1, 2. ¿Ñobätä töbikakwe nämäne krubäte Jesús kisete?

JESÚS nämäne mrä kä tibienbätä ye ngwane, töbikakwe nämäne krubäte kisete. Nitre ja mikaka niara rüere yekwe niara murie ketai ye nämäne gare ie. Akwa kukwe keteiti nämäne niara mike töbike bäri. Niara tö nämäne kä mikai juto Rün yebätä, ñobätä ñan aune nämäne tare krubäte kwe. Kukwe tare ben Jesús nämäne ja tuin, akwa ja ngwain metre kwe ngwane Ngöbö kä ye mikai ütiäte kwe ye nämäne gare ie. Ne madakäre, nämäne ni tarere aune nikwe nünandre kärekäre yekäre niara rabadre ja ngwen metre nememe murie ketadre ye ngwane ye nämäne gare ie.

² Töbikakwe nämäne krubäte Jesús kisete, akwa yebiti ta töi nämäne jäme. Köbö ye känenkri niara niebare nitre apóstol kwe ie: “Kä jäme jen tikwe ti bike mikete munbtä” (Juan 14:27). “Kä jäme Ngöbökwe” ye nämäne kwe, ye abokän nire tä ja kete kwin Jehovabe ye töita jäme meden gärätä. Ye erere ja namani ruin Jesús ie yekwe töi aune brukwä mikani jäme (Filip. 4:6, 7).

3. ¿Nibike dre mike gare jai kukwe ja tötikara nekänti?

³ Kukwe kri ben Jesús ja tuani ye erere ni ñaka jire iti käkwe ja tuai. Akwa ni jökrä nänkä niara jiebiti ye käkwe ja tuai kukwe tare ben (Mat. 16:24, 25; Juan 15:20). Aune ruäre ngwane töbikakwe rabai ni kisete niara erere arato. ¿Ni raba dre nuainne ne kwe nikwe ñaka töbikadre krubäte aune ni töi tädre jäme? Jesús nämäne Kä tibienbätä ye ngwane, kukwe meden ketamä nuainbare kwe kukwe driekänti aune nikwe ja tuadre kukwe kri ben ngwane, ni raba ja ngwen ño niara erere ye nibike mike gare jai.

4. Kukwe nieta 1 Tesalonicenses 5:17 ye erere, Jesús nämäne mrä Kä tibienbätä ye ngwane orabare ño bä kabre kwe ye mä raba mike gare ruäre.

⁴ (Ñäkädre 1 Tesalonicenses 5:17 yebätä). Jesús murie ketadre ye käi namanina no ngwane, orabare bä kabre kwe. Jesús ja nire biain ye nitre ja tötikaka kwe käkwe ngwandre törö jai driebare kwe ietre ye ngwane, niara jämi ban bien ietre aune jämi vino bien ietre ye känenkri orabare kwe (1 Cor. 11:23-25). Pascua nuainbare kwetre yekänti orabare kwe nitre apóstol yebe arato jämi nikentre mento ye känenkri (Juan 17:1-26). Niaratre namani Getsemaní ye ngwane Jesús orabare bati bobu (Mat. 26:36-39, 42, 44). Aune niara murie jämi niken ye känenkri orabare kwe Rün ie (Luc. 23:46). Nibira gare nie ye erere, kukwe ütiäte ye mikakäre nemen bare Jesukwe kukwe ye mikani gare jökrä Jehovai.

5. ¿Ñobätä kä jürä namani nitre apóstol yebätä?

⁵ Jesús nämäne orare käre Rün ie yekwe dimikani kä ngwen nüke jai. Akwa, nitre apóstol käkwe ñaka ye erere nuainbare köbö yete deu aune kä jürä namani bätätre ja tuakäre kukwe kri ben (Mat. 26:40, 41, 43, 45, 56). ¿Ye tä dre driere nie? Ye tä mike gare nikwe oradi käre ngwane, nikwe ja ngwandi metre Jesús erere. Akwa, ¿nikwe dre ribedre orasionte?

6. ¿Ñobätä tödeka ye raba ni dimike ja töi mike jäme?

⁶ Jehovakwe ni mikadre tödeke bäri ye nikwe ribedre ie (Luc. 17:5; Juan 14:1). Tödeka ye nita ribere jai, ñobätä ñan aune ni jökrä nänkä Jesús jiebiti ye Satanakwe nuaite (Luc. 22:31). Kukwe keta kabre ben nikwe ja tuadre ye ngwane, tödeka ye raba ni töi mike jäme. ¿Ñobätä? Ñobätä ñan aune ni raba dre  dre nuainne ye erere nikwe nuaindre, akwa ye bitikäre nikwe kukwe ye mikadrete Jehová kisete. Niara raba kukwe ye ükete bäri kwin ni kräke yei nikwe tö ngwandre, ye köböire ni töi aune ni brukwä tädi jäme (1 Ped. 5:6, 7).

7. ¿Robert kukwe niebare ye tä dre mike gare nie?

⁷ Kukwe meden meden rabadre bare nibätä, akwa orasion ye raba ni dimike ne kwe ni töi tädre jäme. Ani blite Robert ni ji ngwanka konkrekasionte yebätä, niarabiti kä niena 80 biti bäri. Niara tä dre nuainne ne kwe töi tädre jäme ye tä mike gare: “Mekerabe nükebe nengwane kukwe nieta Filipenses 4:6, 7 ye käkwe ti dimikanina krubäte ja tuakäre kukwe kri tä nemen ti kisete yebe. Ngwian ñaka tä nemen tie aune bati ti nämä sribire ni umbrere ye tikwe tuametreba”. Tä mike gare jankunu: “Töbikakwe tä nemen ti kisete ye ngwane tita orare Jehovai. Tita orare bäri ye ngwane, ti töita nemen bäri jäme tä nemen ruin tie”.

8. Kukwe nieta Juan 8:29 ye erere, ¿dre köböire Jesús töi nämäne jäme?

⁸ (Ñäkädre Juan 8:29 yebätä). Nitre ja mikani Jesús rüere akwa yebiti ta niara töi nämäne jäme. ¿Ñobätä? Ñobätä ñan aune niara nämäne kä mike juto Rün yebätä ye nämäne gare ie. Kukwe kri ben Jesús nämäne ja tuin akwa käre Rün mikani täte kwe. Niara nämäne Jehová tarere yebätä, töi nämäne kwatibe mikabätä täte. Niara jämi kite Kä tibienbätä ye känenkri nämäne “ni sribikä kwin krubäte” Ngöbökwe (Prov. 8:30). Aune nükani kä tibienbätä ye ngwane, kukwe metre driebare  kwe Rünbätä kä jutobiti nitre ie (Mat. 6:9; Juan 5:17). Sribi ye kä mikani juto krubätebätä (Juan 4:34-36).

9. ¿Käre nikwe kukwe driedi ye raba ni dimike ño ne kwe ni töi tädre jäme?

⁹ Nikwe ja ngwandre Jesús erere Jehová kukwei mikakäre täte aune nikwe “sribi ni Dänkienkwe, yebtä [...] ja kita[dre] ja di ngöibti” (1 Cor. 15:58). Ni kristiano “töi[ta] [...] kwatibe” kukwe driebätä ye köböire ñaka tä ja töi mike krubäte kukweta kisete yebätä (Hech. 18:5). Nitre ie nita kukwe driere ye tätre ja tuin kukwe bäri kri ben ni kräke. Akwa, niaratre tä nemen Jehová tarere aune Ngöböta dre niere ye tä nemen gare ietre ngwane, niaratre tä nemen nüne bäri kwin aune kä jutobiti. Ye erere tä nemen bare ngwane, Ngöbökwe ni ngübai ie nita nemen tö ngwen bäri. Aune nita nemen tö ngwen kwatibe ye tä ni dimike ne kwe ni töi tädre jäme. Meri Testiko iti ie ja nemen ruin ñaka ütiäte aune tä nemen ulire kukwe yebe tä ja tuin mekerabe. Tä niere: “Tita kukwe driere käre ye tä ti dimike ja töi mike jäme aune tä kä mike juto tibätä. Ye ngwane jata nemen ruin bäri Jehová ken tie”.

10. ¿Brenda tä kukwe niere yebätä ni raba dre mike gare jai?

¹⁰ Ani blite meri Testiko kädekata Brenda yebätä. Niara aune ngängän kwe ye tä bren krubäte bren kädekata esclerosis múltiple ye kisete. Brenda tä silla de rueda yete aune di ñaka krubäte. Ruäre ngwane, tä kukwe driere ju ju te, akwa metrere tä nuainne tärä tikata kwe yebiti. Niara tä niere: “Ti ñaka rabai räre kä nengwane rükaba gare tie ye ngwane, tikwe ja töi mikaba kwatibe sribi Ngöbökwe yebätä. Tita kukwe driere ye tä ti dimike kukweta ti kisete ye käi kwitekä jabiti. Tita kukwe driere nitre ie ye ngwane, tita ja töi mike niaratre dimikabätä. Aune kukwe kwin tä ti kräke ja känenkäre ye tita ngwen törö jai”.

11-13. a) Nitre apóstol aune nitre mada nänkä Jesús jiebiti ye nämäne ja kete bökän ben, ¿ye bämikani ño kwetre? b) ¿Ja ketamuko yekwe Jesús dimikani ño?

¹¹ Jesús nämäne sribi Ngöbökwe nuainne ye ngwane ja tuani kukwe tare keta kabre ben kwe. Kukwe nieta Proverbios 18:24 ye erere, “ja ketamuko tärä abokän raba ja ngwen bäri metre ni eteba yebiti ta” ye kwrere nitre apóstol nämäne ja kete erametre ben ye bämikani kwetre. Ja ketamuko ye Jesús nämäne mike ütiäte jai. Kä ye ngwane niara etebatre ñaka nämäne niara mike era jai (Juan 7:3-5). Bati niara mräkätre namani nütüre kä nämäne ngwarbe niara dokwäbiti (Mar. 3:21). Akwa nitre apóstol ja ngwanka metre ye ñaka töbikabare ye erere. Jesús murie keta jämi ye känenkri deu niebare kwe ietre: “Mun abrä tä käre näin tibe okwäbiti tita ja tare nike” (Luc. 22:28, NGT).

¹² Ruäre ngwane, nitre apóstol käkwe niara mikani ulire. Niaratre nämäne ja mike ngite akwa Jesús ñaka nämäne ja töi mike kukwe yebätä, ñakare aune niaratre nämäne tödeke yebätä ja töi mikani kwe (Mat. 26:40; Mar. 10:13, 14; Juan 6:66-69). Jesús nämäne mrä deu nitre ja ngwanka metre yebe ngwane, niebare kwe ietre: “Ti Rün tä dre dre niere tie, erere tita mike gare jökrä munye, aisete mun abko ti kukwe muko [ja ketamuko] tikwe” (Juan 15:15). Erametre ja ketamuko nämäne kwe ye käkwe niara dimikani krubäte. Niaratre sribi Ngöbökwe nuainbare ben yekwe kä mikani jutobätä (Luc. 10:17, 21).

¹³ Nitre apóstol nämäne ja ketamuko Jesukwe, akwa nitre mada brare aune merire nämäne ja ketamuko kwe, yekwe niara dimikani sribi Ngöbökwe nuainne aune kukwe mada känti arato. Nitre ye ruäre käkwe niara nübaibare mröre ja gwirete (Luc. 10:38-42; Juan  12:1, 2). Nitre mada abokän käkwe dikakabare ben aune jondron nämäne kwetre ye biani kwe ie arato (Luc. 8:3). ¿Ñobätä ja ketamuko kwin nämäne Jesukwe? Ñobätä ñan aune niara nämäne ja kete kwin nitre ben. Jondron nuainbare kwe niaratre kräke aune ñaka kukwe ribebare krubäte kwe ietre. Niara töi nämäne metre aune nitre ye abokän töi nämäne ngite akwa debe biani kwe ietre. Aune ye käkwe niara dimikani ne kwe niara töi tädre jäme.

14, 15. a) ¿Ja ketamuko kwin raba nemen ño nikwe? b) ¿Niaratre raba ni dimike ño?

¹⁴ Ja ketamuko kwin yekwe ni dimikai ja ngwen metre Jehovai. Ja ketamuko kwin rabadre nikwe yekäre käne nikwe ja töi mikadre ja ketamuko kwin känene (Mat. 7:12). Ñodre, nikwe nitre mada dimikadre, metrere nitre tä ja di ribere ye dimikadre nieta Bibliakwe (Efes. 4:28). Ja mräkätre konkrekasionte tä ja di ribere yebätä, ¿ni raba ja töi mike? Ni kukwe driekä abokän tä bren o niena umbre, ¿ye ni raba dimike ño? Ni raba niara dimike jondron kökö. O nitre ja mräkäre kwe ngwian ñaka ye ni raba dimike mröbätä. ¿Internet käi jw.org^® aune aplicación JW Library^® yebiti kukwe känä gare kwin nie? Ye erere ngwane, ni raba ja mräkätre konkrekasionte dimike kukwe ye mike gare jai. Nikwe ja töi mikai nitre mada dimike ye ngwane, kä rabai bäri juto nibätä (Hech. 20:35).

¹⁵ Ja ketamuko rabai nikwe ye käkwe ni dimikai ja tuin kukwe kri rabai ni kisete yebe aune ye köböire ni töi tädi jäme. Job nämäne ja driere ye ngwane, Elihú niara kukwe nuani bätärekä, ye erere arato kukwe meden tä ni  mike töbike ye nikwe mikai gare ja ketamuko nikwe ie ye ngwane, niaratre käkwe ni kukwe nuai arato (Job 32:4). Erametre nikwe kukwe meden diandre nuaindre jai ye niaratre niedre nie ye ni ñaka rabadre ngübare, akwa kukwe nieta Bibliabätä yebiti niaratre mäträdi nibätä ye nikwe kukwe nuadre (Prov. 15:22). Nane ni rabadre ja di ribere ye ngwane, nikwe ja töi mikadre rei David erere, ja ketamuko kwe niara dimikani ye kani ngäbiti kwe aune ñaka bikabare kri kwe (2 Sam. 17:27-29). Erametre ja ketamuko kwin ye Jehovata bien nie (Sant. 1:17).

16. Kukwe nieta Filipenses 4:6, 7 ye erere, ¿dre aibe köböire ni töi raba nemen jäme? Mä raba mike gare.

¹⁶ (Ñäkädre Filipenses 4:6, 7 yebätä). ¿Ñobätä Jehová tä niere ni töi raba nemen jäme “Kristo Jesu” köböire? Ñobätä ñan aune ni töi aune ni brukwä tädre jäme yekäre, Jesús töita ño Ngöbö töi mikabätä nemen bare ye rükadre gare nie aune nikwe tödekadre ye ütiäte krubäte. Ñodre, nita ja mike ngite ye juanta jökrä ta nibiti niara ja nire biani ni ütiäre ye köböire ye tä ni töi mike jäme (1 Juan 2:12, TNM). Ne madakäre, Jesús tä Reire Gobran Ngöbökwe yete aune Satana bätä nitre gobrainta kwe tä kukwe tare nuainne nibätä ye ükaite Jesukwe yei nita tö ngwen (Is. 65:17; 1 Juan 3:8; Apoc. 21:3, 4). Aune sribi kri tä nuaindre nie yebätä Jesús tä ni dimike kä krüte nengwane ye tä ni dimike ñaka kä jürä ngwen jabätä (Mat. 28:19, 20). Ni töi mikata jäme, tö ngwanta aune ni ñaka kä jürä ngwen jabätä ye ütiäte krubäte ne kwe ni töi tädre jäme, ¿ñan ererea?

17. a) ¿Ni kristiano töi raba nemen ño jäme? b) Kukwe nieta Juan 16:33 ye erere, ¿ja rabai ruin ño nie?

¹⁷ Ye medenbätä, ¿nikwe ja tuadre kukwe kri ben ye ngwane ño ni raba ja töi mike jäme? Nikwe ja ngwandre Jesús erere. Kena, nikwe käre oradre. Ketebukäre, nikwe Jehová kukwei mikadre täte aune nikwe kukwe driedre kä jutobiti kukwe tare rabadre bare yebiti ta. Aune ketamäkäre, ja ketamuko nikwe ni dimikadre ye nikwe kadre ngäbiti. Ye ngwane kä jäme Ngöbökwe yekwe ni töi aune ni brukwä kriemikai. Jesús erere nikwe kä ngwain nüke jai ja tuakäre kukwe keta kabre ben (ñäkädre Juan 16:33 yebätä).