KUKWE JA TÖTIKARA 53
¿Ja näkwita mäkwe ye tä kä mike juto Jehovabätä?
Ngöbö Jehová ye kä juto bökänkä (1 Timoteo 1:11). Aune nikwe nünandre kä jutobiti ie tö. Nita sribire, akwa nikwe kä diandrekä jai ja dükakäre aune ja jäkäkäre chi ye tuin kwin ie. Nita ngwarbe ngwane ño ni raba kukwe kwin nuainne aune kä mike juto Jehovabätä ye rabai gare nie kukwe ja tötikara nekänti.
1. ¿Kukwe dianta ja näkwitara jai ngwane drebätä töbikadre?
¿Mäta kä denkä jai ja kräke ngwane, mä töta nemen dre nuaindi? Nitre ruäre tä nemen gwi ñäke täräbätä, musika kukwe nuin, pelikula mrusaire o kukwe känene internete. Mada abokän töta nemen kukwe mada nuaindi ja ketamuko kwe ben ñodre, dikekä ji ngrabare, jübenkä ñöte o jadenkä. Kukwe ño ni töta nemen nuaindi akwa ye “dbe ni” Dänkien kräke o ñakare ye nikwe mikadre gare kwin jai (Efesios 5:10). Kukwe ne tädre gare kwin nie ye ütiäte krubäte. Ñobätä ñan aune kukwe keta kabre nitre tä den jai ja näkwitara ye tuin käme Jehovai ñodre, ja nuainta tare, raba kämekäme jabe o ja mäkä chokabe (mäkwe ñäkä Salmo 11:5 yebätä). ¿Dre käkwe ni dimikai kukwe kwin den nuaindre jai?
Ni Jehová tarekä yebe nikwe ja ketai ngwane, niaratre käkwe ni dimikai ja näkwita kwin ye den jai. Rababa gare nie kukwe ja tötikara 48 yebätä erere, “nire tä näin nitre töbätä ben ye rabai töbätä”. Akwa, nire tä ja kete ni ñan kukwe Jehovakwe mike täte yebe “ye kräke kukwe tare tä” (Proverbios 13:20).
2. ¿Nikwe ja näkwitai nuäi ye ükadrete kwin jai ye ñobätä ütiäte?
Ni ñan kukwe blo den jai ja näkwitara akwa nikwe ja ngübadrebiti ne kwe ñaka kä diandrekä krubäte jai kräke. Nikwe kä diainkä krubäte jai ja näkwita ye kräke ngwane, kä ñan rabaite nie kukwe bäri ütiäte ye nuainkäre. Nikwe ñaka kä juandre ngwarbe ta nieta Bibliakwe (mäkwe ñäkä Efesios 5:15, 16 yebätä).
JA TÖTIKE BÄRI NGUSETA
Mä raba dre nuainne kukwe kwin diankäre nuaindre jai ja näkwita yebätä ye ani mike gare jai.
3. Ja näkwita käme yebätä ja ngübarebiti
¿Ñobätä ñaka ja näkwitadre okwä kware? VIDEO mikadre ñärärä, biti kukwe ne kädriedre jabe:
-
Jadaka nämäne kira Roma, ¿ye kukwe medenbätä ja erebe jadakata nengwane yebe?
-
Turi videote erere, ¿ja näkwita yebätä dre nibi gare Danny ie?
Ñäkädre Romanos 12:9 yebätä aune kukwe ne kädriedre jabe:
-
¿Ja näkwita yebätä bersikulo ne raba ni dimike ño?
¿Kukwe meden meden kräke Jehová brukwä? Ñäkädre Proverbios 6:16, 17; Gálatas 5:19-21 yebätä aune kukwe ne kädriedre jabe:
-
Kukwe kädrite texto nekänti erere, ¿meden meden nuainta bäri nengwane raba ruin mäi?
¿Ja näkwita kwin ye dian raba nuaindre ño jai?
Ngwentari jai:
-
¿Drebätä jadakata? ¿Kukwe tuin käme Jehovai nuainta yete?
-
¿Ñongwane? ¿Kukwe bäri ütiäte yebätä tä kä denkä tikän?
-
¿Ni ño ben? ¿Nitre ñan Jehová tarere yebe ti täi ora kabre te?
Ni ñan juruaindre tare yekäre, ni gitiadre kukwe tare yebätä. Ye medenbätä, jadaka raba kukwe tare mike nemen bare nibätä rabadre ruin nie ngwane, ni gitiadrebätä.
4. Ñan kä juan ngwarbe ta
VIDEO mikadre ñärärä, biti kukwe ne kädriedre jabe:
-
Eteba videote ye ñan täni kukwe käme nuainne, ¿akwa kä nemente ngwarbe ie yebiti täni dre nuainne?
Ñäkädre Filipenses 1:10 yebätä aune kukwe ne kädriedre jabe:
-
¿Nikwe kä diainkä nuäi jai kä ngwankäre juto jabätä yebätä bersikulo ne raba ni dimike ño?
5. Mä ja näkwita kwin dian jai
Bäkänä, ja näkwita ruäre ye tuin käme Jehovai, akwa keta kabre tuin kwin ie yebätä ni raba ja näkwite. Ñäkädre Eclesiastés 8:15; Filipenses 4:8 yebätä aune kukwe ne kädriedre jabe:
-
¿Ja näkwita kwin ye meden tuin kwin mäi?
Kukwe kwin nuain raba kä ngwankäre juto jabätä.
NITRE RUÄRE TÄ KUKWE NE NIERE: “Ja näkwita känti ja mäkä chokabe, ni nuainta tare o raba kämekäme jabe mikata ye ñan käme, ¡nuaindre yebrä käme!”.
-
¿Mäkwe dre niedre?
¿DRE NIBI GARE MÄI?
Nikwe kä ngwandre juto jabätä aune ja näkwita kwin diandre jai ie Jehová tö.
Ngwankäreta törö
-
¿Kukwe ño abokänbätä ni kristiano ñan ja näkwite?
-
¿Ñobätä ni rabadre ja ngübarebiti kä diankata nuäi jai ja näkwitara yebätä?
-
¿Ñobätä mä tö ja näkwita tuin kwin Jehovai ye diain jai?
KUKWE MIKE GARE BÄRI JAI
Drebätä nikwe ja näkwitadre ye tä gare nirei, ye mike gare jai.
“¿Pelikula, tärä o kansion meden tuadre ye tä listabätä nitre testiko Jehovakwe?” (Artículo jw.org)
Ño ja näkwita kwin dian raba jai, yebätä ñäke.
“¿Kukwe ñan blo yebätä ja näkwitata?” (Ni Mikaka Mokre, 15 octubre 2011)
Ñobätä ni iti käkwe ja näkwita ruäre tuanimetre ye mike gare jai biografía “Ti töi nämä ño yebätä ti rababa kwäre”.
“Biblia niaratre töi kwitani” (Ni Mikaka Mokre, 1 febrero 2010)
Meri iti nämäne ja näkwite kukwe chokakwe yebätä, akwa ñobätä kukwe kwin diani nuaindre kwe jai ye tuin.
Ne rabai tuen kwin mäi arato
KUKWE NGWANTARITA BÄRI
¿Ja tötika Bibliabätä drieta ni testiko Jehovakwe ye abokän ño?
Ni testiko Jehovakwe tä ni tötike ye ütiä kärä ñaka aune mä raba ja tötike Biblia jeñe mäkwe yebiti. Ne madakäre mä raba mä mräkä jökrä o ja ketamuko ye nübaire jabe ja tötike.
