SRIBI ruäre nuainta konkrekasionte abokän ni töta nemen nuain, ¿akwa nengwane sribi ye ñaka tä mikani ni kisete? Sribi ye ja mräkätre mada tä nuainne o sribi ye arabe ni nämäne nuainne käne. Nita kite umbre, nita bren, ngwain ñaka tä nemen nie o ni mräkätre tä nemen ngübadre nie, yebätä ñan nemen nuäre ni kräke sribi ye nuainkäre. O juta ükaninte Ngöbökwe tä kukwe ükete ye ngwane, sribi meden ni nämäne nuainne kä kwati krubäte te ye tä nemen nie. Nikwe dre dre nuainbare akwa Jehovata dre nuainmana nie abokän erere ñan nemen bare nie ni raba nemen nütüre. Kukwe ye erere känti, ruäre ngwane jata nemen ruin ulire nie aune ye raba nemen bare ni jökräbätä. Akwa, ¿ni raba dre nuainne ne kwe ni ñaka di riadrekä o ni ñaka rabadre rubun? ¿Dre ni dimikai kä ngwen juto jankunu jabätä?

Juan Bautista kukwe kwin bämikani ye tä kukwe ütiäte driere nie. Ni Ngöbö mikaka täte ye kisete sribi ütiäte krubäte nämäne mikani. Akwa kukwe meden ben ja tuadi kwe ye ñaka nämäne gare ie raba ruin nie, kitani ngite ye ngwane kä nikani bäri rairebiti yete aune ñaka kukwe driebare krubäte kwe. Akwa, yebiti ta kä nämäne jutobätä. ¿Kukwe meden käkwe niara dimikani? Aune, ¿ni abokän raba dre nuainne kä ngwankäre juto jankunu jabätä ja tuakäre kukwe rabadre bare nibätä yebe?

Abril 29 ye jatanina nüke ngwane, Juan jatani dirire nitre ie mikakäre juto Mesías ka ngäbitikäre, Jehovakwe nuain mananbare ie ye erere. Namani kukwe ne niere: “Ngöbö kä käinbti kebera nüke gobrane ni ngätäite, aisete kukwe kämekäme kite temen, bti ja töi kwiteta Ngöbö kukwäre” (Mat. 3:2; Luc. 1:12-17). Nitre kwati käkwe kukwe ye ka ngäbitibare. Nitre kwati krubäte kä mente känti nükani kukwe ye kukwe nuin, niaratre ye kwati käkwe ja töi kwitabare aune ja ngökani ñöte kwetre. Nitre ji ngwanka nämäne ja bämike jerekäbe, nitre ye ñan ja töi kwitadre ngwane mikai ja ngie nuin ye Juankwe mikani gare metre ietre (Mat. 3:5-12). Octubre 29 jatanina nüke ye ngwane, niarakwe sribi ütiäte nuainbare, ye abokän Jesús ngökani ñöte kwe. Yete ja käne, nitre töi mikani kwe niken Jesús, Mesías käbämikani ye jiebiti (Juan 1:32-37).

Juankwe sribi ütiäte nuainbare, yebätä Jesukwe kukwe ne niebarebätä: “Ni jökrä därebare kä nebtä, ye ngätäite ni ñakare jire iti abko bäri ütiäte Juan Bautistakrä” (Mat. 11:11). Sribi ütiäte nuainbare  Juankwe yebätä kä namani jutobätä raba ruin nie. Juan ye erere, nitre kristiano kwati kä nengwane käkwe sribi ütiäte nuainbarera. Ye erere namani bare ja mräkä Terry aune muko kwe Sandra yebätä, niaratre sribibare köbö täte Ngöbö kräke kä 50 biti bäri. Terry tä mike gare: “Tikwe sribi keta kabre ütiäte nuainbare. Tikwe sribi prekursor regular nuainbare, tikwe sribibare Betelte, tikwe prekursor especial nuainbare aune tikwe circuito aune distrito tuabitibare aune nengwane tita prekursor especial nuainenta”. Erametre, nita sribi ütiäte nuainne juta ükaninte Ngöbökwe yete ye tä kä mike juto nibätä. Juan nuainbare ye erere, nita sribire Jehová kräke ye tuin ütiäte nie akwa kä tädre juto jankunu nibätä yekäre, nikwe ja di ngwandre kukwe meden rabadre bare yebiti ta.

Sribi mikani Juan Bautista kisete yebätä käre nämäne debe bien, yekwe dimikani kä ngwen juto jankunu jabätä. Ñodre, Jesús ja ngökani ñöte ye bitikäre nitre ja tötikaka ñaka jatani näin krubäte Juanbe akwa Jesús abokän ben nitre jatani näin kwati krubäte. Kukwe ye namani nitre ja tötikaka Juankwe mike töbike, yebätä niebare kwetre ie: “Ni ye abko tä ni mda mda ngökö ñöte arato amne ni jökrä nibi niken niara känti” (Juan 3:26). Juankwe niebare ietre: “Ni iti tä niken ja mike gure angwane, ni ja mikaka gure ye abko ni merire rabadre ben, ye abko kwe. Akwa ni ja mikaka gure ye kukwe muko tä känime käkwe ni ja mikaka gure ye kukwei nuadre blite angwane, kä rabadre nuäre kri krübäte btä. Ye kwrere kä nena nuäre kri tibtä mtare, ñobtä ñan angwane Jesu abko ni ja mikaka gure kwrere amne ti abko kukwe muko kwrere aisete” (Juan 3:29). Juan ñaka nämäne ja gain Jesube, sribi nuain nämäne kwe ye nämäne ütiäte kräke aune Jesús nämäne sribi nuainne ye namani ütiäte kräke arato. “Ni ja mikaka gure ye kukwe muko” o ja ketamuko yebätä käta nemen juto ye kwrere kä namani juto jankunu Juanbätä.

Sribi ñaka nuäre nämäne Juan kisete akwa niara nämäne töbike kwin yekwe dimikani kä ngwen juto jankunu jabätä. Juan därebare ye ngwane, niara abokän nazareo yebätä ñaka rabadre vino ñain (Luc. 1:15). Niara nünanbare ño ye Jesukwe mikani gare: “Juan nükani ye ngwane ñaka mröbare kwe aune ñaka tomana ñani kwe”. Akwa Jesús aune nitre ja tötikaka kwe ye abokän ñaka nazareo, yebätä nämäne nüne ni mada mada kwrere (Mat. 11:18, 19, TNM). Ne madakäre, kukwe ñan tuabare ye Juankwe ñaka nuainbare akwa nitre ja tötikaka Jesukwe aune nitre nämäne näin käne niarabe ye abokän raba nuainne ye nämäne gare ie (Mat. 10:1; Juan 10:41). Akwa, Juankwe ñaka ja töi mikani kukwe yebätä, ñakare aune ja töi mikani kwe metrere sribi mikani Jehovakwe niara kisete yebätä.

Nita sribi meden nuainne Jehová kräke ye nikwe mikai tuin ütiäte jai ngwane, kä täi juto käre nibätä arato. Ja mräkä Terry abokänbätä blitani käne, niara tä niere: “Sribi keteitire keteitire mika nämä ti kisete yebätä ti nämä ja töi mike”. Niarakwe sribibare köbö täte Ngöbö kräke yebätä tä nemen töbike ngwane, tä kukwe ne niere: “Tikwe ñaka ja di ngwani ngwarbe ruin tie. Dre dre kwin namani bare tibätä ye tita ngwenta törö jai”.

Nita sribi meden nuainne Ngöbö kräke yebätä nikwe töbikaitari ngwane, kä rabai juto nibätä: ñodre, ni abokän “sribikä jen Ngöbökwe” ye ütiäte krubäte (1 Cor. 3:9). Ani bämike keteiti. Jondron meden ütiäte tä nikwe ye nikwe ngübai aune ükaite kwin ngwane, kä rikai kwati krubäte ta akwa jondron ye tädi ütiäte. Ye erere arato, sribidre Ngöbö kräke ye ütiäte krubäte yebätä nikwe töbikaitari ngwane, nikwe ñaka ja töi mikai ngwarbe, ñakare aune kä täi juto nibätä. Nita dre dre nuainne ye nikwe ñaka ketadre ni mada tä dre nuainne yebe, nita sribi nuainne ye ñaka ütiäte ni mada tä sribi nuainne ye kräke, ye nikwe ñaka nütüdre (Gál. 6:4).

Juankwe ñaka kukwe driei krubäte nämäne gare ie raba ruin nie, akwa niara murie ketai jötrö ngwarbe ye abokän ñaka nämäne gare ie raba ruin nie (Juan 3:30). Niarakwe Jesús ngökani ñöte ye söi nikani krä ti ta ngwane, kä 30 yete rei Herodes niara kitani ngite. Akwa, yebiti ta niara ja di ngwani kukwe driere (Mar. 6:17-20). ¿Kukwe namani barebätä akwa dre käkwe niara dimikani kä ngwen juto jankunu jabätä? Niarakwe ja töi mikani kukwe ja üaire yebätä.

Juan nämäne ngite, akwa Jesús nämäne dre dre nuainne kukwe driekänti ye namani gare ie (Mat. 11:2; Luc. 7:18). Jesús ye Mesías nämäne gare metre ie, akwa Kukwe Ngöbökwe nämäne dre niere ye erere Mesías nuaindi jökrä ya ye niara namani ngwentari jai raba ruin nie. Ñodre, Jesús rabai reire niebare, aisete,  ¿rabai gobrane bengwairebe? ¿niara mikai kwäre kwe ngite käi yekänti? Jesukwe dre nuaindi ye Juan tö namani mikai gare kwin jai, yebätä nitre ja tötikaka kwe juani nibu kwe ngwentari: “Ni Dianinkä juandre Ngöbökwe ne abko Jesu ya, ñakare ya abko tö namani gai” (Luc. 7:19). Nitre ye nükaninta ngwane, Jesús nämäne kukwe ñan tuabare nuainne nitre mikakäreta kwin ye niebare ie aune Jesukwe kukwe nie mananbare ie ye kukwe nuani kwin kwe raba ruin nie: “Ni ie kä tuen ñakare abko ie kä nibi tuenta kuin amne, ni nakwente abko nibi dikekäta kuin kröta. Erere arato, ni bren bren lebra kisete abko kwata nibi nebeta kuin jökrä amne ni olo ngidianinte abko ie ni kukwei nibi ruenta kuin. Erere arato, ni krütanikrütani abko nibi nüketa nire amne ni bobre bobre abko ie Ngöbö kukwei kuin mika nibi gare abko munkwe nie Juanye” (Luc. 7:20-22).

Kukwe yekwe Juan mikani dite raba ruin nie. Kukwe ye mikani gare metre ie, kukwe niebare Mesías yebätä ye erere Jesús nämäne mike nemen bare. Jesukwe ñaka Juan mikai kwäre ngite käi yekänti, akwa niarakwe ñaka sribibare ngwarbe ye nükani gare ie. Kukwe yebiti ta, kä nämäne jutobätä.

Juan ye erere nikwe ja töi mikai kukwe ja üaire yebätä ngwane, nikwe kä ngwain nüke jai kä jutobiti aune nikwe kukwe ngübai bätärekä (Col. 1:9-11). Nikwe ñäkäi Bibliabätä aune töbikaitaribätä ngwane, kukwe yekwe ni dimikai, ñobätä ñan aune nita dre dre nuainne Ngöbö kräke ye abokän ñaka ja di ngwanta ngwarbe ye rükaita törö nie (1 Cor. 15:58). Sandra abokän kädrite käne, niara tä niere: “Tita ñäke Bibliabätä kapitulo keteitibätä köbö kwatire kwatire ye tä ti dimike nökrö bäri Jehová ken bätä ja töi mike niarabätä aune ñaka töbike ja aibebätä”. Ne madakäre, dre dre nuainta käbiti tibien Gobran Ngöbökwe kräke ye nikwe mikadre ñärärä. Ye köböire nikwe ñaka ja töi mikai krubäte kukweta ni kisete yebätä, ñakare aune Jehovata dre nuainne yebätä nikwe ja töi mikadre. Sandra tä niere jankunu: “Kukwe mikata tuare sö kratire kratire JW Broadcasting^® yete ye köböire nita keteitibe juta ükaninte Ngöbökwe yete aune nita sribi meden nuainne Ngöbö kräke ye käita juto nibätä”.

Juan Bautista sribi Ngöbökwe nuainbare jötrö, “Elías nämane sribire [...] Ngöbö Üai köböire amne Ngöbö diebti, ye kwrere”. Aune Elías ye erere Juan töi nämäne “ni mda mda kwrere” arato (Luc. 1:17; Sant. 5:17). Ni töita debe bianbätä ngwane, Juankwe nuainbare erere, ni töi rabai kukwe ja üaire yebätä, dre dre rabai bare akwa yebiti ta kä täi juto nibätä sribikäre Gobran Ngöbökwe kräke.