Ja kädriere chi nunbe.

Ti därebare 1979 Estados Unidos. Kä nämä krämä tibiti ngwane ti rüntre ja tuametreba. Ti meye ti ngübabare kukwe nuainta nitre judío yebätä, aune käre ti nämä niken kwela judía kädekata Yeshivás. Kä nämä krä kükü tibiti ngwane nun rikaba nüne Israel. Ti rikaba mada kwela kibutz, kä känti sribita tirete ye kädekata ne erere. Kä rikaba krati ta ngwane nun rikaba nüne México.

Yete sinagoga ñaka nämä känime, akwa kukwe mika nämäne täte tikwe ye tikwe nuainba jankunu, ti nämä vela okwä bukekä sabadote, ti nämä ñäke Torá [kukwe nuainta nitre judio] aune ti nämä orare sidur yebiti, ye abokän tärä ükaninte orakäre. Religión tikwe ye bökän ye käre ti nämä niere nitre nänkä kwelate tibe ie. Ti ñan nämäne ñäke jire Nuevo Testamento tä blite Jesukwe dre driebare aune dre nuainbare yebätä, ti meye ti mikani mokre kukwe yebätä nane tikwe ja mritadre kukwe blo ben yebätä.

¿Ñöbätä mä ja töi mikani ñäke tärä Nuevo Testamento yebätä?

Kä rababa 17 tibiti ngwane ti jataninta Estados Unidos ja tötikakäre jankunu kwelate. Ja ketamuko iti tikwe niara abokän kristiano nieba kwe tie aune kukwe nieta Jesubätä ye tikwe ñan mikadre era jai ngwane ja nire tikwe täi tökare.

Nitre tä Jesús mike era jai yebiti ngökata, tikwe nieba ie.

¿Mäkwe ñäkäbarera tärä Nuevo Testamento yebätä ya?

Ñakare.

¿Se ñobätä mä raba kukwe niere ye kwrere? Kukwe jämi gare nie yebiti ta nita blite ye ñaka kwin, ye ni töi ñaka tä nuainne.

Ti nämä töbike niara kwrere aisete kukwe nieba kwe tie yebiti ti bäbrükateba. Kä rababa gen tibätä, tikwe Biblia kwe ye ka ngäbitiba ie aune ti rikaba ngwena jai ñäkäkäre tärä Nuevo Testamento yebätä.

¿Mäkwe ñäkäba ye rababa tuin ño mai? 

Kenanbe, tärä Nuevo Testamento ye nitre judío käkwe tikabare ye rükaba gare tie ngwane ye ti töi mikaba ñan krütare. Ne madakäre, ti jataba ñäke bäri täräbätä ngwane, Jesús ye ni töi kwin aune töi bobre tö nämäne nitre dimikabätä, ñan namani kukwe sribere niaratrebätä. Arato ti janama tärä ruäre kätä blite niarabätä ye denkä bibliotekate kukwe känänkäre niarabätä. Metrere yete kukwe ñan kwanba tie mikakäre gare Jesús ye Mesías erametre. Jesús ye Ngöbö ye nie nämä tärä ruäre yete, ye ñan rababa tuin bä debe näre tie. Ti nämä töbike ne erere: “¿Jesús nämäne orare ngwane nire ie nämäne orare? ¿Akwe jai ya?”. Ne madakäre Jesús krütani akwa Biblia ta ne niere Ngöböbätä: “Mä ñan raba krüte”. a

¿Mäkwe dre nuainba mada?

Kukwe metre ñan raba kukwe kwite jai kwärikwäri, aune ti töi nämä kwatibe kukwe metre känänbätä. Aisete muare kwärä tikwe orabare Ngöböi ja brukwä ngöibiti aune yete tikwe ñan nuainba suduryebiti kenanbe jire. Tikwe oraba ünä ngwane jukwe meta nämä tie: Nitre testiko Jehovakwe nibu nämä yete. Nunkwe blitaba jabe yebiti täräkwata mikateba kwetre tie. Niaratre nämä kukwe Bibliabätä driere ye rababa gare tie täräkwata yebiti aune nunkwe blitaba jankunu mada ngwane yebiti. Ñodre, nitre Testiko kräke Jesús ñaka tä trinidad, ñakare aune niara “Ngöbö monsoi” b aune “niara odei biti jändrän jökrä sribebäre”. c

Kä rikaba braibe ta ngwane ti jatabata nüne Mexico aune yete kukwe drieta Mesiabätä yebätä tikwe ja kitaba jankunu nitre Testiko ben. ¡Kukwe ere rababa gare tie! Akwa yebiti ta ti ñan tö rababa kukwe ye mikabata era jai täte. Ti nämä ngwentari jai: “¿Kukwe nämä tikani Mesiabätä ye namani bare Jesubätä aibe ya? ¿Nane ja töi mikani ja bä mike jerekäbe nitre ngökakäre?.

¿Mrä mada dre käkwe mä mikani kukwe ye kain ngäbiti?

Kukwe nie nämä kira ye ni iti ñan raba bämike jerekäbe ye nitre Testiko mikaba gare tie. Ñodre, Mesías ye däredi Belén yete ye Miqueas käkwe mikani gare kä nikani 700 näre ta ja jiebiti ngwane. d ¿Se ni däredi medente ye nire raba kitete jakrä? Mesías mürie ketai ni kukwe käme nuainkä erere akwa yebiti ta doboi mikai nitre jondron bäkäne ye ngätäite. e Profecía ye namani bare jökrä Jesubätä.

Ti kräke kukwe mikata gare nirekri Jesús jatani ye ti töi mikaba bäri kukwe ye mike era jai. Rei David mräkätre yekri Mesías jatai ye drieta Bibliabätä. f Ni iti tä kite nirekri ye gare kwin nitre judío ie, ne aisete Jesús ye ñan kite David mräkätre yekri ngwane nitre ja mikaka niara rüere ye raba töi kwatibebiti kukwe ye erere niere nitre jökrä ie. Akwa ye ñan namani bare ñobätä ñan aune kukwe tikabare David mräkätre aune Jesús yebätä ye namani bare kwin täte. Ne ñan ngörä nitre jökrä nämäne niara kädekete arato “David monso”. g

Kä 70 yete, kä 37 Jesús krütani ye bitikäre, nitre rükä romano Jerusalén dikaninte jökrä aune registro ye juani ngwarbe o nianinte arato. Aisete kä ye känenkri Mesías ye jatadre ne kwe rabadre bämikani metre ta niara jatani David mräkätre yekri.

¿Mäkwe töbikaba ño mrä?

Ni blitaka Ngöbö diäre Moisés erere ye rabai Israel niebare Ngöbökwe Deuteronomio 18:18,19 yete aune ni mikani mokre kukwe nebiti mada: Ni iti se käkwe blitai ti käbiti ye ni iti ñan kukwe nuadi ngwane, ti ara kukwe ükaite ben. Tikwe ja tötikaba nguseta kukwe jökrä tä tikani Bibliabätä ngwane, rükaba gare metre ta tie Jesús Nazaret ye ara profetabätä blitata yete.