1. ¿Ñongwane kukwe ñaka nuain bä erere Pedro nuainbare?

PEDRO mikani ñärärä Jesukwe ye ñaka käi kwitaikä jire kwe jabiti. ¿Jesús namani ulire aune ñaka namanina kain ngäbiti ye bä namani tuin ngwärebätä ie? Metrere ñaka gare nie, ñobätä ñan aune “ni Dänkien nikwitaninte, käkwe Pedro mikani ñäräre” ye aibe nieta Bibliakwe (Luc. 22:61). Akwa apóstol mikani ñärärä kwe yebiti namani gare ie niara ja mikani ngite krubäte. Pedro ñaka kukwe nuaindi jire niebare kwe, akwa erere nuainbare kwe yete Jesukwe niebare ye erere: Dirikä tare kwe ye ñaka gare ie niebare kwe. Ñaka ja mike ngite krubäte erere ja mikani ngite kwe ye näire. Kukwe ñaka nuain bä erere Pedro nuainbare nükani gare ie.

2. ¿Kukwe meden ütiäte namani gare ja töi kräke Pedro ie, aune kukwe tare namani barebätä ye raba ni dimike ño?

² Akwa, ¿kukwe ye ükate ñaka raba jire? Ñaka ye erere, ñobätä ñan aune ja känenkäre Pedro dimikani kukwe ñaka kwin nuainbare kwe ye ükete. Niara nämene tödeke krubäte, yebätä dimikani ye kani ngäbiti kwe aune bäri ütiäte ngite juandre ta ye dre gärätä ye nükani gare ie Jesús köböire. Ñodre, kukwe ye ütiäte krubäte ja töi kräke ye ni jökrä mikadre gare jai, aune kukwe tare namani bare Pedro yebätä ye raba ni dimike nuainne.

3, 4. a) ¿Pedro kukwe meden ngwanintari Jesús ie, aune apóstol ye nämene töbike ño raba ruin nie? b) ¿Nitre mada nämene töbike ye erere Pedro nämene töbike ye Jesukwe mikani gare ño ie?

³ Sö krä ti ye känenkri, niaratre nämene Capernaum, Pedro nämene nüne yekänti, yete Pedro ngwanintari Jesús ie: “Ti Dänkien, ¿ti mräkä iti käkwe kukwe nuendre blo ti rüere, se abko tikwe diandre bäbe bti ta [...]? ¿Tikwe diandre bä kükü bti ta ya?”. Erametre, ja nämene ruin mantiame krubäte Pedro ie, ñobätä ñan aune bämäkäbe ngite juandre ta ni madabiti nitre ji ngwanka kukwebätä nämene driere. Akwa, Jesús kukwe niebare ie yekwe töi mikani ñan krütare: “Ñan makwe diandre bä kükübe bti ta abko ti bike niere mae, akwa makwe diandre gre ketamä bti bä jätäbti bä kükü (77) bti ta” (Mat. 18:21, 22).

⁴ ¿Ngite ni madakwe ye täindre ai gäräbare Jesukwe? Ñakare. Pedro bä kükü niebare ye Jesukwe kwitani 77, ye abokän metrere ni mada tare nikwe angwane käre ngite juandre tabiti niebare kwe (1 Cor. 13:4, 5).  Nitre ie nitre mada ñaka nämene tuin bobre aune nämene ja brukwä mike käme kräke yebätä nämene ngite kwetre ye tike täräbätä ye kwrere, apóstol ye ja töi mikani ye erere ye Jesús tö namani mikai gare ie. Akwa nire tä ja ngwen Ngöbö erere käkwe ja mikadre bäri mantiame aune töi kwin krubäte ngite juankäre ta ni madabiti (mäkwe ñäkä 1 Juan 1:7-9 yebätä). *

5. Ngite juandre ta ni madabiti ye ütiäte krubäte, ¿ye ñongwane tä nüke gare bäri kwin nie?

⁵ Pedro ñaka ñäkäbare Dirikä kwe kukwei rüere, akwa ¿kukwe niebare kwe ie ye matani brukwäte? Ngite juandre ta nibiti ye nita nemen ribere jötrö ngwarbe jai angwane, ngite juandre ta ni madabiti ye ütiäte krubäte tä nüke gare nie. Jesús murie keta jämi ye känenkri kukwe ye erere namani bare Pedro yebätä. Jesús nuainbare tare ye näire, Pedro ja mikani ngite bä kabre yebätä bäri tö namani ngite juamana ta jabiti ie.

6. Nitre apóstol ye ja töi mikadre bobre ye Jesús tö namani driei ietre, ¿ye ngwane Pedro dre niebare, akwa Jesukwe mikani tuin ño jai?

⁶ Köbö ye namani ütiäte krubäte, köbö yete deu Jesús nämene mrä nire Kä tibienbätä. Aune kukwe nämene keta kabre krubäte driedre ie nitre apóstol kwe yei. Ye nuainkäre kena, niaratre ja töi mikadre bobre ye driebare kwe ietre. ¿Nuainbare ño kwe? Niaratre ngoto bätäninte kwe, sribi ye nitre klabore aibe nämene nuainne. Kena, Jesús kukwe nuainbare ye rüere Pedro ñäkäbare. Ye bitikäre, ñaka tö namani ja ngoto bätätemana, akwa Jesús kukwe ye mikani gare ie angwane tö namani ja kise bätä ja dokwä bätätemana ie arato. Jesús ñaka ja di ngwani nekä, ñakare aune kukwe nuainbare kwe yebiti tö namani dre mikai gare ye mikani gare bätärekä kwe nitre apóstol kwe yei (Juan 13:1-17).

7, 8. a) ¿Pedrokwe Jesús di ngwani nekä ño jankunu? b) Jesús töi nämene kwin krubäte ni mada kräke aune nämene nitre mada töi mike nüke gare jai, ¿ye bämikani ño kwe?

⁷ Gwä ngwarbe, Pedro kukwe nuainbareta yebätä Jesukwe kä ngwaninta nüke jai mada bati. Nitre apóstol yekwe ñäkäbare jai kwärikwäri niaratre meden bäri ütiäte yebätä, aune nitre tö namani bikai kri ye ngätäite Pedro nämene arato raba ruin nie. Akwa, Jesukwe töi ükaninte töi kwinbiti aune nämene ja ngwen metre bätä nämene käre niara ken yebätä kukwe kwin niebare kwe ie. Akwa ye bitikäre, Pedrokwe tuainmetre niebare kwe ie arato. Jötrö ngwarbe, Pedro täi käre Dirikä kwe ye ken aune nämene juto biare ja nire biankäre niara ütiäre niebare kwe ie. Ye erere ñaka rabai bare Jesús niebare ie: antlan jämi ngwäne bobu deu ye  känenkri, Jesús ñaka gare Pedro ie niedi bämä jire kwe. Akwa, apóstol ye ñaka ñäkäbare jerekäbe Jesús kukwei rüere, ñakare aune niarakwe ja ngwain bäri metre nitre mada yebiti ta niebare kwe (Mat. 26:31-35; Mar. 14:27-31; Luc. 22:24-28; Juan 13:36-38).

⁸ Jesukwe ñaka ja di ngwani nekä ye tä ni mike töi ñan krütare. Ñodre, niara nämene ja tuin kukwe tare ben akwa nitre ja tötikaka kwe ja mike ngite ye nämene dre dre kwin nuainne ye mikani ñärärä kwe. Pedro ja mikai ngite ye nämene gare kwin ie akwa niebare kwe: “Makwe tödekadre janknu Ngöböbti, abkokäre tikwe blitaba Ngöböbe makrä Simón. Ne aisete ma töi rikwitata ti kukwäre angwane, makwe ma mräkä mda mda nete se die mika nünenkä dite jabtä” (Luc. 22:32). ¡Jesús ja töi mikani kwin krubäte ni mada kräke aune nitre mada töi ño ye mikani nüke gare kwe jai! Pedro rabaita dite kukwe ja üairebiti aune rabaita Ngöbö mike metre täte yei Jesús nämene tö ngwen.

9, 10. a) ¿Ñobätä Pedro töi ükaninte jardín Getsemaní yekänti? b) ¿Pedro kukwe nuainbare ye tä dre mike gare metre nie?

⁹ Ye bitikäre, jardín Getsemaní yekänti, Pedro töi ükaninte bä kabre. Jesús nikani orare ye ngwane Pedro, Santiago aune Juan ja ngwandre mokre niebare kwe ietre, ñobätä ñan aune niara nämene ulire krubäte yebätä ja ketamuko kwe yekwe dimikadre ie tö namani. Akwa, niaratre nikani kübien bati bobu. Akwa yebiti ta, Jesús ngite juani ta niaratre yebiti, aune namani tuin bobre krubäte ie aune nämene tare kwe yebätä niebare kwe ietre: “Mun töi abko tä biare jändrän kuin nuene, akwa mun di ñakare” (Mar. 14:32-41).

¹⁰ Ye bitikäre, nitre nükani kwati kä yekänti nämenentre antorchas, ngitra, krimana ngwen kisete. Erametre ye ngwane bäri töbikadre kwin aune ja ngwandre töbätä. Akwa ¿Pedro dre nuainbare? ¡Ñaka ja ngwani ye erere kwe! Drekebe ngwarbe ngitra dianinte kwe aune Malco sribikä sacerdote bäri kri kräke ye olo tikaninkä kwe. Akwa, ye ngwane Jesús ñaka ja di ngwani nekä arato, ñakare aune töi kwinbiti Pedro töi ükaninte kwe bätä ni ye olo mikaninta kwin kwe. Ne madakäre, nitre ja tötikaka kwe ye ñaka rabadre nitre mada nuainne tare niebare kwe ietre, kukwe ye ererebätä ni kristiano täbe ja ngwen nükebe kä nengwane (Mat. 26:47-55; Luc. 22:47-51; Juan 18:10, 11). ¡Pedro kukwe nuainbare yebätä bä kabre Jesukwe kä ngwani nüke jai! Apóstol nämene kukwe nuainne ye tä kukwe metre mike gare: käre nita ja mike ngite (mäkwe ñäkä Santiago 3:2 yebätä). ¿Ni tärä iti kä nebätä abokän ñaka ngite juamana ta jabiti mantre jetebe Ngöböi? Akwa kukwe ruäre nämene Pedro käne ye näire deu. Kukwe bäri tare nämene niara käne.

11, 12. a) ¿Jesús jänikani ngite ye bitikäre ñobätä Pedro ñaka kä jürä ngwani jabätä ni raba niere? b) ¿Pedro kukwe käbämikani ye ñobätä ñaka erere nuainbare kwe?

¹¹ Nitre apóstol ye tuanemetre nikenta Jesukwe nini nitre kwati yei,  ñobätä ñan aune niara ye meden känänta kwetre. Dirikä kwe jäniki ye ñaka nibi nuaindre Pedro kräke, yebätä ngiti nitre apóstol mada yebe.

¹² Ye bitikäre, Pedro aune Juan ñaka nibira ngitie. Anás nämene sacerdote bäri kri ye gwire ken namanintre nünenkä raba ruin nie, ñobätä ñan aune yete Jesús jänikani käne kukwe ngwantarikäre ie. Jesús jäniki kä madakänti ye ngwane Pedro aune Juan niki jiebiti akwa “mente[ni]” ta (Mat. 26:58; Juan 18:12, 13). Pedro yebätä kä jürä nie ñaka raba jire. Nänkäre nitre kwati rükä ye jiebiti ñaka kä jürä ngwandre jire jabätä. Ne madakäre, niarakwe nitre ye iti olo tikaninanka ye nikwe ngwandre törö jai. Akwa, niara ja ngwain metre niebare kwe, ¿ye erere nuainbare kwe? ¡Nämene juto ja nire biankäre Jesús ütiäre niebare kwe arato! (Mar. 14:31.)

13. ¿Dre aibe köböire ni raba näin erametre Kristo jiebiti?

¹³ Pedro erere, kä nengwane nitre kwati tä näin Jesukristo jiebiti akwa “mente[ni]” ta; ñaka tö tuai nemen gare nitre mada ie. Akwa, ja känenkäre Pedro arabe tikani ye erere, ni tädre Kristo ken ye aibe köböire nikwe nändi erametre jiebiti. Nikwe ja ngwandre niara erere kä jökrä ngwane, ñaka kä jürä ngwandre jabätä dre dre rabadre bare nibätä ye kärera (mäkwe ñäkä 1 Pedro 2:21 yebätä).

14. ¿Kukwe ükate nämene deu Jesús rüere ye ngwane Pedro nämene medente?

¹⁴ Pedro tä näin käbube niki nemen Caifás ni sacerdote bäri kri aune ngwian bökäne krubäte ye gwirete, ju ye bäri kri aune bä nuäre krubäte Jerusalén ye jökrä känti. Ju kri ne erere sribe nämene abokän te ruäre kä mikate nämene tökare aune jukwe mika nämene känenkri. Pedro nibi jukwebätä angwane, meri jukwe ngübabitikä yekwe ñaka miri näin gwä. Akwa sacerdote bäri kri ye nämene gare Juan ie aune niara nämene ki ye teri käkwe blitabare meri yebe ye köböire Pedro tuanimetre näin gwä arato. Pedro ñaka ja mirite yete Juan ben aune ñaka niki kä teri Dirikä kwe tä yekänti raba ruin nie. Ja mirite kwe ju bäre, kä nibi tibo yebätä nitre klabore aune nitre sribikä kwati tä yete ja träse ñukwä bäre ta, ye ngwane nitre kwati kukwe ngwarbe niekä tä näin gwä aune küken kukwe niekäre Jesús rüere (Mar. 14:54-57; Juan 18:15, 16, 18).

15, 16. ¿Jesús kukwe niebare Pedro yebätä ye namani bare ño?

¹⁵ Meri käkwe Pedro miri näin gwä yei niara nü gare bäri kwin ñukwä trä yebiti. Nü gare ie yebätä nini kwe ie: “Jesu Galileabo se ben ma nämane dikekä siba arato”. Kukwe nini apóstol ie yekwe ngwini nikenkä. Yebätä, Jesús ñaka gare jire ie nini kwe aune meri ye tä blite drebätä ye ñaka gare ie nini kwe. Ye bitikäre niki jukwe ken, ne kwe ñaka gadre. Yete meri madakwe turi aune nini kwe ie arato: “Jesu Nazarebo abko ben ni noko nämane dikekä siba”, ye ngwane Pedro nini: “Ni ye gare ñakare jire chi tie” (Mat. 26:69-72; Mar. 14:66-68). Jesús ñaka gare Pedro ie ninina bobu jire kwe. Ye bitikäre, antlan ngwänäni bobukäre; akwa niara tä nikenkä yebätä dre rabai bare Jesús nini ye ñaka törö ie.

 ¹⁶ Pedro tä ja di ngwen ne kwe ñaka gadre akwa nitre ruäre ki kokwäre. Iti Malco mräkä, ni klabore abokän Pedrokwe olo tikaninkä. Ni ye nini ie: “¿Ma ye täni siba ben olibo nurai känti sete tikwe turi, nibi ruen tie ya?” Nitre jökrä ye ñaka tä kukwe metre niere Pedro nini ietre; niara tä blite metre nini kwe, ¡tä ni ngökö angwane kukwe tare rabadre barebätä nini kwe! Dirikä kwe ñaka gare ie nini bämäkäre kwe. Pedro kukwe ye nini angwane bengwairebe antlan ngwänäni bobukäre deu (Juan 18:26, 27; Mar. 14:71, 72).

17, 18. a) ¿Pedro ja mikani ngite krubäte gani kwe ye ngwane ja namani ruin ño ie? b) ¿Pedro töbikabare ño raba ruin nie?

¹⁷ Ye bätärabe, Jesús tä mitrini käkwe nikrani jubäre angwane okwä mati ja ketamuko kwe yebätä, miri gare jai kena kapitulo nekänti ye erere. Nekänti Pedro ja miri ngite krubäte nibi gare ie. ¡Niara ja miri ngite Dirikä kwe ie! Ja miri ngite krubäte kwe yebätä, niki mento yete aune niki sö bolore täte kitra niken nekä trä diore yete ta ji ngrabare. Akwa okwä ñöi nibi nen yebätä ñaka nibi näin jötrö. Angwane, kä ñaka nü ie aune nibi ja muaire krubäte (Mar. 14:72; Luc. 22:61, 62).

¹⁸ Ja mikadre ngite ne erere angwane, nikwe kukwe käme krubäte nuainbare yebätä ngite juan ñaka raba ta nibiti nita nemen nütüre. Erametre, ye erere ja namani ruin Pedro ie raba ruin nie. ¿Dirikä kwe ngite juain ta niarabiti?

19. ¿Pedro kukwe nuainbare yebätä ja namani ruin ño ie raba ruin nie, akwa ñaka ja di ngwani nekä kwe ye ñokänti gare nie?

¹⁹ Dekä aune köbö ye jökrä näire dre dre namani Pedro töi nike ye ñaka gare nie. ¡Jesús ja tare nikabare krubäte aune krütani ye ngwane ja namani ruin ngite krubäte Pedro ie! ¡Köbö mrä te Dirikä kwe nämene nire kä tibienbätä ye ngwane mikani ja tare nike bäri kwe yebätä töi namani ulire krubäte! Erametre Pedro namani ulire krubäte, akwa ¿ja di ngwain nekä kwe kukwe yebätä? Ñakare nieta Bibliakwe, ñobätä ñan aune jötrö ngwarbe ja ükaninkröta kwe nitre mada ja tötikaka Jesukwe yebe (Luc. 24:33). Erametre, ja namani ruin ngite ietre kä jürä ngwani kwetre jabätä deu yebätä. Akwa, namaninta keteitibe jakänti ye köböire ja dimikaninta kwärikwäri kwetre.

20. ¿Pedro ja ngwani töbätä kukwe nuainkäre ye tä dre driere nie?

²⁰ Nete Pedro ja ngwani töbätä kukwe nuainkäre ni raba niere. Ni Ngöbö mikaka täte tä ja mike ngite ye ngwane kukwe käme krubäte nuainbare kwe ye ñan ai bäri ütiäte, ñakare aune ja töi mikadre kwatibe kwe kukwe ye ükete aune näin ja käne ye bäri ütiäte (mäkwe ñäkä  Proverbios 24:16 yebätä). * Pedro nämene ulire krubäte akwa ja töi mikani kwe rabakäre keteitibe mräkätre mada yebe, ye ngwane nämene tödeke metre ye bämikani kwe. Nita nemen ulire aune jata nemen ruin ngite nie ye ngwane, ni töta nemen ja tuai kaibe. Akwa ye nuaindre ye ñaka kwin jire chi (Prov. 18:1). Ni tädre dite ja üairebiti, yekäre ni tädre konkrekasion ye ken (Heb. 10:24, 25).

21. ¿Pedro nämene mräkätre tödekaka yebe köböire dre kwin namani gare ie?

²¹ Pedro nämene keteitibe mräkätre tödekaka yebe, ye köböire kukwe kwin namani gare ie: ¡dobo ye jue mikani kwin akwa Jesús ngwaka ye ñaka nämene yete! Pedro aune Juan nikani betekä dobobiti. Juan ye bäri bati yebätä namani käne raba ruin nie. Akwa dobo ye kwani tökare ie angwane ja ñaka nükani törö ie nänkäre gwä. Pedro abokän di ñaka namanina akwa ñaka töbikabare kwe nikani gwä. Erametre: ¡dobo ye nämene tökare! (Juan 20:3-9.)

22. ¿Ñokänti kukwe metre namani gare Pedro ie aune brukwä ñaka namanina ulire?

²² Kenanbe, Jesús ganinkröta ye Pedro ñaka mikani era jai. Ángel kukwe mikani gare meritre ja ngwanka metre yei ye meritre käkwe niebare nitre ja tötikaka yei angwane Pedro ñaka mikani era jai arato (Luc. 23:55–24:11). Akwa, köbö ye nikani krüte angwane kukwe ye namani gare metre ie aune brukwä ñaka namanina ulire. ¡Jesús nämene nire! Niara namani ni üaire dite krubäte, aune ye bämikakäre ja mikani tuare kwe nitre apóstol jökrä kwe yei. Akwa ye känenkri kukwe ütiäte nuainbare kwe Pedro kräke. ¿Dre nuainbare kwe? Biblia tä mike gare nie. Köbö yete, nitre ja tötikaka kwe niebare: “¡Jesu nükaninta nire bkänä! Niarakwe ja miri tuadre Simónye” (Luc. 24:34). Ja känenkäre, Jesús “ja mikani tuadre [Cefas ie], bti ja mikaninta tuadre kwe nitre ja töitikaka ben ni jätäbti nibu yeye” Pablo tikabare arato (1 Cor. 15:5). Pedro ye kädekata Simón aune Cefas arato ye nikwe ngwandre törö jai. Yebätä, Biblia tä kukwe ütiäte mike gare Pedro yebätä: ye näire niara nämene kaibe angwane Jesukwe ja mikani tuare ie.

23. ¿Nitre kristiano ja mikani ngite krubäte ye ñobätä rabadre kukwe namani bare Pedro yebätä ye ngwen törö jai?

²³ Pedro ja tuani Jesube ye ngwane dre namani bare ye Biblia ñaka mike gare. Dirikä tare kwe ye nämene nire namani gare apóstol yei, ye käi namani jutobätä aune niara ja mikani ngite krubäte yebätä nämene ulire bätä ja töi kwitabare kwe niebare kwe ie ye ni raba bämike ja töite. Jondron mada ye jökräbiti ta tö namani Jesús tuai ngite juen ta jabiti. Aune erametre, Jesukwe nuainbare ja brukwä tätebiti. Kä nengwane, nitre kristiano ja mikani ngite ye rabadre kukwe namani bare Pedro yebätä ye ngwen törö jai aune Ngöbökwe ñaka ngite juain tabiti ye ñaka rabadre nütüre. Jesús tä ja ngwen metre Rün kwe ye erere ye nikwe ngwandre törö jai, niara tä ngite ‘juen ta nibiti’ (Is. 55:7).

24, 25. a) ¿Pedro nikani gwakite deu mar Galilea yebiti angwane käbä namani? b) ¿Kä jatani ngwen dekä ye ngwane Jesús jondron ñan tuabare nuainbare yebätä Pedro dre nuainbare?

²⁴ Nitre apóstol ye rikadre Galilea Jesús niebare ietre, yete niara tuaita bobukäre kwetre. Namanintre yete angwane, Pedro nikani gwakite mrenbiti, aune nitre ja tötikaka ruäre nikani ben. Mada bati, Pedro tä ñöbiti känti käre nämene gwakite. Ru ye ngö nemen, ñö ñaka mate dite rubätä aune krade ruin doboko kisete ie yebätä ja ruin kwin ie. Ja di ngwini kwetre dibire akwa käbä ñaka nibi jire (Mat. 26:32; Juan 21:1-3).

 ²⁵ Kä kite ngwen dekä ye ngwane, batibe nita jate yekwe krade ye kitamana ñöte ietre ru ye kwäräkri. Ye erere nunie kwetre angwane... ¡gwa ngeden 153 ietre! Ni ye nü gare Pedro ie angwane jötrö ngwarbe nankwa ñöte aune niki jübenkä nemen jate. Ümanbiti Jesús gwa kuri ñukwäbiti ye bini kwe nitre ja ketamuko metre kwe yei. Metrere blitani kwe Pedro yebe (Juan 21:4-14).

26, 27. a) ¿Drekäre Jesukwe kukwe ngwanintari bämä jire Pedro ie? b) ¿Jesukwe ngite juani ta Pedro yebiti ye bämikani ño kwe?

²⁶ Gwa gani ere kwetre yebätä Jesús kise kitani raba ruin nie, aune ngwanintari kwe Pedro ie: “¿Mätä ti tarere bäri ne ngwä ya?”. Apóstol nämene sribire gwakitabätä sribi ye nämene tare kwe, ¿ye erere Jesús rabai tare kwe arato? Köbö nikani braibe ta, ye känenkri Kristo ñaka gare Pedro ie niebare kwe bämä jire. Akwa yebiti ta Jesukwe kukwe ngwanintari bämä jire Pedro ie ne kwe nämene tare kwe ye mikadre gare kwe ie apóstol mada ye okwäbiti, ye erere Pedro nuainbare. Pedro kukwe ye bämikadre metre Dirikä kwe ribeni ie. ¿Nuaindre ño kwe? Sribi Ngöbökwe ye mikadre käne kwe: rabadre obeja Kristokwe ye jie ngwen, rabadre mräkätre tödekaka ye ngübare aune dimike (Luc. 22:32; Juan 21:15-17, NGT).

²⁷ Kukwe nebiti, Jesukwe mikani gare Pedro ie niara nämene ütiäte kräke aune Rün kwe ye kräke. Kristo tä konkrekasion jie ngwen yete Pedro rabai sribi ütiäte nuainne. ¡Jesukwe ngite juani ta niarabiti ye bämikani metre kwe ie! Erametre, Jesukwe mikani tuin bobre jai ye matani brukwäte.

28. ¿Pedro kädekani ye dre gäräbare aune ye ererebätä ja ngwani ño kwe?

²⁸ Sribi biani Pedro ie ye nuainbare täte kwe kä kwati krubäte te. Jesús murie keta jämi deu ye ngwane niebare kwe ie ye erere, niarakwe mräkätre tödekaka ye dimikani. Obeja Kristokwe ye ngübabare bätärekä kwe aune tarebare kwe. Simón, abokän Jesukwe kädekani Pedro arato, kädekani mrä ye abokän jä gärätä aune ye ererebätä ja ngwani kwe, ja ngwani dite kwe bätä blitabare metre kwe aune tö ngwani ie konkrekasionte. Tärä ketebu Bibliabätä tikani kwe tä ye erere mike gare. Ngite juandre ta ni madabiti ye dre gärätä Jesukwe driebare Pedro ie ye ñaka käi kwitaninkä jire kwe jabiti mikata gare tärä yebätä arato (mäkwe ñäkä 1 Pedro 3:8, 9 aune 4:8 yebätä).

29. ¿Ni raba tödeke ño Pedro erere aune ni mada mike tuin bobre jai Dirikä kwe ye erere?

²⁹ ¡Ni jökrä ja tötikadre kukwe yebätä ye ütiäte krubäte! ¿Nita ja mike ngite yebätä nita ngite juamana ta jabiti Ngöböi mantre jetebe? ¿Niara tä ngite juen metre ta nibiti ye nita kain ngäbiti? ¿Nita ngite juen ta nitre madabiti? Ye erere angwane nikwe tödekai Pedro erere, aune bäri ütiäte, ni mada mikai tuin bobre jai Dirikä kwe ye erere.