Töbike kukwe nebätä: Bämän nebätä, bobu jire monsotre nibu niebare Brian ie rabadre sö duen. Bämäkäre niaratre bike kukwe ye arabe niere ie. Monsotre ye niki kokwäre ye ngwane niara nibi tibo ñöre ja jiebiti.

Monso iti nini ie:

Dininte balite kwe aune kötara kwärä ngürü kwe Brian ie.

Brian okwä nibi sö yebätä aune bäri nibi tibo ñöre ja jiebiti.

Mä Brian akräke, ¿mäkwe dre nuaindre?

Monsotre nänkä kwelate Brian ben ie nüke gare tätre kukwe ñaka kwin nuainne, ¿raba ruin mäi? ¿Ja töi jeñebiti tätre nuainne? Ñakare. Nitre mada tä niaratre töi kwite. Niaratre kadre ngäbiti ie tö, yebätä tätre nuainne.

Mä nuadrete kukwe ye kwrerebiti ye ngwane mä törba kukwe diain akwle ja käne, ¿ñan ererea?

1. JA NGWEN MOKRE

   Biblia tä niere: “Ni töbätä ie kukwe tare ye tuin aune tä kämikekä; akwa ni tö ñaka abokän tä kukwe ye nuainne jankunu aune kukwe tare tä nemen barebätä” (Proverbios 22:3).

   Ñongwane ni nuate raba ye raba nemen gare nie känenkri. Ñodre: Monsotre tädre sö duen ji ngrabare jutuadre mäi. Mäkwe dre nuaindre yebätä töbike käne kukwe kwin diankäre jai.

2. TÖBIKE

   Biblia tä niere: “Munkwe nüna kuin ni mda mda okwäbti” (1 Pedro 3:16).

   Ngwentari jai: “Nitre tä kukwe nuainne ye erere tikwe nuaindre angwane, ¿ja rabai ruin ño tie?”. Kenanbe monsotre ja ketai mäbe, akwa ñaka nuaindi jankunu kwetre angwane, ¿ja rabai ruin ño mäi? ¿Mäkwe kukwe kwin kitai tibien ne kwe mä matadre kwin monsotre yebätä? (Éxodo 23:2.)

3. JA TÖI MIKE KWATIBE

   Biblia tä niere: “Ni töbätä ye tä mokrere jabiti aune kukwe käme yebätä tä kämikekä” (Proverbios 14:16).

   Käre nita kukwe den nuaindre jai aune dreta nemen bare ye nikwe kadre ngäbiti. José, Job aune Jesús käkwe kukwe kwin diani nuaindre jai, akwa Caín, Esaú aune Judas ñaka kukwe ye erere nuainbare ye Biblia tä mike gare arato. ¿Mä abokän kukwe meden diain jai?

Biblia tä blite “ja ngwan metre” yebätä, aune ye erere nikwe ja ngwandre (Salmo 37:3). Mäkwe kukwe nuain ye ererebätä kukwe rabai mä kisete ye gare mäi angwane, rabai nuäre mä kräke blitakäre. Arato ye köböire jondron kwin rabai mäkwe.

Mäkwe ñaka nütü mä rabadre kukwe niere täte ietre. Mäkwe ñakare nie kwatibe. Mäkwe ñaka ja töi kwitai ye mikakäre gare ietre mä raba ne niere:

• “Ti ñaka täi siba yete munbe”.

• “Ti ñaka ye nuainne jire chi”.

• “Ti töita ño ye gare mäi”.

Mäkwe kukwe mikadre gare bengwairebe aune metre ta ye mä dimikai. Mäkwe ye nuain angwane monsotre ñaka mä nikai jankunu.

Monsotre raba kukwe nuainne mäbätä mä kötaikäre. Raba niere mäi: “¿Ñobätä mä ja ngwen kore ye? Mätä dre ngänikaire”. Kukwe ye kwrere nieta ni mada töi mikakäre kukwe nuainne jabe. Mä raba kukwe ketebu ne nuainne ja kriemikakäre:

• Mä raba kukwei kain ngäbiti. Mä raba niere ietre: “Metre, kä jürätä tibätä”. Ye bitikäre, mäkwe nie ietre ñobätä mä töita kore.

• Mä raba niere niaratre käre. Ñobätä mä ñaka kukwe ruäre nuainne ye mike gare, ye bitikäre mäkwe nie: “Ni töbätä mä erere ye aita sö duenya”.

Mä nika rabadre jankunu angwane mä rika mento, ñakare aune bäri mä töi mikai kukwe nuainne. Mäkwe kä mikadrekä ye ngwane rabai gare mäkwe dre nuaindre ye ni mada ñaka raba niere mäi.

Erametre, käre monsotre törbai mä tuai kukwe nuainne jabe. Dre nuaindi mäkwe, mä töita ño aune mäkwe ñaka monsotre tuainmetre ja töi kwite ye mä raba bämike metre. Mäkwe kukwe diandre akwle jai nuainkäre (Josué 24:15).