ÑÜ JOBE muriebe minimini räkäin tibien ye köböite kukwe tare raba nemen bare nitrebätä ye rabadre gare ni blitaka radiote ie. Niara ñan törbadre kukwe tare tuai nemen bare nitrebätä, aisete jötrö ngwarbe kukwe döräidre kwe kä ngrabare nitre mikakäre mokre kukwe tare jämi nemen bare ye känenkri.

Ye erere arato, Jehovata nitre jökrä nünanka kä tibienbätä ye mike mokre. Ni blitaka radiote käkwe nitre mikadre mokre ñü jobe muriebe minimini yebätä, akwa Jehovata nitre mike mokre kukwe bäri tare krubäte abokän ñan rababare bare jire yebätä. ¿Tä nitre mike ño mokre? Aune ¿ñobätä gare metre nie niarata kä bien nitre ie ja töi kwitakäre? Jehovakwe kukwe ruäre niebare nitre kirabe mikakäre mokre yebätä ani blite kukwe ngwantarita ye mikakäre gare jai.

Kirabe nitre ñaka nämäne Jehová mike täte yebätä niarakwe mikai ja ngie nuin niebare kwe ietre mikakäre mokre (Prov. 10:25; Jer. 30:23). Bä kabre Ngöbökwe nitre mikani ja ngie nuin akwa kukwe tare ye känenkri kä biani kwe nitre ie ja töi kwitakäre aune nitre ye käkwe dre nuaindre ne kwe ñaka gadrete ye jökrä mikani gare kwe ietre arato (2 Rey. 17:12-15; Neh. 9:29, 30). Nitre ye töi mikakäre ja ngwen metre aune ja töi kwitadre jötrö ngwarbe kwetre yekäre Jehovakwe nitre niara mikaka täte yebiti nitre käme ye mikani mokre (Amós 3:7).

Nitre ja ngwanka metre ye iti abokän Noé. Kä kwati krubäte te niarakwe ja ngwani dite nitre ja mikaka gure kämekäme aune ni mada nuainkä tare ye mikakäre mokre Ñü Kri räkäin kä jökräbiti tibien yebätä (Gén. 6:9-13, 17). Nitre käkwe dre nuaindre rabatekäre nire ye mikani gare kwe ietre. Noé ja di ngwani krubäte sribi ye nuainkäre, yebätä niara ye kukwe metre driekä nieta Bibliabätä (2 Ped. 2:5).

Ngöbökwe nitre käme gaite ye Noé käkwe ja di ngwani mike gare mantre jetebe nitre niara näire yei, akwa yebiti ta nitre ye käkwe ñaka kukwe ye mikani era jai. Ye köböite “ñü jatani jobe temen” ye ngwane niaratre jökrä “müre neketani ñöte” (Mat. 24:39; Heb. 11:7). Ngöbökwe ñaka niaratre mikani mokre ye nie ñaka raba.

Kä ruäre känti nitre namanina jerekäbe gadrete ngwane Jehovakwe mikani mokre. Akwa yebiti ta niarakwe kä biani nitre ie ja töi kwitakäre. Kukwe tare keta jätäbiti nitre egipcio mikani ja tare nike kwe ngwane, ye erere kä biani kwe ietre. Ñodre, kukwe tare keta kükükäre ye känenkri dre namani bare ye ani mike gare jai. Ñü järe jämi näkäin tibien ye känenkri Jehovakwe Moisés aune Aarón juani faraón aune nitre sribikä kräke ye känti niaratre ye mikakäre mokre. Ñü järe ye räkändre tibien jetebe se kwrere, ¿aisete kä nämäne ietre ja kriemikakäre? Biblia tä mike gare krörö: “Nitre sribikä Faraón kräke käkwe Jehová kukwei mikani täte ye jataninta jötrö ngwarbe nitre sribikä kwetre aune nibi kwetre ye ngwenanta gwä, akwa nitre käkwe kukwe Jehovakwe mikani ngwarbe jai ye käkwe sribikä kwetre aune nibi kwetre ye tuanimetre tirete” (Éx. 9:18-21). Kukwe tare jämi nemen bare ye känenkri Ngöbökwe nitre mikani mokre, ye köböire nitre käkwe ja mikani täte ye namaninte nire kukwe tare yebätä.

Kukwe tare keta jätäkäre jämi nemen bare ye känenkri Jehovakwe faraón aune nitre sribikä kwe ye mikaninta mokre. Akwa nitre ye käkwe ja dokwä mikani ribi aisete ñaka ja kriemikani kwetre (Éx. 4:22, 23). Ye köböite monsotre mubai kwetre ye jökrä murie neketani niaratre okwäbiti. ¡Ye kukwe tare krubäte! (Éx. 11:4-10; 12:29). ¿Kä biani ietre ne kwe kukwe tare ye ñaka rabadre bare bätätre? Jänri kä biani ietre. ¿Ñobätä kä biani ietre nieta nikwe? Ñobätä ñan aune Moisés käkwe nitre israelita ye mikani mokre kukwe tare yebätä aune niaratre rabadre kukwe ruäre nuainne mräkätre kwe ye kriemikakäre  niebare kwe ietre (Éx. 12:21-28). ¿Nitre nibe käkwe niara kukwe nuani? Nitre 3 millón käkwe kämikaninkä Egipto aune namaninte nire kukwe tare Ngöbökwe mikani nemen bare yebätä nieta. Akwa nitre israelita ye ñan aibe käkwe kämikaninkä yete, ñakare aune “nitre mada kwati nikani siba”, ye ngätäite nitre egipcio nämäne näin arato (Éx. 12:38; nota).

Kukwe nakaninkä kira bätä blitani gwä ye tä mike gare, käre Jehovata kä bien nitre ie ja töi kwitakäre kukwe tare jämi nemen bare bätätre ye känenkri (Deut. 32:4). ¿Ñobätä tä kä bien? Apóstol Pedro käkwe mikani gare, Jehová “ñan tö tärä ni ño kwa tuai nete, akwa niara tö ni jökrä tuai ja töi kwite” (2 Ped. 3:9, NGT). Ngöbö töita krubäte ni jökräbätä. Niara jämi kukwe ükete ye känenkri nitrekwe ja töi kwitadre aune kukwe biani ja jie ngwankäre kwe ietre ye mikadre täte kwetre ie tö namani (Is. 48:17, 18; Rom. 2:4).

Kä nengwane nitre jökrä rabadre olo ketete kwekebe kukwe tare rakaikä abokän mikata gare jötrö ngwarbe käbiti tibien ye ie. Jesús nämäne kä tibienbätä ngwane “ja tare nikadi kri” ye näire nitre töi käme ye gaite niebare kwe (Mat. 24:21). Ja tare nikadi kri ye käi jataira ja ken ngwane, nitre niara mikaka täte yebätä kukwe keta kabre rakaikä aune kukwe ketare ketare rabai bare okwäbiti ye mikani gare kwe ietre. Kukwe krikri jatai nakainkä käbiti tibien niebare Jesukwe ye erere niena nakainkä ni okwäbiti kä nengwane (Mat. 24:3-12; Luc. 21:10-13).

Jesukwe kukwe mikani gare, nebätä Jehová tä nitre jökrä nübaire niara mike täte aune sribire ja kräke. Nitre ja ngwen metre ye käkwe nünandre kwin aune kukwe kwin krubäte rabadre kwetre kä mrä käbämikata ja känenkäre yete ie Jehová tö (2 Ped. 3:13). “Kukwe kwin Gobran Ngöbökwe yebätä” ye Jehovata driemana ne kwe nitre käkwe tödekadre kukwe käbämikata ja känenkäre yei. Kukwe ye raba nitre mike kwäre. Kukwe ye abokän driedi “kä jökräbiti tibien kukwe mikakäre gare nitre juta jökrä te ie” niebare Jesukwe (Mat. 24:14, TNM). Ngöbökwe nitre niara mikaka täte ükaninte ne kwe kukwe driedre juta 240 jene jene te. Jehovakwe kukwe ükaite mrä ye känenkri nitre jökrä käkwe kukwe nieta kwe ni mikakäre mokre ye kukwe nuadre rabatekäre nire yei niara tö (Sof. 1:14, 15; 2:2, 3).

Jehovata nitre käme mike ja ngie nuin ye ngwane tä kä bien ietre ja töi kwitakäre ye ngwandretari jai ye ñan ai ütiäte. Ñobätä ñan aune käre niarata kä bien nitre ie ja töi kwitakäre. Akwa kukwe tare jämi nemen bare ye känenkri ja töi kwitai kwetre ya ye ngwandretari jai yebrä ütiäte. Ni abokän Ngöbö kukwei ngwanka, aisete nikwe ja di ngwandre jankunu nitre jökrä dimike ne kwe rabadrete nire kukwe tare krubäte rabai bare ja känenkäre yebätä.