1. ¿Ni itire itire ja ngwanka metre Jehovai ye tuin ño ie konkrekasionte?

JEHOVÁ tä ni tarere, yebätä ni itire itire ja ngwanka metre niarai ye ütiäte kräke konkrekasionte. Sribi jene jene tä ni kisete, akwa ni jökrä ütiäte aune ja dimikadre kwärikwäri ye ni jökrä tä ribere jai. Kukwe ye ja töi kräke nie aune apóstol Pablo tä ni dimike kukwe ütiäte ye mike nüke gare jai. ¿Tä nuainne ño?

2. Efesios 4:16 tä niere erere, ¿ñobätä nikwe ja mikadre tuin ütiäte jai kwärikwäri aune sribidre gwairebe?

² Texto dianinkä kukwe ja tötikara ne kräke tä niere erere, ni ñaka raba ni iti mike ñärärä aune töbike, ‘mä ñaka ütiäte nünankrä tie’ (1 Cor. 12:21). Ni tädre jäme konkrekasionte yekäre nikwe ja mikadre ütiäte jai kwärikwäri aune sribidre gwairebe ja dimikakäre kwärikwäri (ñäkädre Efesios 4:16 yebätä). Nita sribire gwairebe konkrekasionte ngwane, ja mräkätre tä kite bäri dite aune ja tareta bäri konkrekasionte.

3. ¿Dre rabai gare nie kukwe ja tötikara nekänti?

³ ¿Kukwe meden meden känti ni raba ja mräkätre ye mike ütiäte jai? Kena, nitre umbre ji ngwanka rabadre ja mike ño ütiäte kwärikwäri. Ketebukäre, ja mräkätre kaibe ye ni raba  mike ño ütiäte. Aune ketamäkäre, ja mräkätre ñan blite kwin ni kukweibiti ye nikwe mikadre ño ütiäte ye rabai gare nie kukwe ja tötikara nekänti.

4. ¿Pablo kukwe meden niebare Romanos 12:10 abokän nitre umbre ji ngwanka rabadre mike täte?

⁴ Nitre umbre ji ngwanka jökrä ye kädekata üai deme yebiti, akwa itire itire ie sribi nuain gare aune töbätä kukwe ruäre känti (1 Cor. 12:17, 18). Ruäre abokän krire kädekani aune ruäre abokän ñan raba sribire krubäte niena umbre yebätä. Akwa nitre ji ngwanka ñaka raba niere iti ie, ‘mä ñaka ütiäte tikrä’, ñakare aune, Pablokwe kukwe niebare Romanos 12:10 ye ni umbre ji ngwanka jökrä rabadre mike täte (ñäkädrebätä).

5. ¿Nitre umbre ji ngwanka rabadre dre nuainne ja mikakäre ütiäte jai kwärikwäri aune ñobätä ütiäte nuaindre kwetre?

⁵ Nitre umbre ji ngwanka tä ja kukwe nuin bökän ngwane, tätre ja mike ütiäte jai kwärikwäri. Tätre ja ükökrö blitakäre kukwe ütiätebätä ngwane, ye ngwane bäri rabadre ja kukwe nuin bökän. ¿Ñobätä? Ni Mikaka Mokre inglere 1 octubre 1988 käkwe dre niebare ye ani mike ñärärä: “Nitre umbre ji ngwanka tä gätäre ngwane Kristo raba üai deme yebiti nitre umbre ji ngwanka meden erere mike töbike kukwe ja jie ngwankäre yebätä kukwe ükateta kwetre ngwane o kukwe ütiäte diankäre nuaindre jai ye gare metre ietre (Hechos 15:6-15). Üai deme tä nitre umbre ji ngwanka jökrä dimike aune ñaka itibe aibe”.

6. a) ¿Dre käkwe nitre umbre ji ngwanka dimikai sribire kwin jabe? b) ¿Ye köböire ja mräkätre konkrekasionte tä nemen ño?

⁶ Nitre umbre ji ngwanka tä ja mike ütiäte jai ngwane, tätre gätäre ngwane ñan tä ja mike käne blitakäre mada mada ye kräke. Ñan itibe aibe käkwe blitai bäri aune itibe aibe bäri ütiäte ye ñan rabai ruin ie. Ñakare aune, kukwe tuin ño ie ye niedi kwe, akwa niedi kwe töi bobrebiti aune mada mada ye  kukwe nuai bökän kwe. Aune bäri ütiäte, tä juto biare kukwe Bibliabätä ja jie ngwankäre ye kädriekäre jabe aune “ni klabore ie tö ngwan raba bätä töbätä” tä dre niere ye mikakäre täte (Mat. 24:45-47, TNM). Nitre umbre ji ngwanka tä ja tarere aune ja mike ütiäte jai kwärikwäri ngwane üai deme tä bätätre ye köböire tä kukwe den nuaindre konkrekasion mikakäre bäri dite (Sant. 3:17, 18).

7. ¿Ni ñaka gure yebätä Jesús nämäne töbike ño?

⁷ Ja mräkätre gure aune monsotre bökäne tärä konkrekasionte, akwa ja mräkätre kaibe tärä konkrekasion nikwe te arato. ¿Ja mräkätre kaibe ye nikwe mikadre tuin ño jai? Ni kaibe yebätä Jesús nämäne töbike ño ye ani ngwenta törö jai. Nämäne kä tibienbätä ngwane, ñaka ja mikani gure kwe aune kukwe driebare kwe köbö täte. Ni kristiano ja mikadre gure o rabadre kaibe ye ñaka driebare kwe. Akwa ni kristiano ruäre ja töi mikai ñaka ja mike gure niebare kwe (Mat. 19:11, 12). Nitre kaibe ye Jesús ñaka nämäne mike tuin ngwarbe jai aune nämänentre kaibe ye köböite kä ñaka nämäne juto nitre yebätä ye Jesús ñaka nämäne nütüre, ñakare aune nämäne mike tuin ütiäte jai.

8. ¿1 Corintios 7:7-9 tä niere erere nitre kristiano raba drebätä töbike niebare Pablokwe?

⁸ Jesús erere, apóstol Pablo ñan ja töi mikani ja mike gure sribikäre bäri Jehová kräke. Ja mikadre gure ye käme ye ñan driebare kwe. Kukwe ye tä gare ni itire itire ie nämäne gare ie. Akwa yebiti ta, apóstol Pablo nitre kristiano nübaibare ñan ja mike gure sribikäre bäri Jehová kräke (ñäkädre 1 Corintios 7:7-9 yebätä). Erametre, nitre kaibe ye ñan namani tuin ngwarbe Pablo ie. Ñodre, Timoteo monso bati ñaka gure ye kädekani kwe sribi ütiäte keta kabre nuainkäre (Filip. 2:19-22). * Ye medenbätä, ja mräkä iti tä gure yebätä bäri töbätä sribi nuainkäre ye ni ñaka raba nütüre o ja mräkä iti tä kaibe ye ñaka töbätä sribi nuainkäre ye ni ñaka raba nütüre (1 Cor. 7:32-35, 38).

9. ¿Nitre tä gure o nitre tä kaibe ye rabadre tuin ño nie?

⁹ Nikwe ja mäkädrete o ni rabadre kaibe ye Pablo aune Jesús ñaka driebare. Ye medenbätä, ¿nitre tä gure aune nitre tä kaibe ye rabadre  tuin ño nie? Ni Mikaka Mokre 1 octubre 2012 yebätä kukwe ye mikani gare: “Ni raba ja mike gure o ni raba nemen kaibe ye jondron ütiäte Jehovakwe biani nie. [...] Jehová kräke ni ñaka rabadre ja gaire nita kaibe yebätä o ja ñaka rabadre ruin ulire nie ni ñaka gure yebätä”. Ye tä mike gare nitre ñaka gure tä konkrekasionte ye nikwe mikadre ütiäte jai.

10. ¿Ja mräkätre tä kaibe ye ütiäte ni kräke ye ni raba bämike ño?

¹⁰ ¿Ja ruin ño nitre tä kaibe ie ye ñobätä nikwe mikadre ütiäte jai? Kukwe keta kabrebätä ja mräkätre tä kaibe ye nikwe mikadre gare jai ye ütiäte krubäte. Ñodre ja mräkätre ruäre tä ja töi mike ñaka ja mike gure. Mada abokän tö ja mäkätebätä akwa nire ben ja mäkädrete kwe ye ñan kwen ie. Ruäre abokän muko krütani kän yebätä tätre kaibe. Ñobätä ja mräkätre ye tä kaibe ye ni ñaka raba ngwentari ietre aune ni raba dimike kukwei muko känene ye ni ñaka raba niere ietre. Ebäkänä, ja mräkätre ruäre ye raba ja di kärere nie ja kukwei muko känänkäre. Akwa, ñan ribere nie ngwane nikwe ñaka nuaindre. Ni raba dimike nikwe niedre ie ye känenkri ja raba nemen ruin ño ie yebätä nikwe töbikadre käne (1 Tes. 4:11; 1 Tim. 5:13). Ja mräkätre tä kaibe ye ruäre tä dre niere ye ani mike gare jai.

11, 12. ¿Dre nuainta nikwe köböite ja ñan raba nemen ruin kwin ja mräkätre tä kaibe ie?

¹¹ Ni circuito tuabitikä iti tä sribi kwe ye nuainne kwin aune nita kaibe yebätä kukwe kwin tä nemen nikwe nieta kwe. Akwa ñobätä niara ñaka ja mike gure ye ja mräkätre ruäre tä ngwentari töi kwinbiti ie yebätä jata nemen ruin di nekä ie nieta kwe. Ja mräkä kaibe tä sribire sukursal keteiti känti tä niere: “Ni kaibe ye tä nemen tuin bobre ja mräkätre ie tä nemen tuin tie ruäre ngwane, yebiti tätre bämike ni kaibe ye tä ja tare nike aune kukwe kwin ñaka tä kwetre”.

¹² Meri testiko iti tä sribire Betelte tä niere: “Ni kaibe ye jökrä tö ja mäkätebätä aune tä niken fiestabätä ngwane tä niken kukwe ye kräke ye nütüta ja mräkätre ruärekwe. Bati, ti juanba sribi Betelbätä nuainne kä keteiti känti. Köbö te gätä nuaindi deu ye näire ti rababa. Ja eteba känti ti rabai ye käkwe nieba tie konkrekasion kwe te ja ngwaitre nibu nämä abokän tö rababa mikai gare tie nieba kwe tie. ‘Ti ñan tä kukwei muko känene mä kräke’ nieba kwe tie, akwa nun rikaba gwäkäre Ju Ja Ükarakrö yete ngwane ti kaba küdebiti kwe aune ti jänrikaba kwe ja ngwaitre nibu nämä yekänti. ¡Nun nimä ngwanba kwe ja gaire yete!”.

13. ¿Dre käkwe meri testiko iti dimikani töbike kwin jabätä?

¹³ Meri testiko kaibe mada sribikä Betelte tä niere: “Ja mräkätre prekursor tä kaibe kä kwati krubäte te ye ruäre gare tie, niaratre ye tä töbike kwin kukwe keta kabrebätä, tä ja töi mike kukwe ruäre nuainne, tä juto biare ni mada dimikakäre aune kätä juto bätätre tuin tie. Niaratre ye tä konkrekasion dimike krubäte, akwa ja ñan ruin bäri ütiäte ietre nitre mada yebiti ta tä kaibe yebätä aune ñaka gure bätä monsoi ñaka yebätä ja ñan ruin ngwarbe ietre”. Ja mräkätre konkrekasion nikwe te tä ni mike ütiäte jai ye bä nuäre krubäte, ni ñaka tuin ngwarbe ietre o niaratre ñaka bätä ngwen nibätä, arato ñaka ni tuenmetre kaibe o ñaka ni mike bäri ütiäte ni mada kräke, ñakare aune ni jökrä tä ja tarere aune ja mike ütiäte jai konkrekasionte.

14. ¿Ja mräkätre tä kaibe ye ütiäte ni kräke ye ni raba bämike ño?

¹⁴ Ja mräkätre tä kaibe ye ñan rabadre tuin  bobre nie tä kaibe yebätä, ñakare aune töi kwin keta kabre yebätä mikadre tuin ütiäte jai ye kwin kräketre. Ni ñaka rabadre nekwetekä jiebiti. Ñakare aune tätre ja ngwen metre ye nikwe mikadre ütiäte jai. Niaratre tä dre nuainne yebätä nikwe ja töi mikai ngwane, ni ñaka täi niere ietre, ‘mä ñaka ütiäte tikrä’ (1 Cor. 12:21). Ye köböire niaratre ütiäte ni kräke konkrekasionte rabai gare ietre.

15. ¿Ja mräkätre tä dre nuainne kukwe driekäre bäri?

¹⁵ Bitinkä, ja mräkätre kwati tä ja kite blitakäre kukwe madabiti kukwe driekäre bäri. Yekäre tätre ja kwite konkrekasion madate (Hech. 16:9). Ja mräkätre tä kukwe ye den nuaindre akwle jai. Niaratre ñaka raba blite jötrö kukwe madabiti, akwa tä ja ngwen ño aune kukwe nuain gare ietre yebiti tä konkrekasion dimike krubäte. Niaratre tä ja di ngwen konkrekasion dimikakäre ye ütiäte ni kräke, ¿ñan ererea?

16. ¿Nitre umbre ji ngwanka rabadre dre ngwen törö jai tö rabadre ja mräkä iti kä biain kädekakäre ngwane?

¹⁶ ¿Ja mräkätre ñan blite kwin ni kukweibiti ye raba nemen ji ngwanka o siervo ministerial? Jän. Ja mräkä ye ñaka blite kwin ni kukweibiti yebätä ñaka kädekadre ji ngwankäre ye nitre umbre ji ngwanka ñaka rabadre nütüre. ¿Ñobätä? Ñobätä ñan aune Biblia tä dre ribere nitre ji ngwanka aune siervo ministerial ie yebätä nitre umbre ji ngwanka töbikadre aune ja mräkä ñan blite kwin ni kukweibiti ye ñan aibätä ja töi mikadre kwetre (1 Tim. 3:1-10, 12, 13; Tito 1:5-9).

17. ¿Nitre ja mräkäre tä niken juta madate ye käkwe dre diandre nuaindre jai?

¹⁷ Nitre ja mräkäre ruäre tä ngitie juta madate o tä niken sribi känänkäre jai. Juta mrä yete blitata kukwe madabiti, aisete monsotre tötikata kwelate kukwe yebiti aune nitre rüne ja kitadre kukwe yebiti sribi känänkäre jai. Akwa ani ne bämike. Juta mrä yete konkrekasion o grupo tärä niaratre kukweibiti ngwane, ¿niaratre dre nuaindre? ¿Konkrekasion medente ja ükadrekrö kwetre? ¿Konkrekasion niaratre kukweibiti o kukwe madabiti?

18. Gálatas 6:5 tä niere erere, ¿ni ji ngwanka mräkätre käne tä kukwe den nuaindre jai ye ütiäte nikrä ye ni raba bämike ño?

¹⁸ Konkrekasion medente nitre ja mräkäre rabadre niken ye ni ji ngwanka mräkätre käne rabadre den nuaindre jai. Akwa konkrekasion meden kwin mräkätre kwe kräke yebätä töbikadre käne kwe (ñäkädre Gálatas 6:5 yebätä). Kukwe ye tä gare ni itire itire ie, aisete ni ji ngwanka mräkätre käne ye nikwe mikadre ütiäte jai. Yebätä niara dre diandre nuaindre jai ye mikadre ütiäte jai aune mräkätre kwe kadre ngäbiti kwin konkrekasionte (Rom. 15:7).

19. ¿Kukwe medenbiti blitata konkrekasionte ye ñan nüke gare monsotre ie ngwane ni ji ngwanka mräkätre käne käkwe dre nuaindre?

 ¹⁹ Nitre rüne aune meyere ruäre tä ja ükökrö konkrekasion te blitata niaratre kukweibiti yete monsotre ben. Akwa monsotre tötikata kwelate kukwe mada yebiti ngwane, rün aune meye kukwei ye ñan tä nüke gare ietre raba ruin nie. Ye köböite gätä ñaka nüke gare ietre aune ñan nirien kukwe ja üairebiti. Kukwe ne erere ben ni ja mräkäre tä ja tuin ngwane, ni ji ngwanka mräkätre käne rabadre orare aune töbike kukwe yebätä monsotre kwe dimikakäre ja kete Jehovabe aune juta kwe yebe. Kukwe ketebu aibe tä niaratre käne, akwa keteiti aibe diandre kwe nuaindre jai. Rabadre niaratre kukwei ye driere monsotre kwe ie o konkrekasion te blitata monsotre kukweibiti yete ja töi mikadre niken kwetre. Niara ja töi mikadre niken konkrekasion medente, akwa ja mräkätre konkrekasion yete käkwe niaratre mikadre ütiäte jai aune taredre.

20. ¿Ja mräkätre tä ja kite blitakäre kukwe madabiti ye ütiäte ni kräke ye ni raba bämike ño?

²⁰ Kukwe jene jenebätä ja mräkätre tä ja di ngwen blitakäre kukwe madabiti. Blitakäre kukwe yebiti ñan tä nemen nuäre kräketre, akwa niaratre ñaka blite kwin kukwe yebiti yebätä nikwe ñaka ja töi mikai ngwane, niaratre tä Jehová tarere aune tö mikai täte ye rabai tuin merebe nie. Niaratre ñan blite kwin ni kukweibiti yebätä ñan tädre konkrekasion nikwe te ni ñaka nütüdre jire.

21, 22. ¿Ñobätä nita debe bien krubäte Jehovai?

²¹ Ni jökrä ütiäte Jehová kräke yebätä nita debe bien krubäte. Ni brare o ni merire, ni kaibe o ni gure, ni bati o ni umbre, ni blite kwin kukwe madabiti o ni ñaka blite kwin kukwe madabiti, akwa ni jökrä ütiäte Jehová kräke aune ja mräkätre kräke (Rom. 12:4, 5; Col. 3:10, 11).

²² Apóstol Pablo kukwe bämikani ni ngrabarebiti yebätä kukwe ütiäte ja töi kräke nibi gare nie. Kukwe nibi gare nie ye nikwe mikai täte ngwane, ni ütiäte konkrekasionte rabai gare nie aune nikwe ja töi mikai kukwe mada nuainne ja mräkätre dimikakäre, mikakäre ütiäte jai aune tarekäre.