Nitre jökrä Jehová tarekä ye kräke:

Jesukwe niebare: “Kukwe era metre Ngöböbta rükadi gare munye amne kukwe era yebti mun rabadi tikaninte” (Juan 8:32). ¡Kukwe kwin krubäte! Kukwe taretare tä nakainkä, “kä mrä” nete, nitre tä ni ngökö käbiti tibien, akwa kukwe metre ye raba nemen gare nie (2 Timoteo 3:1). Ñodre, kukwe metre Bibliabätä yebätä ni jatani ja tötike ngwane kä namani juto krubäte nibätä ye törö nie. ¡Kukwe kwin krubäte namani bare ni kräke!

Akwa kukwe metre rabadre gare kwin nie aune mikadre gare käre ye ñan ngörä. Kukwe ye ererebätä nünandre ye ütiäte krubäte. Ye erere, nikwe Ngöbö taredre jankunu. Akwa ¿ño ni raba niara tarere jankunu? Jesús murie keta jämi ye känenkri kukwe ye mikani gare deu kwe, niebare kwe nitre apóstol nänkä metre ben yei: “Ti Rün kukwei mikata täte metre tikwe, abtä ti Rünta ti tarere kärekäre [...], ye kwrere jire munkwe ti kukwei mikadre täte ne ngwane, tita mun tarere kärekäre rabadre nüke gare kärekäre munye arato” (Juan 15:10).

¿Jesukwe Ngöbö tarebare ño jankunu nieta nete? Rün kukwei mikani täte kwe. Ye erere nikwe nuaindre arato. Ngöbö tarekäre jankunu, nikwe jondron jökrä nuaindre ye ngwane ja jie ngwandre kukwe metre yebiti. Ye erere Jesukwe niebare köbö yete deu: “Jondron ne nüke gare mun ie, angwane munkwe ja kitaibätä, angwane kä rabai nuäre munbätä” (Juan 13:17, Ngöbö Täräe, tärä okwä ükaninte).

Tärä ne ni jökrä dimikadre kukwe metre nuainne ye ie nun tö, ye köböire nikwe “Ngöbö taredre jankunu, [...] ne kwe ja nire käre rabadre nikwe” (Judas 21, TNM).