KUKWE JA TÖTIKARA 55
Konkrekasion dimike
Konkrekasion kä jökräbiti tibien te nitre millón kwati tä Jehová mike täte kä jutobiti. Kukwe ja jie ngwankäre bianta nitre kristiano ie, ye tätre kain ngäbiti kä jutobiti. Aune kukwe keta kabrebiti tätre konkrekasion dimike, ¿ja ruin kore mäi konkrekasion mäkwe yete?
1. ¿Mä raba dre nuainne ja mräkätre konkrekasionte dimikakäre?
Ni jökrä raba konkrekasion dimike. ¿Ja mräkätre umbre o ja mräkä bren tärä konkrekasionte? ¿Mä raba niken ngwena gätäbätä? O ¿mä raba niken jondron kökö kräke o dimike gwita? (mäkwe ñäkä Santiago 1:27 yebätä). Ju Ja Ükarakrö ye mikata merebe o ükateta ngwane, ni raba sribire siba. Ni mika ñan ja dibiti kukwe ye nuainne, ñakare aune Ngöbö aune ja mräkätre tare nikwe, yebätä ja töi jeñebiti nita kukwe ye nuainne (Salmo 110:3).
Ni Testiko ja ngökani ñöte ye raba konkrekasion dimike kukwe madabiti. Biblia tä kukwe ribere ni kädekakäre siervo ministerial ye ni testiko tä mike täte ngwane, kädekata siervo ministerial biti ja känenkäre kädekata ni umbrere. Aune ni jökrä brare aune merire raba precursor nuainne konkrekasion dimikakäre. Arato, ni testiko ruäre tä sribire siba Ju Ngöbö mikara täte yebätä. Aune ruäre abokän tä ja kwite konkrekasion tä ja di ribere yekänti.
2. ¿Ngwian aune jondron nikwe yebiti ni raba konkrekasion dimike ño?
“Mäkwe Jehová käikitaka jondron ütiäte mäkwe yebiti” nieta Bibliakwe (Proverbios 3:9). Ngwian aune jondron nikwe yebiti konkrekasion aune kukwe drie kä jökräbiti tibien dimikata ye tä kä mike juto nibätä (mäkwe ñäkä 2 Corintios 9:7 yebätä). Aune nita ngwian bien yebiti labores de socorro ye nita dimike. Käre ja mräkätre kwati tä ja töi mike “ngwian denkä chi” biankäre ja töi jeñebiti (mäkwe ñäkä 1 Corintios 16:2 yebätä). Ngwian ye mika raba caja ngwian mikara tä Ju Ja Ükarakrö yete o bian raba página internet donate.pr418.com yete. Jehová tare nikwe ye niarata ni tuenmetre bämike jai jondron tä nikwe yebiti.
JA TÖTIKE BÄRI NGUSETA
Kukwe medenbiti mä raba konkrekasion dimike ye ani mike gare jai.
3. Jondron tä mäkwe ye mä raba bien
Ni jondron bianka kä jutobiti ye tare Jehovakwe aune Jesukwe. Ñodre, meri kän muko krütani bobre käkwe ngwian dökai jakwe biani yebätä Jesukwe ja töi mikani. Ñäkädre Lucas 21:1-4 yebätä aune kukwe ne kädriedre jabe:
-
¿Ngwian biandre ere ne kwe kä rabadre juto Jehovabätä?
-
¿Nita jondron bien kä jutobiti ngwane, jata nemen ruin ño Jehová aune Jesús ie?
Jondron bianta yebiti dre nuainta mikakäre gare jai. VIDEO mikadre ñärärä, biti kukwe ne kädriedre jabe:
-
¿Nita jondron bien yebiti konkrekasion kä jökräbiti dimikata ño?
4. Mä raba sribire siba
Nitre Jehová mikaka täte kira käkwe sribibare kä jutobiti Ju Ngöbö mikara täte yebätä, aune ñan ngwian aibe biani kwetre. Ñäkädre 2 Crónicas 34:9-11 yebätä aune kukwe ne kädriedre jabe:
-
¿Ju Jehová mikakäre täte ye ngübakäre nitre israelita käkwe dre nuainbare?
Kukwe nieta Bibliakwe ne erere nitre testiko Jehovakwe tä mike ño täte mikakäre gare jai. VIDEO mikadre ñärärä, biti kukwe ne kädriedre jabe:
-
¿Ju Ja Ükarakrö tädre merebe aune ükaninte kwin ye ñobätä ütiäte?
-
¿Mä raba dre nuainne konkrekasion dimikakäre?
5. Ni testiko brare raba ja di ngwen sribikäre bäri
Bibliata nitre kristiano brare nübaire nirien jankunu kukwe ja üairebiti, ne kwe rabadre konkrekasion dimike. Ye erere ja mräkä iti käkwe nuainbare, mikakäre gare jai. VIDEO mikadre ñärärä, biti kukwe ne kädriedre jabe:
-
¿Ryan dre nuainbare ririakäre bäri ja üairebiti aune konkrekasion dimike?
Ni kristiano brare tö sribidi siervo ministerial aune ni umbrere ngwane, rabadre dre nuainne ye Biblia tä mike gare. Ñäkädre 1 Timoteo 3:1-13 yebätä aune kukwe ne kädriedre jabe:
-
¿Nitre tö sribidi siervo ministerial aune ni umbrere yebätä dre ngübata?
-
¿Dre ngübata mräkätre kwebätä? (Bersikulo 4 aune 11 mikadre ñärärä).
-
Kukwe ribeta ne ja mräkätre tä ja di ngwen mike täte ngwane, ¿tä mate ño konkrekasionbätä?
NITRE RUÄRE TÄ KUKWE NE NGWENTARI: “¿Ngwian ñobiti nitre testiko Jehovakwe tä sribi nuainne?”.
-
¿Mäkwe dre niedre?
¿DRE NIBI GARE MÄI?
Ja di nikwe aune jondron tä nikwe yebiti nita konkrekasion dimike ye ütiäte krubäte Jehová kräke.
Ngwankäreta törö
-
¿Dre nuain raba konkrekasion dimikakäre?
-
¿Jondronta nikwe yebiti konkrekasion dimika raba ño?
-
¿Mä tö konkrekasion dimikai ño?
KUKWE MIKE GARE BÄRI JAI
Diezmo biandre ye Ngöbö ñan niena ribere ye mike gare jai.
Sribi ruäre ye ni brare ja ngökani ñöte aibe käkwe nuaindre nieta Bibliakwe. Akwa ni merire rabadre nuainne ribedre ie ngwane, ¿dre nuaindre kwe?
“Kukwe ükaninte ji ngwankäre konkrekasionte” (Ni Mikaka Mokre, febrero 2021)
Ni testiko ruäre tä ja di ngwen krubäte ne kwe täräkwata rabadre ja mräkätre madakwe ye mike gare jai.
Religión mada tä ngwian ükekrö sribi jakwe nuainkäre ye erere ni testiko Jehovakwe ñaka nuainne ye mike gare jai.
“¿Ngwian ñobiti nitre testiko Jehovakwe tä sribire?” (Artículo jw.org)
Ne rabai tuen kwin mäi arato
KUKWE NGWANTARITA BÄRI
¿Ja tötika Bibliabätä drieta ni testiko Jehovakwe ye abokän ño?
Ni testiko Jehovakwe tä ni tötike ye ütiä kärä ñaka aune mä raba ja tötike Biblia jeñe mäkwe yebiti. Ne madakäre mä raba mä mräkä jökrä o ja ketamuko ye nübaire jabe ja tötike.
