1. ¿Jehová raba dre nuainne ja töi mikakäre nemen bare?

JEHOVÁ raba kukwe ñokwä nuainne ja töi mikakäre nemen bare. Ñodre, niara ni tötikaka, ni rün ni töi mikaka jäme aune kukwe driekä (Is. 48:17; 2 Cor. 7:6; Gál. 3:8). Jehová raba kukwe jökrä nuainne, akwa niara tä ni kä tibienbätä ye mike kukwe ruäre nuainne ja töi mikakäre nemen bare arato (Mat. 24:14; 28:19, 20; 2 Cor. 1:3, 4). Jehová raba ni mike töbätä aune ja di bien nie ne kwe nikwe kukwe jene jene nuaindre niara töi mikakäre nemen bare. Kukwe jökrä ye Jehová kä gärätä nitre ja tötikaka kukwe yebätä tä niere erere.

2. a) ¿Ni ñaka tä sribire Jehová kräke ye ñobätä ni raba kite nütüre? b) ¿Drebätä nibike ja kite kukwe ja tötikara nekänti?

² Ni jökrä tö sribidi Jehová kräke, akwa ni ruäre abokän ñaka tä sribire Jehová kräke ruin ietre. ¿Ñobätä? Ñan ñobätä aune niaratre niena umbre, kukwe keta kabre tä kisete o kukwe ñaka gare krubäte ietre yebätä ñaka raba sribi Jehovakwe nuainne ruin ietre. Mada abokän tä sribi nuainne ye niena debe kräketre aune sribi mada mikadre ja käne kwetre ye ñaka ütiäte nütüta kwetre. Akwa, Jehová raba ni tötike niara töi mikakäre nemen bare ye rabai gare nie kukwe ja tötikara nekänti. Jehovakwe nitre brare aune merire kirabe ye töi mikani sribire bäri ja kräke aune ja di biani kwe ietre sribi ye nuainkäre ye nibike mike gare jai arato. Mrä mada, Jehovakwe ni mikadre sribire ja kräke ja töi mikakäre nemen bare, yekäre nikwe dre nuaindre ye rabai gare nie arato.

3. Kukwe käbämikata Filipenses 2:13 erere, ¿Jehová raba dre nuainne?

³ (Ñäkädre Filipenses 2:13 yebätä). * Jehová raba ni dimike ne kwe nikwe ja töi mikadre sribire. ¿Raba nuainne ño? Ñodre, ni raba konkrekasion nikwe ye dimike o kä madakänti ja di ribeta yebätä sukursal tärä juandre bätä ñäkädre konkrekasionte ngwane ni raba ngwentari jai: “¿Ti raba dre nuainne nitre dimikakäre siba?”. Sribi ribi driedre nie ngwane, ni niena juto o ñakare sribi ye erere nuainkäre yebätä ni raba nemen töbike. O nikwe ñäkädre Bibliabätä ye bitikäre ni raba nitre dimike ño texto yebiti yebätä ni raba nemen töbike. Jehovakwe ñaka ni mikai ja dibiti sribire ja kräke. Akwa, ni tö sribidi bäri niara kräke rabai tuin ie ngwane, ni töi mikai kwe ye erere nuainne.

4. ¿Ño Jehová raba ja di bien nie ja töi mikakäre sribire?

⁴ Jehová raba ja di bien nie sribikäre ja kräke (Is. 40:29). Kukwe ruäre nuain gare nie, akwa niara raba ni dimike nuainne bäri kwin üai deme kwe yebiti (Éx. 35:30-35). Aune juta kwe yebiti raba ni tötike sribi jene jene nuainkäre. Sribi mikadre ni kisete ye nuaindre ño ñaka rabadre gare nie ngwane nikwe ja di kärädre. Arato nikwe krötadre töi jämebiti ni Rün kä kwinbiti ken di bäri kri ye käräkäre ie ñan ñobätä aune niara ye mantiame (2 Cor. 4:7; Luc. 11:13). Jehovakwe nitre brare aune merire kwati ye tötikani ne kwe niaratre töi rabadre sribikäre aune ja di biani kwe ietre nuainkäre mikata gare Bibliabätä. Ani blite nitre ruäre yebätä aune Jehová raba ni mike ño sribire ja kräke niaratre erere yebätä ani ja tötike.

5. Jehovakwe Moisés mikani sribire ja kräke kä debe näre te, ¿ye tä dre driere nie?

⁵ Jehovakwe Moisés tötikani aune dimikani nitre israelita mikakäre kwäre. Akwa, ¿ñongwane Jehovakwe sribi ye mikani kisete? ¿“Nitre töbtä krikri Egiptobo” käkwe Moisés tötikani ünä ye ngwane namanina juto sribi ye nuainkäre? Ñakare (Hech. 7:22-25). Jehovakwe Moisés tötikani ne kwe rabadre ja ngwen jäme aune töi bobre ye bitikäre sribi ye mikani kwe kisete (Hech. 7:30, 34-36). Arato, Moisés mikani dite kwe blitakäre rei bäri kri Egipto yebe (Éx. 9:13-19). Jehovakwe sribi mikani Moisés kisete kä debe näre te aune nuainbare ño kwe, ¿ye tä dre niere nie? Ye tä mike gare nie, nire nire tä ja töi mike Jehová erere aune tä tö ngwen ie ye niarata mike sribire ja kräke (2 Cor. 4:7).

6. ¿Jehovakwe Barzilái töi mikani rei David dimike ye tä dre driere nie?

⁶ Kä nikani kwati krubäte ta ye bitikäre, Jehovakwe Barzilái töi mikani rei David dimike. Rei David aune nitre nänkä ben ye nämäne ngitie Absalón ngänikaire ngwane nämänentre nainte, mrö aune tomana namani ietre. Barzilái namanina umbre, akwa niara aune nitre mada ye ñaka kä jürä ngwani jabätä nänkäre rei känti dimikakäre. Barzilái nämäne umbre yebätä ñaka raba sribire Jehová kräke ñan nütübare kwe. Ñakare aune, ja ngwani mantiame kwe aune dre nämäne kwe yebiti nitre Ngöbö mikaka täte nämäne jondron ribere jai ye dimikani kwe (2 Sam. 17:27-29). ¿Ye tä dre driere ja töi kräke nie? Kä nuäi nibiti akwa Jehová raba ni töi mike ja mräkätre nünanka ni käite o juta madate tä jondron ribere jai ye dimike (Prov. 3:27, 28; 19:17). Ni ñaka raba jondron bien gwärere ietre, akwa ni raba ngwian bien ja mräkätre käbiti tibien dimikakäre tätre ja tare nike ye ngwane (2 Cor. 8:14, 15; 9:11).

7. a) ¿Jehovakwe Simeón töi mikani dre nuainne? b) ¿Ñobätä kukwe ye tä ni dimike krubäte?

 ⁷ Simeón ni umbre ja ngwanka metre nämäne nüne Jerusalén. Niara krütadre ye känenkri Mesías tuai kwe ye Jehovakwe käbämikani ie. Kukwe käbämikani ie ye käkwe kä mikani juto krubätebätä ñan ñobätä aune kä kwati krubäte te Mesías rükai ye nämäne jiebäre. Simeón tödekabare krubäte aune kä ngwani nüke kwe jai yebätä Jehovakwe kukwe kwin mikani nemen bare kräke. Bati, “Ngöbö Üai Deme käkwe Simeón töi mikani niken” templote aune yete Jesús tuani kwe. Ye ngwane Jehovakwe niara töi mikani kukwe niere monso chi yebätä. Monso chi ye Kristo ara niebare kwe (Luc. 2:25-35). Jesús jatani kukwe driere ye Simeón ñaka tuani akwa Ngöbökwe niara tuanimetre kukwe niere Jesubätä ye namani ütiäte kräke. Aune kä bä nuäre yete Jesús täi gobrane ye köböire kukwe kwin rabai nitre kä tibienbätä yekwe, ye Simeón käkwe tuai ja okwä jeñebiti ye kukwe bäri ütiäte tä kräke ja känenkäre (Gén. 22:18). Jehová tä ni tuenmetre sribi nuainne ja kräke ye rabadre tuin ütiäte krubäte nie arato.

8. ¿Jehová raba ni töi mike dre nuainne?

⁸ Siklo kena yete ni iti mantiame kädeka nämäne José ye nämäne juto ne kwe Jehovakwe sribi mikadre kisete (Hech. 4:36, 37). Nitre apóstol käkwe niara kädekani Bernabé, ye abokän “Ni kä mikakata nuäre nibtä” o ni töi mikaka jäme gärätä. Kädekani kore ñan ñobätä aune ni mada töi mikadre ño jäme ye nämäne gare kwin ie. Ñodre, Saulo ja mikani kristiano ngwane ja mräkätre kwati yebätä jürä namani. Niaratre ñaka tö namani ja ketai ben ñan ñobätä aune niara käkwe ja mräkätre konkrekasionte ye ngwani ja tare nike krubäte. Akwa Bernabé käkwe niara dimikani. Bernabé käkwe ja töi mikani kwin kräke yebätä debe biani krubäte kwe ie (Hech. 9:21, 26-28). Ja känenkäre, ja mräkätre juta Antioquía de Siria ye nämäne ja di ribere namani gare nitre umbre ji ngwanka Jerusalén ie ngwane, ¿nire juani raba ruin mäi? Bernabé ara juani kwetre ja mräkätre ye dimikakäre. Ye kukwe kwin krubäte nuainbare kwetre ñan ñobätä aune Bernabé käkwe ja mräkätre ye dimikani ja ngwen metre jankunu Jesús ie ja di tätebiti aune töi bökänbiti nieta Bibliabätä (Hech. 11:22-24). Kä nengwane Jehová raba ni töi mike ja mräkätre töi mike jäme. Ñodre, ja mräkätre kän mräkä krütani ye töi mike jäme, ja mräkätre tä bren o tä ulire ye tuinbiti o ñäke kökräte ta ietre kukwe kwin niekäre ietre. Bernabé erere, ¿nita juto biare ne kwe Jehovakwe ni töi mikadre nitre mada töi mike jäme? (1 Tes. 5:14).

9. ¿Ño Jehovakwe Vasily dimikani aune ye tä dre driere nie?

⁹ Jehovakwe ni testiko iti kädekata Vasily dimikani ne kwe rabadre ni ji ngwanka kwin kukwe ja üairebiti. Kä nämäne 26 biti ngwane kädekani ni umbre ji ngwanka konkrekasionte, akwa ja ñan nämäne nüke törö ie sribi ye nuainkäre, metrere ja mräkätre nämäne ja di ribere ye dimikakäre. Akwa nitre ji ngwanka bäri umbre niarabätä ye käkwe dimikani aune Kwela Sribi Ngöbökwe Jie Ngwankäre ye käkwe dimikani krubäte arato. Ja di ngwani kwe nitre jie ngwen bäri kwin. Ñodre, niara rabadre dre dre nuainne ye tikani kwe täräbätä jai. Kukwe keteitire keteitire ye jatani nemen bare ie ngwane, kä jürä jatani nekäbätä. Niara tä niere: “Dre jürä nämä nemen tibätä ye kä nengwane tä kä mike juto tibätä. Jehová tä ti dimike texto känene ja mräkä dimikakäre ngwane, jata nemen ruin kwin tie”. Ja mräkätre, munta ja di ngwen Vasily erere aune munta juto biare sribikäre Jehová kräke ngwane, niarakwe mun tötikai sribikäre bäri konkrekasionte.

10. ¿Abigaíl dre nuainbare aune ye tä dre driere nie?

¹⁰ David aune nitre ja ngwanka metre ie ye jiebiti rei Saúl käkwe nänbare murie ketakäre ngwane, niaratre ja di ribebare krubäte. Bati ni israelita jondron bökäne krubäte kädeka nämäne Nabal yei nitre nänkä David ben käkwe mrö käräbare. Niaratre käkwe mrö käräbare ie ñobätä ñan aune kä ngwarbe nötare yete oveja Nabalkwe ye niaratrekwe kriemikani. Akwa Nabal nämäne ja sribere käbäre aisete ñaka bukani jire chi kwe. Ye käkwe David därie ngwani nokwrekä aisete ja töi mikani kwatibe kwe Nabal aune nitre sribikä kwe ye murie kete (1 Sam. 25:3-13, 22). Ye ngwane Abigaíl Nabal muko bä nuäre ye käkwe ñaka David tuanimetre kukwe ye nuainne. Meri ne käkwe ñaka kä jürä ngwani jabätä, nikani David ngäbiti, namani ngätäi ben ngwane, nikani ngitiekä ngudokwäbiti tibien David ngotobätä käkwe niebare ie, niarakwe ñaka ja ngie mikadre, ñakare aune kukwe ye tuanemetre kwe Jehová kisete aune Nabal därie ngie ye ñaka rikadrebiti. Abigaíl käkwe blitabare töi bobrebiti aune ja ngwani kwin kwe ye matani David brukwäte ye köböire nükani gare ie, Jehová ara käkwe meri ye juani (1 Sam. 25:23-28, 32-34). Abigaíl nämäne ja di ngwen ja töi mikakäre kwin, aisete Jehovakwe töi mikani kukwe ye erere nuainne. Ye erere arato Jehová raba meritre tä ja ngwen töbätä aune ñan blite okwä kware yebiti mräkätre o konkrekasion dimike kä nengwane (Prov. 24:3; Tito 2:3-5).

11. ¿Salum ngäbriänkätre merire ye käkwe dre nuainbare aune nire tä ja ngwen niaratre erere kä nengwane?

¹¹ Siklo kwati krubäte ye bitikäre, Jehovakwe nitre mikani ki Jerusalén sribereta ye ngätäite Salum ngäbriänkätre merire ye käkwe sribibare siba (Neh. 2:20; 3:12). Salum nämäne gobrane siba, akwa ngäbriänkätre merire kwe ye namani juto sribi ñan nuäre ye nuainkäre (Neh. 4:15-18). Nitre tecoíta ütiäte ütiäte ñaka tö namani sribidi, ye erere meritre ye ñaka ja ngwani (Neh. 3:5). Köbö 52 aibe te sribi mikani krüte ye käkwe kä mikani juto meritre yebätä ye bämike ja töite (Neh. 6:15). Kä nengwane, meritre kristiana kwati krubäte tä sribi keta kabre nuainne Jehová kräke kä jutobiti. Ñodre, ju sribeta sribi Ngöbökwe nuainkäre yebätä aune ükatebätä. Sribi nuain gare ietre, tätre sribire kä jutobiti aune ja ngwanta metre kwetre ye köböire sribi Ngöbökwe tä nemen bare kwin krubäte.

12. Tabita erere, ¿Jehová raba ni mike dre nuainne?

¹² Jehovakwe Tabita töi mikani “jändrän kuin nuene ni mda mdakrä” aune “ni bobre bobre die mike”, metrere meritre kän muko krütani ye niarakwe dimikani bäri (Hech. 9:36). Tabita krütani ngwane nitre kwati käkwe muaibare ñobätä ñan aune ja ngwani mantiame kwe aune nämäne kukwe kwin nuainne yebätä. Akwa apóstol Pedro käkwe niara ganinkröta ngwane kä namani juto krubäte nitrebätä (Hech. 9:39-41). ¿Tabita ja ngwani ño ye tä dre driere nie? Ye tä driere nie, ni bati o ni umbre, ni brare o ni merire akwa, ni jökrä raba kukwe kiakia ütiäte nuainne ja mräkätre dimikakäre (Heb. 13:16).

13. ¿Jehovakwe meri Testiko kädekata Ruth ye töi mikani dre nuainne aune dre nükani gare ie?

¹³ Meri Testiko kädekata Ruth ye nämäne nemen jakaire aune ñaka nämäne nemen nuäre kräke blitakäre ni madabe, akwa tö namani sribi misionero ye nuaindi. Nämäne monsore ngwane, nämäne niken jötrö ngwarbe ju ju te täräkwata döräire. Niebare kwe: “Sribi ye nämä tuin kwin tie”. Akwa blitadre jukwebätä Gobran Ngöbökwe yebätä nitre ben ye ñaka nämäne nemen nuäre kräke. Akwa yebiti ta, kä nämäne 18 biti ngwane, ja mikani kwe prekursora regular. Kä 1946 yete niara nübaibare Kwela Galaad Watchtower yebätä aune sribi  misionero nuainbare kwe Hawái aune Japón. Jehovakwe niara dimikani kukwe kwin ye driere nitre kwati krubäte ie. Ruth sribi misionero ye nuainbare bäsi kä 80 te aune kukwe ne nükani gare ie: “Jehová ye ti mikaka dite aune niarakwe ti dimikaba blite aune ñaka jakaire. Nireta tö ngwen Jehovai ye niara raba mike sribire ja kräke ye gare metre tie”.

14. Colosenses 1:29 tä niere erere, ¿nikwe dre nuaindre ne kwe Jehovakwe ni töi mikadre sribire?

¹⁴ Kirabe nükebe nengwane Jehovakwe nitre niara mikaka täte ye töi mikanina kukwe keta kabre nuainne. Akwa, ¿mä töi mikai kwe dre nuainne? Ni itire itire käkwe ja di ngwain ño ye ererebätä ni töi mikai kwe kukwe nuainne (ñäkädre Colosenses 1:29 yebätä). * Nita juto ngwane, Jehová raba ni mike kukwe driere kä jutobiti, nitre mada tötike kwin, nitre töi mike jäme, sribi nuainne kwin aune ja ruin ño ja ketamuko nikwe ie ye mike nüke gare jai o sribi mada mada ye nuainne niara töi mikakäre nemen bare.

15. 1 Timoteo 4:12, 15 tä niere erere, ¿monsotre bati käkwe dre ribere Jehovai?

¹⁵ Monso bati, ¿mä kitera ünä ya? Nitre bati bati dite mun erere käkwe ja mikadre ni sribikä konkrekasionte erere sribi jene jene nuainkäre ye ribeta. Konkrekasion keta kabre känti nitre umbre ji ngwanka ye tä kädekani bäri nitre sribikä konkrekasionte ye kräke. ¿Mä raba ja töi mike sribire bäri konkrekasionte? Ruäre ngwane ja mräkätre tä niere: “Ti niena kukwe driere, se dre mada”. Ye erere mätä niere ngwane, ja di kärere Jehovai ja töi mikakäre nemen ni sribikä konkrekasionte erere. Aune mäkwe sribi mikadre nuaindre jai ye jökräbätä mä dimikadre kwe ye mäkwe ribe ie (Ecl. 12:1). Mäkwe nun dimikadre ye nunta ribere jai (ñäkädre 1 Timoteo 4:12, 15 yebätä).

16. ¿Nikwe dre ribedre Jehovai aune ñobätä?

¹⁶ Jehová raba ni töi mike sribi jene jene nuainne niara töi mikakäre nemen bare. Yebätä Ngöbökwe ni töi mikadre sribire ja kräke aune ja di biandre kwe nie nuainkäre ye nikwe ribedre ie. Ni tä bati o niena umbre, akwa kätä nie, ni die, jondron nikwe aune dre nuain gare nie ye jökräbiti nikwe Jehová käikitadrekä kä nengwane (Ecl. 9:10). Kä jürätä nemen nibätä o ja ñaka nüke törö nie ye ñaka rabadre ni ketebätä sribikäre krubäte Ngöbö kräke. Sribi kiakia nuainta nikwe o nita sribire krubäte akwa ni jökrä raba ni Rün kä kwinbiti ye käikitekä niara tö ie ye erere.