1. ¿Kukwe meden ütiäte tä nikwe?

NITA konkrekasion Jehovakwe te ye ütiäte krubäte ni kräke. Kä bä nuäre ja üairebiti nete nita nüne jäme aune kätä juto ni jökräbätä. ¿Akwa drekäre ni itire itire tä konkrekasionte?

2. ¿Tärä keta kabre tikani Pablokwe yete kukwe meden bämikani krubäte kwe?

² Apóstol Pablo tärä keta kabre tikani yebätä konkrekasion bämikani kwe kukwe keteitibiti kukwe ütiäte driekäre nie. Konkrekasion ye abokän ni ngrabare kwrere niebare kwe aune ni itire itire tä konkrekasionte ye abokän ni ngrabare kiakia ye kwrere (Rom. 12:4-8; 1 Cor. 12:12-27; Efes. 4:16).

3. ¿Kukwe meden ketamä ja töi kräke rabai gare nie kukwe ja tötikara nekänti?

³ Ni itire itire ye ütiäte krubäte konkrekasion Jehovakwe yete. Ni jökrä raba konkrekasion dimike nemen dite. Ni kite medenkri, nita nüne ño, ni ja tötikabare o ñakare ni jondron bökäne o ñakare akwa yebiti ta ni jökrä abokän ütiäte krubäte konkrekasionte. Pablo kukwe bämikani yebätä nibike kukwe ketamä mike gare jai ja töi kräke kukwe ja tötikara nekänti. Kena, ni itire itire ütiäte krubäte konkrekasion Jehovakwe yete. Ketebukäre, nane ja ñaka ruin ütiäte nie konkrekasionte ngwane ni raba dre nuainne ja töi kwitakäre kukwe yebätä ye rabai gare nie. Aune ketamäkäre, Jehovakwe sribi biani nie konkrekasion kwe yete ye ñobätä ni tädre nuainne töi kwatibebiti ye rabai gare nie arato.

4. ¿Romanos 12:4, 5 tä dre driere nie?

⁴ Kukwe kena ja töi kräke nie Pablo kukwe bämikani yebätä ye abokän ni itire itire ütiäte krubäte Jehová mräkätre ngätäite. Pablokwe kukwe bämikani ye kömikani kwe krörö: “Ni abko itibe akwa ni kiakia ngrabare abko kabre, akwa ni kiakia ngrabare ye ñan tä sribi ketetibe nuene, akwa tä sribi bätäkä ngwarbe nuene ni ngrabare die mikakäre. Ye kwrere arato, ni itire itire tödekaka Kristobti tä nekete niarakri abko ni kwati, akwa ni abko Kristo ngrabare itibe, aisete nita nekete gwaire jakri ja die mikakäre kwärikwäri” (Rom. 12:4, 5). Sribi ütiäte tä ni itire itire kisete konkrekasionte, akwa ni jökrä ütiäte ye Pablo tö namani mikai gare kukwe yebiti.

5. ¿Jehovakwe dre ‘ütiäte’ biani konkrekasion ie?

⁵ Nire nire ütiäte konkrekasionte yebätä nita töbike ngwane, bengwairebe nita nemen töbike nitre tä juta Ngöbökwe jie ngwen yebätä (1 Tes. 5:12; Heb. 13:17). Kristo köböire Jehovakwe ‘nitre brare biani jondron ütiäte ye kwrere’ konkrekasion ie yebrä metre (Efes. 4:8, TNM). ¿Akwa nitre brare biani ngwarbe ye abokän nire nire? Ye abokän Nitre Braibe Konkrekasion Jökrä Ngübabitikä aune niaratre dimikaka, ja mräkätre sukursal jie ngwanka, ja mräkätre circuito tuabitikä, ja mräkätre ni tötikaka kwelabätä, ja mräkätre ji ngwanka konkrekasionte aune siervo ministerial. Üai demebiti ja mräkätre ye jökrä kädekani oveja ütiäte Jehovakwe ye ngübakäre aune konkrekasion dimikakäre (1 Ped. 5:2, 3).

6. 1 Tesalonicenses 2:6-8 tä niere erere, ¿ja mräkätre kädekani üai deme yebiti ye tätre ja di ngwen dre nuainne?

⁶ Ja mräkätre kädekata sribi jene jene nuainkäre üai deme yebiti. Ni kise, ni ngoto aune ni ngrabare kiakia mada ye jökrä tä ni ngrabare dimike sribire kwin, ye erere arato nitre kädekani ye tä sribi jene jene nuainne konkrekasion dimikakäre. Nitre mada käkwe niaratre käikitadrekä ye ñan ai känänta kwetre, ñakare aune tätre ja di ngwen ja mräkätre dimikakäre aune kä mikakäre nuäre bätätre (ñäkädre 1 Tesalonicenses 2:6-8 yebätä). Ja mräkätre ye ünä ja üairebiti aune tätre kukwe ni madakwe ye mike käne kukwe jakwe yebiti ta yebätä nita debe bien krubäte Jehovai.

7. ¿Dre kwin tärä ja mräkätre prekursor aune misionero yekwe?

⁷ Konkrekasion nikwe te ja mräkätre misionero, prekursor especial aune prekursor regular tärä raba ruin nie. Ja mräkätre, merire brare kwati käbiti tibien tä kukwe driere köbö täte aune nitre mike ja tötikaka. Ye köböire nitre kwati dimikanina kwetre nemen ja tötikaka Jesukwe. Ja mräkätre ye jökrä bäsi ñaka jondron bökäne krubäte, akwa Jehovakwe kukwe kwin keta kabre bianina ietre (Mar. 10:29, 30). ¿Ja mräkätre ye tä nibe konkrekasionte yebätä nita debe bien krubäte Jehovai ñan ererea?

8. ¿Ni kukwe driekä itire itire ye ñobätä ütiäte Jehová kräke?

⁸ ¿Akräke ja mräkätre kädekani ji ngwankäre aune ja mräkätre sribikä köbö täte ye aibe ütiäte konkrekasionte? Ye ñaka kore. Ja mräkätre itire itire ye ütiäte krubäte Jehová kräke aune konkrekasionte (Rom. 10:15; 1 Cor. 3:6-9). Kukwe ye metre ñobätä ñan aune konkrekasion ükaninte kukwe ütiäte kräke ye abokän nitre mikakäre ja tötikaka Jesukwe (Mat. 28:19, 20; 1 Tim. 2:4). Ja mräkätre kukwe driekä, ja ngökanina ñöte o ñakare, ye jökrä tä ja di ngwen sribi ütiäte ye mike nuaindre käne jai (Mat. 24:14).

9. ¿Meritre testiko ye ñobätä ütiäte ni kräke?

 ⁹ ¿Meritre testiko yebätä ni raba dre niere? Niaratre ye ütiäte krubäte Jehová kräke konkrekasionte. Meritre gure, nitre meyere, meritre kän muko krütani aune meritre kaibe ja ngwanka metre ye ütiäte krubäte Jehová kräke. Meritre ruäre käkwe kä mikani juto Ngöböbätä yebätä Biblia tä blite, ñobätä ñan aune ja ngwani töbätä kwetre, tödekabare, sribibare kä jutobiti, ñan kä jürä ngwani jabätä, ja ngwani mantiame aune kukwe kwin nuainbare (Luc. 8:2, 3; Hech. 16:14, 15; Rom. 16:3, 6; Filip. 4:3; Heb. 11:11, 31, 35). Meritre testiko töi kwin keta kabre ye kwrere tärä konkrekasionte. Niaratre tä nibe konkrekasionte yebätä nita debe bien krubäte Jehovai.

10. ¿Ja mräkätre niena umbre ye ñobätä ütiäte ni kräke?

¹⁰ Ja mräkätre niena umbre tä nibe konkrekasionte ye ütiäte krubäte arato. Ja mräkätre ye ruäre mekerabe tä Jehová mike täte. Mada abokän kä jämi rairebiti Jehová mikabätä täte. Ja mräkätre kwati ye tä bren kitera umbre yebätä aune ñan raba sribire krubäte konkrekasionte aune kukwe driebätä. Akwa yebiti ta, tätre ja di ngwen kukwe driekäre bätä di kwe yebiti tätre nitre mada dimike aune tötike. Kukwe gare krubäte ja mräkätre yei ye ütiäte krubäte ni kräke. Erametre, niaratre ye bä nuäre Jehová kräke aune ni kräke arato (Prov. 16:31).

11, 12. ¿Monsotre bati konkrekasion mäkwe te tä ja ngwen kwin ye tä mate ño mäbätä?

¹¹ Ani töbike monsotre bati yebätä arato. Satana tä kä ne gobraine aune niara töita ño ye drieta käbiti tibien ye ngätäite nünandre ye ñaka nuäre monsotre bati kräke (1 Juan 5:19). Akwa yebiti ta tätre blite gätäte, tätre kukwe driere aune käta nemen ietre blitakäre tödeka kwetre yebätä ngwane tätre nuainne ye käi juto nibätä. Monsotre bati, mun ye ütiäte krubäte konkrekasion Jehovakwe nete (Sal. 8:2).

¹² Ne madakäre, ja mräkätre ruäre ie ja ñan nemen ruin ütiäte konkrekasionte. ¿Ni ütiäte konkrekasionte ye dre käkwe ni dimikai mike gare jai? Ani mike gare jai.

13, 14. ¿Ñobätä nitre ruäre ie ja ñaka raba nemen ruin ütiäte konkrekasionte?

¹³ Kukwe ketebukäre ja töi kräke nie Pablokwe kukwe bämikanibätä ye tä ni mike töbike kukwe keteiti ben ja mräkätre tä ja tuin yebätä ye abokän, ja ñaka ruin ütiäte ja mräkätre ie konkrekasionte. Pablokwe tikabare: “Ni ngoto käkwe niedre, ¡A! Ti ñakare ni kise, aisete tita ni ngrabare bäre mento, niedre kwe, ¿ye ngwane rabadre ni ngrabare bäre mento ya? ¡Ñakare! Erere arato, ni olo käkwe niedre, ¡A! Ti ñakare ni okwä, aisete tita ni ngrabare bäre mento, niedre kwe, ¿ye ngwane rabadre ni ngrabare bäre mento ya? ¡Ñakare!” (1 Cor. 12:15, 16). ¿Kukwe niebare Pablokwe ye tä dre driere nie?

¹⁴ Nita ja ñäke ja mräkätre ben konkrekasionte ngwane, ni ütiäte arato ye ñaka jutuai mrebe nie. Ja mräkätre ye ruäre abokän dirire kwin, kukwe ükete kwin nuaindre o jie ngwen kwin. Aune ni ñaka niaratre erere raba ruin nie. Ye tä mike gare ni abrä töi bobre aune kukwe ñaka gare jökrä nie (Filip. 2:3). Akwa ja mräkätre ie kukwe nuain gare yebe käre ni täi ja ñäke ngwane ni rabai ulire aune di nekä. Ye medenbätä nikwe ja ngübadrebiti kukwe yebätä. Pablokwe niebare erere, ngwarbe nita ja mike kwati konkrekasionte ni raba kite nemen nütüre. ¿Dre raba ni dimike ñaka töbike kore jabätä?

15. 1 Corintios 12:4-11 tä niere erere, ¿kukwe nuain gare nie yebätä nikwe dre ngwandre törö jai?

¹⁵ Ani töbike kukwe nebätä: siklo kena ye ngwane Jehovakwe ja üai deme biani ja mräkätre ruäre ie sribi ruäre ñan tuabare nuainkäre, akwa itire itire namani sribi jene jene nuainnebiti (ñäkädre 1 Corintios 12:4-11 yebätä). Nitre kristiano itire itire yei Jehovakwe sribi jene jene ñan tuabare biani nuaindre, akwa niaratre jökrä ye nämäne ütiäte Jehová kräke. Erametre üai deme ñaka tä ni mike sribi ñan tuabare nuainne nitre kira erere, akwa kukwe ja erebe tä nemen bare. Sribi jene jene nuain gare nie, akwa ni jökrä ütiäte Jehová kräke.

16. ¿Apóstol Pablo kukwe meden niebare abokän nikwe mikadre täte?

 ¹⁶ Ni ñan tädre ja ñäke ja mräkätre madabe, ñakare aune Pablokwe mäträbare ne nikwe mikadre täte: “Ni itire itire tä sribi nuene ño, ye mika ñäräre kuin kwe, yebtä blita au kwe jakrä angwane, jändrän nuenta kuin kwe raba tuen ie, yebtä tö raba ja käikitekä ne ngwane ja käikitaka kwe, akwa ni mda mda tä sribi nuene ño, yebtä ñan ñäkä kwe” (Gál. 6:4).

17. ¿Pablo kukwe niebare ye nikwe mikai täte ngwane kukwe meden kwin rabai nikwe?

¹⁷ Pablokwe kukwe niebare ye nikwe mikai täte aune nita dre nuainne ye nikwe mikaitari ñärärä ngwane, kukwe ruäre nuain gare nie ye rükai gare nie. Ñodre, ni umbre ji ngwanka iti ye ñan dirire kwin konkrekasionte, akwa nitre mikadre ño ja tötikaka Jesukwe ye nuain gare kwin ie. O niara ñaka kukwe ükete bängrabe jai nuainkäre nitre umbre ji ngwanka mada ye erere, akwa niara ye ni ji ngwanka ja tarekä abokän ja mräkätre tä känene ne kwe dimikadre kwe Bibliabiti yebätä niara gare nitre madai. O niara abokän mantiame krubäte yebätä gare kwin ni madai raba ruin nie (Heb. 13:2, 16). Kukwe meden nuain gare nie ye rükai gare nie ngwane, kä rabai juto nibätä ñan ñobätä aune kukwe yebiti nita konkrekasion dimike. Aune dre ñan nuain gare nie, abokän ja mräkä mada ie nuain gare yebätä nikwe ñaka mokredi.

18. ¿Ñokänti ni raba nemen dirikä bäri kwin?

¹⁸ Dre dre nuain gare nie konkrekasionte, akwa ni jökrä rabadre ja töi mike sribire aune dirire bäri kwin. Yekäre, Jehovata ni tötike juta kwe yebiti. Ñodre, gätä nuainta bämän ngrabare yete ni tötikata dirikäre bäri kwin. ¿Ni tötikata ye nita kain ngäbiti kwin aune mike täte ya?

19. ¿Ni raba dre nuainne nänkäre Kwela Nitre Gobran Ngöbökwe Kukwei Driekä kräke yebätä?

¹⁹ Kukwe madabiti ni tötikata ye abokän Kwela Nitre Gobran Ngöbökwe Kukwei Driekä kräke, kwela ye ja mräkätre merire brare sribikä köbö täte kä 23 nemen 65 biti ye kräke. ¿Ni ñan raba nemen kwela yebätä ruin jabätä nie? Kukwe meden medenbätä mä ñaka raba niken kwela yebätä, yebätä mäkwe ñaka ja töi mika, ñakare aune ñobätä mä tö nänbätä kwela yebätä, yebätä mäkwe töbika. Biti kukwe meden ribeta nänkäre kwela yebätä ye ererebätä mäkwe kukwe ükate jai nuainkäre. Jehová diebiti aune nikwe ja di ngwain yebiti, kukwe meden namani tuin ribi nuaindre nie ye rabai bare nie.

20. ¿Romanos 12:6-8 ye tä dre driere nie?

²⁰ Kukwe ketamäkäre ja töi kräke nie Pablo kukwe bämikani yebätä ye tä Romanos 12:6-8 yebätä (ñäkädrebätä). Ni itire itire ie kukwe jene jene nuain gare, ye Pablokwe niebareta texto nekänti. Akwa ni itire itire ie dre nuain gare yebiti konkrekasion dimikadre aune kä mikadre jutobätä ye mikani gare Pablokwe.

21, 22. ¿Kukwe namani bare Robert aune Felice yebätä ye tä dre driere nie?

²¹ Ni umbre ji ngwanka iti nibike kädeke Robert yebätä dre namani bare ye ani mike gare jai. Sribi köbö täte nuainbare kwe juta madate, akwa ye bitikäre juaninta juta kwe känti sribikäre Betelte. Sribi mada mikani kisete ye ñaka niarakwe kukwe käme nuainbare yebätä niebare ie, akwa yebiti ta niarakwe niebare: “Sö kabre te ti rababa töbike blo jabätä aune ja rababa ruin ngwarbe tie. Ruäre ngwane ti törbaba kämikaikä Betelbätä”. ¿Dre käkwe niara dimikani kä ngwenta juto jabätä?  Sribi känekäne yete Jehovakwe dre driebare nie ye tä ni dimike sribi tä gwä ngwane ni kisete ye nuainkäre kwin ye ni umbre ji ngwanka käkwe ngwani törö ie. Robert ñaka ja töi mikadre kukwe nuainbare käne yebätä, ñakare aune raba dre nuainne kä nengwane yebätä ja töi mikadre kwe ye nükani gare ie.

²² Kukwe ye kwrere namani bare ja mräkä Felice Epíscopo yebätä. Niara aune muko kwe kä 1956 ye ngwane graduabare Kwela Galaad aune sribibare kwe ni ni tuabitikä erere juta Bolivia yekänti. Kä 1964 yete monso namani iti kwetre. Felice tä niere: “Sribi nämä nunkwe ye ñaka rababa nuäre nun kräke tuanmetrekäre. Kä kwati näre te ti nämä ulire krubäte ti raba niere. Akwa, Jehová diebiti tikwe ja töi kwitaba aune sribi mrä nämä ti kisete ni rüne erere yebätä tikwe ja töi mikaba”. ¿Ja ruin Robert aune Felice ye erere nie? ¿Sribi nuain nämäne nikwe ye ni ñan niena nuainne yebätä nita ulire? Ye erere ja ruin nie ngwane, ni raba dre nuainne Jehová kräke aune ja mräkätre kräke yebätä nikwe ja töi mikadre ye raba kä mike bäri juto nibätä. Nikwe sribidre käre aune dre nuain gare nie yebiti nikwe nitre mada dimikadre. Ye köböire kä täi juto nibätä nita konkrekasion dimike yebätä.

23. a) ¿Drekäre nikwe kä diandrekä jai? b) ¿Dre rabai gare nie kukwe ja tötikara ja känenkäre yebätä?

²³ Ni itire itire ye ütiäte Jehová kräke, ni rabadre mräkätre kwe ngätäite ie niara tö. Ni raba dre dre nuainne ja mräkätre dimikakäre yebätä nikwe kä diainkä jai töbikakäre aune ja di ngwain kukwe ye nuainkäre ngwane ni ütiäte konkrekasionte ye rabai gare nie. ¿Akwa ja mräkätre konkrekasionte ye tuin ño nie? ¿Niaratre ye ütiäte ni kräke ye ni raba bämike ño? Kukwe ütiäte ngwantarita ye rabai gare nie kukwe ja tötikara ja känenkäre yebätä.