Ni jökrä tä ngwian ribere jai ni mräkä tä jondron ribere jai ye biankäre ietre (Proverbios 30:8). Erametre, “ngwian ye kwin ja kriemikakäre” (Eclesiastés 7:12). Ruäre ngwane ñaka nemen nuäre blitakäre ni mräkäbe ngwian ñakare yebätä, akwa mäkwe ñaka kukwe ye tuanmetre kukwe kri mike ja kisete nünankäre mä muko yebe (Efesios 4:32). Munkwe tö ngwan jai kwärikwäri aune drebätä munkwe ngwian kitaikä ye munkwe kädrie jabe.

BIBLIA TÄ NIERE: “Nane ni iti rikadre ju mike nura ngibiabtikrä angwane, ngwian tärä täte ju ye mikakrä bare täte jökrä ya, btä tä töbike käne, abti ngwian tärä täte ye ngwane tä ju mike” (Lucas 14:28). Ngwian munkwe yebiti munkwe dre dre nuain ye munkwe ükate jabe (Amós 3:3). Munta dre ribere jai aune mun raba ngwian kitekä nuäi ye munkwe mika gare jai (Proverbios 31:16). Ngwian tärä munkwe jondron kökakäre akwa ye ñan aibätä mun rabadre jondron ye kökö. Munkwe ja di ngwan ñaka rürübän ütiä mike jabiti, ngwian tärä munkwe ye aibe munkwe kitaka (Proverbios 21:5; 22:7).

MÄ RABA NE NUAINNE:

• Sö krüte yebätä ngwian rabate munye angwane, munkwe dre nuaindibiti ye mäkwe kädrie mä muko ben

• Rürübän ütiä tärä munbiti angwane, munkwe kukwe ükate kwin jai ngwian kitakakäre bäri brai. Ñodre, mun raba mrö sribere gwi ne kwe mun ñaka rikadre mröre kä madakänti

BIBLIA TÄ NIERE: “Ñan nun tö jändrän jökrä nuein kuin metre [Jehová, TNM] aibe okwäbti, akwa ni mda mda okwäbti arato” (2 Corintios 8:21). Mätä ngwian ganainne nuäi aune kitekä nuäi ye mäkwe nie metre mä muko ie.

Mä jämi ja töi mike jondron nuainne ngwian yebiti ye känenkri mäkwe kädrie mä muko ben (Proverbios 13:10). Mäkwe blitai kwin kukwe nebätä mä muko ben ye käkwe mä dimikai nüne töi jämebiti jabe. Mätä ngwian ganainne ye mä mräkäkwe ye kwrere mäkwe mika tuin jai, aune ñaka mä aibe kwe ye erere (1 Timoteo 5:8).

MÄ RABA NE NUAINNE:

• Mun itire itire raba ngwian kitekä nuäi ye mäkwe kädrie mä muko ben

• Mun rabadre ngwian ribere jai ye ñan aibe ngwane munkwe blita kukwe yebätä