1, 2. a) Däkien Jesús Mrö Biani Deu yebätä nitre millón kwati tä kwen ngwane, ¿dre mikata ñärärä Jehovakwe? (Üai kena täräkwatabätä mikadre ñärärä). b) ¿Kukwe ja tötikara nekänti nikwe dre mikai gare jai?

DÄKIEN Jesús Mrö Biani Deu yebätä nitre millón kwati tä nüke ngwane, ¿Jehovata mike tuin ño jai? Nitre kwati tä ja ükaninkrö ye ñan aibe mikata ñärärä kwe; ñakare aune ni itire itire brukwä mikata ñärärä kwe. Ñodre, nire nire tä kwen käre kä kwatire kwatire gätä ütiäte yebätä ye tuin ie. Nitre ye ruäre rüere ja mikata, akwa yebiti ta tätre nüke gätä ütiäte yebätä. Nitre mada abokän ñaka kwen gätä nuainta bämän kratire kratire yebätä, akwa Jesús Ja Nire Biani Ngwanta Törö Jai ye nuainta ngwane, niaratre rabadre kwen gätä yebätä tä nemen ruin ietre. Dre nuainta ye nitre ruäre töta nemen mikai gare jai, yebätä tä kwen gätä ütiäte yebätä ye tuin Jehovai arato.

² Nitre kwati krubäte tä nüke Jesús Ja Nire Biani Ngwanta Törö Jai yebätä ye käita nemen juto Jehovabätä (Luc. 22:19, TNM). Akwa, nitre nibe tä nüke gätä yebätä ye ñan ai mikata ñärärä kwe, ñakare aune töi ñobiti tätre nüke yebrä ütiäte kräke. Kukwe ja tötikara nekänti nikwe ja tötikai kukwe ütiätebätä: ye abokän, Däkien Jesús Mrö Biani Deu ye ñan aibebätä nita kwen, ñakare aune gätä nuainta bämän kratire kratire ye jökräbätä nita kwen, ¿ye ñobätä nita nuainne? Dreta ni töi mike kwen gätäbätä ye ani mike gare jai.

3, 4. a) ¿Ñobätä nita niken gätäbätä? b) ¿Nita kwen gätäbätä yebiti ni töi meden kwin nita bämike? c) Kukwe nieta 1 Corintios 11:23-26 ye erere, ¿Jesús Ja Nire Biani Ngwanta Törö Jai ye ñobätä nikwe ñaka juandre ja bäre?

³ Nita kwen gätäbätä ñobätä ñan aune yebiti nita Ngöbö mike täte aune yete Jehovata dirire nie arato. Nitre bikaka  kri yei ni madakwe diridre ye ñaka ribere jai nütüta kwetre (3 Juan 9). Ni abokän ñaka nitre ye erere, ñobätä ñan aune Jehová aune juta ükaninte kwe ye diridre nie ye nita ribere jai (Is. 30:20; Juan 6:45).

⁴ Nita kwen gätäbätä yebiti ni töi bobre ye nita bämike aune Ngöbökwe ni tötikadre yei ni tö. Jesús Ja Nire Biani Ngwanta Törö Jai yebätä nita niken ngwane, ñan nuain mananta ja dibiti nie ye aibätä, ñakare aune ni töi bobre aune ni tö Jesukwe kukwe niebare ne mikai täte: “Käre munkwe ban kweta kore ti ngwiankrä töre jae” (ñäkädre 1 Corintios 11:23-26 yebätä). Gätä ye köböire nita nemen tö ngwen bäri aune ni tare Jehovakwe ye tä ngwenta törö nie. Akwa, ni dimikadre aune ni töi mikadre jäme batibe kä kwatire kwatire te ye ñan aibe nita ribere jai ye gare kwin ie. Ye medenbätä, gätä nuainta bämän kratire kratire yebätä ni kwandre tä ribere nie. Ni töi bobre ye tä ni töi mike niara mike täte. Yebätä, nita kä denkä krubäte jai bämän kratire kratire ja tötikakäre aune niken gätäbätä.

5. ¿Jehovata nitre nübaire ye nitre töi bobre tä kain ngäbiti ño?

⁵ Kä kwatire kwatire te, Jehovata nitre kwati nübaire ne kwe ja tötikadre kwetre niarabätä ye niaratre tä kain ngäbiti töi bobrebiti (Is. 50:4). Kenanbe tätre kwen Jesús Ja Nire Biani Ngwanta Törö Jai yebätä, biti tä kite kwen gätä jökräbätä (Zac. 8:20-23). Ngöbö ni tötikaka ni “dimikaka” aune ni mikaka “kwäre” tä ni jie ngwen ye kwin ni kräke (Sal. 40:17). Erametre, Jehová aune Jesús tä ni nübaire gätäbätä dirikäre nie ye nikwe kadre ngäbiti, ñobätä ñan aune ye bäri ütiäte jondron jökrä biti ta (Mat. 17:5; 18:20; 28:20).

6. Jesús Ja Nire Biani Ngwanta Törö Jai yebätä ni iti janamane, ¿yebiti bämikani ño kwe töi nämäne bobre?

⁶ Kä kwatire kwatire te, nita ja di ngwen nitre nübaire nüke Jesús Ja Nire Biani Ngwanta Törö Jai yebätä. Ye köböire nitre kwati töi bobre yekwe kukwe kwin namanina. Ani mike gare keteiti jai. Bati, ni Testiko iti käkwe täräkwata nitre nübaikäre ye biani ni iti ie, akwa ni ye niebare ñaka rabai nuäre kräke rabakäre gätä yebätä. Jesús Ja Nire Biani Ngwanta Törö Jai ye näire deu, ni ye nükani Ju Ja Ükarakrö yete ye käkwe ni Testiko ye töi mikani ñan krütare. Niara kani ngäbiti kwin gätäbätä ye matani kwinbätä ye köböire jatani kwen gätä jökräbätä. Kä nikani kwati ta ngwane, gätä juani bämäbe ja bäre kwe. ¿Dre käkwe dimikani ja töi kwite? Kä nikani ta ye bitikäre, jä mräkä Testiko yekwe niebare: “Ni ye töi bobre”. Jehová ara käkwe ni ye töi mikani kite ja kokwäre ne kwe rabadre juta kwe yete. Kä nengwane ni ye niena testiko Jehovakwe (2 Sam. 22:28; Juan 6:44).

7. Kukweta nemen gare nie gätäte aune ñäkätä Bibliabätä, ¿ye tä ni dimike ño ja töi mike bobre?

⁷ Kukweta nemen gare gätäte nie aune ñäkätä Bibliabätä ye tä ni dimike ja töi mike bobre. Jesús Ja Nire Biani Ngwanta Törö Jai ye känenkri, kukwe kwin bämikani kwe aune töi bobre bätä ja nire biani kwe ni ütiäre ye kädrieta gätäte. Jesús Ja Nire Biani Ngwanta Törö Jai ye känenkri, ni nübaita ñäke Bibliabätä ne kwe Jesús murie ketani aune ganinkröta ye namani bare ño ye rabadre gare nie. Kukwe jökrä nieta ni tötikakäre ye tä ni töi mike debe bien krubäte Jesukwe ja nire biani ni ütiäre yebätä. Ye köböire, nita ja töi mike bobre aune Ngöbö töita ño ye nita mike täte kukwe tare tä nemen bare yebiti ta (Luc. 22:41, 42).

8. ¿Kä jürä ñaka nämäne Jesubätä ye bämikani ño kwe?

⁸ Jesús ñaka kä jürä ngwani jabätä ye erere ni tö ja ngwain. Niara murie keta jämi ye känenkri ñaka kä jürä ngwani kwe jabätä ye  bämikani ño kwe yebätä ani töbike. Niara kwata metai, mikai tuin ngwarbe jai aune murie ketai ye nämäne gare ie (Mat. 20:17-19, TNM). Akwa, yebiti ta ja tuani kwe kukwe tare yebe. Nämäne jardín Getsemaní ye ngwane, niebare kwe nitre apóstol ie: “Ni ti kitaka ngise tiebe ti rüeye abko nükera tibtä, aisete näin krö, bränta” (Mat. 26:36, 46). Nitre kwati krubäte nämäne jondron rükäre ngwen kisete ye nikani niara kain ngite ye ngwane, näntebare kwe nitre ye kokwäre aune niebare kwe nitre yei niara ye abokän nire aune nitre rükä ye rabadre nitre apóstol ye tuenmetre niken mento niebare kwe ietre (Juan 18:3-8). Kä jürä ñaka nämänebätä ye bämikani metre kwe, ¿ñan ererea? Nengwane, nitre dianinkä nänkäre kä kwinbiti aune oveja mada mada ye tä ja di ngwen ñaka kä jürä ngwen jabätä Jesús erere. ¿Tätre nuainne ño?

9. a) ¿Ñobätä nikwe ñaka kä jürä ngwandre jabätä nänkäre käre gätäbätä? b) ¿Ja mräkätre tä ngite ye ni raba dimike ño?

⁹ Kukwe ruäre ben nita ja tuin ye köböite ñaka raba nemen nuäre ni kräke nänkäre gätä jökräbätä. Ye erere ngwane, ñaka kä jürä ngwandre jabätä. Ñodre, ja mräkätre ruäre tä bren, tä di nekä aune tä ulire krubäte. Mada abokän mräkätre kwe o gobrantre tä ja mike rüere yebe tätre ja tuin. Ja mräkätre ruäre tä kitani ngite Ngöbö mikabätä täte yebätä ani töbike. Nita kukwe kwin bämike yebiti ni raba niaratre dimike, ¿yebätä ni tärä töbike? (Heb. 13:3). Kukwe keta kabre tare tä nemen bare nibätä yebiti ta ni täbe sribire jankunu Jehová kräke ye tä nemen gare ietre ngwane, tödeka kwetre tä nementa dite aune jata nemen ruinta dite ietre ja ngwankäre metre Ngöböi. Ye erere namani bare apóstol Pablo yebätä. Nämäne ngite Roma ye ngwane, ja mräkätre nämäne Ngöbö mike täte metre ye nämäne nemen gare ie ngwane, kä nämäne nemen jutobätä (Filip. 1:3-5, 12-14). Niara mikani kwäre ye bitikäre kä nikani braibe ta ngwane, tärä tikani kwe nitre Hebreo ie. Tärä yebätä niebare kwe, ja mräkätre ja ngwanka metre ye rabadre ja ükökrö jankunu aune niebare kwe ietre arato: “Munta ja tarere, ye kwrere munkwe ja tare janknu” (Heb. 10:24, 25; 13:1).

10, 11. a) ¿Nikwe nire nire nübaidre Jesús Ja Nire Biani Ngwanta Törö Jai yebätä? b) ¿Kukwe meden nieta Efesios 1:7 abokänbätä nita nitre nübaire?

¹⁰ Ni mräkä, sribi muko nikwe aune nitre nünanka ni bäre ye nita nübaire Jesús Ja Nire Biani Ngwanta Törö Jai yebätä ngwane, kä jürä ñaka nibätä ye nita bämike. ¿Ñobätä nita nuainne? Ñobätä ñan aune Jehová aune Jesús käkwe kukwe kwin nuainbare ni kräke yebätä nita debe bien ietre. Ne madakäre, Jehovakwe ni kökanintari ye abokän “kukwe kwin ñaka nuain bä ni kräke akwa nuainbare [...] ni kräke” ye köböire kukwe kwin raba nemen kwetre ye ni tö mikai gare ietre (ñäkädre Efesios 1:7 yebätä; * Apoc. 22:17).

¹¹ Nita niken gätäbätä yebiti ni töi mada kwin nita bämike. Jehová aune Jesús käkwe bämikanina ye erere.

12. a) ¿Nita kwen gätäbätä ye köböire nita nemen Jehová aune Jesús tarere ño? b) Kukwe nieta 2 Corintios 5:14, 15 ye erere, ¿ni raba ja ngwen ño Jesús erere?

¹² Nita Jehová aune Jesús tarere ye tä ni töi mike niken gätäbätä aune ye köböire nita nemen niaratre tarere bäri. ¿Ñobätä? Ñobätä ñan aune niaratre dre nuainbare ni kräke ye ngwanta törö käre nie gätäte (Rom. 5:8). Jesús Ja Nire Biani Ngwanta Törö Jai yebiti ni aune nitre mada tarebare kwe ye tä ngwen törö nie. Nita debe bien krubäte, yebätä ni tö ja ngwain Jesús erere nita dre nuainne mantre jetebe yebiti (ñäkädre 2 Corintios 5:14, 15 yebätä). Ne madakäre, Jehovakwe Monso kwe biani ni kräke yebätä nita niara käikitekä. Nita blite gätäte ja brukwä tätebiti yebiti niara käikitakata arato.

13. Nita Ngöbö aune Monso kwe tarere ño ye mä raba mike gare.

¹³ Nita juto biare kukwe keta kabre nuainne, yebiti nita Jehová aune Monso kwe tarere ye nita bämike. Ni kwandre gätäbätä yekäre, ni rabadre ja di ngwen kukwe keta kabre nuainne. Ñodre, konkrekasion keta kabre tä gätä nuainne bämän kratire kratire derekri, akwa ye ngwane nita sribire yebätä nita nemen nainte. Aune gätä mada abokän nuainta bämän krüte yebätä, yete nitre ñaka sribire. ¿Nita nainte akwa nita niken gätäbätä ye tuin Jehovai? Jän. Nikwe ja di ngwain bäri ngwane, nita Jehová tarere ye mikai bäri ütiäte kwe jai (Mar. 12:41-44).

14. ¿Jesukwe kukwe meden kwin bämikani ni kräke?

¹⁴ Nita ni mada tarere ye ngwane nita ja di ngwen kukwe keta kabre nuainkäre kräke, ye erere Jesukwe kukwe kwin bämikani ni kräke. Ja nire biani kwe nitre nänkä ben ye kräke akwa ye ñan aibe, ñakare aune nitre ye nämäne dre ribere jai yebätä ja töi mikani kwe aune ñaka töbikabare ja aibebätä kwe. Ñodre, niara nämäne nainte aune ja töibikaire krubäte akwa yebiti ta ja ükaninkrö kwe bentre (Luc. 22:39-46). Nitre mada nämäne dre ribere jai yebätä ja töi mikani kwe, akwa nitre mada raba dre bien ie ye ñan aibätä ja töi mikani kwe (Mat. 20:28). Nita Jehová aune ja mräkätre tarere krubäte Jesús ye erere ngwane, nikwe käre ja di ngwain nemen Däkien Jesús Mrö Biani Deu yebätä aune nemen gätä jökräbätä.

15. ¿Ni tö nitre meden meden dimikai metrere?

¹⁵ Nitre kristiano ja ngwanka metre ye  ngätäite nita aune ni töita kwatibe nitre mada nübaibätä nemen siba nitre kristiano jökrä ye ngätäite. Metrere ni tö “nitre tä tödeke nibe” akwa tä tibo kukwe ja üairebiti ye dimikai (Gál. 6:10, TNM). Niaratre tare nikwe ye ni tö bämikai ietre, yebätä nikwe nübaidre gätäbätä aune Jesús Ja Nire Biani Ngwanta Törö Jai yebätä. Nitre tä tibo kukwe ja üairebiti tä kiteta Ni oveja Ngübaka aune ni Rün ni tarekä ye kokwäre, ye käita nemen juto krubäte nibätä, Jehová aune Jesús ye erere (Mat. 18:14).

16. a) ¿Nikwe ja dimikadre ño kwärikwäri aune gätä ye ni dimikai ño? b) Kukwe niebare Juan 3:16 yebätä, ¿ye ñobätä ütiäte krubäte nikwe töbikadretaribätä köbö ne erere ngwane?

¹⁶ Bämän madabätä ja käne nikwe nitre jökrä nübaidi Jesús Ja Nire Biani Ngwanta Törö Jai rabai bare köbö 19 abril 2019 yebätä (Recuadro “ ¿Nikwe nitre mada nübaidi?” ye mikadre ñärärä). Käre nikwe ja dimikadre kwärikwäri nänkäre jankunu gätäbätä. Ñobätä ñan aune kä ne nibira krüte. Ye medenbätä, ütiäte krubäte nikwe ñaka gätä juandre ja bäre, ñobätä ñan aune ye käkwe ni dimikai ja töi mike bobre, ñaka kä jürä ngwen jabätä, aune ja tarere jankunu (1 Tes. 5:8-11). Jehová aune Jesús tä ni tarere krubäte yebätä nita debe bien ie ye nikwe bämikadre (ñäkädre Juan 3:16 yebätä). *