NITA tödeke ye ütiäte krubäte. Ñodre, Satana töta nemen ni murie ketai kukwe ja üairebiti, akwa tödeka ye tä ni dimike “buko jutra ngitiekä Diablukwe” ye ötöte (Efes. 6:16, TNM). Ne madakäre, nita tödeke ye köböire ni raba ja tuin kukwe kri krubäte ben. Jesukwe niebare nitre ja tötikaka kwe ie: “Munkwe tödekadre chi mostasa nurai chi ye näre, akwa munkwe tödekadre era metre Ngöböbti, ye ngwane mun rabadre niere ngitio nokoye: Ja denkä mento yete, bti ma rika kä mdabti, munkwe niedre ie, ye erere ngitio noko rikadre mento” (Mat. 17:20). Nita tödeke ye köböire nita nemen dite kukwe ja üairebiti, aisete ni raba ja tötike kukwe ngwantarita nebätä: ¿Tödeka ye dre gärätä? ¿Nita tödeke ye ni raba bämike ño ja brukwäte? ¿Ni raba tödeka ye mike ño bäri dite? Aune, ¿nire ie nikwe tödekadre? (Rom. 4:3).

Nita tödeke ye abokän ñan jerekäbe kukwe nieta Bibliabätä ye era ni kräke ye ñan ai gärätä, ñobätä ñan aune Biblia tä niere: “Ngöbö tärä itibe abko mikata era jae üai kämekämenkwe amne Ngöbö jürä tä nebe btätre” (Sant. 2:19). Ye erere ngwane, ¿tödeka ye dre gärätä?

Biblia tä blite tödeka yebätä ngwane tä kukwe ketebu mike gare. Kena, tä mike gare “tödeka ye abko jändrän ngibiata nikwe abko erere rükadi ni kisete abko nita mike era jae” ye abokän kukwe ye rabai bare metre meden gärätä (Heb. 11:1a). Nita tödeke ngwane, Jehovata dre niere ye jökrä metre aune kukwe nieta kwe ye rabai bare metre ie nita tö ngwen. Ñodre, Ngöbökwe kukwe ne niebare nitre israelita ie: “Tikwe kukwe ükaninte kä ngwen aune kä drüne kräke ye mun raba ketebätä ngwane, kä ngwen aune kä drüne ye ñaka rabadre nemen bare kä kitani ye erere te, ye aibe köböire ti kukwe ükaninte David ben ye ti rabadre ketebätä” (Jer. 33:20, 21). Ñänä ñaka rükai kä mrebiti o ñaka näin nekä, ne kwe kä ngwen aune kä drüne ñaka rabadre jire, ¿ye ruäre ngwane ni tärä nemen nütüre? Jondron jökrä sribebare ye ererebätä kukwe ükaninte ne kwe Kä tibien nändre Ñänä bäre ta aune ye ni ñaka mike ngwarbe jai, ye medenbätä, ni jondron jökrä Sribikä käkwe kukwe ükaninte jondron ye kräke ererebätä tä ja jie ngwen, ¿niara tä dre käbämike ye ñaka mikai nemen bare kwe rabadre ruin nie? Niara tä dre niere ye rabai bare metre (Is. 55:10, 11; Mat. 5:18).

Ketebukäre, tödeka ye “jändrän tuen ñakare nie, akwa jändrän ye abko tärä era metre tä nebe ruen nie” ye abokän jondron meden ñan tuin nie akwa ye metre ni kräke meden gärätä (Heb. 11:1b). Ani töbike kukwe bämikata nebätä. Monso chi kukwe ngwandretari nie, ¿ñokänti gare nie murie ye tärä? Erametre, murie ye ni ñan tuabare akwa dre tä mike gare murie ye tärä ye ni raba mike gare monso chi ie, ñodre, nita murie jäke, murie tä mate aune jondron mada mada tä nemen murie köböire ye ni raba niere ie. Kukwe ye rükadre gare kwin monso ie ngwane, murie ye niara ñan tuabare akwa mikai era kwe jai. Ye erere arato, dre dre tä nemen bare ye nita mike ñärärä ngwane, nita nemen tödeke (Rom. 1:20).

Nita dre nuainne yebiti nita bämike nita tödeke, nikwe tödekadre yekäre, käne “kukwe metre” ye rabadre gare nie (1 Tim. 2:4, NGT). Akwa ye ñan  aibe ngörä. Apóstol Pablo tikani nita tödeke ye nita bämike “ja brukwäte” (Rom. 10:10, NGT). Kukwe metre rabadre era ni kräke ye ñan aibe, ñakare aune nikwe mikadre ütiäte jai. Ye köböire nita tödeke ye nikwe bämikai, ye abokän kukwe metre tä nemen gare nie ye ererebätä nikwe ja ngwandre meden gärätä (Sant. 2:20). Nire ñaka kukwe metre ye tarere ja brukwäte ngwane, kukwe meden metre ye ñaka raba mike era jai kukwe mada ngwarbe tä töite yebätä o raba kukwe mike jabiti ja mikakäre ngite (2 Ped. 3:3, 4; Jud. 18). Ye medenbätä, nitre kira käkwe kukwe ñan tuabare tuani nemen bare akwa niaratre ye jökrä käkwe ñaka tödekabare (Núm. 14:11; Juan 12:37). Nire nire tä kukwe metre tarere aune ja brukwä mike kukwe ngwarbe nieta ye kräke, nitre ye aibe Ngöbö üai deme tä dimike tödeke (Gál. 5:22; 2 Tes. 2:10, 11).

Nitre kwati Ngöbö mikaka täte nämäne tödeke metre ye ngätäite rei David kädekateta (Heb. 11:32, 33). Akwa kukwe ye erere nie ñaka raba mräkätre jökrä kwe yebätä. Ñodre, eteba umbre kwe kädeka nämäne Eliab ye ñaka nämäne tödeke ye bämikani kwe, ñobätä ñan aune David namani kukwe ngwentari Goliat yebätä ngwane, Eliab ñäkäbare ie (1 Sam. 17:26-28). Nita därere ye ngwane, ñan nita nemen tödeke bengwairebe aune ñan ni rün bätä ni meye ye köböire tödeka tä nemen nikwe. Aisete, David nämäne ja kete kwin Ngöböbe ye köböire tödekani kwe.

Salmo 27 yekänti, David nämäne tödeke ño metre ye mikani gare kwe (bersikulo 1). Kukwe medenbe ja tuani kwe aune Jehovakwe dre nuainbare nitre ja mikaka niara rüere yebätä ye jiebiti nämäne töbiketari (bersikulo 2 aune 3). Tabernáculo Jehovakwe ye nämäne ütiäte krubäte kräke (bersikulo 4) aune yete nämäne mike täte nitre israelita mada yebe (bersikulo 6). Nämäne mantre jetebe ja jie ngwamana Jehovai orasion yebiti (bersikulo 7 aune 8). Aune nändre ño kwe ji metre yebiti ye Jehovakwe driedre ie ribebare kwe (bersikulo 11). Tödeka ye nämäne ütiäte kräke, ñobätä ñan aune kukwe ne ngwantaribare kwe jai niara ñan tädre tödeke akräke niara tädre medente (bersikulo 13).

David töi nämäne ño aune ja ngwani ño kwe nieta Salmo 27 ye erere nikwe ja ngwandi ngwane, ni rabai tödeke niara erere. Kukweta nemen gare nie yei nita tödeke, nikwe ja tötikai bäri Kukwe Ngöbökwe aune tärä aune täräkwata nikwe yebätä ngwane, rabai bäri nuäre ni kräke tödekakäre (Sal. 1:2, 3). Ni tädre ja tötike ye ngwane, nikwe kä diandrekä jai töbikatarikäre, ñobätä ñan aune nita töbiketari ye tä ni töi mike debe bien. Nikwe debe biain bäri Jehovai ngwane, nita tödeke ye ni törbai bämikai gätäte niara mikakäre täte aune kukwe kwin ie nita tö ngwen yebätä nikwe blitai ni madabe (Heb. 10:23-25). Nita orare jankunu aune ñaka ja di ngwen nekä yebiti nita bämike nita tödeke arato (Luc. 18:1-8). Aisete, nikwe oradre käre Jehovai ne kwe niara töita nibätä ie  nita tö ngwen ye bämikakäre (1 Tes. 5:17; 1 Ped. 5:7). Nita tödeke ye ni töi mikai kukwe ruäre nuainne aune nita dre nuainne ye tä tödeka nikwe mike dite (Sant. 2:22).

Jesús murie keta jämi ye känenkri deu niebare kwe nitre ja tötikaka kwe ie: “Munkwe tödeka Ngöböbti amne munkwe tödeka tibti arato” (Juan 14:1). Ye tä mike gare, ni rabadre tödeke Jehovai aune Jesús ie arato. ¿Nuaindre ño? Ani mike gare ketamä jai.

Kena, ni kökanintari ye abokän jondron ütiäte Ngöbökwe biani nie ye erere mikadre tuin jai. Apóstol Pablo niebare: “Tita tödeke Ngöbö Monsoi yei, niarakwe ti tarebare aune ja nire biani kwe ti kräke” (Gál. 2:20, TNM). Nita tödeke Jesús ie ngwane, ni kökanintari ye nuainbare ni kräke ye gare metre nie, ye köböire Ngöböta ngite juen ta nibiti aune köböire ja nire käre käbämikata nie aune yebiti bämikata Ngöböta ni tarere (Rom. 8:32, 38, 39, NGT; Efes. 1:7,TNM). Ye käkwe ni dimikai ñaka ja töi mike kukwe ngwarbe yebätä (2 Tes. 2:16, 17).

Ketebukäre, Jesús ja nire biani ye köböire ni raba nökrö Jehová ken orasion yebiti. Ni kökanintari ye köböire ni raba orare Jehovai töi jämebiti aune “Ngöbö moto kuin ni tarekä, ye ken ari krötö angwane, ni rabadi ruen bobre ie amne, kukwe bätäkä ngwarbe tä kite ni rüere, angwane ni die mikadi kwe” (Heb. 4:15, 16; 10:19-22). Nita orare ye tä ni dimike ja töi mike kwatibe ni nuadrete ye ngwane ñaka ja mike ngite (Luc. 22:40).

Ketamäkäre, nikwe Jesús kukwei mikadre täte. Apóstol Juan kukwe ne tikani: “Nire tä tödeke ngobobiti, yebrä abokän ja nirekrä käre tä kwe, akwa nire ñakare tä niara mike era jai, yebrä ñan tärä ja nire tuaka jire chi, angwane Ngöbökwe tö diandi krubäte” (Juan 3:36, NGT). Nita tödeke aune kukwe nieta nie ye mikakäre täte ye ñaka ja erebe niebare apóstol Juankwe. Ye medenbätä, nita tödeke Jesús ie ngwane, nita niara kukwei mike täte. “Nünandre ño ükaninte Kristokwe” ye erere nita mike täte ngwane, diribare kwe aune dre dre nuain mananbare kwe ye jökrä nita mike täte meden gärätä (Gál. 6:2). Ne madakäre, “ni klabore ie tö ngwan raba bätä töbätä” tä dre niere ye erere nita mike täte ngwane, nita niara mike täte (Mat. 24:45, TNM). Jesús tä dre nuainmana nie ye erere nikwe nuaindi ngwane, ja di kwain nie ja tuakäre kukwe kri ben (Mat. 7:24, 25).

Bati, ni iti niebare Jesús ie: “Tita tödeke mabti, akwa mtare ti tö nibi tödekai bäri kwatibe mabti” (Mar. 9:24). Ni ye nämäne tödeke akwa ja töi mikani bobre kwe aune niara rabadre tödeke bäri nükani gare ie. Ni ye erere, ni jökrä tä tödeka ribere bäri jai kä jökrä ngwane. Ni jökrä raba tödeka nikwe mike dite kä nengwane. Nibira gare nie ye erere, nita ja tötike Kukwe Ngöbökwe yebätä aune töbiketaribätä ye tä ni töi mike debe bien krubäte Jehovai, ye köböire nita tödeka nikwe mike dite. Nita Ngöbö mike täte ja mräkätre ben, kukwe kwin ie nita tö ngwen yebätä nita blite ni madabe aune nita orare käre ye ngwane, tödeka nikwe tö nemen bäri dite arato. Ye erere nikwe nuaindi ngwane, kukwe kwin rabai krubäte nikwe. Tödekadre bäri ne kwe nikwe Ngöbö taredre jankunu (Jud. 20, 21, TNM).