Tratado de Versalles ye köböire Sociedad de Naciones ye ükaninte. Sociedad de Naciones ye abokän juta keta kabre käkwe ja töi mikani gwairebe juta mada mada ye nübaire ne kwe kä jökräbiti tibien ñaka rüdre, ñakare aune nünandre jäme. Iglesia keta kabre ja bianka kristiano käkwe ja mikani kukwe yekri. El Consejo Federal de las Iglesias de Cristo en América ye käkwe Sociedad de Naciones ye dimikai bämikakäre kukwe ne niebare kwetre: “Sociedad de Naciones ye tä sribire Gobran Ngöbökwe kräke”. Niaratrekwe sribidi gwairebe ye bämikakäre nitre ruäre juani kwetre París gätä nuainbare yebätä. Yete iti käkwe niebare: “Nete ja känenkäre kukwe kwin krubäte rabai bare ni kä tibienbätä kräke”.

Erabokänä kukwe kwin jatani nemen bare. Akwa nitre käkwe gätäbare París ye ñan ai köböire jatani nemen bare. Kä 1919 yete kukwe bäri kwin namani bare kukwe driebätä. Jehovakwe ja di biani juta kwe ie kukwe driekäre bäri. Akwa ye känenkri ja mräkätre ja tötikaka Bibliabätä ye rabadre kukwe ruäre ükete.

Kä kwatire kwatire te nitre Sociedad Watch Tower Bible and Tract jie ngwankäre ye dianka nämäne ye köböi kitani sábado 4 enero kä 1919 yete. Ye ngwane ja mräkä Joseph Rutherford nämäne sribi Jehovakwe jie ngwen (o presidente) ja mräkätre ni kükü yebe, akwa kä ye ngwane niaratre nämäne kitani ngite juta Atlanta Georgia kä Estados Unidos yete. Ja mräkätre ye käkwe sribi Jehovakwe jie ngwain jankunu o ñakare ye namani ükadrete.

Dre rabai bare juta Ngöbökwe yebätä ye nämäne ja mräkä Rutherford ngwen töbike krubäte. Ni mada kädekadre ji ngwankäre ye bäri kwin nütü nämäne ja mräkä ruärekwe ye nämäne gare ie. Ye medenbätä, ja mräkä Rutherford nämäne ngite käkwe tärä tikani ja mräkätre käkwe gätädi ye kräke. Yete mikani gare kwe, ja mräkätre raba Evander Coward ye denkä ji ngwankäre ñan ñobätä aune ja mräkä ye nämäne “ja ngwen jäme”, “töbike kwin käne” aune nämäne “ja ngwen metre”. Akwa ja mräkätre mada abokän tö namani gätä ye nuainne sö krä ti ja känenkäre yete. Nitre  abogado ja mräkätre nämäne ngite dimikaka ye nämäne töbike ye erere. Kukwe ye kädriebätä nitre jatani ngire jakrä kwärikwäri.

Ja mräkä Richard Barber käkwe niebare erere, kukwe ngüba ñaka abokän namani bare käkwe nitre ngwani kwekebe. Ja mräkä iti nämäne ja ngätäite käkwe kä käräbare chi jai blitakäre: “Ti ñaka abogado akwa kukwe nebätä nikwe dre nuaindre yebätä kukwe gare chi tie, metrere nikwe ja ngwandre metre yebrä Ngöböta ribere nie. Nita ja ngwen metre Ngöböi ye bämikakäre bäri kwin nikwe ja mräkätre diandrekä akwa nikwe ja mräkä Rutherford ara mikadreta ni jie ngwankäre” niebare kwe (Sal. 18:25).

Dre namani bare jändrinaine ye Alexander Macmillan nämäne kitani ngite siba ye käkwe ngwani törö jai. Ja mräkä Rutherford nämäne kä kwäräkri käkwe ki metani ne käkwe niebare ie “kise ngökö tie”. Yete ja mräkä Rutherford käkwe tärä ngökaninkä ie. Macmillan okwä niabare tärä yebätä ngwane dre gärä nämäne ye nükani gare drekebe ie. Yete nie nämäne, ja mräkä Rutherford, Wise, Van Amburgh, Barber, Anderson, Bully aune Spill ye kädekaninta bobukäre ji ngwankäre. Niaratre ye ngätäite ja mräkä Rutherford mikaninta presidente, aune Van Amburgh ye kädekaninta secretario aune tesorero.

Ja mräkätre ji ngwanka nämäne ngite ngwane, ja mräkätre aune ja ngwaitre käkwe täräkwata sribebare ja di käräkäre nitre ie ne kwe ja mräkätre nämäne ngite ye tikadrete. Ja di ngwani krubäte kwetre ye köböire nitre 700,000 käkwe ja kä tikani täräkwata yebätä. Miércoles 26 marzo kä 1919 yete täräkwata ye mikadre tuadre gobrantre ie ye känenkri ja mräkä Rutherford aune ja mräkätre ni kükü nämäne ngite ye tikaninte.

Ja mräkätre käkwe Rutherford kani ngäbiti yei kukwe ne niebare kwe: “Gare metre tie, kukwebätä nita ja tuin ye tä ni mike juto kukwe tare jatai nakainkä ja känenkäre ye kräke. [...] Munkwe ja di ngwani ye ñaka nun mikakäre kwäre jerekäbe, ñakare aune munkwe ja di ngwani kukwe metre ye kräke aune nire nire käkwe nuainbare yekwe kukwe kwin rabai”.

Kukwe ükaninte ño ja mräkätre kräke ye käkwe bämikani Jehová ara nämäne kukwe jökrä ye jie ngwen. Köbö 14 mayo kä 1919 yete, tribunal de apelación käkwe ne niebare: “Nitre ne kräke kukwe ükadrete metre, akwa ye erere ñaka nuainbare, aisete kukwe niebare niaratre kitakäre ngite ye jökrä diainkä bititre”. Niaratre kukwe blo nuainbare niebare bätätre, akwa niaratre ye tikadrete jerekäbe o kitadre ngite kä braibe te ngwane, ja mikani ngite kwetre yebätä kitani ngite niedre bätätre. Akwa ye erere ñaka namani bare, ñakare aune niaratre ñaka ngite jire chi niebare bätätre. Ne madakäre, kukwe mada ñaka niebare rüere. Ye köböire, ja mräkä Rutherford * ye tuanimetre jankunu sribire juez erere blitakäre juta Jehovakwe kräke Tribunal Supremo de Estados Unidos yete.  Ye nuainbare kwe bä kabre niara tikaninte ye bitikäre.

Ja mräkä Macmillan niebare: “Nun ñan rabadre kwekebe kise mikani ja teta ñongwane nun jänäin kä kwinbiti ye ngübare jerekäbe, ñakare aune ni däkien tö dre ie ye rabadre gare nuen yekäre nunkwe ja di ngwandre kukwe ruäre nuainne ye rükaba gare nunye”.

Sribi nuain nämäne kä kwati krubäte te ye kömikadreta bobukäre ye ñan namani nuäre ja mräkätre nämäne sede central ye kräke. ¿Ñobätä? Ñobätä ñan aune niaratre nämäne kitani ngite ye ngwane jondron ruäre máquina yete täräkwata imprimikäre ye dikaninte. Kukwe ye namani ja mräkätre di gainkä aune kukwe driedi jankunu o ñakare ye ja mräkätre ruäre namani ngwentari jai.

Ja mräkätre nämäne kukwe kwin Gobran Ngöbökwe driere, ¿ye nitre töi nämäne mikabätä gare jai? Kukwe ne mikakäre gare jai, ja mräkä Rutherford käkwe köbö kitani kukwe kädriekäre, känti nitre jökrä nübaidre niebare kwe. Ja mräkä Macmillan käkwe niebare: “Ni ñan rükai jire ngwane sribi ne kürera”.

Ninina ye erere, bämän 4 mayo kä 1919 yete ja mräkä Rutherford nämäne bren akwa ja bren biti ta kukwe ne kädriebare kwe. “Kukwe käbämikata nitre tä ja tare nike kräke” Los Ángeles (California) yete. Nitre janamane 3,500 gätä yebätä aune mada kwati krubäte namani jubäre, ñobätä ñan aune kä namani chi krubäte gwi. Jändrinaine nitre janamane 1,500 gätäbätä. Nitre janamane gätäbätä ye köböire namani gare ja mräkätre ie, nitre töi nämäne kukwe mikabätä gare jai.

Ja mräkätre käkwe kukwe ruäre nuainbare ye köböire kukwe drie täbe nükebe ni näire.

Täräkwata inglere 1 agosto 1919 ye käkwe mikani gare sö septiembre yete gätä kri sribedi kä Cedar Point (Ohio) yete. Clarence Beaty ye ja mräkä bati nämäne nüne Misuri käkwe niebare:  “Nun jökrä kwandre gätä kri yebätä nämä ruin nuen”. Ja mräkätre nikani bäri kwati krubäte, nitre 6 mil janamane gätä kri yebätä. Nitre 200 ja ngökani ñöte ñö okwä kri Erie yete, yebätä gätä kri ye ngwanta törö jai kä jutobiti.

Köbö 5 septiembre kä 1919 yete ja mräkä Rutherford käkwe kukwe kädriebare “Nitre sribikä siba ye kräke”. Ye ngwane täräkwata mrä mikani gare kwe, ye abokän täräkwata The Golden Age. * Täräkwata nebiti “kukwe ütiäte ütiäte tä nakainkä” ye mika nämäne gare aune “ñobätä kukwe ye nämäne nemen bare” ye mika nämäne gare Bibliabiti.

Ja mräkätre jökrä töi mikani ñaka kä jürä ngwen jabätä aune kukwe driere täräkwata mrä yebiti. Kukwe ükadrete ño sribi ye nuainkäre ye kräke tärä juani känti niebare: “Mun meden käkwe ja ngökanina ñöte ye raba kukwe kwin ye driere nitre jökrä ie aune ja di ngwen nuainne ye munkwe ngwan törö jai”. Kukwe kwin namani bare. Sö diciembre yete, ja mräkätre kukwe kwin driekä ye käkwe nitre 50 mil töi mikani täräkwata mrä ye kärere jankunu jai.

Kä 1919 jatanina krüte ye ngwane juta Jehovakwe käkwe ja ükaninteta aune namaninta dite sribikäreta. Kukwe rabadre bare kä krüte näire ye ruäre namani bare arato. Malaquías 3:1-4 yete mikani gare juta Ngöbökwe ye ükaite bäri kwin. Aune ye erere namani bare kä ye näire. Nitre Jehová mikaka täte ye mikaninta kwäre ja üairebiti Babilonia Kri yebätä. Aune “ni klabore ie tö ngwan raba bätä töbätä” * ye kädekani jie ngwankäre (Apoc. 18:2, 4; Mat. 24:45, TNM). Jehovakwe sribi mikani ja mräkätre kisete ye kräke niaratre namanina juto.