“¡Nitre tä Ngöbö kukwei nuin aune tätre mike täte yebätä kä täi juto!” (Lucas 11:28, Traducción del Nuevo Mundo.)

Ja tare erametre ye kwain nie (Efesios 5:28, 29).

Ja mikadi ütiäte kwärikwäri (Efesios 5:33).

Ja rabai ruin kriemikani nie (Marcos 10:6-9).

Jän, kukwe ketebubätä:

• Ngöbökwe nitre ja mräkäre ye ükaninte. Ngöbö Jehová käkwe ‘ni ja mräkäre jökrä sribebare’ nieta Bibliakwe (Efesios 3:14, 15). Ye abokän Jehovakwe ni ja mräkäre ye sribebare köböire tätre nüne meden gärätä. ¿Kukwe ne mikadre gare jai ye ñobätä ütiäte krubäte?

  Töbike kukwe nebätä: Mä tädre mrö bänänte kwete aune dre dre kitani te ye mä törbadre mikai gare jai angwane, ¿nirei mäkwe ngwandretari? Metrere, ni mrö ye sribekä ie.

  Ye erere arato, dre ribeta mäkwe nünankäre kä jutobiti mä mräkäbe ye mä tö gai angwane, mäkwe ngwandretari Jehovai ye bäri kwin, ñobätä ñan aune niarakwe ni ja mräkäre ye ükaninte kena (Génesis 2:18-24).

• Ngöbö töita nibätä. Jehová tä dre niere Bibliabätä ye mä aune mä mräkä käkwe känändre ja jie ngwankäre ñobätä ñan aune niara “töita käre [ni]btä” (1 Pedro 5:6, 7, Kukwe Kuin Ngöbökwe). Jehová tö ni tuai nüne kwin. Aune kukwe nieta kwe ye käre tä ni dimike (Proverbios 3:5, 6; Isaías 48:17, 18).