Nita keteitibe ja mräkätre ben ngwane jata nemen ruin nie rei David erere. Niebare kwe: “¡Mike ñärärä, ja mräkätre tä nüne keteitibe aune jäme jabe ye kwin krubäte aune ye tä kä mike nuäre nibätä!” (Salmo 133:1). Nita keteitibe ye ñan ja töbiti, ñakare aune ni jökrä ie tä ja di ngwandre ne kwe ni tädre keteitibe.

1. ¿Juta Ngöbökwe ye abokän ño?

Mä janandre gätäbätä juta madate, ni kukwei ñaka rükadre gare mäi akwa ja rabadre ruin gwi mäi. Ñobätä ñan aune, mäta juta madate akwa ni testiko Jehovakwe tä ja tötike Bibliabätä täräkwata arabebiti ye jutuai mäi. Ne madakäre, nita ja di ngwen ja tarere kwärikwäri. Kä ñokänti nita nüne akwa ni jökrä tä ja di ngwen ‘Jehová kädekete aune sribire gwairebe’ kräke (Sofonías 3:9).

2. ¿Mä raba dre nuainne ne kwe konkrekasion tädre keteitibe?

Munkwe ja tare kwärikwäri ja brukwä tätebiti (1 Pedro 1:22). ¿Ño kukwe ne mika raba täte? Tä nainte ni madai yebätä ja töi mikadre näre, kukwe kwin nuainta kwe yebätä ja töi mikadre. Ni töi ja erebe mäbe ye ñan aibe ben mäkwe ja keta ñakare aune mäkwe ja di ngwan nitre ñan ja erebe mäbe ye mike gare kwin jai. Ne madakäre mä ñan ni mada kain ngäbiti ja erebe ngwane, mäkwe ja di ngwan kukwe ye denkä täte ja brukwäte (mäkwe ñäkä 1 Pedro 2:17 yebätä). a

3. ¿Kukwe rabai jabätä mäi ni kristiano madabe ngwane mäkwe dre nuaindi?

Nita keteitibe akwa ni töi ngite yebätä, ruäre ngwane nita ja mike ulire o kukwe tare nuainne jabätä kwärikwäri. Ye medenbätä Ngöbö kukwei tä niere: “Ngite juan jabiti ta kwärikwäri. Jehovakwe töi kwinbiti ngite juani munbiti ta, ye kwrere munkwe nuain” jankunu (mäkwe ñäkä Colosenses 3:13 yebätä). Bä kabre nita kukwe tare nuainne Jehovabätä, akwa käre tä ngite den ta nibiti. Ye erere arato nikwe ngite diandre ta ja mräkätrebiti ngübata kwe. Mäkwe kukwe tare nuainbare ni itibätä rabadre gare mäi ngwane, mäkwe ja di ngwan käne kukwe ye ükatekäre ni yebe (mäkwe ñäkä Mateo 5:23, 24 yebätä). b

 JA TÖTIKE BÄRI NGUSETA

4. Ñan ja brukwä mikadre ni mada kräke

Ni töta ja tare bämikabätä ja mräkätre jökrä ie. Akwa ja mräkätre ruäre ñan ja erebe nibe ye ñan tä nemen nuäre ni kräke ka ngäbitikäre aisete, ¿dre raba ni dimike kukwe nebätä? Ñäkädre Hechos 10:34, 35 yebätä aune kukwe ne kädriedre jabe:

• Jehovata ni jökrä kain ngäbiti ne kwe rabadre testikore kräke. ¿Kukwe ne ben töbätä ni ñan ja erebe mäbe ye mä rabadre mike tuin ño jai?

• ¿Mä käite kukwe medenbätä nitre tä ja brukwä mike ni mada kräke? ¿Ñobätä mä ñaka rabadre ja töi mike nitre ye erere?

Ñäkädre 2 Corintios 6:11-13 yebätä aune kukwe ne kädriedre jabe:

• ¿Mä raba dre nuainne ja etebantre aune ja ngwaitre tarekäre bäri?

5. Töi kwinbiti ngite den ta jabiti aune kä jäme känene

Ngite kitadre ta Jehovabiti ye ñaka ribere jire jai, akwa tä ngite kite ta nibiti töi kwinbiti. Ñäkädre Salmo 86:5 yebätä aune kukwe ne kädriedre jabe:

• ¿Jehovata ngite kite ta nibiti ye bersikulo ne tä mike gare ño nie?

• ¿Jehovata ngite den ta nibiti yebätä mäta debe bien? ¿Ñobätä?

• ¿Kukwe ño raba ni mike ñan ja mäkwe kwin ni madabe?

¿Ni raba ja ngwen ño Jehová erere aune nemen keteitibe jankunu ja mräkätre ben? Ñäkädre Proverbios 19:11 yebätä aune kukwe ne kädriedre jabe:

• Ni iti tä kukwe nuainne tä mate tare mäbätä ngwane, ¿mä raba dre nuainne kukwe ye ükatekäre?

 Nita kukwe nuainne tä mate tare ni madabätä ngwane, ¿dre nuain raba? VIDEO mikadre ñärärä, biti kukwe ne kädriedre jabe:

• Turi videote erere, ¿ja ngwai dre nunie ja mäkäkäreta?

 ¿DRE NIBI GARE MÄI?

Mäkwe ngite kitai ta ja mräkätrebiti aune ja tare bämikai ietre ngwane, mä täi ja di ngwen ne kwe konkrekasion tädre keteitibe.

Ngwankäreta törö

• ¿Ja brukwä mikata ni mada kräke ye mä raba ganainne ño?

• ¿Kukwe rabai jabätä mäi ni kristiano madabe ngwane, mäkwe dre nuaindi?

• ¿Jehovata ngite den ta nibiti ye erere mä törba nuain? ¿Ñobätä?