KIRABE nitre mayordomo ye nämäne ju ngübarebiti o nämäne kä ngübarebiti nitre mada kräke.

José, Jacob ngobo nämäne klabore Egipto ngwane, bökänkä käkwe mikani sribire mayordomo erere. Ni egipcio ne käkwe “Jose mikani jändrän jakwe ngibiabtikä” (Gén. 39:2-6, Jändrän Jökrä Namani Bare Ño Kena). Ye bitikäre José namani ni ütiäte kri Egipto ngwane, ni iti kädekani kwe mayordomo ju jakwe ngübabitikäre (Gén. 44:4).

Jesús näire, nitre jondron bökäne ye nämänentre nüne jutate, mobe mentokwäre kä jeñe kwetre yebätä. Aisete nitre ye nämäne ni iti kädeke mayordomo sribi nuain nämäne kä kwetre yekänti ye tuabitikäre.

¿Ñokänti ni iti kädeka nämäne mayordomo? Columela ni romano tärä tikaka siklo kena ye käkwe niebare, ni klabore kädekadre mayordomo yekäre sribi tirete ye “nuain tädre gare ie aune tädre tötikani kwin nitre mikakäre sribire bökän akwa ñaka ngwankäre ja tare nike”. Columela niebare mada: “Ütiäte krubäte ni mayordomo ye ñaka rabadre ja bien töbätä, ñakare aune kukwe mrä yebätä rabadre ja kite arato”.

Sribi ruäre nuainta konkrekasionte ye Ngöbö kukweibätä ketata ni mayordomo yebätä. Ñodre apóstol Pedro käkwe kukwe ne niebare nitre kristiano ie: “Dre dre nuain gare mun itire itire ie, yebiti munkwe sribidre ja kräke kwärikwäri ni [mayordomo] sribikä kwin ye kwrere kukwe kwin ñaka nuain bä ni kräke akwa nuainta Ngöbökwe bätäkä ngwarbe ni kräke ye ererebätä” (1 Ped. 4:10, TNM).

Jesukwe blitabare ni mayordomo yebätä kukwe bämikani kwe Lucas 16:1-8 ye mikakäre gare. Ne madakäre, niara rabaira Reire ngwane “ni klabore ie tö ngwan raba bätä töbätä” o mayordomo ja ngwen metre ye kädekai kwe käbämikani kwe. Sribi mikani mayordomo kisete ye abokän rabadre mrö ja üaire bien nitre kristiano ie kä krüte näire (Mat. 24:45-47; Luc. 12:42). Mayordomo ie tö ngwanta tä mrö ja üaire döräire kä jökräbiti tibien tödeka nikwe mikakäre dite yebätä nita debe bien krubäte.