1-3. ¿Pedro kukwe meden ñan tuabare tuani nemen bare köbö ye näire, aune kukwe meden tare ben ja tuani kwe dibire?

PEDRO tä ñö sökö ja dibiti kä drünente ta mar Galilea yebiti. Batibe kä trä ngitikä menteni okwäte. ¿Kä bikera kite ngwen dekä ye ai trä nibi tuin ie? Ñö tä mate ja dibiti krubäte rubätä. Murie tä mate dite krubäte ngwärebätä ye kätä mren mike rubun. Pedro tä ñere aune ja ruin bren ngrabare ie, tä ja di ngwen ñö sökö jankunu.

² Nitre ja tötikaka mada tä rute ben, akwa Jesús ñaka tä bentre, ñobätä ñan aune ja mikaninte kwe mren kräbiti. Köbö ye arabe näire, Dirikä kwetre käkwe jondron ñan tuabare nuainbare aune ban bätä gwa braibebiti nitre kwati krubäte bukani kwe ye tuani kwetre. Ye köböire, nitre tö namani mikai reire. Akwa, niara töi nämene kwatibe ñaka ja mritai kukwe gobrankwe yete aune tö namani nitre ja tötikaka kwe ye tötikai ye erere nuainkäre arato. Yebätä, ngitiani nitre kwati ye ngänikaire aune nitre apóstol kwe ye juani kwe rute mren kwäräkri. Ye ngwane, niara nikani ngutuäbiti orakäre kaibe (Mar. 6:35-45; mäkwe ñäkä Juan 6:14-17 yebätä).

³ Nitre ja tötikaka kwe nikani angwane sö okwä namanina mente kwin, akwa nibira niken nekä nedrinkri. Yebiti ta, jämi nemen mente jire. Tätre ja di ngwen ñö sökö aune murieta mate dite bätä mren ngö krubäte, yebätä ja kukwei ñaka ruin bäsi kwärikwäri ietre. Yebätä Pedro tä töbike krubäte raba ruin nie.

4. ¿Ñobätä Pedro kukwe kwin krubäte bämikani ni kräke?

⁴ Kukwe keta kabrebätä tä töbikadre Pedro ie raba ruin nie. Jesús Nazaret namani gare ie ye bitikäre kä nikira kubu biti bäri ta, aune erametre tä ja di ngwen krubäte. Kukwe keta kabre niena gare ie, akwa tä ja tötikadre krubäte ie. Niara tö ja tuai ni ja tötikaka kwin Kristokwe, tö ja töi ükaite, tö ja di ngwain töbika aune kä jürä yebe, yebiti kukwe  kwin bämikani kwe ni kräke. Niara ja ngwani ño yebätä ani ja tötike bäri ja känenkäre.

5, 6. ¿Pedro nämene dre nuainne?

⁵ Jesús namani gare Pedro ie ye ñaka käi kwitaikä jire kwe jabiti. Andrés eteba kwe kukwe kwin krubäte ne mikani gare ie: “Mesía kunina nun ie”. Ye ngwane ja känenkäre niarakwe dre nuaindi yebätä ñaka nämene töbike jire (Juan 1:41, Ngöbö Täräe [NGT], tärä okwä ükaninte).

⁶ Pedro nämene nüne Capernaum, juta ye nämene nemenkä ngwitärikri mar Galilea ye kräbäre, ye ñö tibo okwä kri krubäte. Andrés aune niara nämene sribire gwa kitabätä bätä rürübäine, Santiago aune Juan, Zebedeo monsoitre yebe. Pedro aune muko kwe ye gwirete, bi kwe aune Andrés nämene nüne arato. Nitre gwa kitaka ye rabadre ja ngwen dite, sribire krubäte aune sribire kwin mräkätre ye ngübakäre. Nitre ye nämene nuin raire dibire mrenbiti, krade ye kite aune ükökrö ru krobu te gwa kita nämene kwetre ye ngwankäre. Dekäkri nämenentre sribi ye nuainne ja käne, gwa kitatekäre bätä rürübäinkäre, krade ye bätete aune gudike.

7. ¿Kukwe meden namani gare Pedro ie, aune ñobätä kukwe ye kwin krubäte?

⁷ Ñokänti Pedro namani nänkä Jesube ye Biblia tä mike gare. Andrés eteba kwe ye nämene ja tötikaka Juan Ni Ngökaka Ñöte yebe mikata gare, yebätä Pedro eteba nämene dre dre niere ie Juan yebätä ye niara nämene kukwe nuin kwin. Bati, Andrés jondron ñan tuabare tuani nemen bare. Juan kise kitani Jesús Nazaret yebätä käkwe niebare: “¡Kordero Ngöbökwe kite tuen sere se!”. Bengwairebe, Andrés ja mikani nänkä Jesube, kä namani jutobätä, nikani Pedro känene Mesías nükanina ye mikakäre gare ie (Juan 1:35-41). Kä nikanina 4,000 ta ye känenkri, nitre ja mikani Ngöbö rüere jardín Edén yete, ye ngwane Jehovakwe ni iti ütiäte juain köböire nitre kä tibienbätä diaintari käbämikani kwe (Gén. 3:15). Aune ni ni Diantarikä, Mesías käbämikani, ye ara namani gare gwä Andrés ie. Namani gare Pedro ie angwane, nikani betekä ngäbiti.

8. ¿Jesukwe Pedro kädekani ye dre gärätä, aune ñobätä kä ye ñaka debe kräke nitre ruäre tä niere?

⁸ Pedro kädeka nämene Simón, o Symeón. Akwa, Jesukwe tuani kena ye ngwane niebare kwe ie: “Ma abko Simón. Ma Jonás ngobo, akwa mtare mentokwäre ma kä rabadi Cefas arato. (Cefas abko käta “jä” niere kukwe arameore abko Pedro nieta griegore)” (Juan 1:42). Pedro dre nuaindi ja känenkäre yebätä Jesukwe kädekani “Cefas”, kukwe ye abokän “jä” gärätä. Pedro ye rabai jä ye kwrere namani tuin Jesús ie raba ruin nie: ni ja ngwen dite aune tö ngwan raba ie abokän köböire konkrekasion kristiano ye rabai dite. Akwa ¿Pedro töi nämene ye  erere jabätä? Ñakare raba ruin nie. Ñodre, nitre tä ñäke tärä Evangelios yebätä angwane, Pedro ñaka ja ngwani ye erere nieta kwetre. Arato Biblia tä mike gare ye erere, Pedro ye ñaka nämene ja töi mike kwatibe o bökän jondron nuainkäre nitre ruäre tä niere.

9. ¿Jehová aune Jesús tä dre mike ñärärä nibätä aune ñobätä nikwe tö ngwandre ietre ni tuin ño ietre yebätä?

⁹ Pedro nämene ja ngwen käme ye nämene gare kwin Jesús ie. Akwa, Rün tä nuainne ye erere, nitre nämene dre dre kwin nuainne ye mika nämene ñärärä kwe. Pedro raba jondron keta kabre nuainne namani tuin ie aune tö namani dimikai. Kä nengwane, nita dre dre kwin nuainne ye Jehová aune Jesús tä mike ñärärä arato. Akwa jondron kwin ñaka tuin nibätä ietre rabadre ruin nie, ¿ye ngwane dre nuaindre? Ye erere angwane, ni tuin ño ietre yei nikwe tö ngwandre aune ja tuanemetre tötikadre bätä töi ükadrete ietre Pedro nuainbare ye erere (mäkwe ñäkä 1 Juan 3:19, 20 yebätä).

10. ¿Pedro jondron meden tuani nemen bare, akwa nikaninta sribi meden nuainne?

¹⁰ Jesús namani gare Pedro ie ye bitikäre nämene niken kukwe driere ben kä ngrabare raba ruin nie. Yebätä Jesukwe jondron ñan tuabare nuainbare kena ye niarakwe tuani raba ruin nie, bieta sribebare Caná ja mäkätekäre ye ngwane ñö kwitani vinore kwe. Akwa bäri ütiäte, Jesús kukwe kwin mikani gare Gobran Ngöbökwe yebätä ye kukwe nuani kwe. Akwa biti nikani mento sribi kwe nuainkäre gwa kite aune rürübäine. Sö nikani kabre ta ye bitikäre, Pedro ja tuaninta Jesube, ye ngwane, Jesukwe nübaibare sribi ütiäte nuainne: rabadre kä denkä jai aune ja di ngwen ja mikakäre ja tötikaka kwe.

11, 12. a) ¿Pedro janamene gwakite deu ye ngwane käbä namani? b) Pedro nämene Jesús kukwe nuin ye ngwane, ¿kukwe meden ngwanintari kwe jai raba ruin nie?

¹¹ Pedro jämi ja tuinta Jesube ye ngwane deu, käbä ñaka namani jire. Niara aune nitre nänkä ben krade kitani bä kabre mrente akwa ngwarbekäre. ¿Gwa nämene medente? Pedro ie gwakita gare krubäte, yebätä krade kitabare kwe kä keta kabre känti raba ruin nie. Ni gwa kitaka jökräbätä tä nemen bare ye erere niara namani ulire krubäte, medente gwa tärä kabre ye tö namani tuai ñö bä dobrore yete ta kakäre krade yete raba ruin nie. Rabadre töbike yebätä angwane, bäri di riadrekä. Aune ñaka nämene gwakite kä ngwankäre juto jerekäbe jabätä: nämene nuainne mräkätre kwe ngübakäre. Mrä, ñaka namanina nuaindre kräke, nikaninta jate kise tökare aune namani krade ye bätete. Nämene sribi ye nuainne angwane, Jesús nükani känti.

¹² Nitre nämene näin kwati Jesube niara nämene kukwe driere ye tö namanintre kukwe nuai. Nitre kwati namani ja ükökrö niara bäre ta, yebätä nikani ru Pedrokwe yete aune Pedro rikadre ñö tekwäre ribebare  kwe ie. Yete, kukwe rabai ruin bäri kwin ñö yebiti ta. Nitre nämene kukwe nuin jate ye erere, Pedro töi namani ñan krütare kukwe nuin arato. Niara nämene blite Gobran Ngöbökwe yebätä, ye Pedro ñaka nämene nemen nainte kukwe nuakäre. ¡Kukwe kwin mikadre gare kä jökräbiti tibien Kristokwe ye sribi ütiäte krubäte! Akwa ¿rabadreta töbike ken kukwe yebätä? ¿Dre nuaindi kwe mräkätre ngübakäre? Jändrinaine janamene gwakite deu ye ngwane käbä ñaka namani jire ye nämene törö ie raba ruin nie (Luc. 5:1-3).

13, 14. ¿Jesukwe jondron meden ñan tuabare nuainbare Pedro kräke, aune ja namani ruin ño Pedro ie?

¹³ Jesukwe blitabare ünä, ye ngwane niebare kwe Pedro ie: “Ñö okwä bäri mente nguse, ye känti ru ngwena, bti munkwe krade kita ñöte gwa gakrä”. Pedro namani töbike, akwa niebare kwe ie: “Dirikä, [...]. Nunkwe sribinirira kri dibire ta. Nin nun käbä nibi jire chi, akwa mata ti juen gwa gaenta, aisete ti bike niken”. Niara ñaka tö namani krade kitaita ñöte raba ruin nie, ñobätä ñan aune gwä bätäninte kwe, ne madakäre, kä bäri kwin gwa kitakrä ye nikanina ta. Akwa yebiti ta kukwei mikani täte kwe, aune nitre nänkä ru krati yete ye käräbare kwe ja jiebiti raba ruin nie(Luc. 5:4, 5).

¹⁴ Pedro aune nitre nänkä ben ye krade jäkäninta kä mrebiti angwane, namani doboko ietre. Töi namanintre ñan krütare, käkwe krade jäkäbare bäri ja dibiti aune ¡ñaka nükani gare ietre! ¡Gwa nämene ere krubäte te! Bengwairebe nitre gwa kitaka ru krati yete ye käräbare kwetre ja dimikakäre. Gwa nakani erere krubäte ietre yebätä jötrö ngwarbe nükani ru krobu ye kwati aune namani doboko yebätä namani niken ñöte nguse. Ñaka namani tuin metre Pedro ie. Ye känenkri, Kristo ye die krubäte ye tuani kwe, akwa jondron ñan tuabare nuainbare kwe ne käkwe kukwe ütiäte mikani gare metrere niara ie. Nire raba gwa jäke kradete ye ngwärekri niara nämene. Kä jürä namani Pedro yebätä namani ngukodokwäbiti Jesús ngotokänti aune niebare kwe ie: “Ti Dänkien, ma deme ti ngwä. Ti abko moto kämekäme dikaro, aisete nän mento tibtä”. Erametre Mesías ie Ngöbökwe ja di biani, ye ken ja ñaka namani ruin kwin Pedro ie (mäkwe ñäkä Lucas 5:6-9 yebätä).

15. ¿Jesukwe dre nuainbare ne kwe Pedro ñaka töbikadre aune kä jürä ngwandre jabätä?

¹⁵ Akwa, Jesukwe niebare töi kwinbiti ie: “Mtare mentokwäre ma jatadi ni gaen Ngöbökrä, aisete ma ñan rekwetaka” (Luc. 5:10, 11). Ye ngwane ñaka rabadre töbike aune kä jürä ngwen jabätä, ñobätä ñan  aune Jesús nämene nübaire sribi ütiäte krubäte nuainne, ye erere ñaka rabaita bare jire. Pedro mräkätre ngübadi ño yebätä ñaka rabadre töbike jire arato. Aune niara ja mike ngite bätä di brai yekwe ñaka mikadre töbike. Ngöbö mika nämene täte Jesukwe ye ngite “juandi ta” niarabiti yei rabadre tö ngwen (Is. 55:7). Aune niara nämene dre dre ribere jai ja nire kräke aune ja üairebiti, ye Jehovakwe biandi jökrä ie yei rabadre tö ngwen (Mat. 6:33).

16. ¿Jesukwe Pedro, Santiago bätä Juan nübaibare näin jabe ye ngwane, ja töi mikani dre nuainne kwetre, aune ñobätä ja töi mikani jondron bäri kwin nuainne kwetre?

¹⁶ Pedro nübaibare ye bengwairebe kani ngäbiti kwe, aune Juan bätä Santiago ye erere nuainbare arato. “Nikani ru ngwenante nebe ñö köräbti jate, käkwe jändrän jökrä kwe mikaninte, bti nikanintre Jesube” Biblia tä niere (Luc. 5:11). Erametre Pedro ja töi mikani jondron bäri kwin nuainne: tödeke Jesús ie aune Ngöbö käkwe juani yei. Ni  näire, nitre kristiano tätre tö ngwen aune ñaka kä jürä ngwen jabätä Jehová mikakäre täte, ye tätre tödeke ye erere arato. Rün kä kwinbiti yekwe ñaka niaratre tuainmetre yei raba tö ngwen arato (Sal. 22:4, 5).

17. ¿Kä kubura Jesús namani gare Pedro ie yete dre dre namani barebätä?

¹⁷ Kukwe namani bare kädrieni kena kapitulo nebätä ye ani ngwenta törö jai. Jesús namani gare Pedro ie ye bitikäre kä nikanina kubu ta. Niara aune nitre nänkä ben tä ñö sökö ja dibiti kä drünente ta murie dite tä mate mar Galilea yebiti. Pedro tä töbike drebätä ye ñaka gare nie, akwa kukwe keta kabre namani bare niarabätä ye raba ngwenta törö jai. Jesukwe jondron ñan tuabare nuainbare ye tuanina keta kabre kwe. Ñodre, niara bie namani bren ye ngwane Jesukwe mikaninta kwin ye tuani kwe. Jesús Kukwe Kädriebare Ngudrebiti ye kukwe nuabare kwe arato. Kukwe ye jökräbiti ta, Jesús ye ara Mesías Dianinkä Jehovakwe ye gare kwin Pedro ie. Sö nikanina kabre ta ye bitikäre, Pedro ja töi ükaninante kukwe ruärebätä, ñodre kä jürä ngwen jötrö ngwarbe jabätä aune töbika yebätä. Yebätä Jesukwe dianinkä ne kwe rabadre nitre apóstol 12 kwe ye ngätäite arato. Akwa yebiti ta, nikwe mikai gare jai ja känenkäre ye erere, Pedro täbe ja di ngwen kukwe yebe.

18, 19. a) ¿Pedro dre tuani mar Galilea yete? b) ¿Pedro kukwe ribebare Jesús ie ye ngwane Jesukwe dre niebare ie?

¹⁸ Kä nibira nüke bäsi dekäkri, ora krämä aune kä ngwen dekä näre. Batibe, jondron jatai tuin menteni ñöbiti Pedro ie. Rikaikä, yebätä ñaka rabai ñö sökö aune dreta näin ñöbiti ye rükai krö mikakäre ñärärä. ¿Sö ye ai trätä mate mren däi yebätä? Ñakare; jondron ye tä näin jankunu kokwäre. Jutuadi bäri kwin ie angwane, ñaka rabai tuin metre ie: ¡ni nire tä näin ñö yebiti ta aune bike niken niaratre ye ken ta! Nitre ja tötikaka ye tä nikenkä, ni bäkäi kite ngäbiti ruin ietre yebätä. Akwa ni yekwe nini ietre: “Mun ñan rekwetaka ngwarbe. Tita näin, aisete munkwe ñan ti jürä ngwian” jabätä. Ye erere, Jesús ara tä näin (Mat. 14:25-28).

¹⁹ Ye ngwane, Pedro nini ie: “Ti Dänkien, ma ara tä dikekä ñöbti bkänä ne ngwane, ti rikadre dikekä siba ñöbti nebe ma känti abko niere tie”. Jondron ñan tuabare tuani nemen bare kwe ye käi namani jutobätä aune ñan kä jürä ngwani kwe jabätä, tö namani tuai bäri ja ken tödeka kwe mikakäre dite. Jesukwe käräni töi kwinbiti, ribeni kwe ie ye erere. Pedro ñaka töbiri jire, nankwa timon ru yete aune ngoto miri kwe ñö rubun yebiti. ¿Ngoto ñaka niki nguse nibi ruin ie ye ngwane ja nibi ruin ño ie ye mä raba bämike ja töite? Töi rabai ñan krütare, näin Jesús kokwäre. Akwa, batibe, töi rabai jene (mäkwe ñäkä Mateo 14:29 yebätä).

20. a) ¿Pedro kukwe meden ñaka debe nuainbare aune ye köböite dre namani barebätä? b) ¿Jesukwe kukwe meden niebare Pedro ie?

 ²⁰ Pedro tödekabare ye Jesukwe tuani angwane, Jehovakwe ja di biani ie yebiti mikani näin kwe mren rubun yebiti ta. Ne madakäre, Pedro rabadre nikren kwekebe Jesubätä; akwa murie nibi mate dite yekwe miri nikren mentokwäre. “Müre rababa mate dite [...] rababa tuen Pedroye, abtä rekwetakaba mda”, nieta Bibliakwe. Mren nibi rubun aune ñö nibi mate ja dibiti rubätä, ye ngwane kä jürä nakaka Pedro ie. ¿Bike murie nötökä ñöte yete? Drekebe ngwarbe, kä jürä yekwe ñaka miri tödeke jire, aune Pedro ja ngwen dite yebätä Jesukwe kädekani “Jä”, abokän kite niken ñöte nguse jä kita ñöte ye kwrere. Jubaka gare kwin ie, akwa ñaka tö ngwini kwe ja di jeñe yei aune nibi ngwänenkä kri: “¡Ti dentari ti Dänkien!”. Bengwairebe, Jesukwe kari kisebiti aune järita kwe kä mrebiti. Nibirata nünaninkä ñöbiti ye ngwane, Jesús kukwe ütiäte ne nini ie: “¡Ye ñobtä mata tödeke chi dikaro tibti ye! Ti di tärä täte ma mikakrä dikekä ñöbti abko makwe ñan miri era jae ye” (Mat. 14:30, 31).

21. ¿Ñobätä töbika ye ñaka kwin ni kräke, aune ni raba denkä ño ja töite?

²¹ ¡Kukwe ne tä kukwe ütiäte driere ja töi kräke nie! Töbika ye raba kukwe tare mike ni kisete, ñobätä ñan aune ye raba ni töi kwite jondron nuainkäre. Raba ni mike ñaka tödeke aune ni ngwen di nekä ja üairebiti. Yebätä, töbika aune kä jürä yebe nikwe ja di ngwandre. ¿Nikwe nuaindre ño? Töbikadre metre ja käne. Jondron meden raba kä jürä ngwen nibätä, ni ngwen di nekä o raba ni näkwite ñaka Jehová aune Kristo mike täte, yebätä nikwe ja töi mikadi angwane ni rabai bäri töbike krubäte. Akwa Ngöbö nikwe bätä Monso kwe dre dre nuainbarera, tä dre dre nuainne aune dre dre nuaindi kwetre nitre niaratre tarekä ye kräke, yebätä nikwe ja töi mikai angwane nikwe töbika ye diainkä ja töite.

22. ¿Ñobätä Pedro kukwe kwin krubäte bämikani?

²² Jesús niki ru kokwäre ye ngwane Pedro niki jiebiti. Niki kwin rute ye ngwane, murie ye nekä jutuani ie. Mar Galilea ye nibita kwekebe. Pedro bätä nitre mada ja tötikaka Jesukwe ye töi nibi ñan krütare käkwe nini: “¡Ma abko Ngöbö Odei era metre bkänä!” (Mat. 14:33). Ñänä jatani nen kwin ye ngwane, Pedro debe biani krubäte raba ruin nie. Ye näire deu nämene töbike aune kä jürä ngwen jabätä ye erere ñaka namani ja ngwen mada, namani tö ngwen bäri Jehová aune Jesús ie. Akwa niara rabadre jä kwrere Kristo niebare, ye kräke nämene ja di ngwandre krubäte ie. Akwa, töi nämene kwatibe ja di ngwankäre. Aune ni, ¿ni töita kwatibe ja di ngwanbätä arato? ¡Pedro tödekabare yebiti kukwe kwin krubäte bämikani kwe ni kräke!