Üai deme köböire Pablo mikani gare, ruäre ngwane ja ngwaitre rabadre ja dokwä juemike sribi Jehovakwe nuainkäre. ¿Ñongwane rabadre nuainne, aune ñobätä? Pablo kukwe niebare 1 Corintios 11:3-16 ye ani mike gare jai, ne kwe ja ngwaitre rabadre dre nuainne kukwe jene jene känti Ngöbö mikakäre ütiäte. Kukwe ketamä ngwandre törö jai Pablo niebare: 1) dre nuainta kwetre abokän kräke rabadre ja dokwä juemike; 2) medente, tätre jondron nuainne ye ngwane, aune 3) ñobätä kukwe ne nuaindre kwetre.

Dre nuainta. Pablo kukwe ketebu kädekaninte: orasion  aune Ngöbö kukwei mikata gare (bersikulo 4, 5). Orasion nuainta, yebiti Jehová mikata täte; aune, Ngöbö kukwei mikata gare, ye abokän nitre kristiano merire aune brare tätre ni mada tötike Bibliabätä kä nengwane meden gärätä. Yebätä, ¿ja ngwaitre tädre orare aune kukwe Bibliabätä driere ye ngwane käre rabadre ja dokwä juemike gäräbare Pablokwe? Ñakare. Kukwe ketebukäre yebiti rabai gare: medente tätre jondron nuainne ye ngwane.

Medente. Apóstol Pablo kukwe ketebu kädekaninte: ni mräkätre ben aune konkrekasionte. Kukwe ne tikabare kwe: “Ni brare abko tä ji dokwäte ni merire kräke [...] meri abko rikadre blite Ngöböbe amne rikadre Ngöbö kukwei niere [...] angwane, dän ñan kitadre ja dokwäbti kwe ye ngwane, ja dokwä mikata ütiäte ñakare kwe” (bersikulo 3, 5). Ja gwirete, Jehovakwe ni brare ye mikani ji dokwäre meri käne. Yebätä, ¿Jehovakwe sribi mikani ni brare kisete ye nuaindre kwe angwane dre raba nemen bare? Dre mikani nuaindre muko kwe ie ye ja mikai nuainkä kwe angwane, ñaka muko kwe ye mikai ütiäte kwe. Ñodre, ani kukwe keta kabre mike gare jai. Ja ngwai tädre muko kwe yebe angwane ni mada tötikadre Bibliabätä kwe. Muko mikakäre ütiäte jai, rabadre ja dokwä juemike. Muko kwe ye ja ngökanina ñöte o ñakare akwa nuaindre kwe, ñobätä ñan aune tä ji dokwäre mräkätre kräke. * ¿Aune ja ngwai käkwe oradre o ni mada tötikadre ngobo tä monsore akwa ja ngökanina ñöte kwe ye okwäbiti angwane rabadre dre nuainne? Niara ñaka ji dokwäre mräkätre käne, akwa meyekwe ja dokwä jue mikadre arato. ¿Ñobätä? Ñobätä ñan aune nitre brare ja ngökani ñöte ye kisete sribi mikani konkrekasionte ye mikata ütiäte kwe jai yebätä.

Kukwe ketebukärebätä Pablokwe blitabare, ye abokän  konkrekasionte, yebätä tikabare kwe: “Nane mun ruäre tö raba ja kwetai tibe kukwe nebtä ye abko raba gare munye, akwa nun amne ni mda mda gätäkä Jesu käbti kä mda mdate, ie kukwe mda mda bä jene tärä ya abko gare ñakare nunye” (bersikulo 16). Jehovakwe nitre brare ja ngökani ñöte ye mikani ji ngwanka konkrekasionte (1 Timoteo 2:11-14; Hebreos 13:17). Yebätä, tä nitre brare aibe kädekamana umbre aune sribikä konkrekasionte oveja Kwe ye ngübabitikäre (Hechos 20:28). Akwa ni brare ja ngökanina ñöte ye kisete sribita ye ruäre ngwane ja ngwai raba nuainne. Ñodre, ruäre ngwane raba gätä nuainne kukwe driekäre ñobätä ñan aune ja mräkä ñaka tädre nuainkäre yebätä. Gätä nuainta kukwe driekäre ye abokän kukwe dirita konkrekasionte kwrere, aune ja mräkä rabadre ye nuainne. Ja ngwai käkwe ni mada tötikadre Bibliabätä angwane, ja mräkä ja ngökanina ñöte tädre ken ye ngwane, ye erere nemen bare arato. * Ye medenbätä, niara rabadre ja dokwä juemike sribi ye mikani ni brare aibe kisete gare ie yebätä.

Akwa, kukwe mada keta kabre nuainta Ngöbö mikakäre täte yekäre niarakwe ñaka ja dokwä juemikadre. Ñodre, blitakäre gätäte, kukwe driekäre ju ju te (rikadre muko kwe ben o ja mräkä mada ja ngökanina ñöte ben) aune orasion nuainkäre o ja tötikakäre monsotre kwe jämi ja ngökö ñöte yebe. Akwa, ¿kukwe ruäre känti dre nuaindre kwe ñaka rabadre gare kwin ie angwane raba dre nuainne? Käne,  rabadre ja tötike kwin kukwe yebätä. * Akwa ñaka rükadre gare kwin ie, aune töi ñaka rabadre nike angwane, raba ja dokwä juemike ja ngwai bämikani nete ye erere.

Ñobätä. Kukwe ketebubätä ja ngwai rabadre ja dokwä juemike mikata gare bersikulo 10 yebätä: “Ne aisete ni merire käkwe ja dokwä jue mikadre brare kwe bä mikakäre ütiäte amne angeletre kisete ni merire käkwe ja dokwä jue mikadre arato”. Kukwe kena ye abokän “mikakäre ütiäte” nieta. Erametre, ja ngwai tä ja dokwä juemike yebiti tä bämike ni brare ja ngökani ñöte ye kädekata Jehovakwe ji ngwanka konkrekasionte ye ütiäte kräke. Yebiti Ngöbö tare kwe aune tä ja ngwen metre ie ye tä bämike. ¿Kukwe meden ketebukäre yebätä tä nuainne? Bersikulo tä niere erere, “angeletre kisete” tädre nuainne. Akwa, ¿meri käkwe ja dokwä juemikadre ye raba mate ño nitre üaire dite yebätä?

Nitre jökrä Kä tibienbätä aune kä kwinbiti tä juta Jehovakwe yete, yebätä angeletre okwäta aune Ngöbökwe kukwe ükaninte ye tätre mike ütiäte jai yebätä okwäta arato. Ñodre, nitre töi ngite akwa tätre kukwe mike täte ye tä kukwe kwin driere ietre. Ne madakäre, Ngöbökwe kukwe ükaninte ye nitre üaire ye rabadre mike täte arato, ruäretre abokän käkwe ñaka nuainbare (Judas 6). Kä nengwane, ja ngwaitre ie kukwe gare o töbätä akwa tätre ja mräkätre ja ngökani ñöte ye mike ütiäte jai angwane, ye tä kukwe kwin mike gare angeletre yei. Aune ja ngwai tä kukwe bämike ye dianinkä nänkäre kä kwinbiti ye ngwane kukwe ye tä mate bäri kwin bätätre. ¿Ñobätä? Ñobätä ñan aune ja känenkäre ja ngwaitre ye rabai gobrane Kristobe kä kwinbiti, rabaitre kädekani angeletre yebiti ta. Mikata gare ne erere, sribi ütiäte krubäte tä ja ngwaitre ye käne. Tätre ja ngwen metre aune tätre kukwe kain ngäbiti yebiti töi bobre aune tätre ni mada kukwei mike täte ye tätre bämike angeletre kwati krubäte yei.