KUKWE JA TÖTIKARA 21
Kukwe kwin Ngöbökwe drieta
Jehová köböra Gobran kwe yebiti kukwe jökrä tare kä nebätä ye denkä. ¡Kukwe ye kwin krubäte! Aisete, rabadre gare ni jökrä ie. Jesús tö namani nitre nänkä niara jiebiti ye tuai kukwe ye mike gare ni jökrä ie (Mateo 28:19, 20). ¿Nitre testiko Jehovakwe tä dre nuainne kukwe nuain mananbare Jesukwe ne mikakäre täte?
1. ¿Mateo 24:14 ye nemen bare ño nengwane?
Jesukwe niebare: “Kukwe kwin Gobran Ngöbökwe yebätä ye driedi kä jökräbiti tibien” (Mateo 24:14, TNM). Sribi ütiäte krubäte ne, ni testiko Jehovakwe tä nuainne kä jutobiti. Kukwe 1,000 biti bäri kukwe kwin ne drieta kä jökräbiti tibien. Sribi kri krubäte ne mikakäre nemen bare ja di ngwandre krubäte aune kukwe tädre ükaninte kwin. Jehová ñan ni dimike akräke sribi ne ñan raba nemen bare.
2. ¿Dre nuainta kukwe driekäre nitre ie?
Kukwe drieta ni jökrä ie. Nitre kristiano siklo kena nämäne nuainne erere, kukwe drieta “ju ju te” (Hechos 5:42, TNM). Ye köböire, kukwe drieta nitre millón kwati ie kä kwatire kwatire. Akwa ruäre ngwane nitre ñaka gwi, aisete kukwe drieta nitre kwati ngwärekri arato. Kä jökrä ngwane, nunta ja di ngwen blitakäre Jehovabätä aune niara tö dre nuaindi ja känenkäre yebätä nitre ben.
3. ¿Nire rabadre kukwe kwin Ngöbökwe ye driere?
Ni kristiano metre ye jökrä rabadre kukwe kwin ye driere. Nunta sribi ne mike ütiäte krubäte jai. Nun raba kukwe driere nuäi ye ererebätä nunta ja di ngwen dirire, ñobätä ñan aune ye raba nitre mike kwäre (mäkwe ñäkä 1 Timoteo 4:16 yebätä). Sribi ne ütiä bian ñaka nunye, ñobätä ñan aune Biblia tä niere: “Biani ngwarbe munye munkwe bian ngwarbe arato” (Mateo 10:7, 8). Nitre kwati ñan tä ni kukwe nuin, akwa nita kukwe driere jankunu Jehová mikakäre täte aune kä mikakäre jutobätä.
JA TÖTIKE BÄRI NGUSETA
Ni testiko Jehovakwe tä dre nuainne kukwe driekäre kä jökräbiti tibien aune Jehovata dimike ño ye mike ñärärä.
Kukwe drieta kä jökräbiti: A) Costa Rica; B) Estados Unidos; C) Benín; D) Tailandia; E) Yap (Micronesia); F) Suecia.
4. Ja di ngwanta kukwe driekäre ni jökrä ie
Nun testiko Jehovakwe tä ja di ngwen krubäte kukwe kwin ye driekäre ni kä jökrä känti ie. VIDEO mikadre ñärärä, biti kukwe ne kädriedre jabe:
-
¿Nun testiko Jehovakwe tä kukwe nuainne kukwe driekäre ye meden bäri tuin kwin mäi?
Ñäkädre Mateo 22:39 aune Romanos 10:13-15 yebätä aune kukwe ne kädriedre jabe:
-
¿Nita ni mada tarere ye nita bämike ño kukwe drie yebiti?
-
¿Ni kukwe kwin driekä ye tuin ño Jehovai? (Bersikulo 15 mikadre ñärärä).
5. Sribita Ngöböbe
Kukweta nemen bare ye tä bämike Jehovata kukwe drie jie ngwen. Dre namani bare Nueva Zelanda ye ani mike gare jai. Bati, ni testiko iti kädekata Paul nikani kukwe driere dere aune meri iti kwani gwi ie. Köbö yete dekä meri ye käkwe orabare Ngöböi, känti Jehová niebare kwe Ngöböi. “Mäkwe ni iti juan ti dimike mä mike gare jai” niebare kwe orasionte. “Ora krämä bitikäre ti nämäna jukwebätä, jukwe mete ie” nieta Paulkwe.
Ñäkädre 1 Corintios 3:9 yebätä aune kukwe ne kädriedre jabe:
-
¿Jehovata kukwe drie jie ngwen ye kukwe ne kwrere tä bämike ño?
Ñäkädre Hechos 1:8 yebätä aune kukwe ne kädriedre jabe:
-
¿Jehovakwe ni dimikadre kukwe driekäre ye ñobätä nita ribere jai?
¿Ne gare mäi?
Gätä nuainta bämän ngrabare yete käre nun tötikata kukwe driekäre. Mä tärä nemen gätäbätä nunbe ngwane, ¿nun tötikata kukwe driekäre ne tuin ño mäi?
6. Kukwe drie yebiti kukwe nuain mananbare Ngöbökwe ye nunta mike täte
Siklo kena yete, nitre ja tötikaka Jesukwe ye rüe ñaka tö namani tuai kukwe driere. Nitre kristiano ye nämäne juto blitakäre gobrantre ngwärekri ne kwe tuanemetre kukwe driere jankunu, ye köböire “kukwe kwin ye namani ükaninte metre” gobrantre ngwärekri (Filipenses 1:7). Aune nengwane, nitre testiko Jehovakwe tä ye erere nuainne. a
Ñäkädre Hechos 5:27-42 yebätä aune kukwe ne kädriedre jabe:
-
¿Ñobätä kukwe driedi jankunu? (Bersikulo 29, 38 aune 39 mikadre ñärärä).
NITRE RUÄRE TÄ KUKWE NE NGWENTARI: “¿Ñobätä ni testiko Jehovakwe tä niken ju ju te?”.
-
¿Mäkwe dre niedre?
¿DRE NIBI GARE MÄI?
Jesukwe kukwe kwin ye drie mananbare kä jökräbiti tibien nitre ja tötikaka kwe ie aune Jehovata juta kwe dimike sribi ye mike nemen bare.
Ngwankäreta törö
-
¿Dre nuainta kukwe kwin ye driekäre kä jökräbiti?
-
¿Nita ni mada tarere ye nita bämike ño kukwe drie yebiti?
-
¿Kukwe drie ye raba kä mike juto nibätä raba ruin mäi? ¿Ñobätä?
KUKWE MIKE GARE BÄRI JAI
Ño ni testiko Jehovakwe tä kukwe driere juta krikri te ye tuin.
¿Nitre testiko Jehovakwe tä dre nuainne kukwe driekäre nitre refugiado ie?
Sribi köbö täte Jehová kräke ye käkwe kä mikani juto meri itibätä tä niere ye kukwe nuin.
Gananbare gobrantre ngwärekri ye köböire kukwe kwin ye drie täbe jankunu ye mike gare jai.
“Nitre gobran Ngöbökwe kukwe driekä janamane tribunal” (Gobran Ngöbökwe niena gobrane, kapitulo 13)
a Ngöböta kukwe driemana nie, aisete ni testiko Jehovakwe käkwe kukwe kwin Gobran Ngöbökwe yebätä ye driedre ya, ye ñan ngwandretari gobrantre ie.
Ne rabai tuen kwin mäi arato
KUKWE NGWANTARITA BÄRI
¿Ja tötika Bibliabätä drieta ni testiko Jehovakwe ye abokän ño?
Ni testiko Jehovakwe tä ni tötike ye ütiä kärä ñaka aune mä raba ja tötike Biblia jeñe mäkwe yebiti. Ne madakäre mä raba mä mräkä jökrä o ja ketamuko ye nübaire jabe ja tötike.
