Jehová, ni Rün aune jondron jökrä Sribekä, ye bäri töbätä ni kräke. Ne madakäre, ni tare kwe aune töita nibätä. Niarakwe ñaka ni sribebare ne kwe nikwe ja jie ngwandre akwle (Jeremías 10:23). Monso kia ye rünkwe jie ngwandre tätre ribere jai, ye erere Ngöbökwe ni jie ngwandre nita ribere jai arato (Isaías 48:17, 18). Kukwe Bibliabätä ja jie ngwankäre ye jondron kwin niarakwe biani nie. Mäkwe ñäkä 2 Timoteo 3:16 yebätä.

Ño ni raba nüne bäri kwin aune ja känenkäre ño jondron kwin raba nemen kärekäre nikwe ye kukwe ükaninte aune kukwe ja jie ngwankäre Jehovakwe tä driere nie. Niarakwe ni sribebare yebätä nikwe niara kukwei kadre ngäbiti töi kwinbiti. Mäkwe ñäkä Salmo 19:7, 11 aune Apocalipsis 4:11 yebätä.

Kukwe jene jene rabadre ni kisete ye ngwane nikwe dre nuaindre ye kukwe metre Bibliabätä ja jie ngwankäre raba mike gare nie. Akwa, kukwe ükaninte nuaindre ye nuain raba metrere kukwe ruäre känti (Deuteronomio 22:8). Kukwe ja jie ngwankäre ye mika raba täte ño kukwe ruäre känti mikadre nüke gare jai yekäre, ni rabadre töbiketari kwin kukwe yebätä (Proverbios 2:10-12). Ñodre, Biblia tä driere ja nire ye Ngöbökwe biani. Kukwe ütiäte ja jie ngwankäre ne raba ni jie ngwen sribikänti, ja gwirete aune nita niken kä madakänti ye ngwane arato, ñobätä ñan aune ni rabadre ja kriemike ye tä ngwen törö nie. Mäkwe ñäkä Hechos 17:28 yebätä.

Kukwe ketebu ja jie ngwankäre ye Jesukwe mikani gare. Ñokäre ni sribebare ye kukwe kena tä mike gare: Ngöbö mikakäre gare jai, tarekäre aune mikakäre täte metre. Kukwe ja jie ngwankäre ne ni rabadre ngwen törö jai kukwe meden dianta nuaindre jai nikwe ye jökräbätä  (Proverbios 3:6). Nire nire käkwe ja tuainmetre jie ngwandre kukwe yei ye rabai ja ketamuko Ngöbökwe aune kä juto erametre bätä nüna kärekäre ye rabai kwetre. Mäkwe ñäkä Mateo 22:36-38 yebätä.

Kukwe ketebu ja jie ngwankäre ye tä ni dimike ja mäke kwin ni madabe (1 Corintios 13:4-7). Nikwe nuaindi angwane ni täi ja ngwen Ngöböta nitre mada mike tuin ño jai ye erere. Mäkwe ñäkä Mateo 7:12 aune 22:39, 40 yebätä.

Kukwe Bibliabätä ja jie ngwankäre ye tä ni ja mräkäre mike ja tarere aune nüne keteitibe (Colosenses 3:12-14). Kukwe keteiti ye tä niaratre kriemike, ñobätä ñan aune tä driere nitre gure metre ye rabadre nüne kärekäre jabe. Mäkwe ñäkä Génesis 2:24 yebätä.

Kukwe Bibliabätä ja jie ngwankäre ye tä ni dimike metre aune ja ruin ño nie yebätä arato. Ñodre, nitre tä ja tuenmetre jie ngwandre kukwe Bibliabätä ja jie ngwankäre yei aune tätre ja ngwen kwin aune sribire kwin ye abokän nübaita sribi keta kabre nuainne (Proverbios 10:4, 26; Hebreos 13:18). Ne madakäre, dre dre ribeta nikwe jai nünankäre ye aibe rabadre nikwe aune ja ketadre Ngöböbe mikadre bäri ütiäte jai jondron kä nebätä yebiti ta, ye Kukwe Ngöbökwe tä driere nie. Mäkwe ñäkä Mateo 6:24, 25, 33 aune 1 Timoteo 6:8-10 yebätä.

Kukwe ükaninte Ngöbökwe tä ni kriemike dröbanika, bren aune kukwe tare yebätä, ye erere kukwe Bibliabätä ja jie ngwankäre tä ni ngrabare kriemike (Proverbios 14:30; 22:24, 25; 23:20). Jehová tä ni tuenmetre dö ñain, akwa nikwe ñaka nuaindre ja mikakäre dröbare (Salmo 104:15; 1 Corintios 6:10). Kukwe Bibliabätä ja jie ngwankäre ye tä ni dimike, ñobätä ñan aune tä ni töi mike ja kriemike nita ja ngwen ño aune ni töita ño yebätä (Salmo 119:97-100). Akwa ni kristiano metre ye tä mike ütiäte jai kukwe kwin rabadre nikwe ye ñaka aibe kräke; ñakare aune nita nuainne Jehová, ni Rün kä kwinbiti mikakäre ütiäte jai. Mäkwe ñäkä Mateo 5:14-16 yebätä.