¿Ja ketamuko iti mäkwe käkwe jondron ütiäte biandre mäi ngwane ja rabadre ruin ño mäi? Kä rabadre juto mäbätä aune jondron ye ütiäte mä kräke mä tö rabadre bämikai ja ketamuko mäkwe yei, ¿ñan ererea? Jehová aune Jesús kukwe kwin krubäte biani ni jökrä ie ye abokän, ni kökanintari kwe. Ni raba debe bien ño kukwe yebätä ye ani mike gare jai.

1. ¿Jehová aune Kristo kukwe nuainbare ni kräke yebätä nita debe bien ye ni raba bämike ño?

“Nire tä tödeke” Jesús ie ye rabai nüne kärekäre käbämikata Bibliakwe (Juan 3:16, TNM). ¿Tödekata Jesús ie ye bämikata ño? Tita tödeke ie ye ñaka nieta jerekäbe kukwere, ñakare aune nita dre den nuaindre jai aune kukwe nuainta yebiti bämikata (Santiago 2:17). Nita kukwe nuainne aune kukwe niere, yebiti nita tödeka jakwe bämike ngwane, nita nemen ja kete bäri kwin Jesús aune Rün kwe Jehová yebe (mäkwe ñäkä Juan 14:21 yebätä).

2. ¿Nita debe bien Jehová aune Jesús ie ye ni raba bämike köbö ütiäte medente?

Jesukwe ja nire biain yebätä nitre ja tötikaka kwe raba debe bien ño, ye mikani gare kwe ietre. Niara murie ketadre köböi känenkri deu, köbö ütiäte ükaninte kwe ye Biblia tä kädeke “Däkien mrö bäre”, arato kädekata Jesukwe ja nire biani ngwanta törö jai (1 Corintios 11:20). Jesukwe köbö ye ükaninte ne kwe, yete ja käne nitre apóstol aune nitre kristiano metre rabadre niarakwe ja nire biani ni jökrä ütiäre ye ngwen törö jai. Jesukwe blitabare köbö nebätä ngwane niebare kwe: “Munkwe ne nuain jankunu ti ngwankäre törö jai” (Lucas 22:19, TNM). Jesús ja nire biani ngwainta törö jai yebätä mä kwain ngwane, Jehová aune Jesús ni tarebare yebätä mäta debe bien mäkwe bämikai.

 JA TÖTIKE BÄRI NGUSETA

3. Nita debe bien ye nikwe bämikadre

Mä rabadrera murie nötökä ñöte, akwa ni iti käkwe mä jäkädre jate ye bämike ja okwäte. ¿Ni mä dimikaka ye käi rikwitadrekä jötrö mäbiti? ¿O mäkwe ja di ngwandre kukwe ruäre nuainne debe biankäre ie?

Jehovakwe ja töi mikani kwin ni kräke ye köböire ja nire käre raba nemen nikwe. Ñäkädre 1 Juan 4:8-10 yebätä aune kukwe ne kädriedre jabe:

• ¿Jesukwe ja nire biani murie ketadre ye ñobätä regalo ütiäte biani nie ye kwrere?

• ¿Jehová aune Jesús kukwe nuainbare mä kräke yebätä ja ruin ño mäi?

Jehová aune Jesús kukwe nuainbare ni kräke yebätä nita debe bien, ¿ye ni raba bämike ño? Ñäkädre 2 Corintios 5:15, 1 Juan 4:11, 5:3 yebätä aune kukwe ne kädriedre jabe:

• ¿Nita debe bien ye ni raba bämike ño?

4. Ja ngwandre Jesús erere

Nita ja ngwen Jesús erere ngwane nita debe bien ye nita bämike. Ñäkädre 1 Pedro 2:21 yebätä aune kukwe ne kädriedre jabe:

• ¿Jesukwe ja ngwani ye erere mäta ja ngwen ye mä raba bämike ño?

• ¿Dre nuainta Jesús ja nire biani ngwanta törö jai yete?

 DRE NIBI GARE MÄI

Nita tödeke Jesús ie aune nita kwen Jesukwe ja nire biani ngwanta törö jai yebätä ngwane, Jesús dre nuainbare ni kräke yebätä nita debe bien nita bämike.

Ngwankäreta törö

• ¿Tödekata Jesús ie ye bämikata ño?

• ¿Jehová aune Jesús kukwe nuainbare mä kräke ye ütiäte mä kräke mäta bämike ie? ¿Mä raba dre nuainne bämikakäre?

• ¿Ni kwandre Jesús ja nire biani ngwanta törö jai yebätä ye ñobätä ütiäte?