KUKWE JA TÖTIKARA 43
Jehová aibe mikadre täte
“Ngöbö [Jehová] aibe mikadre ütiäte jae amne niara aibe kräke sribidre” (MAT. 4:10).
KANTIKO 51 ¡Nunkwe ja dianinkä mento Ngöbö kräke!
KUKWE NEBÄTÄ JA TÖTIKAI *
1. ¿Ñobätä nikwe Jehová aibe mikadre täte?
JEHOVAKWE ni sribebare aune tä ja nire bien nie, yebätä nikwe niara aibe mikadre täte (Apoc. 4:11). Jehová tare nikwe aune nita mike ütiäte jai, akwa jondron ruäre ye raba ni töi mike ñaka niara aibe mike täte. Kukwe ye raba nemen bare ño ye nikwe mikadre gare jai ne kwe ñaka rabadre bare nibätä. Akwa ye känenkri, nikwe Ngöbö aibe mikadre täte nieta ye dre gärätä ye ani mike gare jai.
2. Éxodo 34:14 tä niere erere, ¿nita Jehová aibe mike täte yebätä nikwe ñaka dre nuaindi?
2 Nikwe Jehová aibe mikadre täte yekäre nikwe niara taredre krubäte nieta Bibliakwe. Aune Jehová aibe mikadre täte ye abokän niara aibe mikadre ngöböre jai aune nikwe ñaka jondron mada o ni mada ye taredre bäri niara yebiti ta meden gärätä (ñäkädre Éxodo 34:14 yebätä). *
3. ¿Ñobätä nita Jehová aibe mike täte?
3 Kukwe namanina gare nie Jehovabätä ye köböire nita niara aibe mike täte. Niara töita ño ye jökrä tuin ütiäte krubäte nie. Dre tuin kwin ie bätä dre tuin käme ie ye gare kwin nie aune ye erere nita mike tuin jai. Niara töita ño ni kräke ye nüke gare nie aune nita ja di ngwen kukwe ükaninte kwe ye mike täte töi kwe mikakäre nemen bare. Niarata ni tuenmetre nemen ja ketamuko kwe yebiti tä ni mike ütiäte jai (Sal. 25:14). Kukwe jökrä tä nemen gare nie Ni ni Sribekäbätä ye tä ni dimike ja kete bäri kwin ben (Sant. 4:8).
4. a) ¿Drebiti Satana tä ni nuinte ne kwe nikwe ñaka Jehová aibe mikadre täte? b) ¿Nibike dre mike gare jai kukwe ja tötikara nekänti?
4 Nitre kä nebätä tä Diablu ngoto täni, aisete nitre yebiti tä ni nuinte ne kwe nikwe ja töi mikadre jondron ie ni tö ja kräke ye ererebätä (Efes. 2:1-3; 1 Juan 5:19). Nikwe ñaka Jehová aibe mikadre täte, ñakare aune nikwe jondron mada taredre bäri ie Diablu tö. Kukwe ketebubiti tä nuainne yebätä ani blite. Kena, nikwe ja töi mikadre nemen jondron bökäne. Ketebukäre, tä ni töi mike jondron blo ye den jai ja näkwitara.
JA NGWANDRE MOKRE AUNE ÑAKA NGWIAN TAREDRE
5. ¿Ñobätä nikwe ja ngübadrebiti ne kwe ni ñaka jatadre ngwian tarere bäri?
5 Mrö tädre kwetadre nie, dän kwin tädre kitadre jabätä aune ju kwin nünana yei ni jökrä tö. Akwa nikwe ja ngübadrebiti ne kwe ni ñaka jatadre ngwian tarere bäri. Ka nengwane nitre kwati krubäte tä “ngwian tarere bäri” aune jondron kökata kwetre ye tare krubäte kwetre arato (2 Tim. 3:2). Nitre nänkä Jesube ye töi raba nemen ngwian tuabätä krubäte jakwe ye nämäne gare kwin ie, yebätä niebare kwe: “Ni ñaka jire iti raba sribire klabore ni nibu kräke, ñobätä ñan aune iti kräke brukwä rabai aune iti rabai tare kwe, o ja ngwain metre kwe iti ie aune iti ñaka mikai ütiäte kwe jai. Mun ñaka raba nemen klabore Ngöbö kräke aune bengwairebe nemen klabore Ngwian kisete” (Mat. 6:24, TNM). Ni iti tädre Ngöbö mike täte, akwa tädre kä denkä krubäte jai ngwian ganainkäre krubäte ngwane, tä sribire ni nibu kräke ye kwrere. Ni ye ñaka tä Jehová aibe mike täte.
Ja nämäne ruin kore nitre Laodicea ruäre ie, akwa Jehová aune Jesús ie niaratre nämäne tuin kore (Párrafo 6 mikadre ñärärä)
6. ¿Jesús mäträbare konkrekasion Laodicea yebätä ye tä dre driere nie?
6 Siklo kena jatanina krüte ye ngwane, nitre kristiano konkrekasion juta Laodiceate ye nämäne ja bien jondron bökäne krubäte aune ñaka nämäne jondron medei nike nämäne ruin ietre. Akwa niaratre nämäne bobre, ngwarbe, butiere aune kä nämäne iko okwäte ye kwrere nämäne tuin Jehová aune Jesús ie. Nitre ye nämäne jondron bökäne krubäte ye ñan aibätä Jesukwe mäträbarebätä. Ñakare aune nämänentre jondron kä nebätä tarere bäri ye köböite ñaka jatanina ja kete kwin Jehovabe yebätä Jesukwe mäträbare bätätre (Apoc. 3:14-17). Ni töi kite jondron tuabätä krubäte jakwe nikwe gadre jabätä ngwane, bengwairebe nikwe ja töi ükadrete (1 Tim. 6:7, 8). Nikwe ñaka ye erere nuaindi ngwane ni brukwä täi ñäkänintubu aune nita sribire Jehová kräke ye ñaka kai ngäbiti kwe ñobätä ñan aune niara aibe mikadre täte ye tä ribere nie (Deut. 4:24). ¿Dre raba kite ni töi mike ngwian mike bäri ütiäte jai?
7-9. ¿Kukwe namani bare ja mräkä Davidbätä ye tä dre driere nie?
7 Ni umbre ji ngwanka konkrekasionte nünanka Estados Unidos kädekata David yebätä ani blite. Niara ye sribikä baliente nieta kwe. Empresa känti niara nämäne sribire, yete sribi bäri kwin mikani kisete. Sribi nuain nämäne kwe yebätä niara aibe sribikä kwin kä Estados Unidos yete nie nämäne nitrekwe niarabätä. Tä niere: “Jehová ara nämä kukwe kwin krubäte ye mike nemen bare ti kräke nütü nämä tikwe”. ¿Akwa Jehová nämäne kukwe ye nuainne kräke?
8 David nämäne sribire ye köböite ñaka jatanina ja kete kwin Jehovabe. Tä niere: “Ti nämä gätäte aune ti nämä kukwe driere ngwane käre ti töi nämä kukwe nämä nemen bare sribikänti yebätä. Ti nämä ngwian ganainne ere krubäte akwa ti jataba nainte aune nun jataba nikwite jabätä ti mukobe”.
9 Ye ngwane, dre bäri ütiäte yebätä Davidkwe töbikadre ye nükani gare ie. Tä niere: “Tikwe ja töi mikaba kwatibe kukwe ye ükete”. Aisete, sribidi ora nuäi te kwe ye ükaninte kwe biti mikani gare kwe ni sribi bökänkä yei. Kukwe ükaninte kwe jai ye köböite niara kitaninkä sribibätä. ¿Ja nuainbare kwe? “Jändrinaine tikwe solicitud sribi prekursor ausiliar nuainkäre ye bianba” nieta kwe. Ye bitikäre, niara aune muko kwe nikani sribire kä bätätebätä ja ngübakäre. Sribi ye ñaka tuin ütiäte nitre ie, akwa niaratre ñaka ye töibikaire. Ja känenkäre David sribi prekursor regular ye kömikani aune biti muko kwe ja mikani prekursora regular arato. Nengwane niaratre tä ganane braibe akwa ngwian tärä kwetre sö kratire kratire kräke. Niaratre tö jankunu Jehová mikai käne jondron mada yebiti ta. Nire tä Gobran Ngöbökwe mike käne ye Jehovata ngübare ye namanina gare ietre (Mat. 6:31-33).
10. ¿Ni raba ja brukwä ye kriemike ño?
10 Ni jondron bökäne o ñakare akwa ni jökrä käkwe ja brukwä kriemikadre. ¿Ni raba nuainne ño? Nikwe ñaka jondron ütiäte kä nebätä taredre aune nikwe ñaka sribi ye mikadre bäri ütiäte jai sribi Jehovakwe ye kräke. Nane kukwe ye erere niena nakainkä nibätä ye ni tö gai ngwane nikwe kukwe ne ngwandretari jai: “Tita gätäte o kukwe driere ngwane, ¿ti töita sribi ye aibebätä? ¿Ngwian ñobiti tikwe ja ngübai ja känenkäre yebätä käre tita töbike? ¿Ngwian aune jondron mada ye köböite kukweta nemen jabätä tie ti mukobe? Sribi ñan tuin ütiäte nitre ie, ¿ye tita juto biare ka ngäbitikäre sribikäre bäri Jehová kräke?” (1 Tim. 6:9-12). Nikwe ja trä tuai ye erere ngwane nikwe kukwe ne ngwandre törö jai, Jehovakwe ni tare aune nire tä sribire ja brukwä tätebiti kräke yei tä kukwe ne käbämike: ‘Tikwe ñan ma mikaite jire chi kaibe amne, tikwe ñan kä mikaikä jire chi mabtä’. Ye medenbätä apóstol Pablo käkwe kukwe ne niebare mäträkäre: “Munkwe ñan ngwian tare dikaro amne jändrän ño ño tä munkwe, ye abko käi ngwian nuäre jabtä munkwe” (Heb. 13:5, 6).
JONDRON KWIN DIANDRE JAI JA NÄKWITARA
11. ¿Jondron ja näkwitara ye raba ni töi mike ño?
11 Nikwe nünandre kä jutobiti ie Jehová tö aune kukwe ruäre ja näkwitara ye tä kä mike juto nibätä. Ñodre “ni kä nebätä mrödre aune tomana ñadre bätä jondron kwin rabadre kwe aune sribibare ja dibiti kwe ye käi ngwandre juto kwe jabätä ye bäri kwin kräke” nieta Bibliabätä (Ecl. 2:24). Akwa nitre kä nebätä tä jondron nuainne ja näkwitara ye jökrä bäsi blo ñan ñobätä aune tä nitre töi mike kukwe käme nuainne aune kukwe ñäkäita Ngöbökwe ye tarere.
Nita jondron ja näkwitara den jai, ¿ye nireta sribere? (Párrafo 11 nemen 14 mikadre ñärärä) *
12. 1 Corintios 10:21, 22 tä niere erere, ¿ñobätä nikwe jondron kwin diandre jai ja näkwitara?
12 Ni tö Jehová aibe mikai täte, yebätä nikwe mrödre “mesa Jehovakwe” ye aibebätä aune ñaka mrödre “mesa chokalikwe” yebätä. Nikwe ñaka mrödre mesa ketebubätä gwairebe (ñäkädre 1 Corintios 10:21, 22 yebätä). * Mröta keteitibe jabe ni madabe ye tä mike gare ni ye ja ketamuko nikwe. Aisete, jondron ja näkwitara känti ni nuainta tare, kukwe sukiakwe, nitre nemen kämekäme jabe aune kukwe blo mada nuainta ye dianta jai ja näkwitara ngwane, nita nemen täkänintubu mröre nitre ja mikaka Ngöbö rüere yebe ye kwrere. Ye erere nita nuainne ngwane nita kukwe tare mike akwle ja kisete aune köböite ni ñaka tä ja kete kwin Jehovabe.
13, 14. a) ¿Ñobätä jondron ja näkwitara ye bämikata mrö yebätä? b) Santiago 1:14, 15 tä niere erere, ¿ñobätä nikwe ñaka kukwe blo mikadre ja töite?
13 ¿Ñobätä jondron ja näkwitara ye bämika raba mrö yebätä? Nita mröre ngwane, nita dre mike ja kadate ye gare kwin nie. Akwa nita mrö ye ñainkä ngwane matai ño nibätä ye ñan gare nie. Nita mrö kwin kwete ye köböire nita kwin, akwa mrö käme ye tä ni mike bren. Akwa matai kwin nibätä o ñakare ye ñaka tä nemen gare bengwairebe nie.
14 Ye erere tä nemen bare kukwe dianta jai ja näkwitara yebätä. Ni itire itire käkwe drebätä ja näkwitai ye tä gare ie. Akwa kukwe dianta jai ja näkwitara ye tärä nemen ni töite ngwane ye tä kukwe keta kabre mike nemen bare jatäri. Ye medenbätä nita kukwe kwin den jai ja näkwitara ngwane tä kukwe kwin mike nemen bare ni kräke akwa nita kukwe blo den jai ja näkwitara ngwane tä ni mike kukwe kri te (ñäkädre Santiago 1:14, 15 yebätä). Matai ño nibätä ye nikwe ñan gai bengwairebe, akwa ja känenkäre ni jatai ja ngwen ño yekänti rabai gare. Ye medenbätä Bibliabätä kukwe ne nieta ni mikakäre mokre: “Ñan ja ngöka. Ngöböbätä ni ñan raba ja denkä, ñobätä ñakare angwane jondron jökrä nikwe nökadi, ye arabe nikwe ngwä diainta gwä. Ñobätä ñakare angwane nita jondron nökö ja ngätä kräke; ja ngätäbiti jondron ngütiete” erere rabai nikwe (Gál. 6:7, 8, NGT). Ye medenbätä, jondron meden tuin blo krubäte Jehovai ye nikwe ñaka kadre ngäbiti jire ja näkwitara (Sal. 97:10).
15. ¿Jehovata dre bien nie?
15 Kukwe mikata tuare JW Broadcasting® yete ye tuin kwin krubäte ja mräkätre kwati Jehová mikaka täte ie. Meri Testiko kädekata Marilyn käkwe niebare: “Kukwe mikata tuare JW Broadcasting yete ye käkwe ti dimikanina töbike kukwe kwin yebätä aune dre tuata tikwe yebätä ti ñan kä töibikaire. Jata nemen ruin ulire o kaibe tie ngwane, kukwe kädrieta yete o texto köbö kwatire kwatire kädrieta ye tä ti miketa dite. Ye köböire jata nemen ruin bäri Jehová ken tie aune juta kwe yebe. JW Broadcasting käkwe ti dimikanina krubäte”. ¿Jehovata kukwe kwin bien nie ye kräke nita kä denkä jai? Sö kratire kratire te JW Broadcasting ye ñan aibe mikata tuare nie, ñakare aune video, kukwe grababare aune musika mikata yete ni dimikakäre.
16, 17. Nita kä denkä jai ja näkwitara, ¿ye ñobätä kräke nikwe ora ükadrete jai aune ni raba nuainne ño?
16 Nita dre den jai ja näkwitara ye ñan aibebätä nikwe töbikadre kwin käne. Ñakare aune nita kä denkä nuäi jai yebätä nikwe töbikadre kwin arato. Ye erere nikwe ñaka nuaindi ngwane, nikwe kä diainkä krubäte jai ja näkwitakäre sribi Jehovakwe yebiti ta. Kukwe ye ñan tä nemen nuäre nitre kwati kräke. Ñodre Abigail meri testiko yebiti kä 18, tä niere: “Tita sribire krubäte köböiti ye bitikäre tita nemen täkäni televisión tuin, ye tä mate kwin tibätä, akwa ti ñan ja ngübarebiti ngwane ora kabre te tita kwekebe okwä te”. Monso bati kädekata Samuel tä niere: “Ruäre ngwane tita video tuin Internete ora kabre te ye ti ñan tä gain. Tita video krati mike ñärärä biti tita niken mada tuin ngwane ti ñan tä ora gain aune kä tärä niken raire ta”.
17 ¿Nita kä denkä jai ja näkwitara ye ni raba ükete ño? Kena, nita kä denkä nuäi jai kukwe ye kräke ye nikwe mikadre gare jai. Yekäre, nita kä denkä nuäi jai televisión tuakäre, kukwe ruäre mikakäre ñärärä Internete, jadakakäre celularte ye nikwe tikadre täräbätä. Nita kä denkä krubäte jai kukwe ne erere kräke nikwe gadre jabätä ngwane nikwe horario sribedre jai. Kukwe meden meden bäri ütiäte ye mikadre nuaindre käne jai biti kä diandrekä jai ja näkwitara. Ye bitikäre, nikwe kukwe ükaninte ño jai ye ererebätä Jehovakwe ni dimikadre ye nikwe ribedre ie. Ye köböire kä rabai nie aune ni di rabai ja tötikakäre kaibe Bibliabätä, Ngöbö mikakäre täte ni mräkäbe, nänkäre gätäbätä, kukwe driekäre aune nitre mike ja tötikaka Jesube. Ye erere nikwe nuaindi ngwane, nikwe kä diainkä chi jai ja näkwitara yebätä ja ñan rabai ruin ngite nie.
JEHOVÁ AIBE MIKADRE TÄTE JANKUNU
18, 19. ¿Nita Jehová aibe mike täte ye ni raba bämike ño?
18 Nitre gobrainta Satanakwe ye gaite ño aune kä kwin ja känenkäre yebätä apóstol Pedrokwe blitabare ye bitikäre kukwe ne niebare kwe: “Ti mräkätre tare tikwe, kukwe rakadikä jökrä kore, ye ngibiare ngäbti kisere kwärä munkwe nüna deme amne munkwe ñan ja mika ngite amne munkwe nüna jäme jabtä Ngöböbe amne ni mda mdabe” (2 Ped. 3:14). Nita kukwe ja jie ngwankäre ne mike täte, nita ja ngwen kwin aune nita ja ngwen deme Ngöbö okwäkänti ngwane nita Jehová aibe mike täte.
19 Satana aune nitre gobrainta kwe ye käkwe ni nuaite jankunu ñaka kukwe bäri ütiäte ye mikakäre nuaindre käne jai (Luc. 4:13). Aisete, kukwe ñokwä ben nikwe ja tuadi akwa nikwe ñaka jondron mada o ni mada ye taredre bäri Jehová yebiti ta. Ni töita kwatibe Jehová aibe mikabätä täte.
KANTIKO 30 Ti Rün, Ja Ketamuko tikwe aune Ngöbö tikwe
^ párr. 5 Nikwe ja dianinkä mento Jehová aibe mikakäre täte. ¿Akwa ye erere nita nuainne? Kukwe ngwinintari ye mikakäre gare jai nikwe töbikadre nita dre den nuaindre jai yebätä. Nita ngwian aune jondron ja näkwitara ye mike tuin ño jai, ye köböire nita Jehová aibe mike täte o ñakare ye rabai gare nie.
^ párr. 2 Éxodo 34:14: “Mun ñaka ja mikadre ngudokwäbiti ngöbö mada ngwärekri, ñobätä ñan aune gare kwin, Jehová ye tö ja aibe mikamana täte. Jän, niara ye Ngöbö, tö ja aibe mikamana täte”.
^ párr. 12 1 Corintios 10:21, 22, (TNM): “Mun ñaka raba copa Jehovakwe ñain aune copa chokalikwe ñain arato; mun ñaka raba mröre ‘mesa Jehovakwe’ yebätä aune mesa chokalikwe yebätä arato. ¿O ‘nita Jehová mike mokrere’? Ni ñaka bäri dite niara kräke, ¿ñan ererea?”.
^ párr. 55 KUKWE MIKATA GARE ÜAIBÄTÄ. Mrö riadre cocina käme te ye ni ñaka tö kwetai jire, ¿ñan ererea? Ye erere arato, ni nuainta tare, kukwe sukiakwe o nitre nemen kämekäme jabe yebätä nikwe ñaka ja näkwitadre jire.
