Winston, ñokänti Ngöbö namani gare mäi ye mä raba mike gare nuen.

Ti ririabare kä Queensland (Australia) nitre ñaka Ngöbö mike täte ye ngätäite. Kä jondron nire ngübakäre mente yekänti nun nämä nüne, ye medenbätä nitre ñan nun mräkäre yebe ti ñaka nämä ja tuin bäsi. Kä nämä 12 tibiti aune ti jataba Ngöbö känene. Tikwe oraba ne kwe kukwe metre niarabätä ye jatadre nüke gare tie. Kä rikaba ta ngwane, sribi kwanba tie kä Adelaida (Australia Meridional) yekänti. Aune kä jondron nire ngübakäre ye tikwe tuanmetreba. Kä nämä 21 tibiti ngwane, nunkwe köbö diankaba jai nänkäre Sydney ye ngwane, Pamela rababa gare tie. Nitre tä kukwe israelismo británico mike täte, yebätä Pamela blitaba tibe, nitre kukwe ye mikaka täte tätre niere niaratre nünanka Gran Bretaña ye abokän jatani nitre Israel yekri. Nitre Israel nämäne gobrane ngwitärikri abokän jänikani ngite siklo VIII yete, yekri niaratre kite nieta kwetre. Ti rikabata Adelaida ngwane, sribi muko tikwe abokän nämä ja tötike Bibliabätä nitre testiko Jehovakwe ben yebe tikwe blitaba kukwe yebätä. Nunkwe blitaba jabe ora braibe te, metrere nitre Testiko nämä kukwe meden mike täte yebätä, yete rababa gare tie ti nämä monsore ngwane, tikwe orasion nuainba ye ererebätä kukwe mikaba gare tie. Ni ti Sribekä aune Gobran kwe yebätä kukwe metre rababa gare tie. ¡“Perla [...] ütiäte kri” ye kwanba tie! (Mat. 13:45, 46).

Pamela, mä nämäne monsore ngwane mä nämäne perla ye känene arato, ¿ñokänti kwani mäi?

Ti rün aune ti meye nämä kukwebätä, niaratre yekwe ti ngübabare juta Coffs Harbour (Nueva Gales nemenkä mötörikri) yete. Kukwe israelismo británico mikata täte ye ti rün, ti meye, ti ruai aune ti mölöi nämä mike täte. Nitre kite mräkätre británico yekri ye Ngöbö nämä mike ütiäte jai ye drie nämä ti, ti ngwai köre, ti eteba umbre aune ti ngwañontre kwati ie. Akwa, kukwe drie nämä nunye ye ñaka nämä nemen tuin metre  tie aune ja ñaka nämä nemen ruin Ngöbö ken tie. Kä nämä 14 tibiti ye ngwane, ti janama iglesia keta kabre nämä ti bäre yete, ñodre, iglesia anglicanos, bautistas aune adventistas del séptimo día yete. Akwa nitre ji ngwanka yete ñaka ti dimikaba Ngöbö mike gare jai.

Ja känenkäre, ti mräkätre rikaba nüne kä Sydney yete, kä yekänti Winston rababa gare tie niara nämä basare. Niara ninina ye erere, nunkwe blitaba kukwe mika nämä täte yebätä, niara jataba ja tötike Bibliabätä nitre Testiko ben. Ye bitikäre, niara nämä tärä tike tie ye ngwane nämä texto keta kabre Bibliabätä tikebätä. Ti raba niere metre, kenanbe ti rababa töbike aune rubun. Akwa, kukwe ye abokän metre jataba nüke gare bätärekä bätärekä tie.

Kä 1962 yete ti rikaba nüne Adelaida ne kwe nun tädre bäri ja ken Winston ben. Nitre Testiko nämä ja mäkäninte ben niara blitabare ne kwe tikwe nünandre nitre yebe. Niaratre kädeka nämä Thomas aune Janice Sloman, niaratre sribi misionero nuainbare juta Papúa Nueva Guinea yekänti. Niaratre ja töi mikaba kwin krubäte ti kräke, kä nämä krire 18 tibiti aune niaratre ti dimikaba nökrö bäri Jehová ken. Aisete ti rababa ja tötike siba Ngöbö Kukweibätä aune kukwe ye metre rükaba gare bengwairebe tie. Nunkwe ja mäkäteba ye bitikäre, Winston aune ti nun rababa sribi Jehovakwe ye nuainne kä jutobiti. Kukwe ñaka nuäre ben nunkwe ja tuanina, akwa yebiti ta kukwe keta kabre kwin namanina nunkwe ye tä nun töi mike perla kwani nunye ye mike tuin ütiäte jai.

Winston, mäkwe sribi Jehovakwe kömikani ño kena ye mä raba mike gare nunye.

Nunkwe ja mäkäteba ye käi rikaba braibe ta ngwane, Jehovakwe “jukwe [...] kri” tikaba kena sribi kwe nuainkäre nunye (1 Cor. 16:9, NGT). Ni circuito tuabitikä Jack Porter yekwe jukwe kri ye mikaba gare käne nunye, niara nämä konkrekasion te ja mräkätre braibe nämä ja ükökrö ye tuinbiti. Jack aune ti nunta sribire gwairebe sukursal jie ngwankäre kä Australasia yekänti. Kä ye ngwane, niara aune muko kwe Roslyn, niaratre nun töi mikaba sribi prekursor regular ye nuainne, nunkwe sribi ye nuainba kä jutobiti kä kwärike te. Kä nämä 29 tibiti ye ngwane nun nübaiba circuito tuinbiti ngutuä mrente kä mötörikri yete, sukursal Fiyi nämä jie ngwen. Nunkwe ngutuä mrente Kiribati, Nauru, Niue, Samoa, Samoa Norteamericana, Tokelau, Tonga, Tuvalu aune Vanuatu tuabitiba.

Kä ye ngwane, nitre nünanka ngutuä mrente yekänti ye ruäre ñaka nämä tö ngwen nitre testiko Jehovakwe ie, aisete nun rabadre ja ngübarebiti aune mokrere jabiti (Mat. 10:16). Konkrekasion jökrä yete ja mräkätre braibe nämä ja ükökrö yebätä ruäre ngwane ju ñaka nämä nemen nunye kübiakäre. Aisete nun raba nemen kübien nitre nünanka yete ye gwirete o ñakare ye nun nämä ngwentari ietre. Käre niaratre nämä nun kain ngäbiti kwin.

Winston, kukwe kwitadre nitre mada kukweibiti ye tuin kwin mäi. ¿Sribi ye kömikani ño?

Kä ye ngwane, ja mräkätre nünanka Tonga yekwe täräkwata kia aune täräkwata ruäre aibe nämä kwitani kukwe tongano yebiti. Nitre tötikakäre Bibliabätä nun nämä tärä La verdad que lleva a vida eterna nämä inglere yebiti nitre tötike. Aisete, nitre umbre ji ngwanka kräke kwela nuainba ye nuaba sö krati te ye ngwane, nitre umbre ji ngwanka nimä ie blita nämä gare kiakia inglere yekwe ja töi mikaba tärä ye kwite nitre tongano kukweibiti. Kukwe kwitaba ye Pamela tikaba maquinate aune ye bitikäre nunkwe juanba sukursal Estados Unidos ie ne kwe imprimidre. Sribi ye rababa bare sö krobu te. Tärä kwitaba ye ñaka rababa kwitabare kwin täte akwa nitre blite tongano ye dimikaba kwe kukwe metre ye mike gare jai. Pamela aune ti nun ñaka kukwe kwitaka akwa nun sribiba tärä yebätä yekwe nun töi mikaba kukwe kwitata yebätä.

Pamela, mä nämäne nüne Australia akwa kä ye ja erebe, ¿mä nämäne nüne ngutuä mrente yebe?

Ñakare kä nämä jene. Kä ruäre känti jörän nämä krubäte, kä nämä ngire, tibo, tukwe nämä krubäte, bren keta kabre nämä aune ruäre ngwane mrö ñaka nämä nemen krubäte kwetadre nunye. Akwa, ju sribebare aune ñaka nämä ketaninkä  kädeka nämä fale nitre samoano kukweibiti ye täni nun nämä nemen mren mike ñärärä. Deu sö träte koko kä ye trä nämä nemen mate tibien aune sö trä nämä nemen mate mrente ye nun nämä mrusaire. Ye nämä nemen kwin krubäte ñobätä ñan aune nun nämä töbiketari, orare aune nun nämä ja töi mike kukwe kwin yebätä aune nun ñaka nämä töbike kukwe mada yebätä.

Monsotre kia ye nämä nemen tuin nuäre nunye. Nitre menteni kwata ngwen yebätä monsotre kia töi nämä nemen ñan krütare ye nämä nemen tuin nuäre nunye. Nun nämä konkrekasion ngutuä mrentre Niue ye tuinbiti ngwane, monso chi brare rababa Winston küde bäsökö aune nieba kwe: “Mä küde ngin kuta kwrere nibi tuin nuäre tie”. Ni küde mutai ye erere monso chi ñan tuabare yebätä niedre ño kwe ye ñaka nämä gare ie.

Nitre nämä nüne bobre krubäte yebätä nun rababa ulire. Kä bä nuäre akwa nitre bren kräkäi mika ñaka nämä kwin aune kukwe kwin ñaka nämä. Akwa yebiti ta, ja mräkätre aune ja ngwaitre ñaka nämä töbike krubäte niaratre nämä jäme. Niaratre mräkä nämä ken aune kä nämä ietre Jehová mikakäre täte bätä käi kitakakäre ye käi nämä juto bätätre. Niaratre nämä kukwe kwin bämike yekwe nun dimikaba ja töi mike kukwe bäri ütiätebätä aune nüne jondron braibebiti.

Pamela, ñö diankäre aune ukwen riakäre ye erere mä ñaka nuainbare käne, ¿akwa mäkwe dre nuainba?

Ti rün kukwe ütiäte driebare tie yebätä tita debe bien krubäte ie, ñukwä bukadrete, ukwen riadre ñobiti aune nünandre jondron braibebiti ye driebare kwe tie. Nun janama konkrekasion Kiribati tuinbiti ye ngwane, nun rababa kübien mikä jue sribebare nämä ketaninkä cañaza (trärä) yebiti aune tibienta jondron kädekata coral ye nämä mritani yete nun rababa. Tikwe kä muanteba ñukwä okwä mikakäre aune tikwe koko kwata nötare ye mikaba ñukwäte mrö sribekäre. Ñö diankäre ti rikaba ñö okwä muani yekänti aune meritre nünanka yete ye nämä ñö denkä ye ngätäite ti rababa siba. Ñö diankakäre krimana nga metro krobu nämä aune kö nämä mäkänibätä, krito ye gwakitara kwrere. Akwa, kötü ñaka nämäbätä ñakare aune lata nämä mäkänibätä. Meritre itire itire nämä ñö den ye ngwane niaratre nämä “krito” kite aune nämä kise miniente jötrö ngwarbe lata kwitatekäre ne kwe ñö rikadre te. Rababa tuin nuäre nuaindre tie, ye bitikäre kä rükaba tie ñö diankäre. Tikwe krito ye kitaba bä kabre akwa lata ye rababa mate jerekäbe ñöbiti aune rababa nakainkä ñöbiti ta. Meritre jökrä rababa ti kötaire aune kötaba ünä kwetre ye ngwane meri iti ti dimikaba. Nitre nünanka yete ye käre nämä nun dimike aune niaratre nämä ja töi mike kwin nun kräke.

Mun nibu nämäne sribi Ngöbökwe nuainne ngutuä mrente yete ye nämäne tuin kwin munye. Kukwe meden namani bare munbätä abokän täbe törö munye ye niere nunye.

Winston: Nitre nünanka yete töi nämä ño ye ñaka rükaba gare bengwairebe nunye. Ñodre, ja mräkätre nämä nun nübaire ja gwirete ngwane, niaratre nämä mrö ye jökrä bien nunye. Nunkwe mrö ye mikadrete niaratre kräke ye ñaka nämä gare nunye. Aisete mrö bian nämä kwetre nunye ye jökrä nun nämä kwete. Ye bitikäre, kukwe ye rababa gare nunye ngwane, nun jataba mrö mikete niaratre kräke. Kukwe nämä nainte nunye, akwa yebiti ta ja mräkätre nämä nun töi mike nüke gare jai. Sö nämä niken krä ti ta ngwane, nun nämä nementa niaratre tuinbitita ye käi nämä nemen juto bätätre. Kä ye ngwane, nun aibe ben niaratre nämä ja kete.

Nun nämä nemen ja mräkätre tuinbiti ye köböire nitre nünanka yete ye rababa blite kwin nunbätä. Ja mräkätre nämä kukwe mike täte ye niaratre arabe käkwe kömikani nitre kwati krubäte nämä nütüre. Ye medenbätä, ni menteni kukwe driekä aune muko kwe nämä nüke ja mräkätre konkrekasionte tuinbiti ye ngwane, kukwe mika nämä täte nunkwe ye mika nämä täte kä jökräbiti tibien ye rükaba gare ietre aune yebätä niaratre töi nämä nemen ñan krütare.

Pamela: Konkrekasion Kiribati yete ja mräkätre braibe nämä ja ükökrö ye nun nämä tuinbiti ngwane, kukwe kwin rababa bare nunbätä ye ñaka käi nikwitekä jire tibiti. Ja mräkä kädeka  nämä Itinikai Matera niara aibe nämä ji ngwen konkrekasionte, niara nämä ja di ngwen nun dimikakäre. Bati kwi mrüke nämä mikani kwati kutuäte rababa ngwena nunye aune nieba kwe: “Ne mun kräke”. Kä ye ngwane kwi mrüke ye nämä ütiäte nun kräke. Ja ngwai ja mikaba mantiame nun kräke ye mataba kwin nun brukwäte.

Pamela, monso jämi därere krütani mäkän. ¿Dre käkwe mä dimikani näin ja käne?

Nun nämä Pacífico sur kä 1973 ye ngwane, ti nämä murore rababa gare tie. Nunkwe ja töi mikaba nikenta Australia aune sö rababa kräbokä tibiti ye bitikäre monso chi krütaba tibätä. Ye rababa tare krubäte Winston ie arato. Ti nämä ulire krubäte kä kwati krubäte te, akwa monso chi ye ñaka käi rikwitakaba tibiti nememe nunkwe ñäkäba La Atalaya 15 abril 2009 yebätä ngwane. Sección “Preguntas de los lectores” nämä niere: “Si una criatura muere en el vientre materno, ¿volverá a la vida en la resurrección?”. Kukwe ye tä gare Jehovai aune käre niara tä kukwe ükete ye ngwane tä nuainne kwin ye täräkwata ye nämä mike gare. Kukwe tare tä nemen bare abokän tä ni ngwen ja tare nike ye Jehovakwe diainkä jökrä, ñobätä ñan aune Ngobo ye kisete “sribi Diablukwe” mikani dikandrete kwe (1 Juan 3:8, NGT). Ni Jehová mikaka täte yekwe perla ütiäte tä ye täräkwata yekwe nun dimikaba mike nüke gare jai arato. Gobran Ngöbökwe ñaka tädre, ¿akräke dre ie nikwe tö ngwandre?

Monso chi krütaba nunkä, ye bitikäre nun rababata sribire köbö täte Ngöbö kräke. Sö ruäre te nunkwe sribiba Betel Australia yete aune ja känenkäre nun rababa circuito tuinbitita. Kä 1981 yete, nun nämä sribire Ngöbö kräke kä kobokä te Nueva Gales del Sur aune Sydney yete ngwane, nun nübaiba sribire sukursal Australia yete kä ye kädeka nämä kore aune nun täbe sribire yete.

Winston, mä nämä ngutuä mrente Pacífico sur yekänti ye tä mä dimike sukursal jie ngwen Australasia, ¿ñan ererea?

Jän, tä ti dimike krubäte. Kenanbe sukursal Australia ye nämä sribi Ngöbökwe nuain nämä Samoa aune Samoa Norteamericana ye jie ngwen. Ye bitikäre, sukursal Nueva Zelanda mikaba keteitibe sukursal Australia yebe. Aune nengwane sukursal Australasia tä, Australia, ngutuä mrente Cook, Niue, Nueva Zelanda, Samoa, Samoa Norteamericana, Timor Oriental, Tokelau aune Tonga ye jie ngwen. Sukursal tä ni juen ye köböire tikwe ja mräkätre nünanka kä jene jene te ye tuaninanbiti. Tita Betelte akwa tikwe sribibare gwairebe ja mräkätre nünanka ngutuä mrente yebe ye tä ti dimike krubäte sribire niaratre ben.

Kukwe ne mikakäre krüte ti törba mikai gare munye, Pamela aune ti ie gare, ñan nitre umbre aibe tö Ngöbö mikai gare jai. Ñakare aune monsotre tö “perla [...] ütiäte kri” ye känäin arato, niaratre mräkä ñaka tö kukwe Ngöbökwe mikai gare jai yebiti ta (2 Rey. 5:2, 3; 2 Crón. 34:1-3). Erametre, Jehová ye Ngöbö ja tarekä aune ni jökrä bati aune umbre rabadrete kwäre ie tö.

Pamela aune ti nun nämä Ngöbö känene ye käi nikanina 50 biti bäri ta aune ye köböire dre rabai bare nun kräke ye ñaka nämä gare nunye. Gobran Ngöbökwe ye abokän perla ütiäte krubäte niena gare metre nunye. Aune nun töita kwatibe ngübabätä ja di tätebiti.