KUKWE JA TÖTIKARA 36
Käre kukwe metre niedre
Ni kukwe metre nuainkä ye ni jökrä töta nemen tuai ja ketamuko jakwe, aune ye erere ngübata Jehovakwe ja ketamuko kwe yebätä. Ni bäsi jökrä ni ngökö ngätäite nünanta, aisete kukwe metre niedre ye ñaka nuäre. ¿Kukwe metre nuaindre ye köböire kukwe meden meden kwin tä nemen bare?
1. ¿Kukwe meden bäri ütiätebätä kukwe metre nuaindre?
Nita ja ngwen metre ni madabe ngwane, Jehová tare nikwe aune ütiäte ni kräke nita bämike. Nita töbike ño aune dre nuainne gare jökrä Jehovai ye ngwen törö jai (Hebreos 4:13). Nita ja töi mike kukwe metre nuainne ye tä gain aune tä mike ütiäte jai. Kukwe kwe tä niere: “ni ja ngwen blo ye käme krubäte Jehová kräke, akwa niarata ja kete bäri kwin nitre kukwe metre nuainkä yebe” (Proverbios 3:32).
2. ¿Kukwe meden känti ja ngwandre metre mantre jetebe?
Jehová töi nuaindre ye abokän nikwe “kukwe metre niedre jai kwärikwäri” (Zacarías 8:16, 17). ¿Ye dre gärätä? Ye abokän ni ñaka ni mräkätre, nitre sribikä nibe, ja mräkätre konkrekasionte, nitre sribikä gobranbe yei kukwe ngwarbe niere ngökakäre. Ni ja ngwanka metre ye ñaka gore aune fraude nuainne (mäkwe ñäkä Proverbios 24:28 aune Efesios 4:28 yebätä). Ne madakäre, tä impuesto ütiä bien (Romanos 13:5-7). Kukwe ne aune kukwe mada känti ni tö “jändrän jökrä nuene kuin metre” käre (Hebreos 13:18).
3. ¿Kukwe metre nuaindre ye köböire kukwe kwin meden tä nemen bare?
Ni ñaka ni ngökö ngwane, nitre mada tä nemen tö ngwen nie. Ne madakäre nita konkrekasion dimike ne kwe tädre krie mikani aune tö ngwan tädre jai ni ja mräkäre erere. Arato ni töita jäme. Nita kukwe metre niere yebiti “Ngöbö ni mikaka kwäre kukwei” ye nita mike bä nuäre, aune ye köböire ni raba ni mada töi mike sribire Jehová kräke (Tito 2:10, Ngöbö Täräe [NGT], tärä okwä ükaninte).
JA TÖTIKE BÄRI NGUSETA
Ja ngwandre metre ye tä ni mike ja kete ño Jehovabe aune ño ni raba ja ngwen metre kukwe keta kabre känti ye ani mike gare jai.
4. Ni kukwe metre nuainkä ye mate kwin Jehovabätä
Ñäkädre Salmo 44:21 aune Malaquías 3:16 yebätä aune kukwe ne kädriedre jabe:
-
¿Ni raba kukwe metre ye üke? ¿Ñobätä mätä töbike kore?
-
Ñan rabai nuäre kukwe metre niekäre, akwa yebiti ta ja töi mikai kukwe metre niere, ¿yebätä ja rabai ruin ño Jehovai?
Monso tä kukwe metre niere ye tä kä mike juto rünbätä. Ye erere nita kukwe metre niere ye tä kä mike juto Jehovabätä.
5. Käre ja ngwandre metre aune ñaka ni ngökadre
Ruäre ngwane ni ngökadre ye bäri kwin ye nitre kwati tä niere, akwa käre ja ngwandre metre ye bäri kwin, ñobätä bäri kwin ye mike gare jai. VIDEO mikadre ñärärä.
Ñäkädre Hebreos 13:18 yebätä aune mäkwe blita ño ni raba käre kukwe metre niere...
-
... ni mräkätre ie.
-
... sribikänti o kwelate.
-
... kukwe mada känti.
6. Ja ngwanta metre ye tä kukwe kwin mike bare ni kräke
Ruäre ngwane kukwe metre niedre ye raba ni mike kukwe kri te, akwa nuaindre ye bäri kwin. Ñäkädre Salmo 34:12-16 yebätä aune kukwe ne kädriedre jabe:
-
¿Kukwe metre niedre ye raba ni dimike nüne ño bäri kwin?
-
Nitre ja mäkäninte brare aune merire tä kukwe metre niere jai ye tä niaratre mike dite.
-
Ni sribikä tä kukwe metre niere aune ja ngwen kwin ngwane, jefe kwe tä nemen tö ngwen ie.
-
Nitre tä ja ngwen metre aune ñaka ni ngökö ngwane, nitre sribikä gobranbe tä nemen tö ngwen ie.
NITRE RUÄRE TÄ KUKWE NE NIERE: “Kukwe chibätä ni ngökata ye ñan blo”.
-
¿Kukwe kri o kukwe chibätä ni ngökata ye jökrä tuin käme Jehovai? ¿Ñobätä mäta ye niere?
¿DRE NIBI GARE MÄI?
Ni ja ketaka Jehovabe ye käkwe kukwe metre niedre aune nuaindre ngübata kwe.
Ngwankäreta törö
-
¿Ja ngwan metre ye ni raba bämike kukwe meden meden känti?
-
¿Kukwe ükata ye ñobätä ja di ngwanta ngwarbe ni raba niere?
-
¿Kukwe meden meden abokänbätä käre mä rabadre kukwe metre nuainne?
KUKWE MIKE GARE BÄRI JAI
¿Monsotre kukwe metre niedre ye nitre rüne raba driere ño ie?
Nita ja kukwei kitekä tä mike täte, ¿ye kräke dre kwin tä nemen bare?
¿Nita impuesto bien ye gateta ngwarbe biti ta nikwe ütiä biandre? Ye mike gare jai.
“¿Mä rabadre impuesto bien?” (Ni Mikaka Mokre, 1 septiembre 2011)
Dre käkwe ni gokä töi mikani ja töi kwite aune kukwe kwin nuainne ye mike gare jai.
“Jehová töi kwin aune tä ngite juen ta nibiti ye rababa gare tie” (Ni Mikaka Mokre, 1 mayo 2015)
Ne rabai tuen kwin mäi arato
KUKWE NGWANTARITA BÄRI
¿Ja tötika Bibliabätä drieta ni testiko Jehovakwe ye abokän ño?
Ni testiko Jehovakwe tä ni tötike ye ütiä kärä ñaka aune mä raba ja tötike Biblia jeñe mäkwe yebiti. Ne madakäre mä raba mä mräkä jökrä o ja ketamuko ye nübaire jabe ja tötike.
