Nitre tä ja mäkete ngwane, kä ye näire käta nemen juto krubäte bätätre aune kä juto ye tädre käre kwetre ie töta nemen. Bäkänä nüna raba kä jutobiti jabe. Nitre kristiano ja mäkäninte kä kwati te tätre ja di ngwen kukwe ja jie ngwankäre Bibliabätä mikakäre täte yei kukwe ne gare metre.

1. ¿Ni brare tä mukobe yei Biblia tä dre niere?

Ni brare mukobe ye rabadre mräkä kwe jie ngwen, ye sribie mikani Jehovakwe kötärä. Aune tä kukwe nuainne ye käkwe kukwe kwin mikadre bare mräkä kwe kräke ngübata Jehovakwe (mäkwe ñäkä Efesios 5:23 yebätä). Bibliata ne niere ni brare mukobe ie: “Mun […] meri munkwe tare” jankunu (Efesios 5:25). ¿Ye dre gärätä? Ni brare tä muko tarere, ye tä bämike ni kwati okwäbiti aune kaibe. Tä muko kriemike aune dre ribeta kwe jai ye tä juto biare biankäre ie (1 Timoteo 5:8). Aune bäri ütiäte, tä ja töi mike käne muko kwe dimike kukwe ja üairebiti (Mateo 4:4). Ñodre, raba orare aune ñäke Bibliabätä ben. Ni brare tä muko kwe tarere ngwane, tä ja kete kwin Jehovabe (mäkwe ñäkä 1 Pedro 3:7 yebätä).

2. ¿Biblia tä dre niere meri ja mäkäninte ie?

Meri ja mäkäninte käkwe muko kwe ‘mikadre ütiäte jae’ nieta Ngöbö kukweibätä (Efesios 5:33). ¿Raba nuainne ño? Muko kwe töi kwin aune muko tä ja di ngwen krubäte niara ngübakäre aune monso kwe ngübakäre yebätä raba töbike. Arato, muko tä dre den nuaindre jai yebätä raba dimike, blite töi kwinbiti ben, blite kwinbätä yebiti tä mike ütiäte jai raba bämike. Muko ñan kukwebätä yebiti ta.

3. ¿Ja mäkäte ye mikakäre bäri dite dre nuain raba?

Ni ja mäkäninte yebätä Biblia tä niere: “Ni nibu ye abko rabadi ni itibe kwrere” (Mateo 19:5). Ne tä mike gare kukwe ño raba niaratre denkä jene jene yebätä rabadre ja krie mike. Ye medenbätä, käre tätre kä denkä jai ja kräke, ja ruin ño ietre, töita ño yebätä tätre blite töi kwinbiti jabe. Ne madakäre, Jehová aune muko kwe yebiti ta ñaka jondron o ni mada mike bäri ütiäte jai. Aune nibutre tä ja ngübarebiti ñaka ja kete ja ken krubäte ni madabe, töi mikakäre jabätä.

 JA TÖTIKE BÄRI NGUSETA

4. Ni brare, mä muko ye tarere aune kriemike

5. Meri mä muko tarere aune mike ütiäte jai

Ni brare tä Jehová mike täte o ñakare, akwa muko kwe rabadre mike ütiäte jai nieta Bibliakwe. Ñäkädre 1 Pedro 3:1, 2 yebätä aune kukwe ne kädriedre jabe:

• Mä muko ñan kukwebätä mäbe ngwane mä tö tuai Jehová mike täte ¿ñan ererea? ¿Käre mäkwe kukwe driei ie ye käkwe dimikai? O ¿mäkwe taredi, ja ngwain kwin ben aune mikai ütiäte jai ye käkwe dimikai raba ruin mäi?

Ni brare aune meri ja mäkäninte raba kukwe kwin den nuaindre gwairebe jai. Akwa ye ñan tä  mike gare muko brare tä kukwe den nuaindre jai ye käre rabai debe kräke. Ye erere ngwane, niara töita ño ye raba mike gare töi bökänbiti muko ie. Akwa, dre bäri kwin ni ja mräkäre kräke ye brarekwe diandre nuaindre jai ye Jehovakwe mikani kisete, ye meri rabadre ngwen törö jai. Aune brare tä kukwe den nuaindre jai ye jökräbätä muko rabadre dimike. Ye köböire kä täi juto mräkätre kwebätä. Ñäkädre 1 Pedro 3:3-5 yebätä aune kukwe ne kädriedre jabe:

• Meri tä muko kwe mike ütiäte jai ngwane, ¿jata nemen ruin ño Jehovai?

6. Kukweta nemen jabätä ye ganain raba

 ¿DRE NIBI GARE MÄI?

Ni brare aune merire tä ja tarere, ja mike ütiäte jai aune kukwe Bibliabätä mike täte ngwane raba nüne kä jutobiti.

Ngwankäreta törö

• ¿Ni brare raba dre nuainne ne kwe kä tädre juto muko kwebätä?

• ¿Meri raba dre nuainne ne kwe kä tädre juto muko kwebätä?

• Mäta ja mäkäninte ngwane, ¿kukwe ja jie ngwankäre Bibliabätä meden raba mun mike bäri dite?