedre jabe:
-
¿Ngöbökwe célula chi sribebare biti tuanimetre nikwite gware, jondron nire aune ni nire erere drieta Bibliakwe? ¿O niarakwe ni aune jondron nire jene jene sribebare?
6. Ngöbökwe ñan ni sribebare jondron nire mada erere
Jehovakwe ñaka ni aune jondron nire sribebare ja erebe. Ñäkädre Génesis 1:26 yebätä aune kukwe ne kädriedre jabe:
-
Nita ni mada tarere aune mike tuin bobre jai, ñobätä ñan aune Ngöbökwe ni sribebare niara töi ño ye erere. ¿Ye tä dre driere niarabätä nie?
NITRE RUÄRE TÄ KUKWE NE NIERE: “Ni aune jondron sribebare ño nieta Bibliabätä ye kukwe ngwarbe nieta ni näkwitakäre”.
-
¿Mä abokän töita ño? ¿Ñobätä mätä töbike kore?
¿DRE NIBI GARE MÄI?
Jehovakwe kä kwinta, kä tibien, ni aune jondron nire sribebare.
Ngwankäreta törö
-
¿Nirekwe kä kwinta bätä kä tibien sribebare drieta Bibliakwe?
-
¿Ngöbökwe célula chi sribebare biti tuanimetre nikwite jondron nire mada mada erere o jondron nire jene jene ye jökrä sribebare kwe?
-
¿Ñobätä ni ñan sribebare jondron nire mada erere?
KUKWE MIKE GARE BÄRI JAI
Dreta mike gare jondron nire sribekä tärä ye mike gare jai.
“¿Jondron nire ye tä dre driere nie?” (Ni Mikaka Ngwäte, septiembre 2006)
Jondron sribebare ño mikata gare Bibliabätä ye ni rüne iti tä mike gare monso chi kwe ie ye mike ñärärä.
Kukwe drieta Bibliabätä aune jondron nire jatani nikwite jatäri nieta ye ja erebe ya ye mike gare jai.
¿Ni aune jondron nire namani ja töbiti o sribebare? Jondron krä kirabe aune nitre científico tä experimento nuainne ye tä dre mike gare ye mike gare jai.
Ñokänti ni aune jondron nire ye tä. Kukwe ketarike mikadre gare jai (Täräkwata)
a Drekäre Ngöbökwe ni sribebare ye mikai gare kukwe ja tötikara 25 yete.
Ne rabai tuen kwin mäi arato
KUKWE NGWANTARITA BÄRI
¿Ja tötika Bibliabätä drieta ni testiko Jehovakwe ye abokän ño?
Ni testiko Jehovakwe tä ni tötike ye ütiä kärä ñaka aune mä raba ja tötike Biblia jeñe mäkwe yebiti. Ne madakäre mä raba mä mräkä jökrä o ja ketamuko ye nübaire jabe ja tötike.
