Iglesia jökrä yete nitre töi bobre aune blite metre tärä. Ngöböta niaratre mike ütiäte jai aune töitabätä ye kukwe kwin krubäte. Akwa, iglesia ye köböite kukwe käme nuainta krubäte (2 Corintios 4:3, 4; 11:13-15). Ni kwati kämikata kä jürä ngwankäre ni madabätä, nitre kwati murie ketata, rü aune küdreta monsotre kiabätä o mikata jabe yete nitre iglesia ruäre te tä ja mike ye ni tärä kukwe nuin noticia yete. ¡Kukwe ye tä nitre Ngöbö mikaka täte brukwä kwin mike ulire! Mäkwe ñäkä Mateo 24:3-5, 11, 12 yebätä.

Nitre kukwe metre mikata täte tä Jehová mike ütiäte jai, akwa iglesia ngwarbe abokän tä ñäke rüere. Iglesia ye tä kukwe ngwarbe driere Ngöböbätä aune nitre krütanina yebätä, aune kukwe ñaka tikani Bibliabätä drieta kwetre. Akwa Jehová tö nitre jökrä tuai kukwe metre mike gare jai niarabätä. Mäkwe ñäkä Ezequiel 18:4 aune 1 Timoteo 2:3-5 yebätä.

Ngöbö ñaka ja tuenmetre ngökadre nitre iglesiate tä ja bien niara tarere yei, akwa metrere niaratre tä jondron kä nebätä Satanakwe tarere (Santiago 4:4). Iglesia ngwarbe ye jökrä Biblia tä kädeke “Babilonia Kri”, ye abokän Ñü kri näkäni Noé näire ye bitikäre juta kira yekri iglesia ngwarbe jatani ye meden gärätä. Iglesia jökrä tä nitre ngökö aune tä mike ja tare nike ye gwäune Ngöbökwe gaite jötrö ngwarbe. Mäkwe ñäkä Apocalipsis 17:1, 2, 5, 16, 17 aune 18:8 yebätä.

Iglesia ngwarbe te nitre töi kwin tä jene jene yebätä Jehová töita aune tä niaratre ükökrö. ¿Tä nuainne ño? Tä kukwe metre driere ietre. Mäkwe ñäkä Miqueas 4:2, 5 yebätä.

Nitre tä kukwe metre tarere aune tö kukwe kwin nuain yebätä Jehová töita. Ye medenbätä niaratre iglesia ngwarbe ye tuanemetre tä ribere ietre. Niaratre tä Jehová tarere metre angwane, täi juto biare ja töi kwitakäre ne kwe kä mikadre juto kwetre niarabätä. Mäkwe ñäkä Apocalipsis 18:4 yebätä.

Siklo I yete, nitre apóstol nämene kukwe driere ye nitre brukwä kwin käkwe kani ngäbiti kä jutobiti. Erametre nünandre bäri kwin kä jutobiti, aune tö ngwandre kukwe ja känenkäre ie ye Jehovakwe driebare nitre yei. Nitre ye erere, nikwe Jehová mikadre käne aune kukwe mikata gare Bibliabätä ye nikwe kadre ngäbiti arato. Mäkwe ñäkä 1 Tesalonicenses 1:8, 9 aune 2:13 yebätä.

Nire nire tä iglesia ngwarbe tuenmetre aune tä kukwe metre mike täte ye Jehová tä kain ngäbiti kä jutobiti. Niaratre jökrä tä ja kete kwin ben, nitre kristiano tä ja tarere ye ngätäite niaratre tä aune tä tö ngwen nüna kärekäre yei. ¿Kukwe kwin ne mä tö tuai nemen jakwe? Mäkwe ñäkä Marcos 10:29, 30 aune 2 Corintios 6:17, 18 yebätä.

Jehovakwe iglesia ngwarbe ye gaite angwane, nitre jökrä rabai nüne kwin. Nitre ne ñaka rabaira ni mada ngökö aune denkä jene jene. Nitre jökrä rabai Ngöbö itibe metre aibe mike täte. Ye kukwe kwin, ¿ñan ererea? Mäkwe ñäkä Apocalipsis 18:20, 21 aune 21:3, 4 yebätä.