Dö kwaka ña yebätä nitre jökrä töi ñaka ja erebe. Nitre ruäre tä ñain nane nane ja ketamuko kwe ben. Ruäre abokän ñaka bänä näin jire. Mada abokän tä ñain nememe tä nemen dröbare ngwane. ¿Bibliata dre niere dö kwaka yebätä?

1. ¿Dö kwaka ñadre ye käme?

Dö kwaka ñadre ye käme ye Biblia ñaka niere. Ñakare aune vino kä mikaka juto ni brukwäbätä ye tä regalo keta kabre Jehovakwe biani nie ye ngätäite nieta Bibliakwe (Salmo 104:14, 15). Ne madakäre, nitre brare aune merire ja ngwanka metre nämäne dö kwaka ñain nieta Bibliakwe (1 Timoteo 5:23).

2. ¿Ni tä ja töi mike dö ñain yebätä Biblia tä mäträre ño?

Dröba nika ye ñan aibe tuin käme Jehovai, ñakare aune dö kwaka ñadre ere ye tuin käme ie arato (Gálatas 5:21). Biblia tä niere: “Nitre vino ñaka krubäte [...] ye ngätäite mä ñaka tädre” (Proverbios 23:20). Aisete, nikwe ja töi mikadre dö kwaka ñain kaibe o ni madabe ngwane, ñaka ñadre ere nememe kä rikwitadrekä nibiti ngwane. Arato ñaka dö ñadre ere abokän käkwe ni mikadre bren. Nikwe dö ñai nuäi yebätä ni ñan raba ja gobraine ngwane, ni tädre juto biare tuametrekäre täte.

3. ¿Ni madata kukwe den nuaindre jai ye ütiäte ni kräke ni raba bämike ño?

Dö ñadre o ñakare ye tä gare ni itire itire ie. Ni iti tä ja töi mike dö ñain chi ye rüere ñan ñäkädre. Aune nire tä ja töi mike ñan ñain ye ñan mikadre ñain ja dibiti (Romanos 14:10). Aune raba ni mada ngwen ngoto ritekä ngwane, ñaka ja töi mikadre ñain (mäkwe ñäkä Romanos 14:21 yebätä). Ni kristiano ñan tä kukwe kwin känene jakrä, ñakare aune ni mada madakrä (mäkwe ñäkä 1 Corintios 10:23, 24 yebätä).

 JA TÖTIKE BÄRI NGUSETA

4. Mäkwe dö ñai o ñakare yebätä töbike

¿Dö kwaka ña yebätä Jesús töi nämäne ño? Ye mikakäre gare jai kukwe ñan tuabare nuainbare kena kwe yebätä ani ja tötike. Ñäkädre Juan 2:1-11 yebätä aune kukwe ne kädriedre jabe:

• ¿Dö kwaka aune nitre tä ñain ye tuin ño Jesús ie yebätä kukwe ne tä dre driere nie?

• Dö kwaka ñadre ye ñan nämäne tuin käme Jesús ie, aisete ni iti käkwe ja töi mikadre ñain ngwane, ¿ni kristiano käkwe mikadre tuin ño jai?

Ni kristiano raba dö ñain ye ñan tä mike gare rabadre ñain käre ye kwin. Ñäkädre Proverbios 22:3 yebätä aune kukweta jatäri nekänti dö ñadre ye kwin ya yebätä blite.

• Mä näin karo ngwen o maquinaria ngwen ngwane.

• Mä meri murore ngwane.

• Doctor ñaka dö kwaka ña manandre mäi ngwane.

• Mätä niken dö ñain aune ñan tä nemen, nemen debe mäi ngwane.

• Lei tä dö ña ye ñäkäire ngwane.

• Ni iti kisete kukwe kri namani dö ñabätä, aisete ñan ja töi mikani kwe dö ñain yebe mätä ngwane.

¿Ja mäkäteta o kä ngwanta juto jabätä yete mä rabadre dö kwaka bien ñadre? Drebätä mä rabadre töbike mikakäre gare jai, VIDEO mikadre ñärärä.

Ñäkädre Romanos 13:13; 1 Corintios 10:31, 32 yebätä aune kukwe ne kädriedre jabe:

• ¿Kä ngwankäre juto Jehovabätä kukwe ja jie ngwankäre ne raba mä dimike ño kukwe kwin den nuaindre jai?

 5. Mäkwe ñai nuäi yebätä töbike

Mä ja töi mikai dö kwaka ñain ngwane, dö kwaka ñadre ye ñan tuin käme Jehovai. Akwa, ñadre krubäte yebrä tuin käme ie ye mäkwe ngwan törö jai, ¿ñobätä? Ñäkädre Oseas 4:11, 18 yebätä aune kukwe ne kädriedre jabe:

• Ni iti dö ñadre krubäte ngwane, ¿dre raba nemen bare?

¿Dre raba ni dimike ñaka dö kwaka ñain biti chi? Kukwe meden känti ni di brai ye tädre gare kwin nie. Ñäkädre Proverbios 11:2 yebätä aune kukwe ne kädriedre jabe:

• ¿Mäkwe dö ñadre nuäi tädre gare kwin mäi ye ñobätä ütiäte?

6. Ngitie dö kwaka yebätä

 ¿DRE NIBI GARE MÄI?

Dö kwaka ye Jehovakwe biani kä ngwankäre juto jabätä nie. Akwa, dröba nika aune ñata ere krubäte yebrä tuin käme ie.

Ngwankäreta törö

• ¿Dre nieta Bibliakwe dö kwaka yebätä?

• ¿Dö ñata ere ye köböite dreta nemen bare?

• Ni madata kukwe den nuaindre jai dö kwaka yebätä ye nita mike ütiäte jai, ¿ye ni raba bämike ño?