1, 2. a) ¿Gobrantre köböra dre mike gare? b) ¿Kukwe meden meden ngwantarita abokän nikwe mikadre gare jai?

GOBRANTRE käkwe “kä titibe aune kukwe blo ñaka” ye mikadre gare kä jökräbiti ye bämike ja okwäte. Niaratre ye aibe köböire kä rabai jäme käbiti tibien yebätä ja rabai ruin ütiäte ietre aune niaratre törbai ni tuai ye erere nütüre arato. Akwa ngwarbe täi ja ngököta akwle ñobätä ñan aune kukwe rakaikä drekebe ngwarbe ye niaratre di ñan rabai ketabätäkäre. ¿Ñobätä? Ñobätä ñan aune “gaite drekebe ngwarbe, [...] aune kukwe yebätä niaratre ñaka raba ngitie jire” nieta Bibliakwe (1 Tes. 5:3, TNM).

² Ne aisete kukwe ruäre ütiäte ngwantarita ne nikwe mikadre gare jai. ¿‘Ja tare nika täi kri’ ye ngwane dre rabai bare? ¿Nikwe dre nuaindre ie Jehová tö? Aune kukwe ye jämi nemen bare känenkri, ¿ni raba ja mike ño juto ja tuakäre “ja tare nikadi kri” yebe? (Mat. 24:21).

3. Apocalipsis 17:5, 15-18 tä niere erere, ¿Ngöbökwe “Babilonia Kri” ye gaite ño?

³ (Ñäkädre Apocalipsis 17:5, 15-18 yebätä). “Babilonia Kri” ye gaite. Ninina ye erere, kukwe rabai bare ye gobrantre di ñan rabai ketabätäkäre. ¿Ñobätä? Ñobätä ñan aune “dre nuendre, ie Ngöbö tö namani, erere mikani kwe” niaratre brukwäte.  ¿Dre mikani kwe brukwäte? Ye abokän, nitre ja bianka kristiano aune iglesia ngwarbe ye jökrä gadrete meden mikani kwe brukwäte. Ngöbökwe kukwe ye mikai jondron “kri krübäte [...] bä tain” “krotu krä jätä” ye brukwäte. “Krotu krä jätä” ye tä gobrantre krikri kä jökräbiti tibien ye bämike aune “jändrän kri krübäte” ye abokän tä Naciones Unidas ye bämike (Apoc. 17:3, 11-13; 18:8). Gobrantre krikri ye rikwitai iglesia ngwarbe rüere ye ngwane ja tare nika kri ye kömikai. Kukwe ngüba ñaka jire erere rabai bare ye käkwe nitre ngwain nikenkä.

4. a) ¿Ñobätä gobrantre käkwe Babilonia ye gaite niedi kwetre? b) ¿Nitre nänkä iglesiate ye käkwe dre nuaindi?

⁴ Ñobätä gobrantre käkwe ja töi mikai Babilonia Kri gaite ñaka gare nie, akwa kukwe ne kwrere niedi kwetre raba ruin nie. Ñodre, nitre iglesiate ye käre tä ja mike política yete aune nitre ye köböite kä ñaka nemen jäme niedi kwetre o nitre yekwe ngwian tä ere krubäte aune tä jondron bökäne krubäte niei kwetre raba ruin nie (Apoc. 18:3, 7). Ne madakäre, ja mikai Babilonia Kri rüere akwa nitre kukwe ngwarbebätä ye ñaka murie ketai jökrä raba ruin nie. Ñakare aune iglesia ngwarbe tä ükaninte kä tibienbätä yebrä gaite gobrantre yekwe. Iglesia ye gaite ye bitikäre nitre nänkä kukwe ngwarbebätä ye ñan rabaira tö ngwen nitre ji ngwanka kwetre yei aisete kämikaikä kwetre iglesia yebätä raba ruin nie.

5. ¿Ja tare nikadi kri yebätä Jehovakwe dre käbämikani aune ñobätä?

⁵ Ka nuäi te gobrantre käkwe Babilonia Kri gaite ye Biblia ñaka mike gare akwa ye ñaka nuai raire (Apoc. 18:10, 21). Ja tare nikadi kri ye Jehovakwe “krötadi” ne kwe nitre “dianinkä” nänkäre kä kwinbiti ye rabadrete nire aune kukwe metre ye ñan gadrekä käbämikani kwe (Mar. 13:19, 20). Ja tare nika kri kömikai nememe rü Armagedón yete, ¿nikwe dre nuaindre ie Jehová tö?

6. ¿Nikwe dre nuaindre ie Jehová tö?

⁶ Kukwe ja tötikara käne yekänti rababa gare nie erere, nikwe ja diandrekä täte Babilonia Kri yebätä ie Jehová tö, akwa nikwe ye  ñan aibe nuaindre ñakare aune nikwe ja töi mikadre kwatibe Jehová mike täte. Yekäre ni raba kukwe ketebu nuainne ye ani mike gare jai.

7. a) ¿Kukwe ükaninte Ngöbökwe ye mikata täte nikwe ye nita bämike ño? b) Hebreos 10:24, 25 tä niere erere, ¿ñobätä ütiäte nikwe ñaka gätä juandre ja bäre?

⁷ Kena, kukwe ükaninte Ngöbökwe ja mika gure yebätä ye nikwe mikadre täte. Nitre käbiti tibien tä kukwe ükete aune kukwe kämekäme nuainne ye nikwe ñaka kadre ngäbiti jire chi. Ñodre, nitre brare brare tätre ja mäkete aune meritre tä ja mäkete meritre ben bätä nitre nemen kämekäme jabe ye ni ñaka kain ngäbiti jire aune tuin käme krubäte nie (Mat. 19:4, 5; Rom. 1:26, 27). Ketebukäre, nikwe Ngöbö mikadre täte jankunu ja mräkätre konkrekasionte yebe. Kä ño erere känti akwa nikwe ja ükadrekrö, ñodre, Ju Ja Ükarakrö yete, ju ja mräkäkwe yete o gore. Kukwe ñokwä rabadre bare akwa yebiti ta nikwe ñaka gätä juandre ja bäre Ngöbö mikakäre täte jankunu. Nikwe nuaindre ñobätä ñan aune “köbö nibira ja ken” yebätä (ñäkädre Hebreos 10:24, 25 yebätä).

8. ¿Dre ñaka nuaindi ja erebe jankunu ruin nie?

⁸ Kukwe tare krubäte rabaira nakainkä ye ngwane ni ñaka rabaira kukwe kwin ye mike gare. Kä nengwane nita kukwe kwin Gobran Ngöbökwe yebätä ye driere aune nita nitre mike ja tötikaka Jesukwe. Akwa kä ye näire nikwe kukwe mikai gare metre ta ietre, ye abokän Bibliabätä bämikata ñü järe ye kwrere (Apoc. 16:21). Satana aune nitre gobrainta kwe ye gate bikera ye nikwe niei ietre raba ruin nie. Nikwe dre mikai gare aune nuaindre ño ye ja känenkäre mikai gare metre ta nie. ¿Kukwe drieta kä nengwane ye erere kukwe ye mikai gare o nuaindi jene? Kä rükai ngwane ye mikai gare. Nikwe mikai gare ño ñan gare nie akwa ye sribi ütiäte krubäte nuaindi nikwe ñobätä ñan aune Jehovakwe nitre käme gaite ye ni ara käkwe mikai gare (Ezeq. 2:3-5).

9. ¿Nikwe kukwe mikai gare yebätä nitre töi rabai ño ni kräke aune dre tädre gare metre nie?

⁹ Nikwe kukwe mikai gare yebätä nitre käbiti tibien brukwä rabai nikrä aune tö rabai ni kukwe ötai batibe raba ruin nie. Kä nengwane nita tö ngwen Jehovai ye köböire nita kukwe driere ye erere arato kä ye ngwane nikwe tö ngwandre kwatibe ie. Ngöbö nikwe ye käkwe ja di biain nie sribi kwe mikakäre nemen bare yei nikwe tö ngwandre kwatibe (Miq. 3:8).

10. Lucas 21:25-28 tä niere erere, ¿nitre käkwe ja ngwandi ño kukwe tare krubäte ye näire?

¹⁰ (Ñäkädre Lucas 21:25-28 yebätä). Kukwe tare krubäte rabai nakainkä ye ngwane nitre rabai nikenkä ñobätä ñan aune nämänentre tö ngwen kukwe keta kabre ie ye jökrä rabai jondron ngwarbe ye erere. Kukwe “tare krubäte” abokän erere ñan nakainkä jire yebe rabaitre ja tuin yebätä rabaitre nikenkä ja jiebiti (Sof. 1:14, 15). Ñan rabai nuäre ja tuakäre kukwe tare yebe kä ye ngwane. Ni Jehová mikaka täte kräke bäri ñan rabai nuäre ja tuakäre kukwe yebe ñobätä ñan aune ni ñaka ja mritai nitre kä nebätä ben. Ni rabai jondron ribere jai raba ruin nie.

11. a) ¿Ñobätä nitre käbiti tibien okwä rabai ni ben jabätä? b) ¿Ja tare nikadi kri ye ñobätä nikwe ñaka jürä ngwandre jabätä?

¹¹ Kä ye arabe näire nitre nänkä kukwe ngwarbebätä kän iglesia juani ngwarbe ye brukwä rabai ni testiko Jehovakwe kräke ñobätä ñan aune ni täi Ngöbö mike täte jankunu yebätä. Ye käkwe kä mikai nokwre redes sociales yete, radiote aune televisionte. Nitre käbiti tibien, Satana ye brukwä rabai iko ni kräke ñobätä  ñan aune ni testiko Jehovakwe aibe rabaikä krö Ngöbö mike täte. Niaratre törbai kukwe mikata täte kä tibienbätä ye jökrä gaite, akwa ñan rabai bare ietre yebätä okwä rabai ni ben jabätä. Ye ngwane juta käbiti tibien ye käkwe ja ükaikrö juta Jehovakwe nuainkäre tare aune gatekäre täte. Juta käkwe ja ükaikrö ye meden kädekata Gog kite kä Magog yekri * (Ezeq. 38:2, 14-16). Dre dre rabai bare ye ñan gare jökrä nie, ye raba köbö gainkä nie aune ni törba mikai gare jai. Akwa kukwe nebrä gare metre nie, ja tare nikadi kri ye nikwe ñaka jürä ngwandre jabätä ñobätä ñan aune ye ngwane nikwe dre nuaindre ye Jehovakwe mikai gare nie (Sal. 34:19). Ni ñaka kä jürä ngwen jabätä erere ni rükai krö aune nikwe dokwä gaikä ñobätä ñan aune ni mikai kwäre ye rabaira no. *

12. “Ni klabore ie tö ngwan raba bätä töbätä”, ¿ye tä ni mike ño juto ja tuakäre kukwe tare yebe?

¹² Kirabe nükebe kä nengwane “ni klabore ie tö ngwan raba bätä töbätä” ye tä ni dimike ne kwe ni tädre juto ja tuakäre ja tare nikadi kri yebe (Mat. 24:45, TNM). Kukwe keta kabrebiti nuainbarera kwetre akwa ani töbike keteiti nebätä. Ye abokän gätä krikri nuainbare kä 2016 nükebe 2018 yebätä. Köbö Jehovakwe nibira ja ken krubäte yebätä nita dre dre ribere jai ja ngwankäre bäri dite ye mikaba gare nie gätä krikri yete. Kukwe meden meden mikaba gare nie ye ani ngwenta törö ruäre jai.

13. ¿Nikwe ja ngwandre metre Jehovai yekäre nikwe dre nuaindre aune ñobätä nikwe nuaindre nengwane?

¹³ Ja ngwandre metre. Gätä kri regional 2016 kädekaba “Nikwe ja ngwandre metre Jehovai”. Nita ja kete kwin krubäte Jehovabe ngwane nikwe ja ngwain metre ie ye mikaba gare nie yete. Arato nita orare ja brukwä tätebiti aune ja tötike mantre jetebe Bibliabätä ngwane yebiti nita nökrö bäri Jehová ken ye ngwanba törö nie. Ye käkwe ni dimikai ja tuakäre kukwe jökrä ben. Satana aune nitre gobrainta kwe ye gate köböra aisete nita tödeke Gobran Ngöbökwe ie aune nita ja ngwen metre ie ye nuaite bärira jire nengwane. Ni mikai yakrä jai aune ni kötaidi jankunu raba ruin nie (2 Ped. 3:3, 4). Ni ñan ja mike nitre kä nebätä aune gobrantre kä nebätä yekri yebätä ja mikai ni rüere. Nikwe ja töi mikadre kwatibe ja ngwen metre kä nengwane ne kwe kukwe tare ben ja tuadi mrä ye ngwane kä rükadre nie.

14. a) ¿Ja mräkätre tä juta Jehovakwe ji ngwen kä tibienbätä yebätä dre rabai bare? b) ¿Nikwe ja ngwandre metre ye ñobätä rabai ütiäte?

¹⁴ Ja mräkätre tä juta Jehovakwe jie ngwen kä tibienbätä nengwane, ye ja tare nikadi kri näire ñaka rabaira ji ngwen. ¿Ñobätä? Ñobätä ñan aune ja mräkätre dianinkä nänkäre kä kwinbiti täi kä tibienbätä ye näin siba kä kwinbiti rükäre Armagedón yete (Mat. 24:31; Apoc. 2:26, 27). Ne tä mike gare Nitre Braibe Konkrekasion Jökrä Ngübabitikä ye ñaka rabaira nibe kä tibienbätä. Akwa yebiti ta ni kwati krubäte Jehová mikaka täte ye täi keteitibe. Ja mräkätre oveja mada mada ngätäite ye käkwe juta Jehovakwe ye jie ngwandi. Nikwe ja mräkätre ye dimikadre aune kukwei mikadre täte, yebiti nikwe bämikai nita ja ngwen metre Ngöböi, ye aibe köböire ni rabaite nire.

15. ¿Ni raba dre nuainne kä ngwankäre nüke bäri jai aune nikwe nuaindre nengwane ye ñobätä ütiäte?

 ¹⁵ Kä ngwandre nüke jai. Gätä kri regional 2017 ye kädekaba “¡Mä ñaka ja di ngwan nekä!”. Ye käkwe ni dimikaba kä ngwankäre nüke jai ja tuakäre kukwe tare tä nemen bäre nibätä yebe. Kukwe ñokwä yebiti ta ni raba kä ngwen nüke jai aune nikwe tö ngwandre Jehovai yebiti ni rabai bäri dite ye rababa gare nie (Rom. 12:12). “Nire nire käkwe nünandrekä dite jabtä, käkwe ñan ti rükandrete nebebe kä mrä” ye aibe rabaite nire niebare Jesukwe ye nikwe ñaka käikwitadrekä jabiti (Mat. 24:13). Kukwe käbämikani ne tä mike gare, nikwe ja ngwandre metre kukwe jökräbiti ta. Nita kä ngwen nüke jai nengwane ye tä ni dimike bäri ja tuakäre ja tare nikadi kri yebe.

16. ¿Nire köböire nita ja ngwen dite aune ni raba dre nuainne ja ngwankäre bäri dite?

¹⁶ Ja ngwandre dite. Gätä kri regional 2018 kädekaba “¡Mäkwe ja ngwan dite!”. Dre nuain gare nie ye ñan aibätä nita ja ngwen dite, ñakare aune tö ngwandre Jehovai ye tä ni mike dite ye ngwanba törö nie aune ye erere arato nie raba kä ngwandre nüke jai yebätä. Aisete ¿ni raba dre nuainne tö ngwankäre bäri Ngöböi? Ñäkädre mantre jetebe Bibliabätä aune Ngöbökwe nitre kira niara mikaka täte ye mikani ño kwäre yebätä kä diandrekä jai töbikatarikäre ye käkwe ni dimikai tö ngwen bäri ie (Sal. 68:20; 2 Ped. 2:9). Ja tare nikadi kri yete nitre käbiti tibien käkwe ja mikai ni rüere ye ngwane nikwe ja ngwandre dite aune tö ngwandre kwatibe Jehovai (Sal. 112:7, 8; Heb. 13:6). Kä nengwane nita tö ngwen kwatibe Ngöböi ngwane, Gog ja mikai ni rüere ngwane nikwe ja ngwain dite arato. *

17. ¿Ñobätä rü Armagedón ye nikwe ñaka jürä ngwandre jabätä? (Üai kena täräkwatabätä mikadre ñärärä).

¹⁷ Kukwe ja tötikara käne käkwe mikaba gare ye erere, ni jökrä tä nüne “kä mrä” o kä krüte ye näire. Akwa ni rabaite kwäre ja tare nikadi kri yete yei nita tö ngwen. Rü Armagedón ye  käkwe kukwe jökrä käme ni näire ye mikai krüte, akwa nikwe ñaka rü ye jürä ngwandre jabätä ñobätä ñan aune yete Ngöbö nikwe käkwe rüdi (Prov. 1:33; Ezeq. 38:18-20; Zac. 14:3). Ñongwane rü ye kömikadre niei Jehovakwe ngwane, Jesukristo ara käkwe ja mikai käne rüe ye gatekäre. Niarabe nitre dianinkä nänkäre kä kwinbiti täi siba aune angeletre kwati krubäte ñan täindre täi siba ben. Gwairebe rüdi kwetre Satana, chokalitre aune nitre rükä kä tibienbätä ye rüere (Dan. 12:1; Apoc. 6:2; 17:14).

18. a) ¿Dre käbämikata Jehovakwe nie? b) ¿Apocalipsis 7:9, 13-17 ye tä ni dimike ño tö ngwen bäri kukwe ja känenkäre ie?

¹⁸ Kukwe ne rabai bare metre käbämikata Jehovakwe nie: “Jondron keta kabre rükäre yebiti ja mikai mä rüere, akwa kukwe tare ñaka nuaindi mäbätä” (Is. 54:17). Ni “kwati kwati krübäte” Ngöbö mikaka täte ye rabaite nire “ja tare nikadi kri” ye täbiti aune sribidi jankunu kwetre Ngöbö kräke (ñäkädre Apocalipsis 7:9, 13-17 yebätä). Kukwe keta kabre Biblia tä mike gare nie ne kwe nikwe tö ngwandre kukwe ja känenkäre ie ¿ñan ererea? “Ni ja ngwanka metre ye Jehovata kriemike” ye gare nie (Sal. 31:23). Jehovakwe ja kä ye mikaita deme ngwane, ni jökrä tä niara tarere aune mike täte yebätä kä rabai juto (Ezeq. 38:23).

19. ¿Kukwe meden käbämikata nie abokän köböra nemen bare?

¹⁹ Satana ñan rabaira nitre gobraine aune nitre rabaira nüne kä bä nuäre yete ngwane 2 Timoteo 3:2-5 käkwe dre niedre yebätä töbike (recuadro “¿Nitre rabai ja ngwen ño kä ja känenkäre te?” mikadre ñärärä). Ja mräkä George Gangas, * ye sribibare Nitre Braibe Konkrekasion Jökrä Ngübabitikä yebe käkwe kukwe ye niebare krörö: “¡Ni jökrä rabai ja mräkäre kä ye näire ye ngwane nüna rabai kwin krubäte! Kä nebera braibe ne kwe niaratre nünandre kä bä nuäre yete. Nüna kärekäre ye rabai kwetre. Nikwe nünain kärekäre”. ¿Kukwe käbämikata nie ye kwin krubäte ñan ererea?