1. Colosenses 2:4, 8 tä niere erere, ¿Satana tä ni ngökö ño?

SATANA tö ni tuai kä mikekä Jehovabätä. Ye nuainkäre niarata sribire ni töibätä. Nikwe töbikadre niara erere ie töta nemen. Jondron meden ie ni töta nemen ye jiebiti tä ni töi mike ni ngökakäre aune nikwe mikadre täte ie tö (ñäkädre Colosenses 2:4, 8 yebätä).

2, 3. a) Colosenses 2:8 känti kukwe nieta ni mikakäre mokre, ¿ye ñobätä nikwe mikadre täte? b) ¿Nibike dre mike gare jai kukwe ja tötikara nekänti?

² Satana tä ni ngökö ye köböite kukwe kri raba nemen ni kisete, ¿ñan ererea? Jän. Colosenses 2:8 ye tikani Pablokwe nitre mikakäre mokre ngwane, ñaka kukwe ye tikani kwe nitre ñaka kukwebätä yei, ñakare aune nitre kristiano dianinkä nänkäre kä kwinbiti yei kukwe ye tikani kwe ye nikwe ngwandre törö jai (Col. 1:1, 2, 5). Nitre kristiano ye namani kukwe tare te aune ni bäri tä kukwe tare te kä nengwane (1 Cor. 10:12). ¿Ñobätä? Ñobätä ñan aune Satana kitani Kä tibienbätä aune niara tö nitre Ngöbö mikaka täte metre ye diankabätä mento (Apoc. 12:9, 12, 17). Ne madakäre, nitre ja bämikaka jerekäbe “jatai ja ngwen bäri käme” ye näire nita nüne (2 Tim. 3:1, 13, TNM).

³ Satana tä dre nuainne ni “ngökakäre” kukwe ngwarbe aune kukwe ñaka ütiäte yebiti ye rabai gare nie kukwe ja tötikara nekänti. Diablu tä kukwe ketamä ‘miketibe ni rüere’ ye nikwe mikadre gare kwin jai (Efes. 6:11). Satana tä kukwe miketibe ni rüere yekwe ñaka ni töi kwitadre yekäre, ni raba dre nuainne ye rabai gare nie kukwe ja tötikara mada yekänti. Akwa nitre israelita namanina Kä Käbämikani ietre yete, ye bitikäre Satana niaratre ngökani ño aune ye tä dre driere nie ye ani mike gare käne jai.

4-6. Kukwe nieta Deuteronomio 11:10, 11 ye erere, ¿nitre israelita namani Kä Käbämikani ietre yekänti ngwane ñobätä namani ja kitadre ietre nura nökadre yebätä?

⁴ Satana nitre israelita töi mikani jondron üai ngwarbe mike ngöböre jai ye ñaka gani kwetre. Niaratre nämäne jondron kwetadre ribere jai yebiti nuaninte kwe. Niaratre namani Kä Käbämikani ietre yete ngwane, nura nökadre ño kä yekänti yebätä namani ja kitadre ietre. Kä Egipto yekänti ñö Nilo dianka nämäne metakakäre nurabiti. Akwa, Kä Käbämikani ietre yete ñö kri ñaka nämäne diankäre kekakäre nurabiti, ñakare aune ñü burie aune ñü nämäne näkäin tibien ye köböire nura nämäne nirien (ñäkädre Deuteronomio 11:10, 11 yebätä; * Is. 18:4, 5). Ye medenbätä, nitre israelita nura nökadre ño yebätä namanintre ja kitadre ietre. Ye ñaka namani nuäre, ñobätä ñan aune nitre Israel ie sribi nämäne gare ye jökrä bäsi krütani kä ngwarbe nötare yekänti.

⁵ Niaratre ñaka rabaira nüne käne ye erere Jehovakwe mikani gare ietre. Ye bitikäre, kukwe niebare kwe nitre Israel mikakäre mokre akwa yete ñaka blitabare kwe nura nökadre yebätä namani ruin ietre. Ngöbökwe kukwe ne niebare: “Munkwe ja ngübabiti ne kwe mun brukwä ñaka kwitadre aune mun rikadre ngöbö mada mike täte aune mun rabadre ngüdokwäbiti ngwärekri” (Deut. 11:16, 17). Nura nökadre yebätä Ngöbö nämäne blite, ¿se ñobätä nitre Israel mikani mokre kwe ngöbö mada mikadre täte yebätä?

⁶ Nitre mada ñaka Ngöbö mikaka täte yebätä nitre israelita törbai ja kitai nura nökakäre ye nämäne gare Jehovai. Erametre, nitre nünanka Canaán ie nura nökadre ño ye nämäne gare bäri kwin nitre Ngöbö mikaka täte ye kräke aune  niaratre rabadre ja kite nitre yebätä namani ruin ietre. Akwa ye köböite kukwe raba nemen bare nitre Israel yebätä. Nitre nünanka Canaán ye nämäne Baal mike täte aune nämänentre nütüre Baal ye kä kwinta bökänkä, abokän köböire ñü nämäne näkäin tibien. Kukwe ngwarbe mika nämäne täte ie nitre israelita ja ngöka manandre ie Jehová ñaka tö namani. Akwa, niaratre bä kabre Baal mikani ngöböre jai (Núm. 25:3, 5; Juec. 2:13; 1 Rey. 18:18). ¿Nitre Israel nakani ño kö okwäte Satana ie? Ani mike gare jai.

7. Nitre israelita namani Kä Käbämikani ietre yete ngwane, ¿tödeka kwetre nuaninte ño?

⁷ Kena, jondron ribeta nikwe jai yebiti Satanakwe niaratre nuaninte, ye abokän ñü räkändre nurabiti niaratre kräke. Kä Käbämikani ietre yekänti, sö abril ye krütare nemen sö septiembre yebätä ñü ñaka nämäne näkäin krubäte tibien. Yebätä nitre mada nünanka nitre Israel bäre nämänentre nütüre rabadre kukwe ruäre nuainne ngöbö kwetre yei ne kwe ñü räkändre tibien. Kukwe ngwarbe mika nämäne täte ye nitre israelita rabadre kain ngäbiti köböire tädre kwin aune jondron tädre kwetre ye Satanakwe mikani nemen niaratre töite. Nitre meden ñan nämäne tödeke Jehovai ye namanintre nütüre kä ñan rabadre moren krubäte yekäre, niaratre rabadre kukwe nuainne Baal mikakäre ütiäte jai aune ye erere nuainbare kwetre.

8. ¿Kukwe meden ketebukäre mikanintibe Satanakwe nitre Israel rüere? Nuainbare ño kwe ye mä raba mike gare.

⁸ Jondron ie ni ngätä töta nemen ye jiebiti Satanakwe nitre israelita töi mikani arato. Kukwe ngwarbe käme nuain nämäne juta mada mada yekwe rabakäre jabe, ñodre, meritre aune nitre brare nämäne nemen bati bati jabe templo kwetre yete. Juta mada mada yete nitre brare aune merire ja erebe nämäne nemen jabe aune nitre nämäne kukwe mada mada nuainne rabakäre kämekäme jabe, ye ñaka nämäne tuin käme ietre ñakare aune niaratre nämäne kain ngäbiti arato (Deut. 23:17, 18; 1 Rey. 14:24). Niaratre nämäne kukwe ye nuainne ne kwe ngöbö kwetre ye rabadre nura ngwä mike nemen kwin nämänentre nütüre. Kukwe käme nuain nämäne juta mada mada yekwe rabakäre jabe ye namani tuin kwin nitre Israel kwati ie aune niaratre ja töi mikani ngöbö ngwarbe keta kabre ye mike täte siba. Metrere, Satana nitre israelita ngökani.

9. Oseas 2:16, 17 tä niere ye erere, ¿Satana dre nuainbare ne kwe Jehová ye nire metrere ñaka rükadre gare?

⁹ Kukwe ketamäkäre mrä mikanintibe Satanakwe: ye abokän Jehová ye nire metrere ñaka rükadre gare. Jeremías ni Ngöbö kukwei niekä näire, Jehovakwe mikani gare nitre kukwe ngwarbe niekä yekwe nitre israelita mikani Jehová kä ye käi kwitekä jabiti Baal mikakäre täte (Jer. 23:27). Ye tä mike gare, nitre israelita ñaka namanina Ngöbö kä ye kädekete, ñakare aune namanintre Baal kädekete, ye abokän “bökänkä” gärätä. Ye köböite nitre Ngöbö mikaka täte ye kräke nire abokän Jehová aune Baal ye ñaka namani nüke gare ietre, yekwe niaratre töi mikani kukwe ngwarbe nuain nämäne Baal mikakäre ngöböre jai ye nuainne Jehová mikakäre Ngöböre jai arato (ñäkädre Oseas 2:16, 17 yebätä). * *

10. ¿Satana tä kukwe meden miketibe ni rüere kä nengwane?

¹⁰ Satana nuainbare kirabe ye erere, täbe kukwe ye arabe miketibe ni rüere kä nengwane. Kukwe meden nitre töta nemen nuain yebiti tä nitre ngökö, ñodre tä nitre töi mike nemen kämekäme jabe aune Jehová ñaka rükadre gare nitre ie. Satana tä kukwe ketamä miketibe ni rüere akwa käne ani blite ketamä mrä yebätä.

11. ¿Jehová ye nire metrere ñaka rükadre gare nie yekäre Satana tä dre nuainne?

 ¹¹ Jehová ye nire metrere ñaka rükadre gare ie Satana tö. Apóstol Jesukwe ye jökrä krütani ngwane, nitre ja bianka kristiano jatani kukwe ngwarbe driere (Hech. 20:29, 30; 2 Tes. 2:3). Nitre kukwe metre tuanmetrekä aune ja mikaka rüere ye jatani Ngöbö metre ye kä kwite jene. Ñodre, Ngöbö kä tä tikani Bibliabätä ye jatanintre denkä aune täte jatanintre “dänkien” o kukwe mada niere kädekakäre. Ye köböite nitre ñäkäkä Bibliabätä yei nire abokän Jehová aune “dänkien” mada mada kädekateta Bibliabätä ye ñaka namani nüke gare kwin (1 Cor. 8:5). Niaratre “dänkien” niebare Jehovai ye arabe niebare kwetre Jesús ie, ye köböite Ngöbö aune Monso kwe ye abokän nire metrere ñaka nüke gare kwin nitre ie (Juan 17:3, TNM). Ye medenbätä, nitre jatani ni nimä Ngöböre itibe niere, kukwe ye drie ñaka jire Bibliabätä. Nitre tä kukwe ngwarbe driere ye köböite nitre kwati krubäte tä nemen nütüre ni ñaka raba Ngöbö mike gare jai aune niara ye nire metrere ye ñaka raba nüke gare nie. ¡Ye kukwe ngwarbe! (Hech. 17:27).

12. a) ¿Kukwe ngwarbe mikata täte ye tä nitre töi mike dre nuainne? b) Kukwe nieta Romanos 1:28-31 ye erere, ¿dreta nemen bare?

¹² Jondron ie ni ngätä töta nemen ye jiebiti Satana tä ni töi mike. Kukwe ngwarbe mika nämäne täte nitre töi mikakäre rababätä kämekäme jabe yebiti Satanakwe nitre Israel kirabe ye ngökani. Ye erere tä nuainne nengwane arato. Kukwe ngwarbe mikata täte ye tä nitre töi mike nitre nemen kämekäme jabe ye kain ngäbiti aune ye ñaka tuin blo ietre. Aisete, nitre kwati krubäte ja bianka Ngöbö mikaka täte ye ñaka niena kukwe ükaninte ja ngwankäre kwin ye mike täte. ¿Ye köböite dre namanina bare? Apóstol Pablo tärä tikani ja mräkätre Roma ie ye ngwane kukwe ye kädekaninte kwe (ñäkädre Romanos 1:28-31 yebätä). “Kukwe käme ñan nuendre” nieta ye abokän nitre tä nemen kämekäme jabe, ye ngätäite nitre brare aune merire ja erebe tä nemen jabe ye kädekateta arato (Rom. 1:24-27; TNM, 32; Apoc. 2:20). Erametre, kukwe drieta Bibliakwe ye nikwe mikadre täte ye ütiäte krubäte.

13. ¿Satana tä kukwe meden mada miketibe ni rüere?

¹³ Jondron ribeta nikwe jai yebiti Satana tä ni nuinte. Ni aune ni mräkätre tä jondron ribere jai nünankäre ye rabadre nikwe ie ni jökrä töta nemen. Yekäre nita ja mike juto (1 Tim. 5:8). ¿Nita dre nuainne? Bäsi kä jökrä känti, käne nita niken kwelate aune nita ja di ngwen nemen ja tötikaka kwin. Akwa nikwe ja ngübadrebiti. Juta keta  kabre känti, dirita monsotre ie ngwane kukwe meden ribeta kwetre jai nünankäre ye ñan aibe drieta ietre, ñakare aune nitre kä nebätä tä kukwe dirire ye drieta ietre arato. Niaratre töi mikata nemen Ngöbö mike ñaka era jai aune Biblia ye mike tuin ngwarbe jai. Jondron nire jatani nikwite jatäri drieta mikadre era jai ye aibe köböire ni kä nebätä nükani ño ye raba nüke gare drieta ietre (Rom. 1:21-23). Kukwe ye erere “Ngöbö bäri töbtä” ñaka driere (1 Cor. 1:19-21; 3:18-20).

14. ¿Nitre kä nebätä tä dirire ye tä nitre mada töi mike dre nuainne?

¹⁴ Nitre kä nebätä tä dirire ye köböite kukwe metre drieta Ngöbökwe ye tätre kwite bä jene. Nitre ye ñaka tä Ngöböta dre niere ye erere nuainmana, ñakare aune tä nitre töi mike “kukwe kämekäme” nuainne (Gál. 5:19-23). Tätre nitre töi mike bike kri aune ja rabadre ruin ütiäte ietre ne kwe nitre ye töi rabadre ja aibe tarebätä (2 Tim. 3:2-4). Nitre tä ja ngwen kore ye ñaka kwin, ñobätä ñan aune Jehová tö ni tuai ja töi mike jäme aune bobre (2 Sam. 22:28). ¿Ja mräkätre ruäre janamane ja tötike kwela krite yebätä dre namani bare? Ngöböta dre niere ye erere niaratre ñaka namanina nuainne, ñakare aune ja tuanimetre kwetre töi kwitadre nitre kä nebätä tä dre niere yei. Ani mike gare keteiti jai.

15, 16. ¿Meri Testiko yebätä kukwe namani bare ye tä dre driere nie?

¹⁵ Meri Testiko tä sribire köbö täte Ngöbö kräke kä kwä jätäbiti kwärikera te, tä niere: “Tikwe ja ngökabara ñöte ngwane, ja tötikadre kwela krite ye raba kukwe kri mike ni kisete nie nämä yebätä ti nämä ñäke aune ti nämä kukwe nuin. Akwa tikwe ñaka töibikaba. Kukwe nie nämä mäträkäre ye ñaka nie nämä tie ti rababa nütüre”. ¿Kukwe meden namani kisete? Niara arabe tä niere: “Ti nämä kä denkä krubäte jai ja tötikakäre  kwela krite, yebätä kä ñaka nämä nemente tie blitakäre Jehovabe käne ye erere; ti nämä nemen nainte yebätä ti ñaka nämä kukwe driere kä jutobiti aune ti ñaka nämä ja tötike kwin gätä kräke. Ti nämä ja tötike kwela krite ye köböite ti ñan jataba ja kete kwin Jehovabe ye rükaba gare tie. Ja tötika kwela krite ye ti rabadre tuenmetre rükaba gare tie. Aune ye erere tikwe nuainba”.

¹⁶ ¿Ja tötika kwela krite yekwe niara töi mikani ño? Niara arabe tä niere: “Ja tötika kwela krite yekwe ti mikaba ñaka töbike kwin ni madabätä, metrere ja mräkätrebätä; ti nämä kukwe ribere krubäte ietre aune yekwe ti töi mikaba kämikekä bätätre, ye tä nüketa törö tie ngwane tita nemen jakaire. Kä rikaba kwati krubäte ta tibiti ja töi ükatekäre. Kukwe namani bare tibätä ye käkwe mikaba gare tie, ni Rün kä kwinbiti tä mäträre nibätä juta ükaninte kwe yebiti ye ni ñaka mike täte ngwane, kukwe kri tä nemen ni kisete. Jehová ie ti nämä gare bäri kwin ti ngwä. Tikwe niara mikadre täte akräke, ¡kukwe kri ñaka rabadre ti kisete!”.

17. a) ¿Nikwe ja töi mikadre kwatibe dre nuainne? b) ¿Kukwe ja tötikara mada yekänti nikwe dre mikai gare jai?

¹⁷ Nitre gobrainta Satanakwe yete “ni ruäre tä näin kukwe ngwarbe dirire, kukwe mikanintbe ngwarbe kira abko tätre dirire” yei nikwe ñaka ja tuanemetre ngökadre. Satana tä kukwe miketibe ni rüere yebätä nikwe ja kriemikadre käre (1 Cor. 3:18; 2 Cor. 2:11). Jehová ye nire metrere aune mikadre täte ño ie tö ye nikwe ñaka Satana tuanemetre käi kwitekä jabiti. Ngöböta kukwe ükete ja ngwankäre kwin ye nikwe mikadre täte. Nikwe ñaka Diablu tuanemetre Ngöböta mäträre nibätä ye käi kwitekä jabiti. Akwa nitre kä nebätä tä kukwe niere ye niena ni töi kwite rabadre gare nie ngwane, ¿nikwe dre nuaindre? Ngöbö Kukwei raba ni dimike “kukwe taretare ngwarbe ngwarbe” mikata era jai ye denkä ño mento ye rabai gare nie kukwe ja tötikara mada yekänti (2 Cor. 10:4, 5).