1. ¿Apóstol Pablo kukwe meden niebare nitre kristiano dianinkä yei?

APÓSTOL Pablo niebare nitre kristiano siklo kena ie, niaratre “ñaka ja töi kwitamana[dre] jondron kä nebätä yei” (Rom. 12:2, TNM). Nitre brare aune merire nämäne Ngöbö mike täte aune nämäne dianinkä nänkäre kä kwinbiti, nitre yebätä Pablo mäträbare metre (Rom. 1:7).

2, 3. a) ¿Satana tä dre nuainne ni töi mikakäre kä mikekä Jehovabätä? b) ¿“Jändrän [...] ribi ribi” tä ni töite ye ni raba denkä ño mento?

² Nitre kristiano dianinkä nänkäre kä kwinbiti ye ruäre nämäne ja tuenmetre töi kwitadre nitre kä nebätä nämäne dirire aune Satana tä kukwe niere yei, ye nämäne Pablo mike töbike krubäte (Efes. 4:17-19). Kukwe ye erere raba nemen bare nibätä. Satana tä ngöböre kä nebätä, aisete tä kukwe keta kabre dätere ni diankakäre mento Jehovabätä. Ñodre, ni töita ja aibebätä o ni tö ja tuai ütiäte kä nebätä ngwane, kukwe ye jiebiti tä ni töi mike. Nikwe ja ngwani ño, nita nüne ño aune drebätä nikwe ja tötikani yebiti Satana raba ni mike töbike niara erere arato.

³ ¿“Jändrän [...] ribi ribi” tä ni töite ye ni raba denkä ño mento? (2 Cor. 10:4). Pablo dre niebare ye ani mike gare jai: “Ngöbö kukwei ñan rabadre gare ni mda mdaye, abkokäre nire nire käta bike kri amne tä kukwe mike Ngöbö Kukwei rüere, ye ben tita blite kukwe kwetre bä mikakäre ngwarbe. Mdakäre abko, ni jökrä käkwe tödekadre metre Kristobti, abkokäre tita ni jökrä töi kwite tödeke bti” (2 Cor. 10:5). Erametre, Jehová diebiti ni raba kukwe ngwarbe drieta ye ganainne. Ñodre, kräkä ruäre tä bren ketebätä, ye kwrere nitre gobrainta Satanakwe tä  kukwe ngwarbe driere ye Kukwe Ngöbökwe raba ni dimike ketebätä arato.

4. Nikwe kukwe metre ye kani ngäbiti ngwane, ¿nikwe ja töi kwitani ño?

⁴ Nikwe kukwe metre Ngöbökwe kani ngäbiti aune nikwe ja töi mikani Jehová mike täte ye ngwane, kukwe keta kabrebätä nikwe ja töi kwitani ye nikwe ngwandre törö jai. Ni kwati krubäte käkwe ja töi mikani kukwe käme ye tuenmetre (1 Cor. 6:9-11). Ngöbökwe ni dimikani kukwe käme ye tuenmetre, yebätä ni raba debe bien krubäte ie.

5. ¿Romanos 12:2 tä ni töi mike kukwe meden ketebu nuainne?

⁵ Akwa, ni ñaka rabadre nütüre nikwe ja töi kwitanina täte. Ebokänä ni jämi ja ngökö ñöte ye ngwane, kukwe kämekäme ni nämäne nuainne ye nikwe tuanimetre, akwa nikwe ja di ngwandre jankunu ne kwe nikwe ñaka kukwe ye nuaindreta bobukäre. ¿Ni raba nuainne ño? Pablo niebare: “Ñaka ja töi kwitamana jondron kä nebätä yei, ñakare aune mun rabadre ja töi ükete kwin” (Rom. 12:2, TNM). Ye nuainkäre ni rabadre kukwe ketebu nuainne. Kena, ni ñaka rabadre ja tuenmetre töi kwitadre nitre kä nebätä ie. Ketebukäre, ni rabadre ja töi ükete o ja töi kwite.

6. ¿Jesús kukwe bämikani Mateo 12:43-45 yekänti ye tä dre driere nie?

⁶ Ja töi ükadrete niebare Pablokwe ye ngwane, ñan nämäne blite ja bä ükateta jerekäbe yebätä. Ye abokän nikwe ja töi ükadrete täte meden gärätä, (recuadro “ ¿Ja töi ükateta o ja bä kwitata?” mikadre ñärärä). Dre tuin kwin nie, nita ja ngwen ño aune ni töita ño ye ererebätä nikwe ja töi ükadrete. Aisete, ni rabadre ngwentari jai: “¿Tita ja töi ükete ño ja ngwankäre Kristo erere? ¿Tita ja bämike jerekäbe? ¿Tita ja töi ükete bökän rabakäre ni kristiano erere?”. Kukwe ye ngwantaridre jai ye ütiäte krubäte. Mateo 12:43-45 yete Jesús  kukwe bämikani ye raba kwen nie aune ni raba dre nuainne ye tä mike gare nie (ñäkädrebätä). Kukwe bämikani ye tä kukwe metre mike gare nie: kukwe käme tä ni töite ye diandrekä akwa ye ñan aibe, ñakare aune kukwe käme ye täte kukwe tuin kwin Ngöböi ye mikadre nemen.

7. ¿Ni raba ja töi kwite ño?

⁷ ¿Kukwe tä ni töite ye ni raba kwite? Ngöbö Kukwei tä mike gare: “Mun töita ño ye mun rabadre kwite jankunu bitin, aune kukwe metre nuaindre bätä ja ngwandre metre yebiti mun rabadre ja ngwen ni bitin kwrere Ngöbö tö namani ie ye ererebätä” (Efes. 4:23, 24, TNM). Nibira gare nie erere, ni raba ja töi kwite akwa ye ñaka nuäre. Kukwe meden blo tä ni töite aune ni tö nuainbätä ye ñan ketadrebätä jerekäbe. Mun “töita ño ye mun rabadre kwite” nieta nie. Ye tä mike gare, ni tö dre ie, ni töita ño aune kukwe meden tä ni töibätä yebätä ja töi kwitadre gärätä. Ye nuainkäre, käre nikwe ja di ngwandre ja töi ükete.

8, 9. ¿Ja mräkä itibätä kukwe namani bare ye tä dre driere nie ja töi ükadrete yebätä?

⁸ Ja mräkä iti jämi ja mike Testiko ye ngwane, nämäne ni mada nuainne tare, nämäne dö ñain aune nämäne ja mete yebätä ani blite. Dre dre nuain nämäne kwe ye tuanimetre kwe aune ja ngökani ñöte kwe, niara nämäne nüne yekänti kukwe kwin bämikani kwe nitre mada okwäbiti. Akwa ja ngökani ñöte kwe ye bätäräbe, bati dere ja tuani kwe kukwe kri ben: ni iti dröba nikaka janamane känti ja metakäre ben. Kenanbe, ja töi mikani kwe ñaka ja mete. Akwa, ni mada ye käkwe ñäkäbare blo Ngöbö kä Jehová ye rüere ngwane, ja mräkä ye ñaka kä ngwani nüke jai. Niara jatani küken aune ni ye metani kwe. ¿Ñobätä kukwe ye nuainbare kwe? Ebokänä Biblia niara dimikani dre nuain nämäne käne kwe ye ñaka nuainne, akwa dre nämäne niara töibätä ye abokän ñaka kwitani täte kwe. Dre nämäne niara töite yebätä nämäne ja töi kwitadre täte ie.

⁹ Akwa yebiti ta niarakwe ñaka ja ngwani di nekä (Prov. 24:16). Nitre umbre ji ngwanka käkwe niara dimikani, niara nämäne nirien jankunu kukwe ja üairebiti aune kä nikani ta ngwane kädekani ni umbrere. Akwa, bati deu niara nämäne ju bäre Ju Ja Ükarakrö yekänti ngwane, kukwe ben ja tuani käne kwe ye erere ben ja tuaninta kwe: ni iti dröba nikaka tö namani ni umbre ji ngwanka mada metai. ¿Ja mräkä yekwe dre nuainbare? Ja töi mikani jäme kwe aune töi bobrebiti ni dröba nikaka yebe blitabare kwe, ñaka ñäkäbare ja dibiti kwe ie, ñakare aune dimikani kwe nementa ja gwirete. ¿Ñobätä ja töi mikani kore kwe? Ñobätä ñan aune dre nämäne niara töite yebätä ja töi kwitani kwe. Ja töi ükaninte kwe yekwe dimikani ja töi mike jäme aune bobre, ye köböire Jehová namani käikitaninkä.

10. ¿Ja töi kwitadre nieta ye dre gärätä?

¹⁰ Ja töi ükadrete ye ñan raba nemen bare bengwairebe nie o ja töbiti nie. Ja töi kwitakäre nikwe ja di ngwandre kä kwati krubäte te (2 Ped. 1:5). Kä niena nuäi nibiti nita kukwe metre mike täte ye ñan aibe ngörä. Nikwe ja di ngwandre dreta ni töite ye kwitakäre. ¿Dre köböire raba nemen bare nie? Kukwe ruäre ütiäte abokän ni raba nuainne ye ani mike gare jai.

11. ¿Orasion ye raba ni dimike ño dreta ni töite ye kwitakäre?

¹¹ Kena nikwe oradre. Ni salmo tikaka kukwe ribebare ye erere nikwe nuaindre: “Ngöbö mäkwe ti brukwä mika kwin mrebe, mäkwe ti töi mrä mika, ne kwe tikwe nändre ja käne” (Sal.  51:10). Dreta ni töite ye ni rabadre kwite ye gare nie yebätä ni rabadre ja di kärere Jehovai. ¿Niara raba ni dimike ye ñokänti gare metre nie? Nitre Israel nämäne ja dokwä mike ribi akwa Ngöbökwe dre käbämikani ietre ye mikani gare kwe Ezequiel näire: “Tikwe brukwä kwatibe biain ietre bätä tikwe üai mrä mikai niaratrebätä; [...] aune tikwe brukwä därebe ye biain ietre”, ye abokän niaratre käkwe Ngöbö kukwei kadre ngäbiti meden gärätä (Ezeq. 11:19). Kukwe ye tä ni miketa dite. Jehová nämäne juto biare nitre israelita dimikakäre ja töi kwite, ye erere arato tä juto biare ni dimikakäre.

12, 13. a) Kukwe nieta Salmo 119:59 ye erere, ¿nikwe töbikadretari drebätä? b) ¿Kukwe meden meden ni raba ngwentari jai?

¹² Ketebukäre, nikwe töbikadretari ye ütiäte krubäte. Mantre jetebe nikwe ñäkädre Bibliabätä aune töbikadretari o kukwe meden namani gare nie yebätä nikwe töbikadre o kukwe medenbätä ni raba ja töi kwite ye kräke nikwe kä diandrekä jai (ñäkädre Salmo 119:59 yebätä; * Heb. 4:12; Sant. 1:25). Nitre kä nebätä tä dirire ye tä ni töi kwite ño ye nikwe mikadre gare kwin jai. Kukwe meden raba ni töi kwite ye nikwe mikadre gare kwin jai aune ja di ngwandre ne kwe nikwe ñaka nuaindre.

¹³ Ye nuainkäre, nikwe kukwe ne ngwandretari jai: “¿Tita bätä ngwen o ti brukwäta ni mada kräke?” (1 Ped. 2:1). ¿Tikwe ja ngwani ño, tikwe ja tötikani kwela krite o ngwian tärä tikwe yebätä ja ruin bäri ütiäte tie?” (Prov. 16:5). “¿Jondron tä tikwe ye erere ñaka ni madakwe o ni mada kwata bä jene yebätä ja ruin bäri ütiäte tie?” (Sant. 2:2-4). “¿Nitre gobrainta Satanakwe tä jondron bämike tuare ye tuin kwin tie?” (1 Juan 2:15-17). “¿Ja näkwitata abokän känti nitre tä nemen kämekäme jabe aune ni mada mada nuainta tare ye tuin kwin tie?” (Sal. 97:10; 101:3; Amós 5:15). Kukwe ngwantarita yebätä nikwe töbikadre ngwane, kukwe meden känti ni raba ja töi kwite ye raba nemen gare nie. “Jändrän [...] ribi ribi” tä ni töite ye nikwe diainkä mento ngwane, nikwe debe biain krubäte ni Rün kä kwinbiti ie (Sal. 19:14).

14. ¿Ja ketamuko kwin känändre ye ñobätä ütiäte krubäte?

¹⁴ Ketamäkäre, nikwe ja ketamuko kwin känändre ye ütiäte krubäte. Nitre ben nita ja kete ye raba ni töi mike kwin o käme ye ni ñaka raba gain jabätä (Prov. 13:20). Nita kwelate o sribikänti ye ngwane, nitre ngätäite nita ye ñaka tä ni dimike ja töi mike Jehová erere. Akwa gätäte abokän ja ketamuko kwin raba kwen nie, ja mräkätre raba ni töi mike ja tarere aune kukwe kwin nuainne (Heb. 10:24, 25).

15, 16. ¿Satana tä dre nuainne ni töi kwitakäre?

¹⁵ Satana töita kwatibe ni töi kwitabätä ye nikwe ngwandre törö jai. Tä kukwe keta kabre dätere ni töi kwitakäre ne kwe nikwe ñaka ja töi mikadre Kukwe metre Ngöbökwe yebätä.

¹⁶ Jardín Edén yete Satana kukwe ngwanintari Eva ie ye erere täbe nuainne nengwane: Kri jökrä nete noko, “¿Ngöbökwe ñan ngwäkä kwetamna jire chi munye ñan ñan? (Gén. 3:1, Jändrän Jökrä Namani Bare Ño Kena). Satana tä kä ne gobraine yebätä kukwe keta kabre ngwantari raba nie abokän raba ni mike töbike, ñodre: “¿Erametre Ngöbö ñaka tö nitre brare tuai ja mike gure meritre kwati ben? ¿Erametre Ngöbö ñaka tö mun tuai Navidad aune cumpleaño käi ngwen juto jabätä? ¿Erametre Ngöbö ñaka tö mun tuai däri mike ja  kwatate? ¿Erametre Ngöbö ja tarekä ye ñaka tö mun tuai ja kete nitre tare munkwe kitaninkä kukwebätä yebe?”.

17. a) Nitre mada kukwe ngwandretari nie ni mikakäre töbike ngwane, ¿nikwe dre nuaindre? b) Kukwe nieta Colosenses 2:6, 7 ye erere nikwe nuaindi ngwane, ¿ye köböire dre rabai bare?

¹⁷ Kukwe meden mikata täte nikwe ye tädre gare metre nie. Kukwe ngwantarita abokän mikadre gare ño ñaka rabadre gare nie ngwane, ni raba nemen töbike aune kukwe ye raba tödeka nikwe ngwen di nekä. Aisete, ¿nikwe dre nuaindre? Ngöbö Kukwei tä niere nie, “kukwe meden kwin aune meden Ngöböta kain ngäbiti bätä meden metre ye rabadre gare” akwle nie ye ererebätä ja töi kwitadre (Rom. 12:2, TNM). Nikwe ja tötikai käre ngwane, yekwe ni dimikai ja töi mike kwatibe kukwe namani gare nie Bibliabätä ye mike tuin metre jai. Ne madakäre, Jehovata kukwe ükete ye abokän metre yei nikwe tö ngwain kwatibe. Nikwe nuaindi ye erere ngwane, kri ngätrie tä nirien aune tä dime dobrote ye kwrere ni rabai “tödek[e] kwatibe” (ñäkädre Colosenses 2:6, 7 yebätä).

18. Kukwe käme nuainta käbiti tibien Satana köböite, ¿ye dre käkwe ni dimikai ñaka kain ngäbiti?

¹⁸ Ni mada ñaka raba tödeka nikwe mike dite; ñakare aune ni ara käkwe tödeka nikwe mikadre dite. Ye medenbätä, nikwe jankunu ja töi mikadre kukwe kwin nuainne. Käre nikwe oradre Jehovai aune üai deme biandre kwe nie nikwe ribedre ie. Nita töbike ño aune ni töita dre nuainbätä yebätä nikwe töbikadretari nguseta. Nikwe ja ketamuko kwin känändre; nitre raba ni dimike ja töi ükete ye ngätäite ni tädre. Kukwe ye jökrä nikwe nuaindi ngwane, kukwe käme nuainta käbiti tibien Satana köböite ye nikwe ñaka nuaindi jire aune “Ngöbö kukwei ñan rabadre gare ni mda mdaye, abkokäre nire nire käta bike kri amne tä kukwe mike Ngöbö Kukwei rüere” ye nikwe ñaka kai ngäbiti (2 Cor. 10:5).