Adán bätä Eva monsoi namani, aune ye köböire nitre namani kwati kä tibienbätä. Ye bitikäre, angeletre ruäre käkwe ja mikani Satana yekri ja mikakäre Ngöbö rüere.

Niaratre jatani kä tibienbätä aune ja sribebare kwetre ni erere, ja mikakäre gure meritre ben. Meritre ye monsoi namani, rubun rubun aune krikri bätä dite krubäte.

Nitre kwati namani jondron käme nuainne kä jökräbiti tibien. Biblia tä niere: “Nitre namani jondron käme nuainne krubäte kä tibienbätä, aune nitre töi namani kukwe käme aibe nuaindi kä jökrä ngwane”.

Noé töi nämene kwin krubäte. Jehovakwe nitre töi käme ye gaite Ñü Kri yebiti niebare kwe Noé ie.

Noé käkwe ru kri kädeka nämene arka ye sribedre niebare ie Ngöbökwe arato, ne kwe niara käkwe mräkätre aune jondron nire keta kabre mikadre ru kri ye teri.

Ñü Kri namanina ja ken ye Noé niebare nitre ie, akwa nitre käkwe ñaka kukwe ye mikani täte. Ruäre namani Noé kötaire aune mada abokän brukwä namani kräke.

Arka ye namani bare täte angwane, Noé käkwe jondron nire ye juani kä teri.