Ye gobran kä kwinbiti abokän rabai gobrantre kä tibienbätä täte aune Ngöbö töi mikai nemen bare kwe kä tibienbätä tä nemen bare kä kwinbiti erere. Gobran Ngöbökwe ye abokän ribeta jai nitre kä tibienbätä yekwe, gobran ye nitre jökrä mikai nüne keteitibe. Kukwe ne kwin krubäte, ¿ñan ererea? Mäkwe ñäkä Daniel 2:44; Mateo 6:9, 10, aune 24:14 yebätä.

Nitre gobranka ye ngätäite ni iti ribeta ji ngwankäre käne, ye erere Ngöbö Jehová käkwe Monsoi, Jesukristo, kädekani Reire gobran kwe yete. Mäkwe ñäkä Apocalipsis 11:15 yebätä.

Video ¿Dre abokän Gobran Ngöbökwe? mikadre ñärärä.

Ngöbö Monsoi ye rei bäri kwin ñobätä ñan aune töi kwin ni mada kräke aune käre tä kukwe metre nuainne (Mateo 11:28-30). Ne madakäre, die tärä nitre dimikakäre, aune ye köböire kä kwinbiti rabai gobrane Kä tibien nebiti. Jesús ganinkröta ye bitikäre nikaninta kä kwinbiti, aune namani Ngöbö kise ruinkri nememe kädekani gobrankäre ye ngwane (Hebreos 10:12, 13). Mrä mada, Ngöbökwe kädekani gobrankäre. Mäkwe ñäkä Daniel 7:13, 14 yebätä.

Biblia tä niere nitre Ngöbö mikaka täte ye braibe käkwe gobrandi Jesube. Daniel 7:27 yekänti niaratre kädekata deme. Nitre apóstol Jesukwe ye dianinkä kena Ngöbökwe rabakäre deme. Kä nengwane Jehová täbe nitre brare aune merire tödekaka ie ye denkä ne kwe rabadre deme. Jesús erere nitre ye krütai ye bitikäre näin kä kwinbiti aune rabai üaire. Mäkwe ñäkä Juan 14:1-3 aune 1 Corintios 15:42-44 yebätä.

¿Nitre nibe näin kä kwinbiti? Nitre braibe näin kä kwinbiti nieta Bibliakwe, niaratre kädekani Jesukwe “obeja braibe”  (Lucas 12:32, TNM). Nitre 144.000 aibe käkwe gobrandi gwairebe niarabe Kä tibien nebiti. Mäkwe ñäkä Apocalipsis 14:1 yebätä.

Jesús namani reire kä 1914, ye ngwane käne Satana bätä chokalitre kitani kwe Kä tibienbätä. * Diablu namani rubun krubäte yebätä namani kukwe käme nuainne kä jökräbiti tibien (Apocalipsis 12:7-10, 12). Ye ngwane ja känenkäre kukwe käme jatani nirien bäri. Rü, dobo kri, bren, mrönikata, ye tä mike gare Gobran Ngöbökwe köböra Kä tibien gobraine mikani gare ye erere. Mäkwe ñäkä Lucas 21:7, 10, 11, 31 yebätä.

Kukwe drieta kä jökräbiti tibien ye köböire, Gobran Ngöbökwe tä nitre “kwati” kä jökräbiti tibien ükökrö. Nitre kwati brare aune merire brukwä kwin ye Jesuta jie ngwen. Gobran Ngöbökwe käkwe nitre käme gaite ye ngwane nitre jökrä rabaite nire. Gobran kukwe kwin nuain ye ni tö tuai nemen jakwe angwane, nikwe Jesús mikadre täte. Mäkwe ñäkä Apocalipsis 7: 9, 14, 16, 17 yebätä.

Kä mil yete, Gobran ye käkwe Ngöbö töi nämene dre nuaindi kena ni kräke ye mikai nemen bare. Kä tibien ne kwitai bä nuäre. Ye bitikäre, Jesukwe Gobran ye biainta Rün kwe ie (1 Corintios 15:24-26). ¿Mä törba kukwe mikai gare Gobran nebätä nitre madai? Mäkwe ñäkä Salmo 37:10, 11, 29 yebätä.