KUKWE JA TÖTIKARA 15
¿Nire abokän Jesús?
Jesús ye ni bäri ütiäte nünanbare kä tibienbätä. Niara kä gare nitre kwati ie, akwa niara abokän ño metrere ñaka gare ietre. Nitre mada abokän tä kukwe bätäkä ngwarbe niere niarabätä. ¿Biblia tä dre driere niarabätä?
1. ¿Nire abokän Jesús?
Jesús ye üaire, dite krubäte tä nüne kä kwinbiti. Jehovakwe niara dätebare jondron jökrä ye känenkri. Yebätä niara “mubai jändrän dätebare jökrä ngwä” nieta (Colosenses 1:15, Ngöbö Täräe [NGT], tärä okwä ükaninte). Jesús abokän “Monso ngöräbe” Ngöbökwe nieta Bibliakwe, ñobätä ñan aune niara aibe Jehovakwe sribebare ja kise jeñebiti (Juan 3:16, TNM). Jesukwe sribibare gwaire Rün kwe ben jondron jökrä dätebätä (mäkwe ñäkä Proverbios 8:30 yebätä). Niaratre täbe ja kete kwin jabe. Jesús ie “Kukwe” nieta, ye abokän tä blite Ngöbö käbiti, aune tä Rün kukwei mike gare meden käräta (Juan 1:14).
2. ¿Ñokäre Jesús jatani kä tibienbätä?
Kä nikanina 2,000 biti bäri ta yete, üai demebiti Jehovakwe jondron ñan tuabare nuainbare. Jesús ángel dite krubäte ye mikani nemen kwe meri bati kädeka nämäne María yebätä. Ye köböire, Jesús därebare ni nire erere kä tibienbätä (mäkwe ñäkä Lucas 1:34, 35 yebätä). Niara jatani kä tibienbätä rabakäre Kristo o Mesías erere ni kä tibienbätä mikakäre kwäre. a Profecía niebare Mesiabätä ye jökrä namani bare Jesubätä. Ye köböire, niara abokän “Kristo, Ngöbö nire Monsoi” nükani gare nitre ie (Mateo 16:16, TNM).
3. ¿Gwä ngwane Jesuta medente?
Jesús murie ketani ye bitikäre Ngöbökwe ganinkröta üaire aune nikaninta kä kwinbiti. “Ngöbökwe mikani bäri ütiäte ni jökrä amne jändrän jökrä bti ta” (Filipenses 2:9). Nengwane Jesuta kädekani kri, Jehová aibe bäri dite niara kräke.
JA TÖTIKE BÄRI NGUSETA
Nire abokän Jesús aune niara mikadre gare jai ye ñobätä ütiäte ye ani mike gare jai.
4. Ngöbö dite ye ñan ai Jesús
Jesús ye üaire dite krubäte tä kä kwinbiti, akwa tä Ngöbö Jehová Rün kwe kukwei mike täte drieta Bibliakwe. ¿Ñobätä Jesús ñaka Ngöbö? Jesús ñan ja erebe Ngöböbe drieta Bibliakwe, mikakäre gare jai VIDEO mikadre ñärärä.
Jehová ye arabe Jesuya, ye texto jatäri ne käkwe ni dimikai mike gare jai. Ñäkädre textobätä aune kukwe ne kädriedre jabe:
Ñäkädre Lucas 1:30-32 yebätä.
-
Angelekwe niebare erere, ¿Jesús ye Jehová gere?
Ñäkädre Mateo 3:16, 17 yebätä.
-
Jesús ja ngökani ñöte ngwane, ¿ni kukwei ngitianinkä kä kwinbiti käkwe dre niebare?
-
¿Ye nire kukwei raba ruin mäi?
Ñäkädre Juan 14:28 yebätä.
-
Nire bäri umbre aune bäri kri, ¿ni rüne o monso?
-
Jesukwe ti “Rün” niebare Jehovai ngwane, ¿tö namani dre mikai gare?
Ñäkädre Juan 12:49 yebätä.
-
¿Jesús arabe Jehová nämäne ruin Jesuye? ¿Ye erere ruin mäi?
5. Jesús namani Mesías
Profecía keta kabre tikani Bibliabätä nitre dimikakäre Mesías mike nüke gare jai, ye abokän ni dianinkä Ngöbökwe ni kä tibienbätä mikakäre kwäre. Jesús nämäne kä tibienbätä ngwane, profecía namani barebätä ye mikakäre gare ruäre jai VIDEO mikadre ñärärä.
Ñäkädre profecía nebätä aune kukwe ne kädriedre jabe:
Mesías däredre medente mikakäre gare jai ñäkädre Miqueas 5:2 yebätä. b
-
¿Jesús därebare ngwane, ¿profecía ye namani bare? (Mateo 2:1).
Mesías murie ketadre känenkri Bibliakwe dre mikani gare mikakäre gare jai ñäkädre Salmo 34:20 aune Zacarías 12:10 yebätä.
-
¿Profecía ye namani bare? (Juan 19:33-37).
-
¿Jesukwe kukwe nuainbare gore ne kwe profecía ruäre rabadre barebätä ruin mäi?
-
¿Kukwe ye tä dre driere Jesubätä mäi?
6. Ütiäte krubäte Jesús mikadre gare jai
Jesús mikadre gare jai aune Ngöbökwe sribi mikani kisete mikadre gare jai ye ütiäte krubäte nieta Bibliakwe. Ñäkädre Juan 14:6 aune 17:3 yebätä aune kukwe ne kädriedre jabe:
-
¿Jesús mikadre gare jai ye ñobätä ütiäte?
Jesukwe ji ükaninte ni käne ja ketakäre Ngöböbe. Kukwe metre Jehovabätä driebare kwe. Aune niara köböire ja nire kärekäre raba nemen nikwe.
NITRE RUÄRE TÄ KUKWE NE NIERE: “Nitre testiko Jehovakwe ñaka Jesús mike täte”.
-
¿Mäkwe dre niedre?
¿DRE NIBI GARE MÄI?
Jesús ye üaire, dite krubäte, Ngöbö monsoi aune Mesías.
Ngwankäreta törö
-
¿Ñobätä Jesús ye “mubai jändrän dätebare jökrä ngwä” nieta?
-
¿Jesús jatadre kä tibienbätä ye känenkri nämäne dre nuainne?
-
¿Ñokänti gare nie Jesús ye Mesías?
KUKWE MIKE GARE BÄRI JAI
Jesús abokän Mesías yebätä kukwe mike gare bäri jai.
“¿Profecía Bibliabätä tä mike gare Jesús ye Mesías?” (Artículo jw.org)
¿Ngöbö namani Jesús rüne ni kä tibienbätä tä monso ngübare ye kwrere drieta Bibliakwe ya? Ye mike gare jai.
Ni nimä ngöböre itibe ye ñobätä Biblia ñaka driere ye mike gare jai.
Biblia tä dre niere Jesubätä ye meri iti käkwe mikani gare jai ngwane, ja töi kwitani kwe yebätä ñäke.
“Ñobätä meri judía ja töi kwitani tä mike gare” (Ni Mikaka Ngwäte, mayo 2013)
a Ni kä nebätä mikadre kwäre ye ñobätä tä ribere jai aune Jesuta nuainne ño ye mikai gare kukwe ja tötikara 26 aune 27 yebätä.
Ne rabai tuen kwin mäi arato
KUKWE NGWANTARITA BÄRI
¿Ja tötika Bibliabätä drieta ni testiko Jehovakwe ye abokän ño?
Ni testiko Jehovakwe tä ni tötike ye ütiä kärä ñaka aune mä raba ja tötike Biblia jeñe mäkwe yebiti. Ne madakäre mä raba mä mräkä jökrä o ja ketamuko ye nübaire jabe ja tötike.
