MONSO tä därere ye ngwane ñaka raba ja kriemike jire. Ni därebare ye ngwane ni meye aune ni rün ye nämene ni ngübare. Ni jatani dikekä ye ngwane, nitre mada ye nämä tuin krikri nie aune, ni nämä nemen nikenkä, ni nämä niken ni meye kokwäre. ¡Mama aune tata nämä ni kain kisebiti ye ngwane ja nämä nemen ruin kriemikani nie!

Ni nämä chi ye ngwane, ni tädre kwin yekäre ni meye aune ni rün käkwe ni dimikadre ye ni nämä ribere. Ni nämä tare kwetre ye nämä gare nie yebätä ja nämä ruin kriemikani nie, aune ni nämä jondron nuainne kwin nämäntre niere nie ye ngwane, bäri ni nämä nemen tö ngwen jai bätä ni nämä nuainne bäri kwin.

Ni jatani nirien ye ngwane, ja ketamuko kwin nikwe ye nämä ni dimike arato ne kwe ja rabadre ruin kriemikani nie. Ja nämä nemen ruin kriemikani nie niaratre ngätäite, yebätä kä jürä ñaka nämä nemen krubäte nibätä nänkäre kwelate.

Erametre, monsotre kia ye jökrä ngübadre kore ye bäri kwin näre. Akwa, ruäretre kräke ñaka nuäre ja ketamuko känänkäre, aune monsotre kia kwati abokän meye aune rün ñaka ngübare ye erere. Melisa * tä niere: “Käre tita nitre ja mräkäre bä tuin jondron nuainne gwairebe angwane tita töbike: ‘ti mräkä käkwe nünandre ye erere näre’”. Ye erere ja raba nemen ruin mäi arato.

Nanekänti mä jatani nirien ye ngwane ja ñaka nämene ruin kriemikani mäi. ¿Ñobätä ye namani bare? Mä nämene chi ye ngwane ñaka mä tarebare aune ñaka mä dimikani yebätä. Mä rün bätä meye jämi ja tuenmetre ye känenkri käre nämenentre ngüdrärekä jabe yebätä niaratre ngite ruin mäi. Aune bäri tare, mä rün o mä meye nämene mä nuainne tare o ñäke tare mäi.

¿Kukwe ne raba mate ño monso kia yebätä? Tätre kite nikwite ja käibiti ye ngwane, ruäre kätä droga duin o dröbanike. Mada abokän tätre ja kete nitre gokä yebe ne kwe ja ñaka rabadre ruin kaibe ietre. Töta nemen ja taremana yebätä, ruäre tätre ja kukwe muko känene; akwa ruäre ngwane ye ñaka tä nuin raire aune, tätre ja tuenmetre ye ngwane bäri ja ñaka tä nemen ruin kriemikani ietre.

Monsotre tätre kite nikwite ja käibiti kätä kwärbere kukwe ne ererebätä ye tä nirien angwane ja ñaka  nemen ruin ütiäte ietre arato. Ñodre, Ana tä niere: “Ti nämä kukwe jökrä nuainne käme ti nämä nütüre, ñobätä ñan aune käre ti meye nämä kukwe ye arabe niere tie. Niarakwe ñaka ti tarebare aune ñaka kukwe kwin niebare jire tie.

Akwa, nita kite nirien ye ñan aibe ngwane jata nemen ruin ñaka kriemikani nie. Ja tuanmetreta, nita kite umbre o ja ñaka ruin bä nuäre nie ye ngwane ja ñaka raba nemen ruin kriemikani nie arato. Kukwe meden kärera, ruäre ngwane mätä ulire aune ñaka nuäre mä kräke ja ketakäre ni madabe. ¿Mä raba dre nuainne ne kwe ja ñaka rabadre ruin ye erere mäi?

Ni ñaka tä kaibe ye ie ni raba tö ngwen. Ni tärä iti abokän raba ni dimike, aune tö ni dimikai: ye Ngöbö ara.

Isaías ni Ngöbö kukwei niekä yebiti, Ngöböta käbämike nie: “Mäkwe ñaka ja töibika, ñobätä ñan aune ti Ngöbö mäkwe. Tikwe mä mikai dite, jän, tikwe mä dimikai, erametre ti kise ruinkri kukwe metre nuainkäre yebiti tikwe mä ketaite dime” (Isaías 41:10, 13). Ngöböta ni kain kisebiti nieta ye tä ni töi mike jäme krubäte. ¡Ni ñaka raba ja töibikaire jire!

Nitre Ngöbö mikaka täte nämene töbike krubäte kädrieta Bibliakwe, akwa ja ketaninte kwetre niara kisebätä, niarakwe dimikai yei tö ngwani kwetre. Ana jämi Samuel ngübare ye ngwane, kukwe kwin ñaka nämene kräke nämene nütüre monsoi ñaka nämene nemen yebätä. Monsoi ñaka nämene nemen yebätä kötaibare akwa kä ngwani nüke kwe jai. Ye jökräbätä, ñaka nämene mröre aune nämene ja muaire krubäte (1 Samuel 1:6, 8). Akwa ja nämene ruin ño ie ye niebare kwe Ngöböi angwane, ñaka namanina töbike (1 Samuel 1:18).

Salmista David ye bä kabre namani töbike krubäte. Kä kabre te, rei Saúl nämene näin jiebiti murie ketakäre. David kwärbebare, akwa ruäre ngwane kukwe nämene kisete ye nämene murie ötökä namani ruin ie (Salmo 55:3-5; 69:1). Akwa, tikabare kwe: “Erametre, ti rabai tibien aune tikwe kübiai jäme, ñobätä ñan aune, mä Jehová, mä ye aibe tä ti mike nüne jäme” (Salmo 4:8).

 Ana bätä David nämene ja tare nike aune ja tuin kukwe tare ben ye ngwane, ja di käräbare kwetre Ngöböi aune niarakwe dimikani (Salmo 55:22). ¿Ni raba ye erere nuainne arato?

1. Mäkwe Jehová mika tuin ja Rün ye kwrere jai

Jesukristo käkwe ni nübaibare Rün kwe ye mike gare jai, niara ye “Ngöbö itibe era metre” (Juan 17:3). Apóstol Pablo tä mike gare nie “ñaka tä mente krubäte ni itire itirebätä” (Hechos 17:27, TNM). Ye medenbätä, Santiago tä niere nie: “Munkwe kröta Ngöbö ken, aune niarakwe krötai mun ken” (Santiago 4:8, TNM).

Ni Rün tärä kä kwinbätä kätä ni tarere aune töita nibätä rabadre gare nie ye ütiäte krubäte ne kwe ni ñaka rabadre töbike krubäte. Erametre ni rabadre tö ngwen ye kwrere ye ñaka nemen bare drekebe ngwarbe, akwa ye käkwe nitre kwati dimikanina. Carolina tä niere: “Ti jataba tö ngwen Jehová ie angwane, ti Rün kwanba tie abokän ie ti nämä ja driere. Yekwe ti töi mikaba jäme krubäte”.

Raquel tä niere: “Ti meye aune ti rün ti tuametreba ye ngwane Jehová ti dimikaba nüne töi jämebiti. Ti nämä blite ben aune kukwe nämä nakainkä tibätä yebätä ti dimikadre kwe ti nämä kärere ie. Aune käre ti dimikaba kwe”. *

2. Nitre tä Ngöbö tarere yei mäkwe ja di kärä

Jesús niebare nitre ja tötikaka ben yei: “Mun abko ja etbare jökrä” (Mateo 23:8). Niara tö namani tuai ja tarere kwärikwäri aune rabadre nitre kwati ja mräkäre ja üairebiti ye erere (Mateo 12:48-50; Juan 13:35).

Konkrekasion kwati nitre testiko Jehovakwe yete nire nire tä ja di ribere ye ja mräkätre tätre ja di ngwen dimike, tarere aune töi mike jäme, nitre ja mräkäre metre käkwe nuaindre ye erere (Hebreos 10:24, 25). Kräkä tä ni träin miketa kwin ye kwrere gätä ye tuin nitre kwati ie.

Eva tä niere: “Konkrekasionte ja ketamuko kwin nämä tikwe aune ja nämä ruin ño tie ye nämä nüke gare ie. Ti kukwe nuaba kwe, ñäkäba Bibliabätä kwe tie aune oraba kwe tibe. Ñaka ti tuametreba kaibe kwe. Ti dimikaba kwe ja töi mike jäme. Ye köböire ja jataba ruin kriemikani tie”. Raquel abokän tä niere: “Konkrekasion ye rababa ‘ti meye bätä ti rün ye kwrere ti kräke’. Ja mräkätre tä ti tarere aune tä ti töi mike jäme”.

 3. Mäkwe ja töi mika kwin ni mada kräke

Nita ni mada tarere angwane, nita nemen ja kete bäri kwin ni madabe. Jesukwe niebare: “Nita jondron bien ye tä bäri kä mike juto nibätä nita jondron kain ngäbiti ye kräke” (Hechos 20:35, TNM). Erametre, nita ni mada tarere bäri angwane, ni rabai bäri tare kwetre. Jesukwe niebare nitre ja tötikaka ben yei: “Nireta jändrän mdei nike, ie munkwe jändrän bian ngwarbe angwane, [...] jändrän biandi munye” (Lucas 6:38).

Nita ni mada tarere aune ni tareta ye köböire jata nemen ruin kriemikani nie. Biblia tä niere erere: “Nita ja tarere kwärikwäri ye abko rabadi kärekäre” (1 Corintios 13:8). María tä niere: “Tita töbike ñaka kwin jabätä ye ñaka metre ye gare tie. Tita nitre mada dimike kukwe ye diankakäre ja töite, aune kukwe ñaka kwin ye tita käi kwitekä tibiti. Käre tita jondron nuainne ni mada kräke ye ngwane kätä nemen juto tibätä”.

Kukwe ketamä kädrieni ye ñan ai köböire kukwe jökrä ye ükaite drekebe ngwarbe, akwa raba ni dimike krubäte. Carolina tä mike gare: “Ruäre ngwane ja täbe nemen ruin ñaka kriemikani tie, akwa ja ñaka niena ruin ngwarbe tie. Jehová töita tibätä ye gare tie aune ja ketamuko tärä tikwe köböire ja ruin kriemikani tie”. Raquel tä kukwe bä kwrere niere: “Nane nane, jata nemen ruin ulire krubäte tie. Akwa ja mräkätre ja üaire tärä kwati tikwe ie ti raba ja di kärere. Niaratre ye käre tätre ti dimike ja töi mike kwin. Akwa bäri ütiäte, ti Rün tärä abokän ben tita blite mantre jetebe. Ye kätä metrere ti dimike”.

Akwa kukwe ye ükaite kärekäre. Kä nebera chi angwane Kä tibien ye rabai bä nuäre känti ni jökrä ie ja rabai ruin kriemikani nieta Bibliakwe. Kukwe Ngöbökwe tä käbämike: “Itire itire rabai täkäni vid bätä higuera kwe ye täni, aune ni ñaka rabai iti käkwe kä jürä ngwainbätä” (Miqueas 4:4). Ye ngwane ni ñaka rabaira jire iti kä jürä ngwen nibätä aune ni nuainne tare. Arato kukwe tare namani bare käne nibätä ye käi rikwitaikä nibiti (Isaías 65:17, 25). Ngöbö aune Monso kwe Jesukristo ye käkwe kukwe metre ye ükaite. Ye ngwane nikwe “nünain jäme aune ja rabai ruin kriemikani kärekäre nie” (Isaías 32:17).