Ñaka töbikata kwin ja käne, ¿ja tuadre ño kukwe yebe?

MÄ TÖ kukwe nuaindi ñan tä nemen bare mäi ngwane, ¿jata nemen ruin ño mäi? Nikwe dre niedre kukwe yebätä ye köböire nita töbike kwin ja käne o ye köböite ni ñaka töbike kwin ja käne tä nemen gare ye nitre ja tötikaka kukwe nebätä tä niere. Kukwe tärä nemen ni jökrä kisete, ¿akwa ñobätä nitre ruäre tä ja tuin kukwe yebe kä jutobiti aune tä näin ja käne? Mada abokän ñaka tä ja di ngwen jire chi ja tuakäre kukwe yebe, ¿ye ñobätä tä nemen bare?

Ñodre, mä rikadre sribi känene aune sribi bökänkä käkwe blitadre mäbe, akwa yebiti ta ñaka sribi biandre kwe mäi. Ye ngwane, ¿ja rabadre ruin ño mäi? Kukwe ye erere raba nemen bare käre mäbätä rabadre ruin mäi aune mä rabadre töbike krörö: “Ni ti ne erere känä ñaka raba sribikäre. Sribi ñaka raba kwen jire tie”. O bärira jire, sribi ñaka kwandre mäi yebätä kukwe jökrä ñaka raba nemen bare mäi rabadre ruin mäi, ye köböite mä rabadre töbike ne kwrere: “Ti ni ngwarbe. Ti ñaka ütiäte jire”. Nita nemen töbike ye erere ngwane, ni ñaka tä töbike kwin ja käne.

Ja tuadre ño kukwe yebe

Ñaka töbikata kwin ja käne, ¿mä raba ja tuin ño kukwe yebe? Kena, kukwe medenbätä mä ñaka töbike kwin ja käne ye mäkwe mikadre gare jai. Biti, mäkwe ja töi ükadrete kukwe yebätä. Ñobätä sribi ñaka biani mäi yebätä mäkwe töbika. Ñodre, ¿ni mä erere ie sribi bian ñaka raba ye aibätä sribi ñan biani mäi? ¿o sribi nuain gare mäi ye ñan ai ribe nämä yebätä sribi ñaka biani mäi?

Töbike kukwe meden meden nuainta kwin mäkwe yebätä, ye köböire kukwe medenbätä mäta töbike ngwarbe ye rabai gare mäi. ¿Sribi ñan biani mäi ye aibätä kukwe jökrä ye ñaka nuain gare kwin mäi? Bäri kwin mäkwe töbikadre kukwe nebätä: mätä kwin ja üairebiti, mäta nüne kwin mä mräkäbe aune mä ja ketamuko kwin yebätä töbike. Kukwe ñokwä nuainta mäkwe ye ñaka rabai bare kwin jire mäi ye erere mäkwe ñaka ja töi mika. ¿Ñobätä? Ñobätä ñan aune, ¿metrere sribi ñaka kwain jire mäi raba ruin mäi? Kukwe mada nuain raba nikwe ja tuakäre töbika ñaka kwin ja käne yebe.

Meta mikata ja käne erere rabadre bare yei tö ngwandre kwatibe

Bitinkä, nitre kukwe mikaka gare jai tö ngwan yebätä käkwe kukwe ne mikani gare. Tö ngwan ye abokän meta mikata ja käne erere rabai bare nie ie tö ngwanta nikwe meden gärätä mikani gare kwetre. Mikai gare kukwe ja känenkäre yebätä erere kukwe ye ñan ngöräbe mika raba gare tö ngwan yebätä, akwa raba ni dimike kukwe ütiäte nuainne. Ñodre, tö ngwan ye nikwe mikai tuin jai meta raba nemen bare nie ye erere ngwane, ye käkwe ni dimikai töbike krörö: “Tikwe meta mikai nuaindre jai ye erere rabai bare tie”.

Nikwe meta mikadre ja käne ye rabadre bare nie yekäre, käre ni tädre meta mike ja käne aune ja di ngwen mike nemen bare. Ni ñaka meta mike ja käne ye nikwe gadre jabätä ngwane, ni tö dre nuaindi ja känenkäre yebätä nikwe töbikadre kwin. Kena, ¿kukwe tärä nuainkäre ja känenkäre nie? Ni tö dre nuaindi ja känenkäre, dre bäri ütiäte ni kräke ye ñan tä nemen nuäre ni kräke ja töi mikakärebätä, ñobätä ñan aune bäri nuäre ni kräke ja töi mikakäre kukwe arabe nuainne köbö kwatire kwatire aune ñaka töbike kukwe mada ütiäte yebätä. Kukwe bäri ütiäte mikadre nuaindre käne jai yebätä Bibliakwe kukwe mikanina gare mekerabe (Filipenses 1:10, TNM).

Kukwe meden bäri ütiäte mä kräke ye rabaira gare mäi ngwane, rabai bäri nuäre mä kräke meta mikakäre ja käne kukwe ja üaire yebätä, mä mräkätre yebätä bätä jakrä. Akwa kenanbe nikwe ñaka meta keta kabre mikadre nuaindre jai, ñakare aune meden raba nemen bare jötrö nie ye nikwe nuaindre käne. Nikwe meta keta kabre nuaindre bengwairebe ye raba ni mike nainte aune ni ñan tö jatadre nuainbätä mada. Ye medenbätä, meta meden ñan rabadre bare jötrö ngwarbe nie ye kräke nikwe kukwe kia kia ükadrete ne kwe rabadre bäri nuäre ni kräke nuainkäre.

Ni tö dre ie yekäre nikwe ja di ngwain ngwane, rabai ni kisete; ye nieta krubäte aune kukwe ye metre. Kukwe meden bäri ütiäte ni kräke ye tä nemen gare nie ngwane, nikwe ja di ngwandre ne kwe rabadre bare nie. ¿Dre käkwe ni dimikai ja di ngwen nuainkäre? Nikwe meta mikadre ja käne ye ñobätä ütiäte ni kräke aune ye köböire dre kwin rabai nikwe yebätä töbikadre. Bäkänä, nikwe ja tuai kukwe ruäre ben, akwa nikwe ñaka kukwe ye tuanemetre ja ketebätä.

Ne madakäre, meta keteiti kräke ñan kukwe keteitibe ükadrete ne kwe rabadre bare nie. Ni tärä tikaka kädekata C. R. Snyder käkwe ja tötikanina krubäte tö ngwan yebätä tä kukwe ütiäte mike gare. Ni tö kukwe keteiti nuaindi ngwane, kukwe jene jene ükadrete ne kwe rabadre bare nie ye ütiäte nieta kwe. Ye köböire kukwe keteiti nuainta nikwe ye ñan tä nemen bare kwin nie ngwane, nikwe mada nuaindre aune ye erere nikwe nuaindre jatäri nememe rabadre bare nie ngwane.

Akwa ye ñan ngöräbe, Snyder tä mike gare nikwe meta mikani ja käne ye ñongwane kwitadre mada yebiti ye rabadre gare nie ye ütiäte arato. Nita meta mike nuaindre jai ye nita ja di ngwen bäre bäre nuainkäre, akwa ñan tä nemen bare nie yebiti ta ni töi täbe nuainbätä jankunu ngwane, ni di raba kite nekä. Bäri kwin, meta meden raba nemen bare jötrö ngwarbe nie ye nikwe mikadre nuaindre jai ye köböire nikwe tö ngwain jankunu.

Bibliabätä kukwe ye bämikata kwin rei David yebätä. Niara tö namani templo sribei Ngöbö Jehová kräke, akwa Ngöbökwe niebare ie niara ñan ai käkwe templo ye sribei, ñakare aune monso kwe Salomón käkwe sribei kräke. Kukwe ye raba David ngwen di nekä, akwa ñan namani romon aune ñan ja töi mikani jankunu kwe sribi ye nuainne, ñakare aune ja töi mikani kwe kukwe mada nuainne. Ja di ngwani kwe jondron ükökrö bätä ngwian ükökrö ne kwe monso kwe ye rabadre templo ye sribere (1 Reyes 8:​17-19; 1 Crónicas 29:​3-7).

Ñaka töbikata kwin ja käne, kukwe yebe ni raba ja tuin aune nita meta mike nuaindre ja käne yebätä ni raba töbike kwin, akwa yebiti ta ñan raba nemen nuäre ni kräke tö ngwankäre jankunu. ¿Ñobätä? Ñobätä ñan aune kukwe meden köböite ni ñan tä tö ngwen ye ni ñaka raba ükete. Kä nengwane, nünanta bobre, rü nuainta krubäte, kukwe ñaka kwin nuainta, bren tare aune gata ye köböite tö ngwan ye raba nete nikän. Akwa yebiti ta, ¿dre raba ni dimike töbike kwin jankunu ja käne?

[Üai]

Sribi ie mä tö ye ñan biandre mäi ngwane, ¿sribi mada ñan kwandre mäi mä rabadre nütüre?

[Üai]

Rei David tö namani meta meden nuaindi ye ñan namani bare ie ngwane, ja töi mikani kwe meta mada nuainne.