KUKWE JA TÖTIKARA 58
Mä ja ngwan metre Jehovai
Ni kristiano metre töita kwatibe ja ngwanbätä metre Jehovai kä jökrä ngwane. Mä töita kore ye gare metre nunye aune mäta ja ngwen metre ye ütiäte krubäte Jehová kräke (mäkwe ñäkä 1 Crónicas 28:9 yebätä). ¿Dre raba mä mike ñaka ja ngwen metre Ngöböi? ¿Mä raba dre nuainne ja tuakäre kukwe yebe?
1. ¿Nitre mada raba dre nuainne abokän raba ja ngwanta metre Jehovai ye nuinte?
Nitre ruäre käkwe kukwe nuaindi ne kwe nikwe ñaka Jehová mikadre täte jankunu. ¿Nire raba ye nuainne? Nitre ruäre kukwe metre tuanimetre aune nengwane tätre kukwe ngwarbe niere juta Ngöbökwe yebätä ne kwe nikwe ñaka tödekadre jankunu. Nitre ye kädekata apóstatas. Arato nitre ji ngwanka iglesiate tä kukwe ngwarbe niere nibätä ne kwe nitre ñaka dite kukwe ja üairebiti yekwe kämikadrekä kukwe metrebätä. Nitre ja mikaka juta Ngöbökwe rüere ben ñäkädre jai, página internete o video, tärä, blogs kwetre yebätä ñäkätre ye raba kukwe tare mike bare nibätä. Nitre ñan tö ni tuai ja ngwen metre Jehovai yebätä Jesukwe blitabare ngwane, niebare kwe: Tuenemetre niaratre ji ngwanka okwäte kä drune. Kä drune ni okwäte tä ni ie kä ñan tuin jie ngwen ngwane nibutre betaikä kä mäkäte (Mateo 15:14).
2. ¿Kukwe meden dianta nuaindre akwle jai abokän raba ja ngwan metre Jehovai ye nuinte?
Jehová tare nikwe aisete ni ñan tö ja mritai jire religión ngwarbe yebe. Sribi nikwe, organización te nita o jondron mada mada nuainta nikwe ye ñan tädre mritani jire religión ngwarbe yebe. Jehovata kukwe ne niere juta kwe ie: “Nän mento juta ne bäre” ye abokän kämikadrekä Babilonia Kri yebätä (Apocalipsis 18:2, 4).
JA TÖTIKE BÄRI NGUSETA
Mäta ja ngwen metre Jehovai ye ni madakwe ñaka juandre tibien yekäre mä raba dre nuainne ye mike gare jai. Aune kä mikakata Babilonia Kri yebätä yebiti ja ngwanta metre Jehovai ye mike gare jai arato.
3. Nitre kukwe ngwarbe driekä yebätä ja ngübadrebiti
Juta Ngöbökwe kädrie jatadre blo ni olote ngwane, ¿nikwe dre nuaindre? Ñäkädre Proverbios 14:15 yebätä aune kukwe ne kädriedre jabe:
-
¿Ñobätä nikwe ja ngwandre töbätä aune kukwe jökrä nieta ye ñan mikadre era jai?
Ñäkädre 2 Juan 9-11 yebätä aune kukwe ne kädriedre jabe:
-
¿Ja ngwandre ño nitre apóstata yebe?
-
Ni ñan ja kete nitre apóstata ben yebiti ta niaratre tä kukwe driere, ¿ye raba kite ni töi mike ño?
-
Kukwe ngwarbe nieta Jehovabätä o juta kwebätä yei ni tädre olo ketete ngwane, ¿ja rabadre ruin ño Jehovai raba ruin mäi?
4. Ja mräkä iti ja mikadre ngite ngwane, ja ngwandre metre Jehovai
Ni iti konkrekasionte kukwe blo krubäte nuainbare rabadre gare nie ngwane, ¿nikwe dre nuaindre? Nitre israelita kira ie Ngöbökwe lei biani yete kukwe ja jie ngwankäre ruäre raba nemen gare nie, ye mike gare jai. Ñäkädre Levítico 5:1 yebätä.
Mikata gare bersikulo nekänti erere, ni iti käkwe ja mikadre ngite krubäte rabadre gare nie ngwane, nikwe mikadre gare ni umbre ji ngwanka ie. Akwa ye känenkri töi kwinbiti nikwe niedre ni ja mikaka ngite yei, niara rabadre ja driere nitre umbre ji ngwanka ie. Ñan nuaindre kwe ngwane, ni tö ja ngwain metre Jehovai yebätä nikwe mikadre gare nitre umbre ji ngwanka ie. Nikwe kukwe ne erere nuaindi ngwane, ¿ñobätä nita ja tare aune ja ngwan metre bämike...
-
... Jehovai?
-
... ni ja mikaka ngite yei?
-
... konkrekasion ie?
Ja mräkä iti ja mikani kukwe kri te ngwane, ¡mäkwe dimika!
5. Mä tädre mente Babilonia Kri yebätä
Ñäkädre Lucas 4:8; Apocalipsis 18:4, 5 yebätä, biti kukwe ngwantarita ne kädriedre jabe:
-
¿Ti kä täbe tikani registro iglesia ngwarbekwe yete?
-
¿Organización keteiti iglesia ngwarbekwe ye ben tita sribire?
-
¿Sribi nuainta tikwe ye tä iglesia ngwarbe ye dimike?
-
¿Kukwe ruäre nuainta tikwe ye ti rabadre kwite kämikakakäre iglesia ngwarbe yebätä?
-
Kukwe ngwinintari ne ruäre ie nikwe “jän” nini ngwane, ¿nikwe dre nuaindre ükatekäre?
Kukwe ño erere känti mäkwe kukwe diandre nuaindre jai ye käkwe mä töi mikadre jäme aune mäta ja ngwen metre Jehovai ye rabadre bämike.
¿Religión ngwarbe tä kukwe ruäre nuainne ni mada dimikakäre ye kräke ja di ribedre mäi ngwane, mäkwe dre nuaindre?
NITRE RUÄRE TÄ KUKWE NE NIERE: “Nitre apóstata tä dre niere nitre testiko Jehovakwe yebätä ñan gare tie, ¿se ño tikwe ja mikadre kukwe metre kiri?”.
-
¿Töbikadre kore ye kwin ya? ¿Ñobätä?
¿DRE NIBI GARE MÄI?
Ni tö ja ngwain metre Jehovai ngwane, nikwe ñaka ja ketadre nitre tö ni ngökai yebe.
Ngwankäreta törö
-
¿Kukwe nieta nitre apostatakwe ye ñobätä ni ñan rabadre kukwe nuin?
-
¿Ja mräkä iti ja mikani ngite krubäte ye nita gain ngwane, nikwe dre nuaindre?
-
¿Kämikadrekä täte iglesia ngwarbebätä nieta ye mikakäre täte ni raba dre nuainne?
KUKWE MIKE GARE BÄRI JAI
Ni mada tä kukwe ngwarbe niere ni testiko Jehovakwebätä ngwane, mä raba dre nuainne ye mike gare jai.
“¿Kukwe nieta ye gare jökrä nie?” (Ni Mikaka Mokre, agosto 2018)
Organización o kukwe keteiti nuainta ye Babilonia Krikwe, ¿ñokänti raba nemen gare nie?
“Kä krüte ne näire sribidre jankunu” (Ni Mikaka Mokre, octubre 2019, párrafo 16 nemen 18)
¿Nitre ja mikaka kukwe metre rüere käkwe dre nuainbarera tödeka nikwe juankäre tibien?
Sacerdote sintoísta käkwe religión ngwarbe tuanimetre ye mike gare jai biografía “Ti nämä monsore ngwane, ti nämä Ngöbö känene”.
“Biblia niaratre töi kwitani” (Ni Mikaka Mokre, 1 julio 2011)
Ne rabai tuen kwin mäi arato
KUKWE NGWANTARITA BÄRI
¿Ja tötika Bibliabätä drieta ni testiko Jehovakwe ye abokän ño?
Ni testiko Jehovakwe tä ni tötike ye ütiä kärä ñaka aune mä raba ja tötike Biblia jeñe mäkwe yebiti. Ne madakäre mä raba mä mräkä jökrä o ja ketamuko ye nübaire jabe ja tötike.
