KUKWE JA TÖTIKARA 14
¿Dre nuaindre Ngöbö mikakäre metre täte?
Kukwe ja tötikara käne yebätä rababa gare nie erere, Ngöbö ñaka iglesia jökrä ye kain ngäbiti, akwa ni raba niara mike täte kä mikakäre jutobätä. ¿Religión meden kä ngäbitita kwe? (Santiago 1:27). Biblia tä kukwe ye mike gare ye ani mike gare jai.
1. ¿Ngöbö mikadre ño täte ye medente mikata gare?
Ngöbö mikadre ño täte ye drieta Bibliabätä. Jesukwe niebare Ngöböi: “Ma kukwei era metre” (Juan 17:17). Kukwe metre Bibliabätä ye iglesia ngwarbe ñaka driere, ñakare aune kukwe kira ñaka kite Ngöbökri drieta kwetre. Jehovakwe ja kukwei biani mikakata mentokwäre ye ñaka tuin kwin ie (mäkwe ñäkä Marcos 7:9 yebätä). Nita kukwe Bibliabätä mike täte ye tä kä mike juto Jehovabätä.
2. ¿Jehová mikadre ño täte?
Jehová ni Sribekä yebätä niara aibe mikadre täte (Apocalipsis 4:11). Ye abokän, niara aibe mikadre Ngöböre jai aune taredre, akwa ñaka mikadre täte ídolo o jondron üai sribebare yebiti (mäkwe ñäkä Isaías 42:8 yebätä).
Ngöbö mika täte nikwe ye rabadre deme aune kä mike jutobätä (Romanos 12:1). Ye abokän kukwe ükaninte kwe ye mikadre täte. Ñodre, nireta Ngöbö tarere ye rabadre kukwe ükaninte nitre gure kräke ye mike täte aune mike ütiäte jai. Aune ñan rabadre kukwe blo nuainne, ñodre, sö duin, droga duin o dröbanike. a
3. ¿Ñobätä Jehová mikadre täte nitre Jehová mikaka täte yebe?
Gätä nuainta bämän kratire kratire yebiti ni raba “Jehová käikitekä [...] konkrekasionte” (Salmo 111:1, 2). Ñodre kantata yebiti Ngöbö käikitakata (mäkwe ñäkä Salmo 104:33 yebätä). Ni tare Jehovakwe yebätä nikwe ja ükadrekrö tä ribere nie aune gätä yekwe ni dimikai nüne kä jutobiti kärekäre gare ie yebätä tä nuainmana nie. Nita nemen gätäbätä ngwane ja mikata dite kwärikwäri.
JA TÖTIKE BÄRI NGUSETA
Ñobätä Jehová ñan tö ja mikamana täte jondron üai yebiti aune ño ni raba Ngöbö käikitekä ye ani mike gare jai.
4. Jondron üai yebiti ñan Ngöbö mikadre täte
Ye ñaka debe kräke, ¿ñobätä gare nie? VIDEO mikadre ñärärä, biti kukwe ne kädriedre jabe:
-
Kira juta Jehovakwe jondron üai sribebare niara mikakäre täte ngwane, ¿dre namani bare?
Jondron üai ngöböre yebiti nitre ruäre tä nökrö Ngöbö ken ruin ietre, akwa ye tä niaratre denkä Ngöböbätä. Ñäkädre Éxodo 20:4-6 aune Salmo 106:35, 36 yebätä aune kukwe ne kädriedre jabe:
-
¿Jondron üai meden medenbiti nitre tä Ngöbö mike täte ye mä tärä tuin?
-
¿Jondron üai mikata ngöböre jai yebätä Jehovai töita ño?
-
¿Jondron üai mikata ngöböre jai ye tuin ño mäi?
5. Nikwe Jehová aibe mikai täte ngwane, ñaka ni ngökai
Jehová mikadre metre täte ye raba ni krie mike kukwe ngwarbebätä ye ani mike gare jai. VIDEO mikadre ñärärä.
Ñäkädre Salmo 91:14 yebätä aune kukwe ne kädriedre jabe:
-
Nita Jehová aibe tarere aune mike täte ngwane, ¿dre nuaindi kwe ni kräke?
6. Gätä nuainta konkrekasionte yebiti Ngöbö mikata täte
Nita kantare aune comentario bien gätäte ngwane, Jehová käikitakata aune ja dimikata kwärikwäri. Ñäkädre Salmo 22:22 yebätä aune kukwe ne kädriedre jabe:
-
¿Comentario bianta gätäte ye tä kä mike nuäre mäbätä?
-
¿Mä törba comentario ükaite jai gätä kräke?
7. Kukwe nemen gare nie nita kä driere ni madabe ye tuin kwin Jehovai
Kukwe nemen gare Bibliabätä nie yebätä blita raba ni madabe. Ñäkädre Salmo 9:1 aune 34:1 yebätä aune kukwe ne kädriedre jabe:
-
¿Kukwe Bibliabätä nemen gare mäi ye meden mä tö mikai gare ni madai?
NITRE RUÄRE TÄ KUKWE NE NIERE: “Iglesia jökrä Ngöböta kain ngäbiti aisete ni tö Ngöbö mikai ño täte erere nuaindre”.
-
¿Mä raba dre niere?
¿DRE NIBI GARE MÄI?
Ngöbö ni Sribekä ye aibe mikadre täte, käikitadrekä gätäte aune blitadre niarabätä ni madabe, ye tä kä mike jutobätä.
Ngwankäreta törö
-
¿Ngöbö mikadre ño täte ye medente mikata gare?
-
¿Ñobätä nikwe Jehová aibe mikadre täte?
-
¿Ñobätä Jehová mikadre täte nitre Jehová mikaka täte yebe?
KUKWE MIKE GARE BÄRI JAI
Meri ñan niena klabore kukwe ngwarbe kisete ye köböire käta jutobätä ye mike gare jai.
“Biblia niaratre töi kwitani” (Ni Mikaka Mokre, 1 julio 2011)
Dre raba mä dimike comentario bien gätäte ye mike gare jai.
“Nikwe Jehová käikitadrekä konkrekasionte” (Ni Mikaka Mokre, enero 2019)
Monso bati ie ja ñan nämäne nemen törö nänkäre gätäbätä, akwa gätäkwe dimikani ño ye mike gare jai.
Kruso yebiti ni kristiano tä nemen gare nütüta nitre kwatikwe, ¿akwa Ngöbö mikadre tätebiti?
“¿Ñobätä nitre testiko Jehovakwe ñaka kruso ngwen jabätä?” (Artículo jw.org)
a Kukwe ye kädriei ja känenkäre.
Ne rabai tuen kwin mäi arato
KUKWE NGWANTARITA BÄRI
¿Ja tötika Bibliabätä drieta ni testiko Jehovakwe ye abokän ño?
Ni testiko Jehovakwe tä ni tötike ye ütiä kärä ñaka aune mä raba ja tötike Biblia jeñe mäkwe yebiti. Ne madakäre mä raba mä mräkä jökrä o ja ketamuko ye nübaire jabe ja tötike.
